Skip to content

Skip to table of contents

Tau Fakamoli a Iehova

Fifili e vagahau Faka-Niue

 APENETIKI

Aho Fakafili—Ko e Heigoa a Ia?

Aho Fakafili—Ko e Heigoa a Ia?

FĒFĒ e manatu haau hagaao ke he Aho Fakafili? Tokologa ne manatu to o atu takitaha e tau piliona tagata ki mua he nofoaiki he Atua. Ati fakahoko e fakafili ke he tau tagata takitaha. To moua he falu e palepale ke he parataiso he lagi, mo e falu to fakahala ke fakakikiveka tukulagi. Pete ia, kua fakakite he Tohi Tapu e fakatino kehe hagaao ke he magaaho nei. Ne fakamaama ai he Kupu he Atua, nakai ko e magahala matakutakuina, ka ko e magahala he amaamanakiaga mo e liu fakafoou.

He Fakakiteaga 20:11, 12, ne totou e tautolu e fakamaamaaga he aposetolo ko Ioane ke he Aho Fakafili: “Ne kitia foki e au e nofoaiki hina kua lahi, mo ia kua nofo ai, kua hola kehe e lalolagi mo e lagi mai mua hana; kua nakai kitia foki ha mena ke tu ai a laua. Ti kitia e au a lautolu ne mamate, ko e tau lalo tagata katoa mo e tau iki, kua tutu ki mua he Atua [nofoaiki], ti fofola ai e tau tohi; kua fofola foki e taha tohi, ko e tohi haia he moui; ti fakafili ai a lautolu kua mamate ke he tau mena kua tohi ke he tau tohi, ke lata mo e tau mahani ha lautolu.” Ko hai e Ikifakafili ne fakakite mai?

Ko Iehova ko e Atua e Ikifakafili mua ue atu he tau tagata. Ti tufatufa e ia e matagahua ke fakafili. Hagaao ke he Gahua 17:31,  ne pehē e aposetolo ko Paulo “kua kotofa e ia [Atua] e aho ke fakafili ai e lalolagi mo e tututonu he tagata kua kotofa ne ia.” Ko e Ikifakafili ne kotofa ko Iesu Keriso ne fakaliu tu mai. (Ioane 5:22) Ka e, kamata a fe e Aho Fakafili? Leva fēfē e magaaho ia?

Ne fakakite he tohi ha Fakakiteaga to kamata e Aho Fakafili ka mole e tauaga i Amaketo, he magaaho ka fakaotioti e fakatokaaga ha Satani he lalolagi. * (Fakakiteaga 16:14, 16; 19:19–20:3) Ka mole a Amaketo, to tuku a Satani mo e tau temoni haana he pahua ke he afe e tau. He magahala ia, ko e tau hakega he lagi ne 144,000 to eke mo tau ikifakafili mo e to pule ko e “tau patuiki fakalataha mo Keriso ke he tau tau ne taha e afe.” (Fakakiteaga 14:1-3; 20:1-4; Roma 8:17) Ko e Aho Fakafili nakai ko e taha mena tupu mafiti ne 24 ni e tulā. Kua leva ke taha e afe tau.

He magahala he afe tau ia, ko Iesu Keriso ka “fakafili e tau tagata momoui katoa mo lautolu kua mamate.” (2 Timoteo 4:1) Ko e “tau tagata momoui” ko e “moto tagata tokologa” ka hao mai i Amaketo. (Fakakiteaga 7:9-17) Ne kitia foki he aposetolo ko Ioane a “lautolu ne mamate . . . kua tutu ki mua he Atua” ke fakafili. Tuga ne mavehe e Iesu, to “logona e lautolu katoa ha he tuagamau fakamanatu hana [Keriso] leo mo e o mai ki fafo” he puhala he liu tu mai. (Ioane 5:28, 29, NW; Gahua 24:15) Ka e ko e heigoa e fakavēaga ka fakafili e tau tagata oti?

Hagaao ke he fakakiteaga he aposetolo ko Ioane, kua “fofola ai e tau tohi,” mo e “fakafili ai a lautolu kua mamate ke he tau mena kua tohi ke he tau tohi, ke lata mo e tau mahani ha lautolu.” (Fakakiteaga 20:12) Ko e tau tohi nei kia ko e fakamauaga he tau gahua he tau tagata he vahā fakamua? Nakai, ko e fakafiliaga to nakai fakavē ke he tau mena ne taute fakamua he tau tagata ato mamate a lautolu. Iloa fēfē e tautolu e mena ia? Kua pehē e Tohi Tapu: “Ko ia kua mate kua toka noa a ia mai he hala.” (Roma 6:7) Ko lautolu ne fakaliu tu mai kua fakamagalo oti e tau hala. Ti ko e tau tohi mogoia kua liga hagaao ke he falu a poakiaga he Atua. Ke moui tukulagi, to lata ia lautolu ne hao mai i Amaketo mo lautolu ne fakaliu tu mai ke omaoma ke he tau  poakiaga he Atua, lauia ai e tau poakiaga foou oti ka liga fakakite e Iehova he magahala he afe tau. To fakafili e tau tagata takitaha he fakavē ke he tau mena kua taute e lautolu he magahala he Aho Fakafili.

To foaki he Aho Fakafili ke he tau piliona tagata e magaaho fakamua ke ako hagaao ke he finagalo he Atua mo e ke omaoma ai. Kakano he mena nei, to taute ai e gahua fakaako ne mua ue atu. Mooli ai, ‘to ako ai e lautolu e mahani tututonu kua nonofo ke he atu motu.’ (Isaia 26:9) Pete ni ia, to nakai makai oti ke fakatatau ke he finagalo he Atua. Ne pehē e Isaia 26:10: “Kia ofania a ia ne mahani kelea, ka e nakai ni ako e ia e mahani tututonu; to mahani hepehepe a ia ke he motu tututonu, nakai kitia foki e ia e lilifu a Iehova.” Ko e tau tagata mahani kelea nei to tamate tukulagi a lautolu he magahala he Aho Fakafili.Isaia 65:20.

He matahiku he Aho Fakafili, ko e tau tagata ne hao “to liu foki momoui” moolioli ko e tau tagata mitaki katoatoa. (Fakakiteaga 20:5) Ko e Aho Fakafili to kitia ai e liuaki maiaga he tau tagata ke he tuaga mitaki katoatoa he kamataaga. (1 Korinito 15:24-28) Oti ai ti fakahoko e kamatamata fakahiku. To fakatoka mai a Satani he fakahala mo e fakaatā ke lali ke fakahehē e tau tagata ke he magaaho fakahiku. (Fakakiteaga 20:3, 7-10) Ko lautolu ne totoko a ia ka olioli e fakamooliaga katoatoa he maveheaga he Tohi Tapu: “To eke ni e motu ma e tau tagata tututonu, to nonofo muatua ai a lautolu.” (Salamo 37:29) E, ko e Aho Fakafili to eke mo monuina ke he tau tagata tua fakamooli oti kana!

^ para. 1 Hagaao ki a Amaketo, fakamolemole kikite e Insight on the Scriptures, Volume 1, lau tohi 594-595, 1037-1038, mo e veveheaga 20 he Tapuaki ke he Atua Moli Tokotaha, ne taute fakailoa he Tau Fakamoli a Iehova.