Skip to content

Skip to table of contents

Tau Fakamoli a Iehova

Fifili e vagahau Faka-Niue

 VEVEHEAGA TAHA

Ko Hai e Atua?

Ko Hai e Atua?

1, 2. Ko e heigoa e tau hūhū ne fa hūhū he tau tagata?

LOGA e tau hūhū ne hūhū he tau fanau. Liga fakamaama e koe taha mena ki a lautolu, ka e fa hūhū a lautolu, ‘Ko e ha?’ Ti ka lali a koe ke tala age e tali, liga hūhū agaia a lautolu, ‘Ka ko e ha?’

2 He ikiiki po ke momotua a tautolu, fai hūhū a tautolu oti. Liga fai hūhū a tautolu ke he mena ka kai po ke tui po ke fakatau. Po ke liga fai hūhū aoga a tautolu hagaao ke he moui mo e vahā anoiha. Ka nakai moua e tautolu e tau tali mitaki ke he tau hūhū nei, liga fakaoti e kumi ha tautolu ke he tau tali.

3. Ko e ha ne manatu e tau tagata tokologa kua nakai maeke ke moua e tau tali ke he tau hūhū aoga ha lautolu?

3 Haia nakai he Tohi Tapu e tau tali ke he tau hūhū aoga ha tautolu? Falu tagata ne liga manatu kua fai, ka e logona hifo e lautolu kua uka lahi ke maama e Tohi Tapu. Liga manatu a lautolu ko e tau faiaoga po ke tau akoako ni ka fai tali. Mo e falu kua fuafuakelea lahi ke talahau kua nakai iloa e lautolu e tau tali. Ko e heigoa e manatu haau?

4, 5. Ko e heigoa e tau hūhū aoga haau? Ko e ha kua lata a koe ke fakatumau ke kumi e tau tali?

4 Liga manako a koe ke moua e tau tali ke he tau hūhū tuga anei: Ko e ha ne ha ha au i hinei? Ko e heigoa ka tupu ki a au ka mate? Fēfē e Atua? Ko Iesu ko e Faiaoga ne mua, ne pehē: “Kia ole atu a mutolu, ti foaki mai ai kia mutolu; kia kumikumi a mutolu, ti moua ai e mutolu; kia tukituki atu a mutolu, ti vevete mai ai kia mutolu.” (Mataio 7:7) Ua fakalolelole ka e lali ke moua e tau tali kua falanaki a koe ki ai.

 5 Ē, kaeke “kia kumikumi” e koe, to moua e koe e tau tali he Tohi Tapu. (Tau Fakatai 2:1-5) Kua nakai uka lahi e tau tali nei ke maama. Ko e tau mena ka fakaako e koe to fiafia lahi e moui haau mogonei mo e moua e amaamanakiaga mitaki lahi ma e anoiha. To fakatutala a tautolu ke he taha e hūhū ne nakai maama he tokologa.

LEVEKI NAKAI HE ATUA A TAUTOLU PO KE VALE A IA?

6. Ko e ha ne manatu falu tagata kua nakai manamanatu e Atua ke he matematekelea ha lautolu?

6 Tokologa e tagata ne manamanatu kua nakai leveki he Atua a tautolu. Logona hifo e lautolu ka leveki mooli he Atua, to kehe mamao e lalolagi. Kitia e tautolu e felakutaki, vihiatia, mo e fakaagitau he tau mena oti. Gagao e tau tagata, matematekelea, ti mamate. Manamanatu e falu, ‘Ka leveki he Atua a tautolu, ko e ha ne nakai taofi e ia e tau matematekelea oti nei?’

7. (a) Puhala fe kua fakaako he tau takitaki lotu e tau tagata kua vale e Atua? (e) Ko e ha kua mauokafua a tautolu ne nakai tukumale e Atua ha ko e tau mena kelea ne tutupu?

7 Falu magaaho ne fakaohooho he tau takitaki lotu e tau tagata ke talitonu kua vale e Atua. Ka tupu taha mena kelea, pehē a lautolu ko e finagalo he Atua a ia. Talahau e lautolu na pihia e manako he Atua. Ka talahau e lautolu e mena ia kua tukumale e lautolu e Atua. Ka e fakaako he Tohi Tapu ko e Atua ne nakai ko e punaaga he kelea muitui. Tala mai e Iakopo 1:13 kua nakai kamatamata he Atua e tau tagata ke he tau mena kelea. Talahau ai: “Aua neke pehe mai taha ka kamatamata a ia; Kua kamatamata au mai he Atua; ha ko e mena nakai kamatamata ai e Atua ke he mena kelea, nakai kamatamata foki e ia ke he taha.” Kakano e mena nei, pete kua nakai taofi he Atua e tau mena kelea he tutupu, nakai ko Ia ne fakatupu ai. (Totou Iopu 34:10-12.) Onoono la ke he fakatai.

8, 9. Ko e ha kua nakai tonu ke tukumale e Atua ha ko e tau lekua ha tautolu? Talahau e fakatai.

 8 Manamanatu ke he tama taane ne nofo i kaina mo e tau matua haana. Ofaofa lahi mahaki he matua taane haana a ia ti fakaako ke taute e tau fifiliaga mitaki. Ka e totoko e tama ke he matua haana ti fano kehe he kaina. Taute e ia e tau mena kelea ti lauia he tau lekua. To tukumale kia e koe e matua ha ko e mena ne tupu he toka e ia e tama haana ke fano kehe he kaina? Nakai pihia! (Luka 15:11-13) Tuga e matua taane ia, nakai taofi he Atua e tau tagata ne fifili ke totoko mo e taute e tau mena kelea. Ti ka tupu e taha mena kelea, lata a tautolu ke manatu ne nakai ko e Atua ne fakatupu e mena ia. Nakai tonu ai ke tukumale e Atua.

9 Fai kakano mitaki lahi ati toka he Atua e tau mena kelea ke tutupu. He veveheaga 11, to iloa e koe e talahauaga he Tohi Tapu ke he mena nei. Ka e maeke a koe ke mauokafua kua fakaalofa e Atua ki a tautolu ti nakai tukumale a ia ha ko e tau lekua ha tautolu. Ko Ia ni kua maeke ke fakamafola e tau lekua.​—Isaia 33:2.

10. Ko e ha kua mauokafua a tautolu to fakafoou he Atua e tau mena oti ne taute he tau tagata kelea?

10 Ko e Atua tapu a Iehova. (Isaia 6:3) Tau mena oti ne taute e ia kua meā, mitaki, mo e nakai fai kelea. Ti maeke a tautolu ke falanaki ki a ia. Nakai pihia e tau tagata. Fa taute e lautolu e tau mena hepe. Nakai maeke foki e takitaki mahani fakamooli ke moua e malolō ke fakafoou e tau mena oti ne moumou he tau tagata kelea. Nakai fai tagata ne lahi e malolō ke tuga he Atua. Maeke mo e to fakafoou e ia e tau mena oti ne moumou he tau tagata kelea. To utakehe tukulagi e ia e tau mahani kelea oti kana.​—Totou Salamo 37:9-11.

 FĒFĒ E LOGONAAGA HE ATUA KA MATEMATEKELEA E TAU TAGATA?

11. Fēfē e logonaaga he Atua ke he matematekelea haau?

11 Fēfē e logonaaga he Atua ka kitia e tau mena tutupu he lalolagi mo e tau mena kua fehagai mo koe? Fakaako he Tohi Tapu ‘kua fiafia a Iehova ke he fakafili tonu.’ (Salamo 37:28) Ti mataala lahi a ia ke he tau mena kua hako mo e hepe. Vihiatia e ia ka matematekelea e tau tagata. Pehē e Tohi Tapu “ti mamahi foki hana finagalo” he kitia e lalolagi fakamua atu ne puke he kelea. (Kenese 6:5, 6) Nakai hiki e Atua. (Malaki 3:6) Pehē e Tohi Tapu kua manatu mooli he Atua a koe.​—Totou 1 Peteru 5:7.

Fakaako mai he Tohi Tapu ko Iehova e Tufuga fakaalofa he lagi mo e lalolagi katoatoa

12, 13. (a) Ko e ha ne fakaalofa mo e manamanatu a tautolu ke he falu, ti fēfē e logonaaga ha tautolu ke he matematekelea he lalolagi? (e) Ko e ha kua mauokafua a tautolu to utakehe he Atua e tau matematekelea mo e nakai fakafili tonu oti?

12 Pehē foki e Tohi Tapu ko e Atua ne tufuga a tautolu ke he haana fakatai. (Kenese 1:26) Kakano ai kua tufuga he Atua a tautolu mo e tau mahani mitaki pihia ne ha ha ia Ia. Ti ka kelea e logonaaga haau he kitia e tau tagata mitaki ne matematekelea, liga mua atu e hukia he Atua ka kitia e ia! Iloa fēfē e tautolu e mena nei?

13 Fakaako he Tohi Tapu ki a tautolu ko e “Atua ko e fakaalofa a ia.” (1 Ioane 4:8) Ko e tau mena oti kana ne taute he Atua kua omoomoi he fakaalofa. Ti fakaalofa a tautolu ha kua fakaalofa e Atua. Manamanatu ke he tau mena nei: Ka ha ha ia koe e malolō, to utakehe nakai e koe e tau matematekelea mo e tau nakai fakafili tonu oti he lalolagi? To utakehe mooli e koe ha kua fakaalofa a koe ke he tau tagata. Ka e kua e Atua? Ha ha ia Ia e malolō mo e kua fakaalofa ki a tautolu, to utakehe e Ia e tau matematekelea mo e tau nakai fakafili tonu oti. Maeke a koe ke mauokafua to fakamooli e tau maveheaga oti he Atua ne  talahau he kamataaga he tohi nei! Ke maeke ke falanaki ke he tau maveheaga nei, lata a koe ke iloa atu foki hagaao ke he Atua.

MANAKO E ATUA KE ILOA E KOE A IA

Ka manako a koe ke kapitiga mo e taha, tala age e koe e higoa haau. Tala mai he Atua e higoa haana i loto he Tohi Tapu

14. Ko hai e higoa he Atua, ti iloa fēfē e tautolu kua lata a tautolu ke fakaaoga ai?

14 Ka manako a koe ke kapitiga mo e taha tagata, ko e heigoa e mena fakamua kua fa tala age e koe? Ko e higoa haau. Fai higoa nakai e Atua? Loga e lotu ne pehē ko e higoa haana ko e Atua po ke Iki, ka e nakai ko e tau higoa anei. Ko e tau matahigoa a ia, tuga e “patuiki” po ke “pelesiteni.” Fitā he tala mai he Atua ki a tautolu ko e higoa haana ko Iehova. Pehē e Salamo 83:18: “Ti iloa ai e lautolu a koe, ko e hāu a higoa ko Iehova, hoko koe ni kua Mua ue atu ke he lalolagi oti.” Fakaaoga lagaloga he tau tagata ne tohia e Tohi Tapu e higoa he Atua. Manako a Iehova ke iloa e koe e higoa haana mo e fakaaoga ai. Tala atu e ia ki a koe e higoa haana ke eke a koe mo kapitiga haana.

15. Ko e heigoa e kakano he higoa Iehova?

15 Hokulo e kakano he higoa he Atua ko Iehova. Kakano kua maeke e Atua ke fakamooli ha maveheaga ne taute e ia mo e fakahoko haana finagalo.  Nakai fai mena ke taofi a ia. Ko Iehova ni ka moua e higoa nei. *

16, 17. Ko e heigoa e kakano he (a) “Malolō Ue Atu”? (e) ‘Patuiki tukulagi’? (i) “Tufuga”?

16 He totou e tautolu he mogo fakamua, pehē e Salamo 83:18 hagaao ki a Iehova: “Hoko koe ni kua Mua ue atu.” Pehē foki e Fakakiteaga 15:3: “Ko e Iki [Iehova] na e, ko e Atua mana [“Malolō Ue Atu,” NW], kua lalahi hau a  tau gahua ke ofomate ai, kua tonu mo e fakamoli hau a tau puhala, ko e Patuiki [“tukulagi,” NW].” Ko e heigoa e kakano he matahigoa “Malolō Ue Atu”? Kakano kua mua atu e malolō ha Iehova ke he ha tagata he lagi mo e lalolagi katoatoa. Ti ko e matahigoa ‘Patuiki tukulagi’ kua kakano ne ha ha tumau a ia. Fakamaama he Salamo 90:2 ko ia mai i tuai tigahau ke hoko ke he tukulagi. Ofoofogia mooli e mena ia!

17 Ko Iehova hokoia e Tufuga. Pehē e Fakakiteaga 4:11: “Ko e Iki [Iehova] na e, kua lata ni a koe ke tuku atu ki ai e fakahekeaga, mo e lilifu, mo e malolo; ha kua eke e koe e tau mena oti, ha ko e hau a finagalo foki ne ha ha i ai a lautolu; mo e eke ai a lautolu.” Ē, mai he tau agelu i luga he lagi ke he tau fetū he pulagi ti hoko ke he tau fua lakau he tau akau mo e tau ika he tahi​—ne tufuga e Iehova e tau mena oti kana kua manamanatu a koe ki ai!

 MAEKE NAKAI A KOE KE EKE MO KAPITIGA HA IEHOVA?

18. Ko e ha kua liga manatu falu tagata kua nakai maeke a lautolu ke eke mo kapitiga he Atua? Ko e heigoa ne talahau he Tohi Tapu hagaao ke he mena ia?

18 Ka totou he falu tagata hagaao ke he tau mahani ofoofogia ha Iehova, kua logona hifo e lautolu e matakutaku ti manatu, ‘Ko e Atua kua malolō lahi, mua ue atu, mo e mamao ligo, ti ko e ha kua manamanatu a ia ki a au?’ Ka e manako kia e Atua ke logona hifo pihia a tautolu? Nakai. Manako a Iehova ke tata ki a tautolu. Pehē e Tohi Tapu ko e Atua kua “nakai ni mamao a ia mo tautolu takitokotaha.” (Gahua 17:27) Manako e Atua ki a koe ke fakatata ki a ia, ti mavehe a ia ke “fakatata mai ai a ia kia [koe].”​—Iakopo 4:8.

19. (a) Puhala fe ka eke a koe mo kapitiga he Atua? (e) Ko e heigoa e tau mahani ha Iehova kua fiafia lahi a koe ki ai?

19 Maeke fēfē a koe ke eke mo kapitiga he Atua? Pehē a Iesu: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.” (Ioane 17:3) Kia matutaki ke fakaako, to iloa e koe a Iehova mo Iesu. Ti maeke mogoia a koe ke moua e moui tukulagi. Ma e fakatai, fitā e fakaako a tautolu, “Ko e Atua, ko e fakaalofa a ia.” (1 Ioane 4:16) Ka e loga atu foki e tau mahani mitaki haana. Tala mai e Tohi Tapu ki a tautolu ko Iehova kua “fakaalofa hofihofi, mo e fakaalofa noa; kua fakatuai hana ita, to lahi e fakaalofa, to fakamoli.” (Esoto 34:6) Ko Iehova “kua mitaki ni a koe, ti fakamagalo e tau hala.” (Salamo 86:5) Ko e Atua kua fakauka mo e fakamooli. (2 Peteru 3:9; 1 Korinito 1:9) To fakaako foki a koe ke he loga atu e tau mahani mitaki haana he totou a koe hagaao ki a ia i loto he Tohi Tapu.

20-22. (a) Puhala fe ka tata e logonaaga ha tautolu ke he Atua pete he nakai maeke ke kitia a ia? (e) Ko e heigoa haau kua lata ke taute ka manako falu ke fakaoti e fakaako Tohi Tapu haau?

20 Maeke fēfē a koe ke tata e logonaaga ke he Atua ka e  nakai maeke a koe ke kitia a ia? (Ioane 1:18; 4:24; 1 Timoteo 1:17) Magaaho ka totou a koe hagaao ki a Iehova he Tohi Tapu, kua iloa e koe a ia ko e Atua mooli. (Salamo 27:4; Roma 1:20) He fakaako fakalahi a koe hagaao ki a Iehova, to lahi fakahaga e fakaalofa haau ki a ia mo e tata lahi ki a ia.

Fakaalofa e matua taane ke he fanau haana ka e mua atu e fakaalofa he Matua ha tautolu he lagi ki a tautolu

21 To maama e koe ko Iehova e Matua ha tautolu. (Mataio 6:9) Foaki mai e ia e moui, ti manako foki a ia ki a tautolu ke mitaki lahi e moui. Pihia e manako he matua taane loto fakaalofa ma e fanau haana. (Salamo 36:9) Ē, fakaako he Tohi Tapu kua maeke a koe ke eke mo kapitiga ha Iehova. (Iakopo 2:23) Manamanatu ki ai. Ko Iehova ko e Tufuga he lagi mo e lalolagi katoatoa, kua manako ke eke a koe mo kapitiga haana!

22 Liga manako falu tagata ke fakaoti e fakaako Tohi Tapu haau. Matakutaku a lautolu neke hiki e lotu haau. Ka e ua fakaatā ha tagata ke taofi a koe he eke mo kapitiga ha Iehova. Ko ia ko e Kapitiga uho kua mua atu.

23, 24. (a) Ko e ha kua lata a koe ke fakatumau ke hūhū? (e) Ko e heigoa ha tautolu ka fakatutala he veveheaga ka mui mai?

23 He fakaako a koe ke he Tohi Tapu, to fai mena ka nakai maama e koe. Ua mā ke hūhū po ke ole ma e lagomatai. Pehē a Iesu kua lata a tautolu ke fakatokolalo tuga e tau tama ikiiki. (Mataio 18:2-4) Ti loga e hūhū he tau tama ikiiki. Manako e Atua ki a koe ke moua e tau tali. Ko e mena ia, fakaako fakamakutu e Tohi Tapu ke mauokafua ko e tau mena haau ne fakaako ko e kupu mooli.​—Totou Gahua 17:11.

24 Ko e puhala mitaki lahi mahaki ke iloa a Iehova ko e fakaako he Tohi Tapu. He veveheaga ka mui mai, to kumikumi a tautolu ke he kakano ne kehe e Tohi Tapu mai he tau tohi oti ne toe.

^ para. 15 Ka manako a koe ke he falu vala tala hagaao ke he kakano mo e fakaleo he higoa he Atua, fakamolemole kikite Tala he Matahiku 1.