Skip to content

Skip to table of contents

Tau Fakamoli a Iehova

Fifili e vagahau Faka-Niue

 VEVEHEAGA HOGOFULU MA VALU

Ko e Papatisoaga mo e Fakafetuiaga Haau mo e Atua

Ko e Papatisoaga mo e Fakafetuiaga Haau mo e Atua
  • Taute fēfē e papatisoaga faka-Kerisiano?

  • Ko e heigoa e tau lakaaga ka taute e koe ke lata ke papatiso?

  • Taute fēfē he tagata e tukuleleaga ke he Atua?

  • Ko e heigoa e kakano uho ke papatiso?

1. Ko e ha ne ole e eunuka Aitiope ke papatiso?

“KITIALA, ko e vai; ke lekua he ha ke nakai papatiso ai au?” Kua hūhū pihia e eunuka Aitiope he senetenari fakamua. Ne fakamooli he Kerisiano ko Filipo ki a ia ko Iesu e Mesia ne mavehe. Aamotia e loto ke he mena ne logona he tau Tohiaga Tapu, ne fakagahuahua he tagata Aitiope e tau mena ne  ako e ia. Nukua fakakite e ia e manako haana ke papatiso!Gahua 8:26-36.

2. Ko e ha kua lata ia koe ke manamanatu fakalahi hagaao ke he papatisoaga?

2 Kaeke kua fakaako fakamatafeiga e koe e tau veveheaga fakamua he tohi nei mo e taha he Tau Fakamoli a Iehova, to liga amanaki a koe ke hūhū, “Ke lekua he ha ke nakai papatiso ai au?” He mogonei kua fitā he fakaako e koe e maveheaga he Tohi Tapu ke he moui tukulagi he Parataiso. (Luka 23:43, NW; Fakakiteaga 21:3, 4) Kua ako foki e koe e tuaga mooli he tau tagata mamate mo e amaamanakiaga he liu tu mai. (Fakamatalaaga 9:5; Ioane 5:28, 29) Kua liga fitā e fakalataha a koe mo e Tau Fakamoli a Iehova ke he ha lautolu a tau feleveiaaga he fakapotopotoaga mo e mailoga e koe e puhala ne fakagahua e lautolu e lotu mooli. (Ioane 13:35) Mua atu e aoga, liga kamata a koe ke feaki e fakafetuiaga fakatagata mo Iehova ko e Atua.

3. (a) Ko e heigoa e poaki ne foaki e Iesu ke he tau tutaki haana? (e) Taute fēfē e papatisoaga ke he vai?

3 Maeke fēfē a koe ke fakakite e manako haau ke fekafekau ke he Atua? Ne tala age a Iesu ke he tau tutaki haana: “Kia o atu a a mutolu ke eke e tau motu oti kana mo tutaki, ti papatiso atu a lautolu.” (Mataio 28:19) Kua fakatoka ni e Iesu e fifitakiaga ke papatiso ke he vai. Kua nakai fuifui aki e vala vai a ia, mo e nakai liligi e vala vai ki luga he ulu haana. (Mataio 3:16) Ko e kupu “papatiso” kua mai he kupu Heleni ne kakano “tanumia ke he vai.” Ti ko e papatisoaga faka-Kerisiano kua kakano ke tanumia katoa, po ke fakatomo, ki loto he vai.

4. Ko e heigoa ne fakakite he papatiso ke he vai?

4 Ko e papatisoaga ke he vai ko e poakiaga ma e tau tagata oti ne manako ke moua e fakafetuiaga mo Iehova ko e Atua. Kua fakakite he papatisoaga ki mua he toloaga tagata e manako haau ke fekafekau ke he Atua. Kua fakakite e fiafia lahi haau ke taute e finagalo ha Iehova. (Salamo 40:7, 8) Ka e, ke maeke ke papatiso, kua lata ia koe ke taute e tau lakaaga kua latatonu.

 LATATONU KE MOUA E ILOILO MO E TUA

5. (a) Ko e heigoa e lakaaga fakamua ke lata ke papatiso? (e) Ko e ha ne aoga ai e tau feleveiaaga Kerisiano?

5 Kua fitā a koe he kamata ke taute e lakaaga fakamua. Puhala fe? He fakatolomaki e iloilo ki a Iehova ko e Atua mo Iesu Keriso, liga puhala he fakaako fakapapahi e Tohi Tapu. (Totou Ioane 17:3.) Ka kua loga atu e tau mena ke ako. Kua manako e tau Kerisiano ke ‘puke he maama mitaki ke he finagalo he Atua.’ (Kolose 1:9) He fina atu ke he tau feleveiaaga he fakapotopotoaga he Tau Fakamoli a Iehova ka lagomatai lahi ke he mena nei. Kua aoga ke fina atu ke he tau feleveiaaga pehenei. (Heperu 10:24, 25) He fina atu tumau ke he feleveiaaga ka lagomatai a koe ke fakatolomaki e iloilo haau ke he Atua.

Ke moua e iloilo tonu ke he Kupu he Atua ko e lakaaga aoga ke maeke ke lata ma e papatisoaga

6. Lata ke lahi fēfē e iloilo haau ke he Tohi Tapu ke lata ke papatiso?

6 Mooli, kua nakai lata ia koe ke iloa e tau mena oti i loto he Tohi Tapu ke lata ke papatiso. Na fai mena ne iloa he eunuka Aitiope, ka e manako lagomatai a ia ke maama e falu vala he tau Tohiaga Tapu. (Gahua 8:30, 31) Pihia foki, kua lahi agaia e mena ne lata ke ako e koe. Ko e mooli, to nakai fakaoti e fakaako haau hagaao ke he Atua. (Fakamatalaaga 3:11) Ka e, fakamua to papatiso a koe, kua lata ia koe ke iloa mo e talia e tau fakaakoaga aoga he Tohi Tapu. (Heperu 5:12) Putoia ke he tau fakaakoaga pihia, ko e kupu mooli ke he tuaga he tau tagata mamate mo e aoga he higoa he Atua mo e Kautu haana.

7. Ko e heigoa e lauiaaga kua lata ke ha ha ia koe he fakaako e Tohi Tapu?

7 Ka kua nakai kuenaia ke moua e iloilo, kakano ka “nakai tua, ti nakai maeke ke fakafiafia kia ia [Atua].” (Heperu 11:6) Ne talamai e Tohi Tapu ki a tautolu he magaaho ne logona he falu tagata he maaga tuai i Korinito e fekau faka-Kerisiano, “kua tua a lautolu, mo e papatiso.” (Gahua 18:8) Ke he puhala tatai, kua lata he fakaakoaga ke he Tohi Tapu ke foaki ki a koe e tua ke he Tohi Tapu ko e Kupu omoi he agaaga he Atua. Lata he fakaakoaga ke he Tohi Tapu ke lagomatai  a koe ke tua ke he tau maveheaga he Atua mo e ke he malolō fakamoui he poa ha Iesu.Iosua 23:14; Gahua 4:12; 2 Timoteo 3:16, 17.

FOLAFOLA E KUPU MOOLI HE TOHI TAPU KE HE FALU

8. Ko e heigoa ka omoi a koe ke talahau ke he falu e tau mena ne ako e koe?

8 He tupu e tua ke he loto haau, to uka ia koe ke toka e tau mena ne ako e koe ki a koe ni. (Ieremia 20:9) To fakaohooho fakalahi a koe ke talahau ke he falu hagaao ke he Atua mo e tau finagalo haana.Totou 2 Korinito 4:13.

Kua lata he tua ke omoi a koe ke talahau e tau mena ne talitonu e koe ke he falu

9, 10. (a) Ko hai ka liga kamata a koe ke talahau ki ai e kupu mooli he Tohi Tapu? (e) Ko e heigoa kua lata ia koe ke taute kaeke manako a koe ke fakalataha ke he gahua fakamatala ne fakatokatoka he Tau Fakamoli a Iehova?

9 Liga to kamata a koe ke talahau e kupu mooli he Tohi Tapu ke he falu he vagahau fakailoilo ke he tau magafaoa, tau kapitiga, tau tuutakaina, mo e tau kapitiga gahua haau hagaao ki ai. Fai magaaho, to manako a koe ke fakalataha ke he gahua fakamatala ne fakatokatoka he Tau Fakamoli a Iehova. He magaaho ia, kia mautali ke fakatutala e tau mena nei mo e Fakamoli ne fakaako mo koe e Tohi Tapu. Kaeke kua lata a koe ke fakalataha ke he gahua fakamatala, to taute e tau fakaholoaga ma haau mo e faiaoga haau ke feleveia mo e ua e motua he fakapotopotoaga.

10 To taute he mena nei a koe ke iloa mitaki e falu a motua Kerisiano, ne leveki e fuifui he Atua. (Gahua 20:28; 1 Peteru 5:2, 3) Kaeke mailoga he tau motua nei, kua maama mo e talitonu a koe ke he tau fakaakoaga aoga he Tohi Tapu, kua moui fakatatau atu ke he tau matapatu fakaakoaga he Atua, mo e manako mooli ke eke mo taha he Tau Fakamoli a Iehova, to tala atu e lautolu kua lata ia koe ke fakalataha ke he fekafekauaga ko e tagata fakailoa he tala mitaki ne nakaila papatiso.

11. Ko e heigoa e tau hikihiki ka liga taute fakamua he falu ato maeke ke lata ma e fekafekauaga?

11 Ke he taha faahi, kua liga lata ia koe ke taute e tau  hikihiki ke he haau a puhala moui mo e tau aga mau ke lata ma e fekafekauaga. Liga putoia ke he mena nei e lata ke fakaoti e falu a matagahua ne taute fufū. Ko e mena ia, fakamua to ole a koe ke eke mo tagata fakailoa nakaila papatiso, kua lata ia koe ke atāina mai he tau hala lalahi, tuga e kelea he mahani fakataane mo e fifine, konahia, mo e fakaaoga hehē he tulaki.Totou 1 Korinito 6:9, 10; Kalatia 5:19-21.

TOKIHALA MO E LILIUINA

12. Ko e ha kua lata ke fakatokihala?

12 Kua fai lakaaga foki ne kua lata ke taute fakamua to lata a koe ke papatiso. Ne talahau he aposetolo ko Peteru: “Kia tokihala . . . mo e mafokifoki a mutolu, kia holoholo kehe ai ha mutolu a tau hala.” (Gahua 3:19) Ke tokihala ko e fakamolemole mooli ke he taha mena ne taute e koe. Kua lata mooli ke fakatokihala kaeke putoia e tagata ke he moui faivao, ka kua lata foki kaeke kua meā e puhala moui he tagata. Ko e ha? Ha kua nakai mitaki katoatoa e tau tagata oti kana ti kua lata ke moua e fakamagaloaga he Atua. (Roma 3:23; 5:12) Fakamua to fakaako e Tohi Tapu, ne nakai iloa e koe e finagalo he Atua. Ti maeke fēfē ia koe ke moui fakatatau katoatoa ke he finagalo haana? Ko e mena haia, kua lata ke fakatokihala.

13. Ko e heigoa e liliuina?

13 Ko e fakatokihala kua latatonu ke mui ki ai e liliuina, po ke ‘fakamafokifoki.’ Kua latatonu ia koe ke lahi e mena ka taute mai he fakatokihala. Lata ia koe ke fakaheu e puhala tuai haau he moui mo e eketaha ke taute e tau mena hako kamata he mogonei. Ko e fakatokihala mo e liliuina, ko e tau lakaaga kua lata ke taute e koe fakamua to papatiso.

TAUTE E TUKULELEAGA FAKATAGATA

14. Ko e heigoa e lakaaga aoga ne kua lata ia koe ke taute fakamua to papatiso?

14 Kua fai lakaaga aoga foki ke taute to papatiso. Kua lata ia koe ke tukulele e koe a koe ki a Iehova ko e Atua.

Kua taute nakai e koe e tukuleleaga fakatagata ke he Atua he liogi?

15, 16. Ko e heigoa e kakano ke tukulele e koe a koe ke he Atua, mo e ko e heigoa ne omoi e tagata ke taute e mena nei?

 15 He magaaho ka tukulele e koe a koe ki a Iehova ko e Atua he liogi fakamakai, kua mavehe a koe ke foaki tukulagi e fakamooli katoatoa haau ki a ia. (Teutaronome 6:15, NW) Ka e, ko e ha ne manako ai ha tagata ke taute e mena ia? Ke tuga anei, liga kamata e tagata taane ke fakatū kapitiga ke he fifine. Ka lahi e mena ne iloa e ia hagaao ke he fifine mo e mailoga e mitaki he tau mahani haana, to futiaki lahi atu a ia ke he fifine. Fai magaaho, ko e mahani mau ke ole age e tagata taane ke mau mo ia. Mooli, kua ha ha i ai e tau matagahua lafi ki luga ka mau. Ka ko e fakaalofa ka omoi e tagata taane ke taute e lakaaga aoga ia.

16 He magaaho ka iloa mo e fakaalofa a koe ki a Iehova, to omoi a koe ke fekafekau ki a ia mo e nakai tehatehaua po ke fakakaupā e tapuaki ki a ia. Ko e ha tagata ne manako ke muitua ke he Tama he Atua, ko Iesu Keriso, kua lata ke “oma e ia a ia.” (Mareko 8:34) Kua oma e tautolu a tautolu he tauteute fakamooli ke nakai fakatauhele he tau manako mo e tau foliaga fakatagata e omaoma katoatoa ha tautolu ke he Atua. Ti fakamua to papatiso a koe, kua lata e finagalo ha Iehova ko e Atua ke eke mo matapatu kakano he moui haau.Totou 1 Peteru 4:2.

KAUTŪ MAI HE MATAKUTAKU NEKE KAUMAHALA

17. Ko e ha ne liga fakauaua e falu mai he taute e tukuleleaga ke he Atua?

17 Kua fakauaua e falu tagata ke taute e tukuleleaga ki a Iehova ha kua matakutaku a lautolu he taute e lakaaga aoga lahi ia. Liga kua matakutaku neke fai fakalagoaga a lautolu ke he Atua ko e Kerisiano tukulele. Kua matakutaku a lautolu neke kaumahala ti fakaita a Iehova, ne manatu a lautolu kua lata ni ke nakai taute e tukuleleaga ki a ia.

18. Ko e heigoa ka omoomoi a koe ke taute e tukuleleaga ki a Iehova?

18 He ako a koe ke fakaalofa ki a Iehova, to omoi a koe ke taute e tukuleleaga ki a ia mo e taute e tau mena ne fahia a koe ke moui fakatatau ki ai. (Fakamatalaaga 5:4) He mole  he taute e tukuleleaga, mooli to manako a koe ke ‘mahani ke lata mo Iehova, kia fiafia mai a ia ke he tau mena oti.’ (Kolose 1:10) Ha ko e fakaalofa haau ma e Atua, to nakai manatu a koe kua uka lahi ke taute e finagalo haana. Mooli ni to talia a koe mo e aposetolo ko Ioane, ne tohia: “Ko e fakaalofa ke he Atua hanai, kia omaoma a tautolu ke he tau poaki hana; nakai mamafa foki hana tau poaki.”1 Ioane 5:3.

19. Ko e ha kua nakai lata ia koe ke matakutaku he taute e tukuleleaga ke he Atua?

19 Kua nakai lata ia koe ke mitaki katoatoa ke taute e tukuleleaga ke he Atua. Iloa e Iehova e tau kūkū haau mo e nakai amanaki ke mua atu e mena ka taute e koe ke he mena kua  fahia a koe ki ai. (Salamo 103:14) Kua manako a ia ke kautū a koe mo e to lalago mo e lagomatai a koe. (Totou Isaia 41:10.) Maeke ia koe ke iloa mooli kaeke falanaki a koe ki a Iehova mo e haau a loto katoa, “ti fakahakohako ai e ia hāu a tau puhala.”Tau Fakatai 3:5, 6.

FAKAMAILOGA E TUKULELEAGA HAAU HE PAPATISO

20. Ko e ha e tukuleleaga ki a Iehova ne nakai lata mo mena fufū?

20 He manamanatu hagaao ke he tau mena ne fakatutala a tautolu ki ai ka lagomatai a koe ke taute e tukuleleaga  fakatagata ki a Iehova he liogi. Ko e tau tagata oti ne ofania mooli e Atua kua lata foki ke ‘talahau ki mua he toloaga tagata ma e fakamouiaga.’ (Roma 10:10) Kua taute fēfē e koe e mena ia?

Fakatai he papatisoaga e mate ke he moui fakamua ha tautolu mo e liu moui ke taute e finagalo he Atua

21, 22. Maeke fēfē ia koe ke ‘talahau ki mua he toloaga tagata’ e tua haau?

21 Talahau ke he leveki he kau he tau motua he fakapotopotoaga haau kua manako a koe ke papatiso. To taute e ia e fakaholoaga mo e falu motua ke liu fakamanatu mo koe e falu hūhū ne lata mo e tau fakaakoaga aoga he Tohi Tapu. Kaeke talia he tau motua nei kua lata a koe ke papatiso, to tala atu e lautolu ke papatiso a koe he magaaho i mua. * Ko e lauga ne fakatutala ke he kakano he papatisoaga kua fa mahani ke foaki he tau magaaho ia. Ti uiina he tagata lauga e tau tagata ka papatiso ke tali ua e hūhū mukamuka ko e taha puhala ke ‘talahau e tua ha lautolu ki mua he toloaga tagata.’

22 Ko e papatisoaga hokoia ne fakakite ke he toloaga tagata kua taute e koe e tukuleleaga ke he Atua ti he mogonei ko e taha he Tau Fakamoli a Iehova. Ko lautolu ka papatiso kua tanumia katoatoa ke he vai ke fakakite ke he toloaga tagata kua taute e lautolu e tukuleleaga ki a Iehova.

KO E KAKANO HE PAPATISOAGA HAAU

23. Ko e heigoa e kakano ke papatiso “ke he higoa he Matua, mo e Tama, mo e [a]gaga [t]apu”?

23 Ne talahau e Iesu to papatiso e tau tutaki haana “ke he higoa he Matua, mo e Tama, mo e [a]gaga [t]apu.” (Mataio 28:19) Kakano he mena nei kua mailoga he tagata ka papatiso e pule ha Iehova ko e Atua mo e ha Iesu Keriso. (Salamo 83:18; Mataio 28:18) Kua mailoga foki e ia e tau puhala mo e gahuaaga he agaaga tapu, po ke malolō gahuahua, he Atua.Kalatia 5:22, 23; 2 Peteru 1:21.

24, 25. (a) Ko e heigoa ne fakamailoga he papatisoaga? (e) Ko e heigoa e tau hūhū ne kua lata ke tali?

 24 Ka e nakai ko e koukou noa e papatisoaga. Ko e fakamailoga he taha mena aoga lahi. He hifo ki loto he vai kua fakamailoga e mate ke he puhala moui fakamua haau. He mafuta hake he vai kua fakakite kua moui a koe mogonei ke taute e finagalo he Atua. Kia manatu foki, kua taute e koe e tukuleleaga ki a Iehova ko e Atua, nakai ke he gahua, ke he tupuaga, falu tagata, po ke fakatokatokaaga. Ko e tukuleleaga mo e papatisoaga haau ko e kamataaga he kapitiga tata lahi mo e Atua—ko e fakafetuiaga tata lahi mo ia.Salamo 25:14.

25 Kua nakai fakamooli he papatisoaga e fakamouiaga. Ne tohia he aposetolo ko Paulo: “Kia gahua ni a mutolu mo e matakutaku mo e vivivivi, kia momoui ai a mutolu.” (Filipi 2:12) Ko e papatisoaga ko e kamataaga ni a ia. Ko e hūhū anei, Maeke fēfē ia koe ke tumau ke he fakaalofa he Atua? To tali mai he veveheaga fakahiku ha tautolu.

^ para. 21 Ko e tau papatisoaga ko e vala mahani mau he tau toloaga mo e tau fonoaga ne taute lagataha he tau he Tau Fakamoli a Iehova.