Skip to content

Skip to table of contents

Tau Fakamoli a Iehova

Fifili e vagahau Faka-Niue

 VEVEHEAGA HOGOFULU MA UA

Moui he Puhala ne Fakafiafia e Atua

Moui he Puhala ne Fakafiafia e Atua
  • Maeke fēfē a koe ke eke mo kapitiga he Atua?

  • Putoia fēfē a koe ke he paleko a Satani?

  • Ko e heigoa e mahani ne nakai fakafiafia a Iehova?

  • Maeke fēfē ia koe ke moui ke he puhala ne fakafiafia e Atua?

1, 2. Talahau falu fakafifitakiaga he tau tagata ne kitia e Iehova ko e tau kapitiga tata haana.

KO E tagata fēfē ka fifili e koe mo kapitiga? Liga manako a koe ke kapitiga ke he tagata ne tatai e tau manatu, tau fiafia, mo e tau tutūaga mo e haau. Mo e futiaki a koe ki a ia ne mahani mitaki, tuga e aga fakamooli mo e totonu.

2 Tali mai he fakamauaga tuai, ne fifili he Atua e falu tagata mo tau kapitiga tata haana. Ke fakatai, ne ui e Iehova a Aperahamo ko e kapitiga haana. (Totou Isaia 41:8; Iakopo 2:23.) Ne hagaao e Atua ki a Tavita “ko e tagata ke lata mo e haku a loto” ha ko e tagata pihia ne ofania e Iehova. (Gahua 13:22) Mo e onoono a Iehova ke he perofeta ko Tanielu “kua ofania lahi.”Tanielu 9:23.

3. Ko e ha ne fifili e Iehova e falu tagata ke eke mo tau kapitiga haana?

3 Ko e ha ne mailoga e Iehova a Aperahamo, Tavita, mo Tanielu ko e tau kapitiga haana? Ne tala age a ia ki a Aperahamo: “Kua fanogonogo a koe ke he haku a tau kupu.” (Kenese 22:18) Ti fakatata atu a Iehova ki a lautolu ne taute fakamakai e tau mena ne ole e ia ki a lautolu. ‘Kia fanogonogo mai ke he haku a leo,’ he poaki e ia ke he tau Isaraela, “ti eke au mo Atua ha mutolu, ti eke a mutolu mo motu haku.” (Ieremia 7:23)  Ka omaoma a koe ki a Iehova, to eke foki a koe mo kapitiga haana!

FAKAMALOLŌ E IEHOVA E TAU KAPITIGA HAANA

4, 5. Fakakite fēfē e Iehova e malolō haana ma e tau tagata haana?

4 Manamanatu ke he tau aoga he kapitiga mo e Atua. Ne talahau he Tohi Tapu kua kumi magaaho a Iehova “ke lagomatai kia lautolu kua katoatoa ha lautolu a tau loto kia ia.” (2 Nofoaga he Tau Patuiki 16:9) Maeke fēfē ia Iehova ke fakakite e malolō haana ki a koe? Taha e puhala ne fakakite he Salamo 32:8, ne totou e tautolu: “To fakaako e au [Iehova] a koe, mo e fakakite kia koe e puhala ke fano ai a koe; to fakatonu e au kia koe, mo e kitekite au kia koe.”

5 Ko e fakakiteaga mafanatia ha ia he fakaalofa ha Iehova! To foaki e ia ki a koe e takitakiaga kua lata mo e puipui a koe he fakagahuahua ai e koe. Kua manako e Atua ke lagomatai a koe ke kautū ke he tau kamatamata haau. (Totou Salamo 55:22.) Ti ka fekafekau a koe ki a Iehova mo e loto katoa, to maeke a koe ke mauokafua tuga e Salamo ne talahau: “To tuku atu e au a Iehova ki mua haku nakai noa; ha ko e mena ha he tapa matau haku a ia, nakai fagahuatia ai au.” (Salamo 16:8; 63:8) E, kua maeke ia Iehova ke lagomatai a koe ke moui he puhala ne fakafiafia a ia. Ka e, iloa e koe, kua ha ha ai e fī he Atua ne manako ke taofi a koe neke taute e mena nei.

KO E PALEKO HA SATANI

6. Ko e heigoa e tukumale ha Satani hagaao ke he tau tagata?

6 Ne fakamaama he Veveheaga 11 he tohi nei e puhala ne paleko e Satani ko e Tiapolo e pule katoatoa he Atua. Ne tukumale e Satani e Atua ke pikopiko mo e talahau kua nakai tonu e mahani ha Iehova he nakai fakaatā a Atamu mo Eva ke fifili ne laua e mena hako mo e mena hepe. He mole e hala ha Atamu mo Eva mo e he kamata e lalolagi ke puke he tau hologa ha laua, ne paleko e Satani e manako he tau tagata oti kana. ‘Kua nakai fekafekau e tau tagata ke he Atua ha kua fakaalofa a lautolu ki a ia,’ he totoko e Satani. ‘Tuku mai taha magaaho ki a au, to liliu kehe  e au ha tagata mai he Atua.’ Ne fakakite he fakamauaga he tagata ne higoa ko Iopu kua talitonu a Satani ke he mena ia. Ko hai a Iopu, mo e putoia fēfē a ia ke he paleko ha Satani?

7, 8. (a) Ko e heigoa ne taute a Iopu ke eke mo tagata kua mua e mitaki he magahala ia? (e) Puhala fe ne paleko e Satani e manako ha Iopu?

7 Ne moui a Iopu kavi he 3,600 e tau kua mole. Ko e tagata mitaki a ia, ha kua talahau e Iehova: “Kua nakai ha ha i ai taha ke tatai mo ia ke he lalolagi, ko e tagata mahani hakohako mo e mahani tonu, kua matakutaku a ia ke he Atua mo e kalo kehe mo e tau mena kelea.” (Iopu 1:8) Kua fiafia e Atua ki a Iopu.

8 Ne paleko e Satani e manako ha Iopu ke fekafekau ke he Atua. Ne pehē e Tiapolo ki a Iehova: “Nakai kia pa takai ai e koe a ia [Iopu], mo e hana fale, katoa mo e hana tau mena oti ke he tau faahi oti? kua fakamonuina e koe e gahua he hana tau lima, kua fakaloga ai foki hana tau manu he fonua. Ka kia fakaolo atu a e koe e lima hau mo e pipiki atu ke he hana tau mena oti, ti vagahau kelea ai a ia kia koe ki mua hau ni.”Iopu 1:10, 11.

9. Tali atu fēfē a Iehova ke he paleko ha Satani, mo e ko e ha?

9 Ti totoko a Satani kua fekafekau ni a Iopu ke he Atua ha ko e palepale ka moua e ia. Ne talahau foki he Tiapolo kaeke ke kamatamata a Iopu, to fuluhi kehe mai a ia he Atua. Fēfē e tali ha Iehova ke he paleko ha Satani? Ha kua putoia e loto ha Iopu ke he matakupu ne fakaatā e Iehova a Satani ke kamatamata a Iopu. He puhala nei, ko e fakaalofa ha Iopu ma e Atua—po ke nakai—to maeke ke kitia maaliali.

NE KAMATAMATA A IOPU

10. Ko e heigoa e tau kamatamata ne fehagai mo Iopu, ti fēfē e tali haana?

10 Nakai leva ne kamatamata e Satani a Iopu ke he tau puhala loga. Ne kaihā e falu manu ha Iopu mo e tamate e falu. Laulahi he tau fekafekau haana kua kelipopo. Ne tamai he mena nei e uka fakatupe. Ne tupu foki e matematekelea lahi mahaki he magaaho ne mamate e fanau tokohogofulu ha Iopu he afā. Pete he tutupu e tau mena kelea nei, ne “nakai hala a Iopu he tau mena oti na, ti nakai pehe foki a ia kua goagoa e Atua.”Iopu 1:22.

11. (a) Ko e heigoa e tukupau ke uaaki ne taute e Satani hagaao ki a Iopu, mo e tali atu fēfē a Iehova? (e) Tali atu fēfē a Iopu ke he gagao mamahi haana?

 11 Ne nakai mahala a Satani. Ti liga manatu a ia pete ni kua fakauka a Iopu ke he galo he tau koloa, tau fekafekau, mo e fanau haana, to fuluhi kehe mai a ia he Atua kaeke ke gagao a ia. Ne toka e Iehova a Satani ke fakahoko ki a Iopu e gagao kelea mo e mamahi. Ka e nakai taute foki he mena nei a Iopu ke tiaki e tua ke he Atua. Ka e, talahau mauokafua e ia: “Ato hoko ke he aho ke mate ai au nakai toka e au haku a mahani hakohako.”Iopu 27:5.

Ne palepale a Iopu ha ko e tua fakamooli haana

12. Tali fēfē e Iopu e paleko he Tiapolo?

12 Ne nakai iloa e Iopu ko Satani ne fakatupu e tau matematekelea ki a ia. He nakai iloa fakamatafeiga e tau matakupu he paleko he Tiapolo ma e pule katoatoa a Iehova, ne matakutaku a Iopu kua puna mai he Atua e tau lekua haana. (Iopu 6:4; 16:11-14) Pete ia, ne fakatumau a ia ke mahani fakamooli ki a Iehova. Ti ko e talahauaga ha Satani na fekafekau a Iopu ke he Atua ma e tau kakano lotokai ne fakakite ai kua nakai mooli ha ko e puhala tua fakamooli ha Iopu!

13. Ko e heigoa ne tupu ha kua tua fakamooli a Iopu ke he Atua?

13 Kua foaki he tua fakamooli ha Iopu ki a Iehova e tali malolō lahi ke he paleko kelea ha Satani. Ko e kapitiga mooli he Atua a Iopu, ati palepale ai he Atua a ia ma e puhala tua fakamooli haana.Iopu 42:12-17.

PUHALA NE PUTOIA A KOE

14, 15. Ko e ha kua talahau e tautolu ko e paleko ha Satani ki a Iopu kua pihia foki ke he tau tagata oti kana?

14 Ko e matakupu he mahani fakamooli ke he Atua ne talahau e Satani kua nakai hagaao hokoia ni ki a Iopu. Kua putoia ai foki a koe. Kua kitia maali e mena nei he Tau Fakatai 27:11, ne talahau he Kupu ha Iehova: “Haku tama na e, kia iloilo ai a koe, kia fiafia ai haku loto; kia fai kupu au ke tali age kia ia kua fakafiu mai kia au.” Kua fakakite he tau kupu nei ne tohia he teau e tau tau he mole e mate ha Iopu, kua fakafiu agaia e Satani e Atua mo e ekefakakelea e tau fekafekau Haana. He momoui a tautolu ke he puhala ne fakafiafia a Iehova, kua lagomatai mooli e  tautolu ke foaki e tali ke he tau tukumale fakavai ha Satani, ti he puhala ia kua fakafiafia e tautolu e loto he Atua. Fēfē haau a manatu ke he mena ia? Kua nakai kia mitaki lahi ha kua fai vala ke tali atu ke he tau tukupau fakavai he Tiapolo, pete ni ka fai hikihikiaga ka taute e koe he moui?

15 Mailoga ne talahau e Satani: “Ko e tau mena oti foki ha ha he tagata, to ta age e ia ke totogi aki hana moui.” (Iopu 2:4) He talahau ‘ko e tagata,’ kua fakamaama mai e Satani kua hagaao foki e paleko haana ke he tau tagata oti kana nakai ni ki a Iopu. Ko e manatu aoga lahi a ia. Kua paleko e Satani e mahani fakamooli haau ke he Atua. Kua manako e Tiapolo ke kitia a koe he nakai omaoma ke he Atua mo e tiaki e puhala tututonu ka tutupu e tau mena uka. Liga lali fēfē a Satani ke taute e mena nei?

16. (a) Ko e heigoa e tau lagatau ne lali a Satani ke liliu kehe aki e tau tagata mai he Atua? (e) Puhala fe ka liga fakaaoga he Tiapolo e tau lagatau nei ki a koe?

16 Tuga ne fakatutala ki ai he Veveheaga 10, ne fakaaoga e Satani e tau lagatau kehekehe ke lali ke liliu kehe e tau tagata mai he Atua. Ke he taha faahi, kua tau mai a ia “tuga ne leona tagi, kua kumi kia falu ke faiola ai e ia.” (1 Peteru 5:8) Ti kua liga kitia e fakaohoohoaga ha Satani he magaaho ka totoko he tau kapitiga, tau magafaoa, po ke he falu foki e tau laliaga haau ke fakaako e Tohi Tapu mo e fakagahuahua e tau mena ne ako e koe. * (Ioane 15:19, 20) Ke he taha faahi foki, “ko Satani ni kua faliu e ia a ia mo agelu he maama.” (2 Korinito 11:14) Kua maeke he Tiapolo ke fakaaoga e tau puhala fakagalogalo ke fakahehē aki a koe mo e fakataki kehe a koe mai he puhala moui mahani Atua. Maeke foki ia ia ke fakaaoga e fakalolelole, he liga taute a koe ke logona hifo kua nakai maeke a koe ke fakafiafia e Atua. (Tau Fakatai 24:10) Pete he taute a Satani ke tuga e “leona tagi” po ke “agelu he maama,” kua tatai agaia e paleko haana:  Ne talahau e ia ka fehagai a koe mo e tau kamatamata, to fakaoti e fekafekau haau ke he Atua. Maeke fēfē ia koe ke tali e paleko haana mo e fakakite e mahani fakamooli haau ke he Atua, tuga ne taute e Iopu?

OMAOMA E TAU POAKI HA IEHOVA

17. Ko e heigoa e matapatu kakano ke omaoma ke he tau poaki ha Iehova?

17 Maeke ia koe ke tali e paleko ha Satani he moui ke he puhala ne fakafiafia e Atua. Ko e heigoa ne putoia ke he mena nei? Ne tali he Tohi Tapu: “Kia fakaalofa a koe kia Iehova hau a Atua mo e hau a loto katoa, mo e hau a agaga katoa, mo e hau a malolo katoa.” (Teutaronome 6:5) He tupu e fakaalofa haau ma e Atua, to puke a koe he manako ke taute e tau mena ne manako a ia ki a koe. “Ko e fakaalofa ke he Atua hanai,” he tohia he aposetolo ko Ioane, “kia omaoma a tautolu ke he tau poaki hana.” Kaeke fakaalofa a koe ki a Iehova mo e haau a loto katoa, to mailoga e koe kua “nakai mamafa foki hana tau poaki.”1 Ioane 5:3.

18, 19. (a) Ko e heigoa e falu poaki ha Iehova? (Kikite puha ne mataulu “ Tiaki e Tau Mena ne Vihiatia e Iehova.”) (e) Iloa fēfē e tautolu kua nakai lahi mahaki e mena ne amanaki e Atua mai ia tautolu?

18 Ko e heigoa e tau poaki ha Iehova? Falu kua putoia ai e tau mahani ne lata ia tautolu ke kalo mai ai. Ke fakatai, mailoga e puha ne mataulu “ Tiaki e Tau Mena ne Vihiatia e Iehova.” To kitia ai e koe e tau mahani ne vihiatia mooli he Tohi Tapu. He onoono fakamua ki ai, liga kua nakai kelea lahi e falu mahani ne tohi i ai. Ka e he mole e manamanatu fakahokulo ke he tau kupu tohi ne fakakite, to liga kitia e koe e pulotu he tau matafakatufono ha Iehova. He taute e tau hikiaga ke he mahani haau ka liga ko e paleko lahi mahaki ki a koe. Ka ko e moui ke he puhala ne fakafiafia e Atua ka tamai e mauokafua mo e fiafia lahi. (Isaia 48:17, 18) Ti ko e mena kua maeke foki ia koe ke moua. Iloa fēfē e tautolu e mena ia?

19 Kua nakai lahi e mena ne amanaki mai a Iehova ki a tautolu ke he mena kua fahia a tautolu ki ai. (Totou Teutaronome 30:11-14.) Kua iloa mitaki e ia e tau mena kua fahia mo e tau kaupāaga  ha tautolu ke he mena ne iloa e tautolu. (Salamo 103:14) Mua atu, maeke ia Iehova ke foaki ki a tautolu e malolō ke omaoma ki a ia. Ne tohia he aposetolo ko Paulo: “Kua fakamoli e Atua, he nakai tuku atu e ia a mutolu ke he kamatamata kua mua ke he mena kua fahia ai a mutolu, ka e taute foki e ia fakalataha mo e kamatamata e mena ke hao ai, kia fahia a mutolu ke fakauka ai.” (1 Korinito 10:13) Ke lagomatai a koe ke fakauka, maeke foki ia Iehova ke foaki ki a koe e “lahi ue atu he malolo.” (2 Korinito 4:7) He mole e fakauka ke he tau kamatamata loga, kua maeke ia Paulo ke talahau: “Kua maeke ia au e tau mena oti kana ke he fakamalolo mai [“he Atua,” NW] kia au.”Filipi 4:13.

 FEAKI E TAU MAHANI ATUA

20. Ko e heigoa e tau mahani Atua kua lata ia koe ke feaki, mo e ko e ha ne aoga ai e tau mena nei?

20 Mooli, kua fai mena foki ne putoia he fakafiafia a Iehova mai he fakaheu noa e tau mena ne vihiatia e ia. Kua lata foki ia koe ke fiafia ke he tau mena ne fiafia a ia ki ai. (Roma 12:9) Kua nakai kia tata lahi a koe ki a lautolu ne tatai e tau manatu, tau fiafiaaga, mo e tau manako mo e haau? Kua pihia foki a Iehova. Kia ako ai ke fiafia ke he tau mena ne fiafia a Iehova ki ai. Ko e falu mena nei kua fakamaama he Salamo 15, ne totou ai e  tautolu hagaao ki a lautolu ne mailoga he Atua ko e tau kapitiga haana. (Totou Salamo 15:1-5.) Kua fakakite he tau kapitiga ha Iehova e mena ne ui he Tohi Tapu ‘ko e fua he agaga.’ Kua ha ha ai e tau mahani tuga e “fakaalofa, ko e fiafia, ko e mafola, ko e fakauka, ko e totonu, ko e mahani mitaki, ko e tua, ko e mahani molu, mo e manako fakalatalata.”Kalatia 5:22, 23.

21. Ko e heigoa ka lagomatai a koe ke feaki e tau mahani Atua?

21 He totou mo e fakaako tumau e Tohi Tapu ka lagomatai a koe ke feaki e tau mahani Atua. Mo e fakaako hagaao ke he mena ne manako mai e Atua ka lagomatai a koe ke felauaki e tau manatu haau mo e puhala he Atua. (Isaia 30:20, 21) Ka ati fakalahi e koe e fakaalofa haau ma Iehova, to manako lahi a koe ke moui he puhala ka fakafiafia e Atua.

22. Ko e heigoa ka moua e koe kaeke moui a koe he puhala kua fakafiafia e Atua?

22 Kua lata ke lali ke moui ke he puhala kua fakafiafia a Iehova. Ne fakatatai he Tohi Tapu e hikiaga he haau a moui ke he aaki kehe he tagata tuai mo e tapulu e tagata foou. (Kolose 3:9, 10) Ka e hagaao ke he tau poaki ha Iehova, ne tohia he salamo: “Kua lahi foki e totogi ka taofi ki ai.” (Salamo 19:11) To kitia foki e koe kua lahi mahaki e palepale he moui ke he puhala ne fakafiafia e Atua. He taute pihia, to foaki e koe e tali ke he paleko ha Satani mo e ke fakafiafia e loto ha Iehova!

^ para. 16 Kua nakai kakano e mena nei ko lautolu ne totoko ki a koe kua haia he pule ha Satani. Ka ko Satani ko e atua he fakatokaaga nei, ti ko e lalolagi katoa ha he pule haana. (2 Korinito 4:4; 1 Ioane 5:19) Ti kua lata ia tautolu ke iloa ko e moui ke he puhala mahani Atua to nakai talahaua, mo e to totoko falu ki a koe.