Skip to content

Skip to table of contents

Tau Fakamoli a Iehova

Fifili e vagahau Faka-Niue

 VEVEHEAGA HOGOFULU MA HIVA

Fakatumau ke he Fakaalofa he Atua

Fakatumau ke he Fakaalofa he Atua
  • Ko e heigoa e kakano ke fakaalofa ke he Atua?

  • Maeke fēfē ia tautolu ke fakatumau ke he fakaalofa he Atua?

  • To palepale fēfē e Iehova a lautolu ne fakatumau ke he fakaalofa haana?

To taute nakai e koe a Iehova mo kolo haau he magahala he tau magaaho tō afā nei?

1, 2. Kua moua e tautolu i fe e maluaga haohao mitaki he vahā nei?

KIA fakatino e koe a koe hane fano hui he puhalatū he aho tō afā. Ne kamata e lagi ke uli. Kamata e hila ke lupa, pakū e lagi, ti tō lipilipi e uha. Ne kumi fakaave a koe ke he taha mena ke fakamalu ai. Ti, he kauhala, ne kitia e koe e mena ke fakamalu ai. Kua mau, mōmō, mo e hagahaga mitaki. Kua fakaaue lahi a koe ma e fakamaluaga haohao mitaki pihia!

2 Kua nonofo a tautolu he tau magaaho tō afā. Ko e tau tutūaga he lalolagi kua holo ki mua e kelea. Ka kua ha ha ai e maluaga haohao mitaki, ko e kolo ka puipui mai a tautolu he hagahagakelea tukulagi. Ko e heigoa e mena ia? Mailoga e mena ne fakaako he Tohi Tapu: “To pehe atu au kia Iehova, Ko e haku a kolo, mo e haku a taue; ko e haku a Atua kua falanaki au kia ia.”Salamo 91:2.

3. Maeke fēfē ia tautolu ke eke a Iehova mo kolo ha tautolu?

3 Manamanatu la ke he mena ia! Ko Iehova, ko e Tufuga mo e Pule Katoatoa he lagi mo e lalolagi, kua eke mo kolo ke puipui a tautolu.  Maeke ia ia ke puipui a tautolu, ha kua mua ue atu e malolō haana ke he ha tagata po ke ha mena ka totoko mai ki a tautolu. Pete ni ka fakahagahagakelea a tautolu, kua maeke ia Iehova ke utakehe e tau lauiaaga kelea oti. Maeke fēfē ia tautolu ke taute a Iehova mo kolo ha tautolu? Kua lata ia tautolu ke falanaki ki a ia. Mua atu, ne fakamafana he Kupu he Atua a tautolu: “Kia fakatumau e mutolu a mutolu ke he fakaalofa he Atua.” (Iuta 21) Ē, kua lata ia tautolu ke fakatumau ke he fakaalofa he Atua, he fakatumau e pipiaga fakaalofa mo e Matua ha tautolu he lagi. Mogoia ka mauokafua ai ha ko ia e kolo ha tautolu. Ka e maeke fēfē ia tautolu ke feaki e pipiaga pihia?

MAILOGA MO E TALI ATU KE HE FAKAALOFA HE ATUA

4, 5. Ko e heigoa e falu a puhala ne fakakite e Iehova e fakaalofa ma tautolu?

4 Ke fakatumau ke he fakaalofa he Atua, kua lata ia tautolu ke loto fakaaue ke he puhala ne fakakite mai e Iehova e fakaalofa haana ma tautolu. Manamanatu ke he falu a fakaakoaga he Tohi Tapu ne fakaako e koe he lagomatai he tohi nei. Ko e Tufuga, kua foaki mai e Iehova e lalolagi mo kaina fulufuluola ha tautolu. Kua fakapuke aki e ia e tau mena kai mo e tau vai loga, tau koloa pauaki he lalolagi, tau momoui ofoofogia he tau manu, mo e tau takatakaiaga fulufuluola. Ko e Punaaga he Tohi Tapu, ne fakakite he Atua e higoa mo e tau mahani haana ki a tautolu. Mua atu foki, ne fakakite he haana a Kupu ne fakafano mai e ia e Tama fakahele haana ke he lalolagi, ti fakaatā a Iesu ke mamahi mo e mate ma tautolu. (Ioane 3:16) Ti ko e heigoa e kakano he mena fakaalofa ia ma tautolu? Kua foaki ki a tautolu e amaamanakiaga ma e vahā homo ue atu anoiha.

5 Ko e amaamanakiaga ha tautolu ma e anoiha kua fakavē foki ke he taha mena ne taute he Atua. Ne fakatū e Iehova e fakatufono he lagi, ko e Kautu faka-Mesia. Nakai leva to fakaotioti e tau matematekelea oti mo e eke e lalolagi mo parataiso. Manamanatu la! Kua maeke ia tautolu ke moui mafola mo e fiafia tukulagi. (Salamo 37:29) He magaaho tonu nei, kua foaki mai he Atua e takitakiaga ke moui ke he puhala mitaki lahi. Kua foaki mai foki e ia ki a tautolu e mena fakaalofa he liogi, ko e atāina  ke fakatutala mo ia. Ko e falu ni a puhala anei ne fakakite e Iehova e fakaalofa ma e tau tagata tokologa mo e ki a koe tokotaha.

6. To liga tali atu fēfē e koe e fakaalofa ne fakakite e Iehova ki a koe?

6 Ko e hūhū aoga kua lata ia koe ke manamanatu ki ai hanei: Puhala fe ka tali atu e au ke he fakaalofa ha Iehova? Tokologa ka talahau, “Kua lata ia au ke fakaalofa atu foki ki a Iehova.” Pihia nakai e logonaaga haau? Ne talahau e Iesu kua mua atu e poakiaga nei: “Kia fakaalofa a koe ke he Iki [Iehova] hau a Atua mo e hau a loto katoa, mo e hau a agaga katoa, mo e hau a manatu katoa.” (Mataio 22:37) Kua ha ha mooli ia koe e tau kakano loga ke fakaalofa ki a Iehova ko e Atua. Ka e kua lata kia ke logona ni e koe kua ha ha ia koe e fakaalofa pihia ki a Iehova fakalataha mo e loto, agaaga, mo e manatu katoa haau?

7. Kua fai mena foki nakai ke fakaalofa ke he Atua, he logona noa ni e fakaalofa ki a ia? Fakamaama.

7 Tuga ne fakamaama he Tohi Tapu, ko e fakaalofa ke he Atua kua mua atu ke he logonaaga. Ko e mooli, pete kua aoga lahi e logonaaga he fakaalofa ma Iehova, ko e logonaaga ia ko e kamataaga he fakaalofa mooli ki a Ia. Ko e tega apala kua aoga lahi ke he tupuaga he apala ne fua. Kaeke manako a koe ke he fua apala, to fiafia nakai a koe ka atu he taha tagata e tega apala? Nakai! Tatai foki, ko e logonaaga he fakaalofa ma Iehova ko e Atua ko e kamataaga hokoia. Ne fakaako he Tohi Tapu: “Ko e fakaalofa ke he Atua hanai, kia omaoma a tautolu ke he tau poaki hana; nakai mamafa foki hana tau poaki.” (1 Ioane 5:3) Ke mooli, kua lata e fakaalofa ma e Atua ke fua mitaki. Kua lata ke fakakite ke he tau gahua.Totou Mataio 7:16-20.

8, 9. Maeke fēfē ia tautolu ke fakakite e fakaalofa mo e loto fakaaue ha tautolu ma e Atua?

8 Kua fakakite e tautolu e fakaalofa ke he Atua ka omaoma e tautolu e tau poakiaga haana mo e fakagahuahua haana a tau matapatu fakaakoaga. Kua nakai uka ke taute pihia. Mamao mai he mamafa, ko e tau matafakatufono ha Iehova kua talaga ke lagomatai a tautolu ke moui mitaki, fiafia, he makona. (Isaia 48: 17, 18) He moui fakatatau ke he takitakiaga ha Iehova, kua fakakite e tautolu ke he Matua ha tautolu he lagi e loto fakaaue mooli ke he tau mena oti ne taute e ia ma tautolu. Momoko ai, ha kua tokofiha ni e tagata he lalolagi he vahā nei ne fakakite e loto fakaaue pihia. Kua nakai manako a tautolu ke nakai loto fakaaue, ke tuga falu tagata ne momoui he vahā ne nofo a Iesu he lalolagi. Ne fakamaulu e Iesu hogofulu e tagata lepela, ka e taha ni ne liu ke fakaaue ki a ia. (Luka 17:12-17) Ti kua manako mooli a tautolu ke tatai mo ia ne loto fakaaue, nakai ke he tokohiva ne nakai loto fakaaue!

9 Ko e heigoa, mogoia, e tau poakiaga ha Iehova ne kua lata ia tautolu ke omaoma? Kua fai tuai ne fitā he fakatutala a tautolu ki ai he tohi nei, ka e liliu a tautolu ke fakamanatu e falu. Ke omaoma ke he tau poakiaga he Atua ka lagomatai a tautolu ke fakatumau ke he fakaalofa Haana.

FAKATATA FAKALAHI ATU KI A IEHOVA

10. Fakamaama e kakano ne aoga ai ke fakatumau ke fakaako hagaao ki a Iehova ko e Atua.

10 He ako hagaao ki a Iehova ko e lakaaga aoga lahi ke fakatata fakalahi atu ki a ia. Ko e fakaholoaga kua nakai  lata ke fakaoti. Kaeke kua mūmū a koe he afi i fafo he pō makalili lahi, to toka nakai e koe e afi ke puho tote ti mate tuai? Nakai. To tafu aki e koe e tau gaafi ke tumau e kakā mo e vela. Liga kua falanaki ni e moui haau ki ai! Tuga e tau gaafi ne tafu aki e afi, to fakamalolō tumau pihia he “iloilo ke he Atua” e fakaalofa ha tautolu ma Iehova.Tau Fakatai 2:1-5.

Tuga e afi, kua lata e fakaalofa haau ma Iehova ke tafu ke kakā tumau

11. Ko e heigoa e lauiaaga he tau fakaakoaga ha Iesu ke he tau tutaki haana?

11 Kua manako a Iesu ke he tau tutaki haana ke fakatumau e fakaalofa ha lautolu ma Iehova mo e Haana Kupu uho mooli, ke moui mo e kakā lahi. He mole e liu tu mai haana, ne fakaako e Iesu e tau tutaki tokoua haana hagaao ke he falu a perofetaaga he tau Tohiaga Tapu Heperu ne fakamooli e ia. Ko e heigoa e lauiaaga? Ne talahau fakamui e laua: “Nakai kia velagia ha taua a tau loto ki loto ia taua he vagavagahau a ia mo taua ke he puhala, he fakamatala mai foki e ia e tau Tohi kia taua?”Luka 24:32.

12, 13. (a) Ke he laulahi he tau tagata he vahā nei, ko e heigoa kua tupu ke he fakaalofa ma e Atua mo e Tohi Tapu? (e) Maeke fēfē ia tautolu ke puipui e fakaalofa ha tautolu neke momoko?

12 Fakamua to ako e koe e tau mena mooli ne fakaako he Tohi Tapu, mailoga nakai e koe kua kamata e loto haau ke velagia he fiafia, makutu, mo e fakaalofa ma e Atua? Kua mailoga mooli e koe. Tokologa foki ne pihia. Ko e paleko he mogonei ke fakatumau ke fakamoui e fakaalofa lahi ia mo e lagomatai ai ke tupu. Kua nakai manako a tautolu ke mumui ke he puhala he lalolagi nei. Ne talahau tuai e Iesu: “[To] momoko foki e tau loto he tau tagata tokologa.” (Mataio 24:12) Maeke fēfē ia koe ke puipui haau a fakaalofa ma Iehova mo e tau kupu mooli he Tohi Tapu neke momoko?

13 Kia fakatumau ke fakaako hagaao ki a Iehova ko e Atua mo Iesu Keriso. (Ioane 17:3) Kia manamanatu fakahokulo hagaao ke he tau mena ne ako e koe mai he Kupu he Atua, ti hūhū hifo: ‘Ko e heigoa ne fakaako he mena nei ki a au hagaao ki a Iehova ko e Atua? Ko e heigoa foki taha kakano ne fakakite mai ki a au ke fakaalofa au ki a ia mo e loto katoa, manatu katoa, mo e agaaga katoa?’ (Totou 1 Timoteo 4:15.) To fakatumau he manamanatu fakahokulo pihia e fakaalofa haau ma Iehova ke kakā lahi.

14. Maeke fēfē he liogi ke lagomatai a tautolu ke fakatumau ke fakamoui e fakaalofa ha tautolu ma Iehova?

 14 Taha puhala foki ke fakatumau e fakaalofa haau ma Iehova ke kakā lahi ko e liogi tumau. (1 Tesalonia 5:17) He Veveheaga 17 he tohi nei, ne fakaako e tautolu ko e liogi ko e mena fakaalofa uho mai he Atua. Ke tuga e tau fakafetuiaga he tagata ne tupu olaola he matutaki tumau, ti ko e fakafetuiaga ha tautolu mo Iehova kua tumau ke mafanatia mo e moui ka liogi tumau a tautolu ki a ia. Kua aoga lahi ai ke nakai talahau teao e tau liogi ha tautolu—he fatiaki tumau e tau kupu ne nakai fai logonaaga po ke kakano mooli. Kua lata ia tautolu ke vagahau ki a Iehova ke tuga e tama tote ke he matua taane fakahele. Mooli, kua manako a tautolu ke vagahau fakalilifu, mo e atāina, fakamooli, ti mai he loto. (Salamo 62:8) Ē, ko e fakaako Tohi Tapu fakatagata mo e liogi mai he loto, ko e tau vala aoga lahi he tapuakiaga ha tautolu, mo e lagomatai he tau mena ia a tautolu ke fakatumau ke he fakaalofa he Atua.

MOUA E OLIOLI HE TAPUAKIAGA HAAU

15, 16. Ko e ha kua lata ia tautolu ke mailoga e gahua fakamatala he Kautu ko e monuina mo e koloa tokiofa?

15 Ko e fakaakoaga Tohi Tapu fakatagata mo e liogi ko e tau mena he tapuakiaga ka taute e tautolu takitokotaha. Ka kia fakatutala a tautolu mogonei ke he vala he tapuakiaga ne taute e tautolu ke he toloaga tagata: fakamatala ke he falu hagaao ke he tau taofiaga ha tautolu. Kua fitā kia he talahau e koe e kupu mooli he Tohi Tapu ke he falu? Kaeke pihia, kua olioli e koe e monuina homo ue atu. (Luka 1:74) He folafola e tautolu e kupu mooli ne fakaako e tautolu hagaao ki a Iehova ko e Atua, kua taute e tautolu e kotofaaga aoga lahi ne foaki ke he tau Kerisiano mooli oti—ko e fakamatala he tala mitaki ke he Kautu he Atua.Totou Mataio 24:14; 28:19, 20.

16 Ne mailoga he aposetolo ko Paulo e fekafekauaga haana ko e mena uho, ti ui ai ko e koloa tokiofa. (2 Korinito 4:7) He tutala ke he tau tagata hagaao ki a Iehova ko e Atua mo e tau finagalo haana ko e gahua mitaki lahi ne kua maeke ia koe ke taute. Ko e gahua ke he Iki mitaki lahi, ti tamai e tau aoga kua mitaki lahi. He putoia ke he gahua nei, kua lagomatai e koe e tau  tagata loto fakamooli ke fakatata atu ke he Matua ha tautolu he lagi mo e ō he puhala ke he moui tukulagi! Ko e heigoa foki taha gahua ne palepale mitaki pihia? Mua atu, he fakamatala hagaao ki a Iehova mo e Kupu haana kua fakamalikiti e tua haau mo e fakamalolō e fakaalofa haau ma haana. Ti kua loto fakaaue a Iehova  ke he tau laliaga haau. (Heperu 6:10) He fakamakamaka fakalahi ke he gahua pihia ka lagomatai a koe ke fakatumau ke he fakaalofa he Atua.Totou 1 Korinito 15:58.

17. Ko e ha ne mafiti ai e fekafekau faka-Kerisiano he vahā nei?

17 Kua aoga ke manatu kua mafiti lahi e gahua fakamatala he Kautu. Ne talahau he Tohi Tapu: “Kia fakamatala atu e koe e kupu, kia fakamalolo a koe.” (2 Timoteo 4:2) Ko e ha kua mafiti lahi ke taute e gahua ia he vahā nei? Ne talamai e Kupu he Atua ki a tautolu: “Kua tata mai e aho lahi a Iehova, kua tata mai ni, kua fakaave mai ni.” (Sefanaia 1:14) Ē, kua mafiti mai e magaaho ka tamai e Iehova e fakatokaaga katoa nai ke he fakaotiaga. Kua lata ke hataki e tau tagata! Lata ia lautolu ke iloa ko e magaaho anei ke fifili a Iehova mo Pule Katoatoa ha lautolu. To “nakai mule mai” e moumouaga!Hapakuka 2:3.

18. Ko e ha kua lata ia tautolu ke tapuaki a Iehova ki mua he toloaga tagata fakalataha mo e tau Kerisiano mooli?

18 Kua manako a Iehova ki a tautolu ke tapuaki a ia ki mua he toloaga tagata he fakalataha mo e tau Kerisiano mooli. Kakano haia ne tala mai e Kupu haana: “Kia manatu foki a tautolu ko e taha ke he taha, ke fakalagalaga ai e fakaalofa mo e tau gahua mitaki; aua neke tiaki e fakapotopotoaga ha tautolu tuga ne mahani he falu, ka kia fefakamafanaaki; kia au atu ai foki he pihia ha kua kitia e mutolu kua tata tuai e aho.” (Heperu 10:24, 25) He magaaho ne fakalataha a tautolu mo e tau katofia talitonu ke he tau feleveiaaga Kerisiano, kua ha ha ia tautolu e magaaho homo ue atu ke fakaheke mo e tapuaki e Atua fakahele ha tautolu. Kua atihake foki mo e fakamalolō e tautolu e taha mo e taha.

19. Maeke fēfē ia tautolu ke gahua ke fakamalolō e tau pipiaga he fakaalofa i loto he fakapotopotoaga Kerisiano?

19 He fakalataha a tautolu mo e falu tagata tapuaki ha Iehova, kua fakamalolō e tautolu e tau pipiaga he fakaalofa mo e aga kapitiga i loto he fakapotopotoaga. Kua lata ke mailoga e tautolu e mitaki he falu, tuga ne kitia e Iehova e mitaki ia tautolu. Aua neke amanaki ke mitaki katoatoa e tau matakainaga talitonu haau. Kia manatu kua kehekehe e tau tutūaga he tutupu fakaagaaga ha tautolu mo e kua hehē e tau tagata oti kana. (Totou Kolose 3:13.) Kia lali ke feaki e fakakapitiga tata mo lautolu ne  lahi e fakaalofa ki a Iehova, to kitia ai e koe a koe hane tupu fakaagaaga. Ē, he tapuaki a Iehova mo e tau matakainaga fakaagaaga haau ka lagomatai a koe ke fakatumau ke he fakaalofa he Atua. Palepale fēfē e Iehova a lautolu ne tapuaki mo e tua fakamooli ki a ia ti fakatumau ke he fakaalofa haana?

FOLI ATU KE HE ‘MOUI MOLI’

20, 21. Ko e heigoa e ‘moui moli,’ ti ko e ha kua homo ue atu e amaamanakiaga ia?

20 Kua palepale e Iehova e tau fekafekau tua fakamooli haana aki e moui, ka ko e moui fēfē? Kua moui mooli nakai a koe mogonei? Tokologa ia tautolu ka talahau fakamoli kua moui a tautolu. Ha kua fafagu a tautolu, kai a tautolu, mo e inu a tautolu. Ti mooli ni kua momoui a tautolu. Ti he tau magaaho fiafia lahi, liga to pehē foki a tautolu, “Ko e moui mooli anei!” Ka e, fakakite he Tohi Tapu, kua nakai fai tagata he vahā nei kua moui mooli ke he taha kakano kua aoga.

Manako a Iehova ke olioli e koe e ‘moui moli.’ To olioli nakai e koe?

21 Ne fakamalolō he Kupu he Atua a tautolu ke ‘toto atu ke he moui moli.’ (1 Timoteo 6:19) Kua fakakite he tau kupu ia ko e ‘moui moli’ ko e taha mena ne amaamanaki a tautolu ke moua anoiha. Ē, he magaaho ka mitaki katoatoa a tautolu, to moui laia a tautolu ke he kakano katoatoa he kupu ia, ha kua nonofo ai a tautolu ke tuga e manako fakamua he Atua. He magaaho ka nonofo a tautolu he lalolagi parataiso mo e mitaki katoatoa e malolō tino, mafola, mo e fiafia, to olioli laia e tautolu e ‘moui moli’—ko e moui tukulagi. (1 Timoteo 6:12) Nakai kia kua homo ue atu e amaamanakiaga ia?

22. Maeke fēfē ia koe ke ‘toto atu ke he moui moli’?

22 Maeke fēfē ia tautolu ke ‘toto atu ke he moui moli’? Ke he tau kupu ia ni, ne fakamalolō e Paulo e tau Kerisiano “kia mahani mitaki” mo e ‘kia maukoloa ke he tau gahua mitaki.’ (1 Timoteo 6:18) Mahino ai mogoia, kua fakavē lahi ni ke he puhala ka fakagahua e tautolu e kupu mooli ne fakaako e tautolu mai he Tohi Tapu. Ka e, kakano kia a Paulo kua latatonu ia tautolu ke moua e ‘moui moli’ he taute e tau gahua mitaki? Nakai, ha ko e tau amaamanakiaga mitaki lahi pihia kua fakavē mooli ni ke he “fakaalofa noa” ne moua e tautolu mai he Atua. (Roma  5:15) Pete ni ia, kua fiafia lahi a Iehova ke palepale a lautolu ne fekafekau tua fakamooli ki a ia. Kua manako a ia ke kitia a koe ne moui ke he ‘moui moli.’ Ko e moui fiafia, moui mafola, mo e moui tukulagi pihia kua ha ha i mua ma lautolu ne fakatumau ke he fakaalofa he Atua.

23. Ko e ha ne aoga lahi ai ke fakatumau ke he fakaalofa he Atua?

23 Kua lata ia tautolu takitokotaha ke hūhū hifo, ‘Kua tapuaki nakai au ke he Atua ke he puhala ne fakatoka mai e ia i loto he Tohi Tapu?’ Ka kumikumi fakamooli hifo a tautolu ki a tautolu ni he tau aho oti, ti ka mooli e tali, kua ha ha ai a tautolu he puhala hako. Kua mauokafua ai a tautolu ha ko Iehova e kolo ha tautolu. To puipui e ia e tau tagata tua fakamooli haana he tau aho fakahiku tupu lekua nei he fakatokaaga tuai. To fakahao foki e Iehova a tautolu ke he fakatokaaga lilifu foou hane tata mai. Ko e fiafia ha ia ha tautolu ke kitia e magaaho ia! Mo e to fiafia lahi foki a tautolu he taute e tau fifiliaga hako he tau aho fakamui nei! Kaeke taute e koe he mogonei e tau fifiliaga ia, to olioli e koe e ‘moui moli,’ ko e moui ne manako a Iehova ko e Atua ki ai, ke hoko ke he tukulagi tukumuitea!