Skip to content

Skip to table of contents

Tau Fakamoli a Iehova

Fifili e vagahau Faka-Niue

 APENETIKI

Mailoga a ‘Papelonia Lahi’

Mailoga a ‘Papelonia Lahi’

KO E tohi a Fakakiteaga ne ha ha i ai e tau talahauaga ne nakai lata ke maama he puhala fakatino. (Fakakiteaga 1:1) Ke fakatai, kua totoku e fifine ne tohi ai he haana matalē e higoa ‘Papelonia Lahi.’ Ko e fifine nei kua talahau ke nofo i luga he “tau moto tagata, mo e tau atu motu.” (Fakakiteaga 17:1, 5, 15) Ha kua nakai fai fifine mooli ka taute e mena nei, ko Papelonia Lahi ko e mena fakatai. Ti ko e heigoa ne fakatino he fifine fakataka nei?

He Fakakiteaga 17:18, ko e fifine fakatai agaia nei kua fakamaama “ko e māga lahi haia, ha i ai e pule ke he tau patuiki he lalolagi.” Ko e kupu “māga” kua fakatino e matakau fakatokatoka  he tau tagata. Ha kua pule e “māga lahi” nei ke he “tau patuiki he lalolagi,” ko e fifine ne fakahigoa ko Papelonia Lahi kua liga ni ko e fakatokatokaaga fakaohooho lahi ke he lalolagi katoa. Kua latatonu ke ui aki e kautu he lalolagi. Ko e heigoa e kautu nei? Ko e kautu fakalotu. Mailoga e puhala he falu kupu pehēnei i loto he tohi ha Fakakiteaga ne takitaki atu a tautolu ke he fakahikuaga nei.

Kua maeke e kautu ke fakapolitika, fakatupe, po ke fakalotu. Ko e fifine ne fakahigoa ko Papelonia Lahi ne nakai ko e kautu fakapolitika ha kua talahau he Kupu he Atua ko e “tau patuiki he lalolagi,” po ke tau mena fakapolitika he lalolagi nei, “kua feuaki” mo ia. Kua mahani feuaki a ia he kau auloa mo e tau pule he lalolagi mo e taute ha mena kua lata mo ia ke moua e pule mo e ke omoomoi e tau pule he lalolagi. Ko e kakano anei ne ui a ia ko e “fifine fakataka lahi.”Fakakiteaga 17:1, 2; Iakopo 4:4.

Ko Papelonia Lahi kua nakai ko e kautu fakatupe ha ko e “tau tagata fakafua koloa he lalolagi,” ne fakatino e tau mena fakatupe, to tagi fakatutuku ki a ia ka hoko mai e moumouaga haana. Ko e mooli, ko e tau patuiki mo e tau tagata fakafua koloa kua fakakite ke “tutu mamao” mai ia Papelonia Lahi. (Fakakiteaga 18:3, 9, 10, 15-17) Ko e mena ia, kua lata ai ke fakahiku ko Papelonia Lahi, nakai ko e kautu fakapolitika po ke kautu fakatupe, ka ko e kautu fakalotu.

Ko e fakamailoga fakalotu ha Papelonia Lahi kua fakamooli foki he talahauaga kua fakahehē e ia e tau motu oti kakano he “tau lagatau taulaatua” haana. (Fakakiteaga 18:23) Ha ko e tau vahega oti he matutakiaga fakataulātua kua puna mai fakalotu mo e fakatemoni, kua nakai ofo ai he ui he Tohi Tapu a Papelonia Lahi ko e “mena ke nonofo ai e tau temoni.” (Fakakiteaga 18:2; Teutaronome 18:10-12) Ko e kautu nei kua fakamaama foki ke totoko fakamalolō ke he lotu mooli, he favale ke he “tau perofeta mo e tau tagata tapu.” (Fakakiteaga 18:24) Ko e mooli, kua hokulo e vihiatia ha Papelonia Lahi ke he lotu mooli ati favale lahi mo e kelipopo foki e ia e “tau talahau kia Iesu.” (Fakakiteaga 17:6) Ti, ko e fifine nei ne fakahigoa ko Papelonia Lahi kua fakatino mooli e kautu he tau lotu fakavai he lalolagi, ne putoia ai e tau lotu oti ne totoko ki a Iehova ko e Atua.