Skip to content

Skip to table of contents

Tau Fakamoli a Iehova

Fifili e vagahau Faka-Niue

 VEVEHEAGA HIVA

Kua Nonofo Kia a Tautolu he “Tau Aho Fakamui”?

Kua Nonofo Kia a Tautolu he “Tau Aho Fakamui”?
  • Ko e heigoa e tau mena tutupu he vahā ha tautolu ne talahau tuai he Tohi Tapu?

  • Ko e heigoa ne talahau he Kupu he Atua ke he mahani he tau tagata he “tau aho fakamui”?

  • Hagaao ke he “tau aho fakamui,” ko e heigoa e tau mena mitaki ne talahau tuai he Tohi Tapu?

1. I fe ka fakaako e tautolu hagaao ke he vahā anoiha?

KUA kitekite nakai e koe e nusi he televisoni mo e manatu, ‘Ko e heigoa kua tupu ke he lalolagi nei’? Kua tutupu fakalutukia e tau matematekelea ati nakai maeke he taha tagata ke talahau tuai e mena ka tupu a pogipogi. (Iakopo 4:14) Pete he pihia, kua iloa e Iehova e mena ka tupu anoiha. (Isaia 46:10) Kua leva tigahau e talahau he Kupu haana, ko e Tohi Tapu, nakai ni ko e tau mena kelea ka tutupu he vahā ha tautolu ka e to tutupu foki e tau mena homo ue atu he vahā anoiha hane tata mai.

2, 3. Ko e heigoa e hūhū ne hūhū he tau tutaki ha Iesu, mo e fēfē e tali haana?

2 Ne vagahau a Iesu Keriso hagaao ke he Kautu he Atua, ka tamai e fakaotiaga ke he mahani kelea mo e taute e lalolagi mo parataiso. (Luka 4:43) Kua manako e tau tagata ke iloa to hoko mai a fe e Kautu. Kua mooli, ne hūhū e tau tutaki ha Iesu ki a ia: “Po ke heigoa foki e fakamailoga he hāu a [“ha ha hinei,” NW], mo e fakaotiaga he lalolagi?” (Mataio 24:3) Ne tali age a Iesu, ko Iehova ko e Atua ni hokoia, ne iloa mooli e magaaho ka hoko mai e fakaotiaga he fakatokaaga nei. (Mataio 24:36) Ka kua talahau tuai e Iesu e tau mena ka tutupu he  lalolagi ka nakai leva to tamai he Kautu e mafola mooli mo e haohao mitaki ke he tau tagata. Ko e mena ne talahau tuai e ia kua fakamooli he mogonei!

3 Fakamua to kumikumi a tautolu ke he tau fakamooliaga kua nonofo a tautolu he “fakaotiaga he lalolagi,” kia tutala fakakū a tautolu ke he felakutaki ne nakaila kitia ia he ha tagata. Ne tupu ai he lagi, ti kua lauia ai a tautolu he mena ia ne tupu.

KO E TAU I LUGA HE LAGI

4, 5. (a) Ko e heigoa ne tupu he lagi he nakai leva e mole e eke a Iesu mo Patuiki? (e) Hagaao ke he Fakakiteaga 12:12, ko e heigoa ka fua mai he tau i luga he lagi?

4 Ne fakamaama he veveheaga kua mole he tohi nei, ne eke a Iesu Keriso mo Patuiki he lagi he tau 1914. (Totou Tanielu 7:13, 14.) Nakai leva he moua e ia e pule he Kautu, ne fakagahuahua e Iesu e malolō haana. “Kua tau foki a lautolu he lagi,” he talahau he Tohi Tapu. “Ko Mekaeli [taha higoa ma Iesu] mo e hana tau agelu kua tau ke he tarako [Satani ko e Tiapolo], ko e tarako foki kua tau a ia mo e hana tau agelu.” * Ne kaumahala a Satani mo e tau agelu kelea haana, ko e tau temoni, ke he tau ia ti tolo hifo a lautolu he lagi ke he lalolagi. Ko e tau tama fakaagaaga tua fakamooli he Atua kua olioli ha kua nakai ha ha ai a Satani mo e haana tau temoni. Ko e tau tagata, to nakai moua e fiafia ia. Ha kua talahau tuai he Tohi Tapu: “Oi fakaalofa kia mutolu kua nonofo ke he fonua . . . ha kua hifo kia mutolu e tiapolo kua ita lahi, ha kua iloa e ia kua tote e hana vaha.”Fakakiteaga 12:7, 9, 12.

5 Fakamolemole mailoga e mena ka tupu he tau i luga he lagi. Ke he ita lahi haana, to tamai e Satani e oi fakaalofa, po ke lekua, ki a lautolu he lalolagi. Ka to kitia e koe, kua nonofo a tautolu mogonei he magaaho ia he oi fakaalofa. Ka e to kū ni e magaaho—he “tote hana vaha.” Ti iloa foki e Satani e mena  ia. Ne hagaao e Tohi Tapu ke he vahā nei ko e “tau aho fakamui.” (2 Timoteo 3:1) Kua fiafia ha ia ha tautolu he nakai leva to utakehe he Atua e fakaohoohoaga he Tiapolo ke he lalolagi! Kia fakatutala a tautolu ke he falu mena ne talahau tuai i loto he Tohi Tapu kua tutupu he mogo tonu nei. Kua fakakite he tau mena nei kua nonofo a tautolu he tau aho fakamui mo e nakai leva to tamai he Kautu he Atua e tau monuina tukulagi ki a lautolu ne ofania a Iehova. Fakamua, kia kumikumi a tautolu ke he fā e vala he fakamailoga ne talahau e Iesu ka fakakite aki e magaaho ne nonofo ai a tautolu.

TAU MENA LALAHI KA TUTUPU HE TAU AHO FAKAMUI

6, 7. Kua fakamooli fēfē e tau kupu ha Iesu hagaao ke he tau felakutaki mo e hoge he vahā nei?

6 “To laga e taha motu ke he taha motu, ko e taha kautu ke he taha kautu.” (Mataio 24:7) Kua totou miliona e tagata ne kelipopo he tau felakutaki he magahala he senetenari kua mole. Ne tohia he taha tagata fakamauaga tala tuai Peritania: “Kua mua atu e kelipopo tagata he senetenari ke 20 aki tali mai he talahauaga he fakamauaga tuai. . . . Ko e senetenari ne felakutaki tumau, ti gahoa mo e kū e magahala ne nakai ha i ai e taufetoko ke he tau felakutaki fakamatakau.” Ne talahau he hokotaki he Worldwatch Institute: “Kua  fakalahi tolu e numera he tau tagata ne matematekelea ha ko e felakutaki he senetenari [ke 20 aki], ke he tau felakutaki oti mai he senetenari fakamua TI ke he 1899.” Ne molea e 100 e miliona tagata ne mamate ha ko e tau felakutaki tali mai he 1914. Pete he logona e tautolu e momoko he galo taha fakahele he felakutaki, kua manamanatu ni a tautolu ke he matematekelea mo e mamahi pihia ne fakalahi laga miliona ai.

7 “To ha ha ai e tau hoge.” (Mataio 24:7) Ne talahau he tau tagata kumikumi kua malikiti hake lahi e tauteaga he tau mena kai he 30 e tau kua mole. Pete ia, kua holo ki mua e hoge ha kua tokologa e tagata ne temotemoai e tupe ke fakatau e tau mena kai po ke vala kelekele ke tō aki e tau akau kai. He tau motu mativa, kua mua atu e molea he piliona tagata ne moui ke he taha ni e talā (US) he aho, po ke tote hifo foki. Ko e laulahi ia lautolu nei kua matematekelea he hoge tumau. Ne fuafua he World Health Organization ko e hoge e lekua lahi ne mamate ai molea lima e miliona he tau tama he tau tau takitaha.

8, 9. Ko e heigoa ne fakakite kua fakamooli e tau mena ne perofeta e Iesu hagaao ke he tau mafuike mo e tau tatalu?

8 “To ha ha ai e tau mafuike lalahi.” (Luka 21:11) Hagaao ke he U.S. Geological Survey, kua amanaki ke avelesi ko e 19 e mafuike lalahi he taha e tau. Kua mua atu e malolō ke moumou e tau fale  lalahi mo e maihiihi e kelekele. Mo e ke he avelesi, ko e tau mafuike lalahi ne tutupu he tau tau takitaha kua moumou katoa e tau fale lalahi. Fakakite mai he taha fakamauaga ko e tau mafuike kua molea ua e miliona tagata ne mamate tali mai he 1900. Ne pehē taha talahauaga: “Ko e holo ki mua he tau matini foou ne kua fakatote hifo ni e numera he tau tagata kua mamate.”

9 “To ha i ai e . . . tau tatalu.” (Luka 21:11) Pete he holo ki mua e tau puhala fakaekekafo, kua lauia kelea agaia e tau tagata he tau gagao tuai mo e tau gagao foou. Ne talahau he taha hokotaki, ko e 20 e gagao ne iloa lahi—putoia e gagao māmā pala, malaria, mo e cholera—kua tutupu tolomaki he tau hogofulu tau kua mole, mo e falu vahega gagao kua uka lahi ke tului he tau vai ekekafo. Ko e mooli, kua kavi ke 30 e gagao foou kua kitia. Kua nakaila fai tuluiaga e falu gagao ia ti kua hagahaga kelea lahi.

TAU TAGATA HE TAU AHO FAKAMUI

10. Ko e heigoa e tau mahani ne talahau tuai he 2 Timoteo 3:1-5 kua kitia e koe he tau tagata he vahā nei?

10 Kehe mai he tau mena ne kua fakakite ne hane tutupu he lalolagi, ne talahau tuai he Tohi Tapu ko e tau aho fakamui to kitia ai ke he hikihiki he tau tagata. Ne talahau he aposetolo ko Paulo e mahani he tau tagata tokologa. Talahau mai ki a tautolu: “Ko e tau aho fakamui to hohoko mai ai e tau aho  uka.” (Totou 2 Timoteo 3:1-5.) Ne talahau e Paulo to eke e tau tagata ke

  • ofaofa ne lautolu a lautolu

  • velevele koloa

  • faliuliu ke he tau matua

  • mahani kelea

  • nakai fai fakaalofa

  • nakai taofi e tau manako

  • mahani favale

  • manako lahi ke he tau mena ke fiafia ai, ka e manako tote ke he Atua

  • ha ha ai e gati he mahani Atua ka kua tiaki e malolo ne toka ai

11. Fakakite fēfē he Salamo 92:7 e mena ka tupu ke he tau tagata mahani kelea?

11 Kua pihia kia e mahani he tau tagata he matakavi haau? Nakai fakauaua kua pihia a lautolu. Ha ha he tau matakavi oti e tau tagata ne aga kelea. Kua fakakite he mena nei to nakai leva ti fakalago mai e Atua, ha kua pehē e Tohi Tapu: “Ka tupu hake e tau tagata mahani kelea tuga ne tau vao ikiiki, ka fiti mai foki a lautolu oti kua eke mena kelea, kua pihia ni kia mahaikava a lautolu tukulagi tukumuitea.”Salamo 92:7.

TAU MENA TUTUPU AOGA!

12, 13. Ko e puhala fe ne kua tupu lahi e ‘iloilo moli’ he ‘vaha fakahiku’ nei?

12 Kua puke mooli e tau aho fakamui he oi fakaalofa, tuga ne talahau tuai he  Tohi Tapu. Ti, he lalolagi lekua nei kua ha ha ai e tau mena tutupu ne aoga ke he tau tagata tapuaki ha Iehova.

13 ‘To tupu lahi ai foki e mahani iloilo moli,’ he talahau tuai he tohi ha Tanielu he Tohi Tapu. To tupu he magaaho fe e mena ia? He magahala he ‘vaha fakahiku.’ (Tanielu 12:4) Mua atu he 1914, ne lagomatai e Iehova a lautolu ne manako mooli ke fekafekau ki a ia ke holo ki mua e maama ke he Tohi Tapu. Kua loto fakaaue lahi a lautolu ke he uho he tau kupu mooli hagaao ke he higoa mo e finagalo he Atua, ke he poa lukutoto a Iesu Keriso, ke he tuaga he tau tagata mamate, mo e ke he liu tu mai. Mua atu foki, ko e tau tagata tapuaki ha Iehova kua fakaako ke moui ke he puhala kua aoga ki a lautolu mo e fakaheke ke he Atua. Kua maama lahi foki e lautolu e matagahua he Kautu he Atua mo e puhala ka fakahako ai e tuaga he lalolagi. Ko e heigoa kua taute e lautolu aki e iloilo nei? Kua tamai he hūhū ia a tautolu ke he taha perofetaaga kua fakamooli he tau aho fakamui nei.

“To fakamatala atu foki e tala mitaki nai he kautu ke he lalolagi oti.”Mataio 24:14

14. Kua laulahi fēfē e fakamatala he tala mitaki he Kautu he vahā nei, ti ko hai ne kua fakamatala ai?

14 “To fakamatala atu foki e tala mitaki nai he kautu ke he lalolagi oti,” he talahau e Iesu Keriso he perofetaaga haana hagaao ke he “fakaotiaga he lalolagi.” (Totou Mataio 24:3, 14.) Ke he lalolagi katoa, ko e tala mitaki he Kautu—ko e kakano he Kautu ia, ko e mena ka taute ai, mo e puhala ka moua ai e tautolu e tau monuina—kua fakamatala ke he molea e 230 e motu mo e ke he totou teau e tau vagahau. Kua totou miliona e Tau Fakamoli a Iehova ne fakamatala fakamakutu e tala mitaki he Kautu. Kua o mai a lautolu he “tau motu oti, mo e tau faoa, mo e tau tagata kehekehe, mo e tau vagahau kehekehe.” (Fakakiteaga 7:9) Ne taute he Tau Fakamoli e tau fakaakoaga Tohi Tapu nakai totogi he tau kaina mo e tau miliona tagata ne manako ke iloa e tau mena ne fakaako mooli he Tohi Tapu. Ko e fakamooliaga ofogia lahi ha ia he perofetaaga, mua atu foki ha kua talahau tuai e Iesu ko e tau Kerisiano mooli to ‘fakavihia he tau tagata oti’!Luka 21:17.

 KO E HEIGOA HAAU KA TAUTE?

15. (a) Talitonu nakai a koe kua nonofo a tautolu he tau aho fakamui, mo e ko e ha? (e) Ko e heigoa e kakano he “fakaotiaga” ma lautolu ne totoko ki a Iehova mo e ma lautolu ne omaoma ke he pule he Kautu he Atua?

15 Ha kua loga e tau perofetaaga he Tohi Tapu hane fakamooli he vahā nei, kua nakai kia talitonu a koe hane nonofo a tautolu he tau aho fakamui? Ka mole e fakamatala he tala mitaki ke he fiafia ha Iehova, to hoko mooli mai e “fakaotiaga.” (Mataio 24:14) Ko e kakano he “fakaotiaga” ko e magaaho ka utakehe he Atua e mahani kelea he lalolagi. Ke fakaotioti a lautolu ne totoko ki a Ia, to fakaaoga e Iehova a Iesu mo e tau agelu malolō. (2 Tesalonia 1:6-9) Ko Satani mo e tau temoni haana to nakai liliu ke fakahehē e tau motu. Ka mole ia, to liligi he Kautu he Atua e tau monuina ki a lautolu ne omaoma ke he haana pule tututonu.Fakakiteaga 20:1-3; 21:3-5.

16. Ko e heigoa e mena pulotu ke taute e koe?

16 Ha kua tata mai e fakaotiaga he fakatokaaga ha Satani, lata ia tautolu ke hūhū hifo, ‘Ko e heigoa haaku kua lata ke taute?’ Kua pulotu ke fakatolomaki ke ako hagaao ki a Iehova mo e tau fakatufono haana ma tautolu. (Ioane 17:3) Kia eke mo tagata fakaako makutu he Tohi Tapu. Kia eketaha ke lafi tumau mo lautolu ne kumi ke taute e finagalo ha Iehova. (Totou Heperu 10:24, 25.) Kia iloa a Iehova ko e Atua he fakaako e Kupu haana, mo e taute e tau hikihikiaga kua lata he moui haau ke olioli e koe e fiafia he Atua.Iakopo 4:8.

17. Ko e ha e fakaotiaga he tau tagata kelea ka fakaofo ai ke he laulahi he tau tagata?

17 Ne talahau tuai e Iesu to fakaheu he laulahi he tau tagata e fakamooliaga kua nonofo a tautolu he tau aho fakamui. Ko e fakaotiaga he tau tagata kelea to hoko fakalutukia mo e nakai mau amaamanaki. Ke tuga e tagata kaihā ke he pō, to ofo ai e tau tagata tokologa. (Totou 1 Tesalonia 5:2.) Ne hataki e Iesu: “Ka e tuga e vaha kia Noa, to eke pihia foki ka [“ha ha hinei,” NW] e Tama he tagata. Ha ko e mena tuga ne eke ke he vaha ka e nakaila hoko e fakapuke, ne kai a lautolu mo e inu, ti  fai hoana a lautolu mo e fakafaitane, kua hoko ni ke he aho ne hu atu ai a Noa ke he vaka, Ti nakai iloa e lautolu ato hoko mai e fakapuke, mo e uta kehe a lautolu oti; to pihia foki ka [“ha ha hinei,” NW] e Tama he tagata.”Mataio 24:37-39.

18. Ko e heigoa e hatakiaga ha Iesu ne kua lata ia tautolu ke uta fakahokulo ke he loto?

18 Ko e mena ia, ne tala age a Iesu ke he tau tagata fanogonogo haana: “A mutolu neke pehia ha mutolu a tau loto, he fakaniniko, mo e konahia, mo e fakaatukehe he tau mena he mouiaga nai; neke fakaofo mai e aho ia kia mutolu. Ha ko e mena tuga ne matahele, ke hoko mai ai kia lautolu oti kana kua nonofo ke he lalolagi oti. Hanai, kia mataala a mutolu, mo e liogi nakai noa, kia talahaua a mutolu kua aoga ke hao mai ke he tau mena oti ia ka hohoko mai, ke tutu [mo e talia] foki ki mua he Tama he tagata.” (Luka 21:34-36) Kua pulotu ke uta fakahokulo e tau kupu ha Iesu. Ko e ha? Ha ko lautolu ne talia e Iehova ko e Atua mo e “Tama he tagata,” ko Iesu Keriso, kua moua e amaamanakiaga ke hao mai he fakahikuaga he fakatokaaga ha Satani mo e ke moui tukulagi ke he lalolagi foou mua ue atu kua tata lahi mai!Ioane 3:16; 2 Peteru 3:13.

^ para. 4 Ma e fakailoaaga ne fakakite ko Mekaeli e taha higoa ma Iesu Keriso, kikite e vala tala he Apenetiki “Ko Hai a Mekaeli ko e Agelu ne Mua?