Skip to content

Skip to table of contents

Tau Fakamoli a Iehova

Fifili e vagahau Faka-Niue

 VEVEHEAGA LIMA

Ko e Lukutoto​—Mena Fakaalofa ne Mua Ue Atu he Atua

Ko e Lukutoto​—Mena Fakaalofa ne Mua Ue Atu he Atua

1, 2. (a) Ko e ha kua aoga e mena fakaalofa ki a koe? (e) Ko e ha e lukutoto ko e mena fakaalofa ne mua ue atu he Atua?

KO E heigoa e mena fakaalofa mitaki lahi mahaki ne moua e koe? Nakai lata e mena fakaalofa ke tauuka ke aoga ki a koe. Ka fiafia a koe ke he mena fakaalofa po ke aoga mooli ki a koe, kua mua atu e loto fakaaue haau ki ai.

2 He tau mena fakaalofa oti kana ne foaki mai he Atua, taha e mena fakaalofa ne manako lahi a tautolu ki ai. Ko e mena fakaalofa ne mua ue atu he Atua ke he tau tagata. He veveheaga nei, to fakaako a tautolu hagaao ki a Iehova ne fakafano mai haana Tama ko Iesu Keriso ke maeke a tautolu ke momoui tukulagi. (Totou Mataio 20:28.) He fakafano mai a Iesu ke he lalolagi ko e lukutoto, fakakite e Iehova e fakaalofa mooli haana ki a tautolu.

KO E HEIGOA E LUKUTOTO?

3. Ko e ha ne mamate e tau tagata?

3 Ko e lukutoto ko e puhala ha Iehova ke fakatokanoa e tau tagata mai he agahala mo e mate. (Efeso 1:7) Ke maama e kakano ma e lukutoto, lata a tautolu ke iloa e mena ne tupu he tau afe tau kua mole he kaina ko Etena. Ko e tau matua uluaki ha tautolu ko Atamu mo Eva ne agahala. Ha kua agahala ai, ne mamate a laua. Ti mamate foki a tautolu ha ko e agahala ne moua mai ia Atamu mo Eva.​—Kikite Tala he Matahiku 9.

4. Ko hai a Atamu, mo e ko e heigoa haana ne foaki age e Iehova?

 4 Magaaho ne tufuga e Iehova e tagata fakamua ko Atamu, ne foaki age e Ia e taha mena uho lahi ki a Atamu. Age e Ia ki a Atamu e moui mitaki katoatoa ko e tagata. Mitaki katoatoa e manamanatuaga mo e tino haana. Nakai gagao, nakai fuakau, mo e nakai mate a ia. Ha kua tufuga e Iehova a Atamu, kua tuga e matua a Ia ki a Atamu. (Luka 3:38) Tutala tumau a Iehova ki a ia. Fakamaama fakamaaliali he Atua ki a Atamu e tau mena ne amanaki a ia mai ia Atamu ti age foki e gahua mitaki ke taute e ia.​—Kenese 1:28-30; 2:16, 17.

5. Ko e heigoa e kakano he talahauaga he Tohi Tapu ne eke a Atamu ke he “fakatai he Atua”?

5 Ne eke a Atamu ke he “fakatai he Atua.” (Kenese 1:27) Age e Iehova ki ai e tau mahani tuga ni Haana, putoia e fakaalofa, pulotu, fakafili tonu, mo e malolō. Foaki age e ia ki a Atamu e atāina ke fifili. Nakai ko e ropoto (robot) a Atamu. Tufuga he Atua a ia ke maeke ke fifili ke taute e mena hako po ke mena hepe. Ane mai fifili a Atamu ke omaoma ke he Atua, liga moui tukulagi a ia he Parataiso.

6. Magaaho ne nakai omaoma a Atamu ke he Atua, ko e heigoa ne galo e ia? Lauia fēfē a tautolu he mena nei?

6 Magaaho ne nakai omaoma ai ke he Atua ti fakahala a ia ke mate, ne lahi mahaki e mena ne totogi e Atamu. Galo e ia e kapitiga pauaki haana mo Iehova, moui mitaki katoatoa haana, mo e kaina Parataiso haana. (Kenese 3:17-19) Fifili a Atamu mo Eva ke nakai omaoma ke he Atua, ti nakai fai amaamanakiaga ma laua. Ko e mena ne taute e Atamu, ati “hoko mai ai e hala ke he lalolagi . . . ko e mate foki ha ko e hala, ti kua hoko mai ai e mate ke he tau tagata oti kana, ha kua hala e tau tagata oti kana.” (Roma 5:12) Magaaho ne agahala a Atamu, “kua fakafua atu” e ia a ia fakalataha mo tautolu  ke fakatupa ke he agahala mo e mate. (Roma 7:14) Fai amaamanakiaga nakai ma tautolu? Ē, fai.

7, 8. Ko e heigoa e lukutoto?

7 Ko e heigoa e lukutoto? Ko e lukutoto kua putoia ai ua e mena. Fakamua, ko e lukutoto ko e totogi ke fakatoka mai e taha tagata po ke liu fakatau mai e taha mena. Ke uaaki, ko e lukutoto ko e totogi katoa ke lata mo e taha mena.

8 Nakai maeke ha tagata ke totogi e mena kelea lahi mahaki ne taute e Atamu he magaaho ne agahala a ia ti hoko mai e mate ki a tautolu. Ka e foaki e Iehova e puhala ke fakatokanoa a tautolu mai he agahala mo e mate. To fakaako a tautolu ke he gahuahuaaga he lukutoto mo e puhala kua aoga ai ki a tautolu.

PUHALA NE FOAKI E IEHOVA E LUKUTOTO

9. Maeke fēfē ke totogi e lukutoto?

9 Nakai fakaai taha ia tautolu ke totogi e lukutoto he moui mitaki katoatoa ne fakagalo e Atamu. Ko e ha? Ha kua nakai mitaki katoatoa a tautolu oti. (Salamo 49:7, 8) Ko e lukutoto kua lata ni ke totogi aki e moui he taha tagata ne mitaki katoatoa. Pehē e Tohi Tapu: “Ko ia ne foaki noa mai e ia a ia ke eke mo lukutoto ma e tau tagata oti kana.” (1 Timoteo 2:6) Ko e moui mitaki katoatoa ha Iesu ne poa kua tatai mo e moui ne galo ia Atamu.

10. Foaki mai fēfē e Iehova e lukutoto?

10 Foaki mai fēfē e Iehova e lukutoto? Fakafano mai e Iehova e Tama fakahele haana ke he lalolagi. Ko e Tama nei ko Iesu ko e uluaki he tau tufugatia haana. (1 Ioane 4:9, 10) Makai a Iesu ke toka e haana Matua mo e kaina he lagi. (Filipi 2:7) Ne hiki mai e Iehova a Iesu he lagi ke he lalolagi, ti fanau a Iesu ko e tagata mitaki katoatoa ne nakai agahala.​—Luka 1:35.

Foaki mai e Iehova e Tama fakahele haana ko e lukutoto ma tautolu

11. Maeke fēfē e tagata tokotaha ke lukutoto ma e tau tagata oti?

 11 Ko e tagata fakamua ko Atamu ne fakagalo e moui mitaki katoatoa ma e tau tagata oti he magaaho ne nakai omaoma a ia ki a Iehova. Fai tagata nakai ne maeke ke utakehe e mate ma e tau fanau oti ha Atamu? Ē, fai. (Totou Roma 5:19.) Ko Iesu ne nakai agahala, ne foaki haana moui mitaki katoatoa mo lukutoto. (1 Korinito 15:45) Maeke ke fakaaoga e moui mitaki katoatoa haana ke utakehe e mate he tau fanau oti ha Atamu.​—1 Korinito 15:21, 22.

12. Ko e ha ne lata a Iesu ke mamahi lahi mahaki?

12 Fakamaama he Tohi Tapu e mamahi lahi ha Iesu ato mate a ia. Ne fahi fakakelea a ia, pao fao ke he akau fakatautau, ti fai magaaho e fakauka mo e mamahi ato mate. (Ioane 19:1, 16-18, 30) Ko e ha ne lata a Iesu ke mamahi lahi mahaki? Kakano na talahau e Satani kua nakai fai tagata ka fakamooli ke he Atua he magaaho ka lahi mahaki e kamatamata. Fakakite e Iesu na maeke e tagata mitaki katoatoa ke fakamooli ke he Atua pete ka mamahi lahi mahaki a ia. Kua fiafia mooli a Iehova ha ko Iesu!​—Tau Fakatai 27:11; kikite Tala he Matahiku 15.

13. Puhala fe ne totogi e lukutoto?

13 Puhala fe ne totogi e lukutoto? Foaki e Iesu ke he haana Matua e kakano uho he moui haana. He tau 33, he Nisana 14 he kalena faka-Iutaia, ne fakaatā e Iehova e tau fī ha Iesu ke tamate a ia. (Heperu 10:10) Tolu e aho he mole e mena nei, liu a Iehova fakamoui mai a Iesu, nakai ko e tagata ka ko e mena moui fakaagaaga. Magaaho fakamui, ne liu atu a Iesu ke he Matua haana he lagi, ti foaki e ia e kakano uho he moui mitaki katoatoa haana ki a Iehova mo lukutoto. (Heperu 9:24) Ha kua totogi ai e lukutoto, kua fakatokanoa a tautolu mai he agahala mo e mate.​—Totou Roma 3:23, 24.

 PUHALA KA AOGA A KOE MAI HE LUKUTOTO

14, 15. Ko e heigoa ha tautolu ka taute ke fakamagalo e tau agahala ha tautolu?

14 Fitā a tautolu he aoga mai he mena fakaalofa ne mua ue atu he Atua. To kitekite a tautolu ke he puhala kua aoga ki a tautolu he mogonei mo e anoiha.

15 Fakamagalo e tau agahala ha tautolu. Kua uka ke taute e mena hako he tau magaaho oti. Taute e tautolu e tau mena hepe, ti talahau foki e tau mena ne nakai tonu he falu magaaho. (Kolose 1:13, 14) Maeke fēfē a tautolu ke moua e fakamagaloaga? Lata ke tokihala mooli ke he mena hepe ne taute e tautolu ti ole fakatokolalo ki a Iehova ke fakamagalo a tautolu. Ti mauokafua mogoia to fakamagalo e tau agahala ha tautolu.​—1 Ioane 1:8, 9.

16. Ko e heigoa ha tautolu ka taute ke moua e loto manamanatu mitaki?

16 Maeke a tautolu ke moua e loto manamanatu mitaki. Ka fakalaga mai e loto manamanatu ha tautolu he fai mena hepe ne taute, ti kelea e loto ha tautolu, liga logona hifo kua nakai fai amanakiaga mo e fakateaga. Ka e lata ke fakamalolō. Ka olelalo a tautolu ki a Iehova ma e fakamagaloaga, ti mauokafua ai to fanogonogo mai a ia mo e fakamagalo a tautolu. (Heperu 9:13, 14) Manako a Iehova ke tutala a tautolu ki a ia hagaao ke he tau lekua mo e tau lolelole ha tautolu. (Heperu 4:14-16) Ko e fua, maeke a tautolu ke mafola mo e Atua.

17. Ko e heigoa e tau monuina ka moua ha kua mate a Iesu ma tautolu?

17 Moua e tautolu e amaamanakiaga he moui tukulagi. “Ha ko e mate ko e palepale ia he hala; ka ko e moui tukulagi ko e mena foaki noa mai he Atua haia, ke he Iki ha tautolu ko Keriso Iesu.” (Roma 6:23) Ha kua mate a Iesu ma tautolu, maeke a tautolu ke momoui tukulagi mo e moua e tino malolō mitaki katoatoa. (Fakakiteaga 21:3, 4) Ka ko e heigoa ha tautolu ka taute ke moua e tau monuina ia?

 TO TALIA NAKAI E KOE E LUKUTOTO?

18. Iloa fēfē e tautolu kua fakaalofa a Iehova ki a tautolu?

18 Manamanatu ke he puhala ne aamotia e loto haau he atu he taha tagata e mena fakaalofa fulufuluola. Ko e lukutoto ko e mena fakaalofa ne mua ue atu, ti lata a tautolu ke loto fakaaue lahi mahaki ki a Iehova ma e mena ia. Talahau e Ioane 3:16 ki a tautolu ko e “fakaalofa mai he Atua ke he lalolagi, kua ta mai ai hana Tama fuataha.” Ē, fakaalofa lahi mahaki a Iehova ki a tautolu ati foaki mai haana Tama fakahele ko Iesu. Iloa e tautolu na fakaalofa foki a Iesu ki a tautolu ha kua makai a ia ke mate ma tautolu. (Ioane 15:13) Lata mogoia e mena fakaalofa ko e lukutoto ke omoomoi a koe ke talitonu kua fakaalofa mooli a Iehova mo Iesu ki a koe.​—Kalatia 2:20.

He fakaako a tautolu hagaao ki a Iehova, to kapitiga a tautolu mo ia mo e tupu lahi e fakaalofa ki a ia

19, 20. (a) Maeke fēfē a koe ke kapitiga mo Iehova? (e) Fakakite fēfē e koe kua talia e koe e poa lukutoto ha Iesu?

19 Ha kua iloa e koe mogonei hagaao ke he fakaalofa lahi he Atua, maeke fēfē a koe ke kapitiga mo ia? Nakai mukamuka ke fakaalofa ke he taha tagata ne nakai iloa e koe. Pehē e Ioane 17:3 kua maeke a tautolu ke iloa a Iehova. He taute pihia e koe, to tupu lahi e fakaalofa haau ki a ia, manako a koe ke fakafiafia a ia, ti eke a koe mo kapitiga haana. Ko e mena ia, fakatumau ke fakaako hagaao ki a Iehova he kumikumi ke he Tohi Tapu.​—1 Ioane 5:3.

20 Talia e poa lukutoto ha Iesu. Pehē e Tohi Tapu “ko e tagata ne tua ke he Tama, ha ha ia ia e moui tukulagi.” (Ioane 3:36) Ko e heigoa e kakano ke fakagahuahua e tua? Kakano ke taute e tau mena ne fakaako mai e Iesu ke taute e tautolu. (Ioane 13:15) Nakai talahau noa ni kua talitonu a tautolu ki a Iesu. Ke talia e lukutoto, lata a tautolu ke fai mena ke taute ke he tua ha tautolu. Ia Iakopo 2:26, totou e tautolu: “[Ko e] tua kua mate ia kaeke kua noa mo e tau gahua.”

21, 22. (a) Ko e ha kua lata a tautolu ke o atu ke he Fakamanatuaga he mate he Keriso he tau tau takitaha? (e) Ko e heigoa ka fakatutala ki ai he Veveheaga 6 mo e 7?

 21 O atu ke he Fakamanatuaga he mate he Keriso. He afiafi to mate a Iesu, fakaako mai e ia kua lata a tautolu ke fakamanatu e mate haana. Taute e tautolu e mena nei he tau tau takitaha, ti fakahigoa ai ko e Fakamanatuaga po ke “kaiaga mena he Iki.” (1 Korinito 11:20; Mataio 26:26-28) Manako a Iesu ke manatu e tautolu na foaki e ia e moui mitaki katoatoa haana ko e lukutoto ma tautolu. Pehē a ia: “Kia eke e mutolu e mena nai mo fakamanatuaga kia au.” (Totou Luka 22:19.) Ka fina atu a koe ke he Fakamanatuaga, kua fakakite na manatu e koe e lukutoto mo e fakaalofa lahi ha Iehova mo Iesu ki a tautolu.​—Kikite Tala he Matahiku 16.

22 Ko e lukutoto ko e mena fakaalofa ne mua ue atu kua moua e tautolu. (2 Korinito 9:14, 15) Ko e mena fakaalofa uho ia to aoga foki ke he tau miliona tagata ne fitā e mamate. To fakatutala e Veveheaga 6 mo e 7 ke he puhala kua maeke e mena ia.