Skip to content

Skip to table of contents

Tau Fakamoli a Iehova

Fifili e vagahau Faka-Niue

 FAKAAKOAGA 10

Omaoma Tumau a Iesu

Omaoma Tumau a Iesu

Mukamuka tumau nakai ke omaoma ke he tau matua haau?— Kua uka he falu magaaho. Iloa nakai e koe na omaoma a Iesu ki a Iehova mo e ke he tau matua haana?— Maeke e fakafifitakiaga haana ke lagomatai a koe ke omaoma ke he tau matua haau pete ni he nakai mukamuka. O mai la ke fakaako atu foki hagaao ke he mena nei.

Ato hau a Iesu ke he lalolagi, ne nofo a ia mo e haana Matua ko Iehova he lagi. Ka e fai matua foki a Iesu he lalolagi nei. Ko e tau higoa ha laua ko Iosefa mo Maria. Iloa nakai e koe ko e puhala fe ne eke a laua mo tau matua ha Iesu?—

Ne tamai e Iehova e moui ha Iesu he lagi mo e tuku ai he manava ha Maria ke maeke a Iesu ke fanau mai mo e nofo he lalolagi. Ko e mana anei! Ne lahi fakahaga a Iesu i loto ha Maria ke tuga ni e tau tama mukemuke ne lalahi fakahaga i loto he tau manava he tau matua fifine ha lautolu. Kavi ke he hiva e mahina he mole, ne fanau mai a Iesu. Ko e puhala nei ne eke ai a Maria mo e taane haana ko Iosefa ko e tau matua ha Iesu he nofo he lalolagi.

He 12 e tau ha Iesu he moui, ne taute e ia taha mena ke fakakite e fiafia lahi haana ke he Matua ko Iehova. Ne tupu e mena nei he mogo ne o atu a Iesu mo e magafaoa haana he fenoga loa ki Ierusalema ma e Paseka. He liliu ki kaina, ne nakai kitia e Iosefa mo Maria a Iesu. Iloa nakai e koe ko fe a ia?—

Ko e ha ne ha ha i ai a Iesu he faituga?

Ne liliu fakamafiti a Iosefa mo Maria ki Ierusalema ke kumi atu a Iesu. Ne tupetupe lahi a laua he nakai kitia a ia. Ka e tolu e aho he mole ne moua e laua a ia he faituga! Iloa nakai e koe e kakano ne ha ha i ai a Iesu he faituga?— Kakano ke maeke a ia ke fakaako hagaao ke he haana Matua ko Iehova. Ne fiafia a ia ki a Iehova ti manako ke iloa e puhala ke fakafiafia a ia. He magaaho ne tupu hake a ia ti eke mo tagata lahi, ne omaoma tumau a Iesu ki a Iehova. Ne omaoma foki a Iesu he tau magaaho ne uka a ia ke omaoma ati mamahi a ia. Kua omaoma foki nakai a Iesu ki a Iosefa mo Maria?— E, pehē e Tohi Tapu ne omaoma a ia.

Ko e heigoa haau ka fakaako mai he fakafifitakiaga ha Iesu?— Kua lata ia koe ke omaoma ke he tau matua haau, pihia foki he tau magaaho ne uka ke omaoma. To taute pihia nakai e koe?—

TOTOU HE TOHI TAPU HAAU