Skip to content

Skip to table of contents

Tau Fakamoli a Iehova

Fifili e vagahau Faka-Niue

 VEVEHEAGA UA

Ko e Tohi Tapu—Tohi Mai he Atua

Ko e Tohi Tapu—Tohi Mai he Atua
  • Ko e heigoa e tau puhala ne kehe e Tohi Tapu mai he falu tohi?

  • Maeke fēfē e Tohi Tapu ke lagomatai a koe ke fahia he tau lekua fakatagata?

  • Ko e ha kua maeke ia koe ke falanaki ke he tau perofetaaga ne fakamau he Tohi Tapu?

1, 2. Ko e tau puhala fe ne eke e Tohi Tapu mo mena fakaalofa ofoofogia mai he Atua?

MANATU nakai e koe e magaaho ne moua e koe e mena fakaalofa uho mai he kapitiga fakahele? Ti liga kua nakai ni olioli he fiafia ke moua e mena fakaalofa ka kua mafanatia foki e loto haau. Ha kua fai mena ne talahau he mena fakaalofa ia ki a koe hagaao ke he tagata foaki—nukua uho e kapitiga haau ki a ia. Mooli ni, ne fakakite e koe e loto fakaaue ma e mena fakaalofa mitaki he kapitiga haau.

2 Ko e Tohi Tapu ko e mena fakaalofa mai he Atua, ti kua lata ia tautolu ke loto fakaaue mooli ki ai. Kua fakakite he tohi kehe ue atu nei e tau mena ka liga nakai maeke ia tautolu ke iloa. Ke fakatai ki ai, ne tala mai hagaao ke he tufugatia he lagi ne kikila he tau fetu, ke he lalolagi, mo e ke he tagata taane mo e fifine fakamua. Kua toka i loto he Tohi Tapu e tau matapatu fakaakoaga mauokafua ke lagomatai a tautolu ke fahia ke he tau lekua mo e tau fakaagitau he moui. Ne fakamaama mai hagaao ke he puhala ka fakamooli he Atua e finagalo haana mo e tamai e tau tutūaga mitaki ke he lalolagi. Ko e mena fakaalofa ofoofogia mooli e Tohi Tapu!

3. Ko e heigoa ne tala mai he foakiaga he Tohi Tapu ki a tautolu hagaao ki a Iehova, mo e ko e ha ne mafanatia ai e mena nei?

 3 Ko e Tohi Tapu ko e mena fakaalofa mafanatia foki, ha kua fai mena ne fakakite mai hagaao ke he Foaki, ko Iehova ko e Atua. He foaki mai e tohi pihia, kua fakakite mooli e manako haana ki a tautolu ke iloa mitaki a ia. Haia, kua maeke he Tohi Tapu ke lagomatai a koe ke fakatata ki a Iehova.

4. Ko e heigoa ne nava lahi a koe ki ai hagaao ke he tufatufaaga he Tohi Tapu?

4 Kaeke fai lagaki a koe he Tohi Tapu, nakai ko koe tokotaha ni ne fai. Kua taute fakailoa e Tohi Tapu, katoa po ke vala, ke he kavi 2,600 e vagahau, ti kua maeke ke moua he puke tagata he lalolagi ne molea e 90 e pasene. Ke he evalesi kua molea e miliona e tau Tohi Tapu hane tufatufa he tau faahi tapu takitaha! Kua totou piliona e tau lagaki he tau Tohi Tapu katoa po ke vala hane fa e lolomi. Mooli ni, kua nakai fai tohi ke tuga e Tohi Tapu.

Ko e “New World Translation of the Holy Scriptures” kua moua ke he tau vagahau loga

5. Ko e puhala fe ne “mai he Agaga he Atua” e Tohi Tapu?

5 Taha mena foki, kua “mai he Agaga he Atua” e Tohi Tapu. (Totou 2 Timoteo 3:16.) Ke he puhala fe? Kua tali ni he Tohi Tapu: “Ko e tau tagata tapu he Atua ne vagavagahau mai he  omoi a lautolu he [a]gaga [t]apu.” (2 Peteru 1:21) Ke fakatai: Liga fekau he tagata pisinisi e tohikupu ke tohia e tohi. Kua toka ai he tohi ia e tau manatu mo e tau fakailoaaga he tagata pisinisi. Ko e mena ia, ko e tohi ni haana, nakai he tohikupu. Ke he puhala tatai, kua toka i loto he Tohi Tapu e fekau he Atua, nakai he tau tagata ne tohia ai. Kua mooli ni, ko e Tohi Tapu katoa “ko e kupu he Atua.”1 Tesalonia 2:13.

LAUTATAI MO E TONUTIKA

6, 7. Ko e ha kua aoga e lautatai pauaki he tau vala kehekehe i loto he Tohi Tapu?

6 Kua molea e 1,600 tau ne tohia ai e Tohi Tapu. Ti kehekehe e tau vahā ne momoui ai e tau tagata tohia Tohi Tapu mo e kua o mai he tau momoui kehekehe. Falu ko e tau tagata gahua fonua, tau tagata takafaga ika, mo e tau leveki mamoe. Ko e falu ko e tau perofeta, tau ikifakafili, mo e tau patuiki. Ko e tagata tohia Evagelia ko Luka, ko e ekekafo. Pete ni he loga e tau feakiaga he tau tagata tohia, nukua lautatai e Tohi Tapu mai he kamataaga ke he fakaotiaga. *

7 Ne tala mai he tohi fakamua he Tohi Tapu e kamataaga he tau lekua he tagata. Ne fakakite he tohi fakahiku to eke e lalolagi mo parataiso, po ke katene. Kua hokotia e tau vala kehekehe he Tohi Tapu ke he afe e tau tau he fakamauaga tuai ti matutaki atu ke he maamaaga he finagalo he Atua. Ko e lautatai he Tohi Tapu kua nava lahi ki ai, ti ko e mena kua amanaki a tautolu ki ai mai he tohi he Atua.

8. Talahau e tau fakatai ne fakakite e tonutika fakasaiene he Tohi Tapu.

8 Kua tonutika e Tohi Tapu ke he puhala fakasaiene. Ne toka ai foki e tau vala tala ne lata mo e anoiha. Ke fakatai ki ai, ne toka i loto he tohi ha Levitika e tau matafakatufono ma Isaraela i tuai ke he puipuiaga mo e fakameāaga, ka e nakaila iloa ia he tau motu ne agaagai ha mena pihia. He magaaho ne hepe  e tau manatu hagaao ke he fua lalolagi, ne hagaao e Tohi Tapu ki ai ko e takai po ke veliveli. (Isaia 40:22) Kua tonutika e Tohi Tapu he talahau kua tautau e lalolagi ka e “nakai ha i ai ha mena ke tautau” ai. (Iopu 26:7) Mooli, nakai ko e tohi fakasaiene e Tohi Tapu. Ka kua tonutika he magaaho ka fakatutala ke he tau mena fakasaiene. Ti nakai kia amanaki pihia a tautolu ke he tohi mai he Atua?

9. (a) Ko e heigoa e tau puhala ne fakakite he Tohi Tapu kua tonutika mo e mauokafua ai ke he fakamauaga tuai? (e) Ko e heigoa ne tala mai he mahani fakamooli he tau tagata tohia ki a koe hagaao ke he Tohi Tapu?

9 Kua tonu mo e moolioli foki e Tohi Tapu ke he fakamauaga tuai. Ti hakotonu e tau fakamauaga i loto. Kua nakai ni putoia e tau higoa ka e pihia foki e tau matohiaga he tau tagata takitokotaha. * Kehe mai he tau tagata fakamau tala tuai he lalolagi, ne nakai talahau e tau kaumahala he tau tagata ni ha lautolu, kua fakamooli e tau tagata tohia Tohi Tapu mo e fakamau hifo foki e tau kaumahala ha lautolu mo e he ha lautolu a motu. Ke tuga anei, i loto he tohi ha Numera he Tohi Tapu, ne talahau he tagata tohia ko Mose e hehē haana ne akonaki fakalahi ai a ia. (Numera 20:2-12) Kua temotemoai e mahani fakamooli pihia i loto he falu fakamauaga tuai ka kua moua ai i loto he Tohi Tapu ha ko e tohi mai he Atua.

KO E TOHI HE PULOTU AOGA

10. Ko e ha kua nakai ofo ha ko e Tohi Tapu ko e tohi aoga?

10 Ha kua mai he agaaga he Atua e Tohi Tapu, kua “aoga ni ke fakaako ai, ke fakatonu ai, ke akonaki ai.” (2 Timoteo 3:16) Ē, ko e Tohi Tapu ko e tohi aoga. Kua hokulo e fakamaamaaga ke he aga pauaki he tagata. Ti pihia ha ko e Punaaga, ko Iehova ko e Atua e Tufuga! Nukua iloa mitaki e ia e tau manamanatu mo e tau logonaaga ha tautolu ke he mena ne iloa e tautolu. Mua atu, ne iloa e Iehova e mena kua lata mo tautolu ke moua e fiafia. Iloa foki e ia e tau puhala he moui ne kua lata ia tautolu ke kalo kehe mai ai.

11, 12. (a) Ko e heigoa e tau matakupu ne fakatutala a Iesu ki ai he haana Lauga he Mouga? (e) Ko e heigoa falu matakupu aoga ne talahau he Tohi Tapu, mo e ko e ha kua aoga tumau e fakatonuaga i ai?

 11 Mailoga e lauga ha Iesu ne ui ko e Lauga he Mouga, ne fakamau ia Mataio veveheaga 5 ke he 7. Ke he puhala fakaako mua ue atu nei, ne vagahau a Iesu ke he tau matakupu kehekehe, lauia ai e puhala ke moua e fiafia mooli, puhala ke fakamafola e tau taufetoko, puhala ke liogi, mo e puhala ke moua e onoonoaga hako ke he tau koloa fakatino. Kua malolō  lahi mo e aoga e tau kupu ha Iesu he vahā nei, ke tuga ni he magaaho ne vagahau ai e ia.

12 Ko e falu matapatu fakaakoaga he Tohi Tapu kua fakafehagai mo e moui he magafaoa, tau aga gahua, mo e tau fakafetuiaga mo e falu. Kua hagaao e tau matapatu fakaakoaga he Tohi Tapu ke he tau tagata oti kana, ti kua aoga tumau e tau fakatonuaga i loto. Ko e pulotu ne moua i loto he Tohi Tapu kua fakamaama fakakū he tau kupu he Atua puhala he perofeta ko Isaia: “Ko au ko Iehova, ko e hau a Atua, kua fakaako atu kia koe ke he tau mena ke aoga ai.”Isaia 48:17.

KO E TOHI HE PEROFETAAGA

Ne talahau tuai he tagata tohia Tohi Tapu ko Isaia e veliaga ha Papelonia

13. Ko e heigoa e tau vala tala matafeiga ne omoomoi e Iehova e perofeta ko Isaia ke fakamau hifo hagaao ki a Papelonia?

13 Kua toka i loto he Tohi Tapu e tau perofetaaga kehekehe, ti loga ne kua fitā he fakamooli. Kikite la e fakataiaga. He puhala he perofeta ko Isaia, ne moui he senetenari ke valuaki F.V.N., ne talahau tuai e Iehova to moumou a Papelonia. (Isaia 13:19; 14:22, 23) Ti kua fakamatafeiga age ke fakakite e puhala ka tupu ai e mena nei. To fakamaha he tau kautau e vailele ha Papelonia mo e foleni ki loto he maaga ka e nakai tau. Ti nakai koēnaia. Ne talahau he perofetaaga ha Isaia e patuiki ka kautū ki a Papelonia—ko Kuresa.Totou Isaia 44:27–45:2.

14, 15. Kua fakamooli fēfē e falu vala tala matafeiga he perofetaaga a Isaia hagaao ki a Papelonia?

14 Kavi ke 200 tau he mole—he pō ia Oketopa 5/6, 539 F.V.N.—ne heapi e kautau tata ki Papelonia. Ko hai e takitaki ha lautolu? Ko e patuiki Peresia ne higoa ko Kuresa. Nukua fakatokatoka tuai e magahala nei ke fakamooli aki e perofetaaga ofogia lahi. Ka e to tapaki kia he kau ha Kuresa a Papelonia ka e nakai tau, tuga ne talahau tuai?

15 Kua ha ha ai e tau Papelonia ke he kaiaga lahi he pō ia ti kua haohao mitaki i loto he tau kaupā lalahi he maaga. He magaaho ia ni, ha ko e pulotu ha Kuresa ne hiki kehe e ia e vai he vailele ne tafe atu ke he maaga. Nakai leva ne pōtake e vai  ke maeke he tau tagata haana ke o atu ke he taha faahi he vailele mo e tata atu ke he tau kaupā he maaga. Ka e to o atu fēfē e kautau ha Kuresa ke he taha faahi he tau kaupā ha Papelonia? Ko e ha kakano ni he pō ia nukua mahafagi fakahanoa e tau gutuhala he maaga!

16. (a) Ko e heigoa ne talahau tuai e Isaia hagaao ke he fakahikuaga ha Papelonia? (e) Fakamooli fēfē e perofetaaga ha Isaia hagaao ke he malona ha Papelonia?

16 Kua talahau tuai hagaao ki a Papelonia: “Nakai liu kakai ai taha tukulagi, nakai tuai nofo ai taha ke hahau mo hahau; to nakai heapi ai e tau tagata Arapi, ti nakai uta foki he tau leveki mamoe ha lautolu a tau fuifui mamoe ke tatakoto ai.” (Isaia 13:20) Ti nakai ni talahau tuai he perofetaaga nei e veliaga he maaga. Ne fakakite ai to malona tukumalagi a Papelonia. Maeke ia koe ke kitia e fakamooliaga he tau kupu nei. Ko e matakavi malona ha Papelonia i tuai—kavi ke 80 kilomita he faahi toga i Baghdad, Iraka—ko e fakamooliaga he mena ne talahau e Iehova puhala ia Isaia: “To tafitafi foki e au a ia ke he tafi ke fakaoti ai.”Isaia 14:22, 23. *

Tau malona a Papelonia

17. Maeke fēfē e fakamooliaga he tau perofetaaga he Tohi Tapu ke fakamalolō e tua?

 17 Kua fakamalolō e tua he iloa ko e Tohi Tapu ko e tohi he tau perofetaaga mauokafua, pihia nakai? Ha kua fakamooli e Iehova ko e Atua e tau maveheaga haana he vahā fakamua, kua ha ha ia tautolu e tau kakano loga ke talitonu to fakamooli foki e ia e maveheaga ke he lalolagi parataiso. (Totou Numera 23:19.) Haia, kua ha ha ia tautolu e “amaamanaki he moui tukulagi, kua talahau mai he Atua kua nakai maeke ke pikopiko, ka e nakaila kamata ai e tau hau.”Tito 1:2. *

“KO E KUPU HE ATUA KUA MOUI IA”

18. Ko e heigoa e talahauaga malolō lahi ne taute he aposetolo Kerisiano ko Paulo hagaao ke he “kupu he Atua”?

18 Mai he tau mena ne fakatutala e tautolu i loto he veveheaga nei, kua maaliali ko e Tohi Tapu ko e tohi kua kehe ue atu  mooli. Ti, kua mua atu e aoga i ai ke he lautatai katoa, tonutika fakasaiene mo e he fakamauaga tuai, pulotu aoga, mo e tau perofetaaga mauokafua. Ne tohia he aposetolo Kerisiano ko Paulo: “Ko e kupu he Atua kua moui ia, mo e gahua malolo, kua mua foki hana matila ke he tau pelu oti kana kua matila fakafahiua, kua tuina foki ato vevehe tuai ai e loto mo e agaga, ko e tau fatia mo e tau uho hui, kua fakafili foki e tau manatu mo e tau fakafiliaga he tau loto.”Heperu 4:12.

19, 20. (a) Maeke fēfē he Tohi Tapu ke lagomatai a koe ke kumikumi hifo ki a koe ni? (e) Maeke fēfē ia koe ke fakakite e loto fakaaue haau ma e mena fakaalofa kehe ue atu he Atua, ko e Tohi Tapu?

19 He totou e “kupu” po ke fekau he Atua, i loto he Tohi Tapu ka hiki e tau momoui ha tautolu. Kua maeke ai ke lagomatai a tautolu ke kumikumi hifo fakahokulo ki a tautolu ni. Liga talahau a tautolu kua ofania e tautolu e Atua, ka ko e puhala ne tali atu a tautolu ke he fakaakoaga he Kupu omoomoi he agaaga, ko e Tohi Tapu, ka fakakite e tau manatu mooli ha tautolu, pihia foki mo e tau fatuakiloto mooli.

20 Ko e Tohi Tapu mooli ko e tohi mai he Atua. Ko e tohi ne kua lata ke totou, fakaako, mo e ofania. Kia fakakite e loto fakaaue haau ma e mena fakaalofa faka-Atua nei he matutaki ke totou ki ai. Ka taute pihia e koe, to hokulo e maamaaga haau ke he finagalo he Atua ma e tagata. Ko e finagalo ia mo e puhala ka fakamooli ai to fakatutala he veveheaga ka mui mai.

^ para. 6 Pete he talahau he falu tagata kua nakai tatai e falu vala he Tohi Tapu, kua nakai fai fakamooliaga e talahauaga ia. Kikite veveheaga 7 he tohi The BibleGod’s Word or Man’s? ne taute fakailoa he Tau Fakamoli a Iehova.

^ para. 9 Ke fakatai ki ai, kikite e matohiaga matafeiga ha Iesu ia Luka 3:23-38.

^ para. 16 Ma e falu fakailoaaga foki ke he perofetaaga he Tohi Tapu, kikite lau tohi 27-29 he porosua A Book for All People, ne taute fakailoa he Tau Fakamoli a Iehova.

^ para. 17 Ko e moumouaga ha Papelonia ko e taha fakatai ni a ia he tau perofetaaga ne fakamooli he Tohi Tapu. Falu fakatai foki ko e moumouaga ha Turo mo Nineva. (Esekielu 26:1-5; Sefanaia 2:13-15) Ne talahau tuai foki he perofetaaga a Tanielu e laini he tau kautu ka pule he lalolagi he mole a Papelonia. Putoia ai a Metai-Peresia mo Heleni. (Tanielu 8:5-7, 20-22) Kikite e vala tala he Apenetiki “Iesu Keriso—Ko e Mesia ne Mavehe,” ma e fakatutalaaga ke he loga e perofetaaga faka-Mesia ne fakamooli ia Iesu Keriso.