Skip to content

Skip to table of contents

Tau Fakamoli a Iehova

Fifili e vagahau Faka-Niue

 VEVEHEAGA TOLU

Ko e Heigoa e Finagalo he Atua ma e Tau Tagata?

Ko e Heigoa e Finagalo he Atua ma e Tau Tagata?

1. Ko e heigoa e finagalo he Atua ma e tau tagata?

KUA ha ha he Atua e finagalo mua ue atu ma e tau tagata. Tufugatia e ia e tagata taane mo e fifine fakamua ko Atamu mo Eva ke nonofo he kaina fulufuluola. Ko e finagalo haana ma laua ke fanafanau, ke taute e lalolagi katoa mo parataiso, mo e leveki e tau manu.​—Kenese 1:28; 2:8, 9, 15; kikite Tala he Matahiku 6.

2. (a) Iloa fēfē e tautolu to taute he Atua e mena ne finagalo a ia ki ai? (e) Ko e heigoa e talahauaga he Tohi Tapu hagaao ke he moui tukulagi?

2 Manatu nakai a koe to nonofo a tautolu he parataiso? Tala mai e Iehova ki a tautolu: “Ne fafati e au, to eke ai ni e au.” (Isaia 46:9-11; 55:11) Ē, to taute e ia e mena ne fafati po ke finagalo a ia ki ai, ti nakai fai mena ke taofi a ia. Pehē a Iehova na fai kakano ati tufuga e ia e lalolagi. Ne “nakai eke noa ai e ia.” (Isaia 45:18) Manako a ia ke he tau tagata ke nonofo he lalolagi katoa. Ko e tau tagata fēfē ne manako e Atua ke nonofo he lalolagi, mo e ke fiha e leva? Pehē e Tohi Tapu: “To eke ni e motu ma e tau tagata tututonu [po ke, omaoma], to nonofo muatua ai a lautolu.”​—Salamo 37:29; Fakakiteaga 21:3, 4.

3. Ha kua gagao e tau tagata ti mamate, liga ko e heigoa e hūhū haau?

3 Ka e he vahā nei, ko e tau tagata kua gagao ti mamate. Ke he loga e matakavi, ne latau a lautolu ti kelipopo he taha e taha. Nakai ko e finagalo he Atua anei. Ti ko e heigoa ne tupu, mo e ko e ha? Ko e Tohi Tapu ni kua maeke ke fakamaama.

 KO E FĪ HE ATUA

4, 5. (a) Ko hai ne vagahau ki a Eva he puhala he gata he kaina ko Etena? (e) Maeke fēfē e tagata fakamooli ke eke mo tagata kaihā?

4 Tala mai e Tohi Tapu ki a tautolu na fai fī e Atua ne “higoa ko e tiapolo, ko Satani.” Fakaaoga e Satani e gata ke vagahau ki a Eva he kaina ko Etena. (Fakakiteaga 12:9; Kenese 3:1) Taute e ia ke tuga ko e gata ne vagahau.​—Kikite Tala he Matahiku 7.

5 Ti ko e Atua kia ne tufugatia a Satani ko e Tiapolo? Nakai! Ko e agelu ne haia he lagi he magaaho ne tauteute he Atua e lalolagi ma Atamu mo Eva kua hiki ti eke mo Tiapolo. (Iopu 38:4, 7) Maeke fēfē e mena ia? Ka e hiki fēfē la e tagata fakamooli ti eke mo tagata kaihā? Nakai fanau mai a ia ko e tagata kaihā. Ka kua manako lahi a ia ke he taha mena ne nakai ko e haana. Ne manamanatu tumau a ia ki ai, ti malolō fakahaga e manako kelea haana. Ti ka moua e ia e magaaho, ne kaihā ai e ia. Kua hiki ne ia a ia mo tagata kaihā.​—Totou Iakopo 1:13-15; kikite Tala he Matahiku 8.

6. Puhala fe ne eke e agelu mo fī he Atua?

6 Ko e mena nei ne tupu ke he agelu ia. He tufugatia e Iehova a Atamu mo Eva, ne tala age a Ia ke fanafanau mo e “fakapuke foki e lalolagi.” (Kenese 1:27, 28) Liga manatu e agelu ia, ‘Ko e tau tagata oti ia kua lata ke tapuaki mai ki a au ka e nakai ki a Iehova!’ He manamanatu lahi a ia ki ai, ne lahi foki e manako haana ke he mena ne moua e Iehova. Manako e agelu ia ke tapuaki e tau tagata ki a ia. Ti pikopiko a ia ki a Eva mo e fakahehē a Eva. (Totou Kenese 3:1-5.) He taute pihia, ne eke a ia mo Satani ko e Tiapolo, ko e fī he Atua.

7. (a) Ko e ha ne mamate a Atamu mo Eva? (e) Ko e ha kua fuakau a tautolu ti mamate?

7 Ne nakai omaoma a Atamu mo Eva ke he Atua ti kai e fua he akau. (Kenese 2:17; 3:6) Agahala a laua ki a Iehova  ti mamate he magaaho fakamui, tuga ni ne talahau e Iehova ka hoko ki a laua. (Kenese 3:17-19) Ne agahala foki e tau fanau ha Atamu mo Eva ti mamate a lautolu. (Totou Roma 5:12.) Ke lagomatai a tautolu ke maama e kakano ne agahala foki e tau fanau ha Atamu mo Eva, hanei e fakatai. Manamanatu ke he falaoa ne tao i loto he apa ne malopo. To malopo, po ke mau foki e pite he fua falaoa tuga e apa tao falaoa. Magaaho ne nakai omaoma a Atamu ke he Atua, ne eke a ia mo tagata agahala. Ha ko tautolu ko e tau fanau ha Atamu, ko e tau tagata agahala a tautolu oti, po ke moua foki he “pite” tuga a ia. Ha ko e tau tagata agahala mogoia a tautolu oti, kua fuakau a tautolu ti mamate.​—Roma 3:23; kikite Tala he Matahiku 9.

8, 9. (a) Ko e heigoa ne manako a Satani ke talitonu a Atamu mo Eva ki ai? (e) Ko e ha ne nakai tamate e Iehova a lautolu ne totoko he magaaho ia ni?

8 Kamata e Satani e totokoaga ki a Iehova he magaaho ne fakaohooho e ia a Atamu mo Eva ke nakai omaoma ke he Atua. Manako a ia ki a Atamu mo Eva ke talitonu ko Iehova ko e pikopiko, ko e takitaki mahani kelea ne nakai manako ke moua e laua e tau mena mitaki. Pehē a Satani kua nakai lata e tau tagata ke tala age he Atua e tau mena ke taute ti lata a Atamu mo Eva ke fifili ni e laua e mena hako mo e hepe. Ko e heigoa mogoia ha Iehova ka taute? Maeke a ia ke tamate e tau tagata totoko ti fakaoti e totokoaga. Ka e to fakakite nakai he mena ia ko Satani ko e pikopiko? Nakai.

9 Ko e mena ia ati nakai tamate e Iehova a lautolu ne totoko he magaaho ia ni. Ka e fakaatā e ia taha magaaho ma e tau tagata ke pule ki a lautolu ni. To kitia maaliali mai he mena nei ko Satani ko e pikopiko mo e ko Iehova ne iloa e tau mena kua mitaki lahi ma e tau tagata. To fakaako foki a tautolu ke he mena ia he Veveheaga 11. Ka ko e heigoa e manatu haau ke he fifiliaga ha Atamu mo Eva? Hako kia a laua ke talitonu ki a Satani ka e nakai  omaoma ke he Atua? Ko Iehova ne age ki a Atamu mo Eva e tau mena oti kana ha laua. Age e ia e moui mitaki katoatoa, kaina fulufuluola ke nonofo ai, mo e gahua ne fiafia a laua ki ai. Ka e nakai fai mena mitaki a Satani ne taute ma laua. Kaeke ko koe i ai, liga ko e heigoa haau ka taute?

10. Ko e heigoa e fifiliaga aoga ha tautolu takitokotaha?

10 He vahā nei, igatia a tautolu mo e fifiliaga pihia ke  taute, ti fakavē e moui ha tautolu ke he fifiliaga ia. Maeke a tautolu ke fifili ke omaoma ki a Iehova ko e Pule ha tautolu mo e lagomatai ke fakakite ko Satani ko e pikopiko. Po ke maeke a tautolu ke fifili a Satani mo pule ha tautolu. (Salamo 73:28; totou Tau Fakatai 27:11.) Gahoa ni e tagata he lalolagi nei ne omaoma ke he Atua. Lafi foki, nakai pule a ia ke he lalolagi. Ka nakai pule e Atua, ti ko hai e pule?

KO HAI NE PULE KE HE LALOLAGI?

Ka nakai pule a Satani ke he tau kautu oti he lalolagi, to liga foaki age nakai e ia ki a Iesu?

11, 12. (a) Ko e heigoa ne fakaako mai e tautolu he mena ne foaki e Satani ki a Iesu? (e) Ko e heigoa e tau kupu Tohi Tapu ne fakakite ko Satani e pule ke he lalolagi?

11 Iloa e Iesu ko hai mooli ne pule ke he lalolagi. He taha magaaho, ko Satani ne “fakakite atu foki kia ia [Iesu] e tau kautu oti he lalolagi, mo e lilifu ha lautolu.” Ti mavehe a Satani ki a Iesu: “To ta atu e au e tau mena oti nai kia koe, kaeke ke fakaveli [po ke, tukutukuhifo] mo e hufeilo mai a koe kia au.” (Mataio 4:8, 9; Luka 4:5, 6) Hūhū ki a koe ni, ‘Ka nakai pule a Satani ke he tau kautu ia, to liga foaki age nakai e ia ki a Iesu?’ Nakai. Ko Satani ne pule ke he tau fakatufono oti.

12 Liga manamanatu a koe: ‘Maeke fēfē a Satani ke pule ke he lalolagi? Nakai kia ko Iehova e Atua Malolō Ue Atu ne tufugatia e lagi mo e lalolagi katoatoa?’ (Fakakiteaga 4:11) Ē, ko ia, ka e talahau fakamaaliali e Iesu a Satani ko e “iki he lalolagi nai.” (Ioane 12:31; 14:30; 16:11) Fakahigoa he aposetolo ko Paulo a Satani ko e Tiapolo ko e “atua he lalolagi nai.” (2 Korinito 4:3, 4) Ti tohi he aposetolo ko Ioane “ko e lalolagi oti ha he pule hana kua mahani kelea.”​—1 Ioane 5:19.

TO MOUMOU FĒFĒ E LALOLAGI HA SATANI?

13. Ko e ha kua lata ma tautolu ke hoko mai e lalolagi foou?

13 Ko e lalolagi nei kua au atu e hagahaga kelea. Kitia  e tautolu e tau felakutaki, kolokolovao, fakavai, mo e mahani favale kua takatakai ia tautolu. Nakai maeke e tau tagata ke utakehe e tau lekua oti nei, pete he lali fakalahi a lautolu. Ka e to nakai leva ti utakehe katoatoa he Atua e lalolagi kelea nei ka hoko e tauaga haana i Amaketo, ti hukui e ia aki e lalolagi foou tututonu.​—Fakakiteaga 16:14-16; kikite Tala he Matahiku 10.

14. Ko hai kua fifili he Atua ke eke mo Patuiki he Haana Kautu? Ko e heigoa ne talahau tuai he Tohi Tapu hagaao ki a Iesu?

14 Fifili e Iehova a Iesu Keriso ke eke mo Patuiki he Haana fakatufono, po ke Kautu he lagi. He tau afe tau kua mole, ne talahau tuai he Tohi Tapu ko Iesu ka pule ko e “Iki he mafola” mo e to tumau tukulagi e fakatufono haana. (Isaia 9:6, 7) Fakaako e Iesu e tau tutaki haana ke liogi ma e fakatufono nei he pehē: “Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.” (Mataio 6:10) He Veveheaga 8, to fakaako a tautolu ke he puhala ka hukui he Kautu he Atua e tau fakatufono he lalolagi. (Totou Tanielu 2:44.) Ti taute mogoia he Kautu he Atua e lalolagi mo parataiso fulufuluola.​—Kikite Tala he Matahiku 11.

TATA MAI E LALOLAGI FOOU!

15. Ko e heigoa e “lalolagi fou”?

15 Mavehe mai he Tohi Tapu: “Ka e fakatalitali a tautolu ke he lagi fou mo e lalolagi fou,” mo e “ke nofo ai e tututonu.” (2 Peteru 3:13; Isaia 65:17) Falu magaaho ka tutala e Tohi Tapu ke he “lalolagi,” kua hagaao ai ke he tau tagata ne nonofo he lalolagi. (Kenese 11:1) Ti ko e “lalolagi fou” tututonu kua hagaao ke he tau tagata oti ne omaoma ke he Atua mo e fakamonuina e ia.

16. Ko e heigoa e mena fakaalofa kua mua e mitaki ka foaki he Atua ma lautolu ka momoui he lalolagi foou haana, ti ko e heigoa ha tautolu ka taute ke moua e mena fakaalofa nei?

16 Mavehe e Iesu ko lautolu ka momoui he lalolagi foou  he Atua to moua e “moui tukulagi.” (Mareko 10:30) Ko e heigoa ha tautolu ka taute ke moua e mena fakaalofa nei? Fakamolemole totou Ioane 3:16 mo e 17:3 ke moua e tali. To kitekite a tautolu mogonei ke he talahauaga he Tohi Tapu hagaao ke he tuaga he moui he lalolagi Parataiso.

17, 18. Iloa fēfē e tautolu to mafola e lalolagi katoa mo e to logona hifo e tautolu e haohao mitaki?

17 Ko e mahani kelea, felakutaki, matahavala, mo e favale to utakehe katoatoa. To nakai ha ha i ai ha tagata mahani kelea he lalolagi. (Salamo 37:10, 11) To ‘fakahiku he Atua e tau he lalolagi katoa.’ (Salamo 46:9; Isaia 2:4) To puke e lalolagi he tau tagata kua fakaalofa ke he Atua mo e omaoma ki a ia. To monuina, po ke mafola tukulagi.​—Salamo 72:7.

18 To logona hifo he tau tagata ha Iehova e haohao mitaki. He tau vahā Tohi Tapu, ka omaoma e tau Isaraela ke he Atua ne haohao mitaki a lautolu ha kua puipui e Ia a lautolu. (Levitika 25:18, 19) He Parataiso, to nakai matakutaku a tautolu he ha mena po ke ha tagata. To logona hifo tumau e tautolu e haohao mitaki!​—Totou Isaia 32:18; Mika 4:4.

19. Ko e ha ne mauokafua a tautolu to loga e tau mena kai he lalolagi foou he Atua?

19 To loga e tau mena kai. “To ha i ai e puke aloalolima he tau saito ke he motu, ki luga he fuga mouga.” (Salamo 72:16) Ko Iehova “ko e ha [tautolu] a Atua kua fakamonuina mai e ia a [tautolu]” mo e “fua mai he kelekele hana tau fua.”​—Salamo 67:6.

20. Iloa fēfē e tautolu to eke e lalolagi mo parataiso?

20 To eke e lalolagi katoa mo parataiso. To fulufuluola e tau fale mo e tau katene he tau tagata. (Totou Isaia 65:21-24; Fakakiteaga 11:18.) Ko e lalolagi katoa to fulufuluola tuga e kaina ko Etena. To foaki mai tumau e Iehova e tau  mena oti kua lata mo tautolu. Pehē e Tohi Tapu hagaao ki a ia: “Kua fakamafola e koe hāu a lima, mo e fakamakona e manako he tau mena momoui oti.”​—Salamo 145:16.

21. Iloa fēfē e tautolu to nonofo mafola e tau tagata mo e tau manu?

21 To nonofo mafola e tau tagata mo e tau manu. To nakai liu e tau manu ke fakapakia e tau tagata. To logona hifo he tau fanau e haohao mitaki, pihia foki ka fakalataha mo e tau manu ne favale ki a tautolu he vahā nei.​—Totou Isaia 11:6-9; 65:25.

22. Ko e heigoa ka taute e Iesu ma lautolu ne gagao?

22 To nakai fai tagata ka gagao. Magaaho ne nofo a Iesu he lalolagi, ne fakamaulu e ia e tau tagata tokologa. (Mataio 9:35; Mareko 1:40-42; Ioane 5:5-9) Ka ko e Patuiki a Iesu he Kautu he Atua, to fakamaulu e ia e tau tagata oti kana. To nakai pehē mai foki taha: “Kua gagao au.”​—Isaia 33:24; 35:5, 6.

23. Ko e heigoa ka taute he Atua ma lautolu ne mamate?

23 To liu momoui mai e tau tagata mamate. Mavehe e Atua to fakaliu tu mai e ia e tau miliona tagata ne mamate. To “liu foki tutu mai a lautolu kua mamate, ko lautolu ne tututonu katoa mo lautolu ne hepehepe.”​—Totou Ioane 5:28, 29; Gahua 24:15.

24. Fēfē e logonaaga haau ke moui he Parataiso?

24 Igatia a tautolu mo e fifiliaga. Maeke a tautolu ke fifili ke fakaako hagaao ki a Iehova mo e fekafekau ki a ia, po ke taute e tau mena kua manako a tautolu ki ai. Ka fifili a tautolu ke fekafekau ki a Iehova, to mitaki lahi e vahā anoiha ha tautolu. He magaaho ne ole e tagata ki a Iesu ke manatu a ia ka mate, ne mavehe a Iesu ki ai: To “fakalataha ai a taua mo koe i parataiso.” (Luka 23:43) To fakaako fakalahi foki a tautolu hagaao ki a Iesu Keriso mo e puhala ka fakamooli e ia e tau maveheaga mitaki ue atu he Atua.