Skip to content

Skip to table of contents

Tau Fakamoli a Iehova

Fifili e vagahau Faka-Niue

 FAKAAKOAGA 6

Nakai Matakutaku a Tavita

Nakai Matakutaku a Tavita

Ko e heigoa haau ka taute ka matakutaku a koe?— Liga fano a koe ke he tau matua ke lagomatai. Ka e fai foki kua maeke ke lagomatai a koe. Kua mua ue atu e malolō haana ke he ha tagata foki. Iloa nakai e koe ko hai a ia?— E, ko Iehova ko e Atua. O mai la ke fakatutala ke he fuata taane i loto he Tohi Tapu ne higoa ko Tavita. Iloa e ia to lagomatai tumau e Iehova a ia, ti nakai matakutaku a ia.

Mai he magaaho ne mukemuke a Tavita, ne fakaako he tau matua haana a ia ke fakaalofa ki a Iehova. Ne lagomatai he mena nei a Tavita ke nakai matakutaku pete he fai mena fakamatakutaku ne tupu ki a ia. Iloa e ia ko Iehova e Kapitiga haana mo e to lagomatai a ia. Taha e mogo, he leveki a Tavita he tau mamoe, ne hau e leona lahi ti gagau e mamoe ti uta! Iloa nakai e koe e mena ne taute e Tavita? Ne tutuli e ia e leona ti keli ke he tau lima ni haana! Ti ko e magaaho ne tutuli he pea e mamoe, ne tamate foki e Tavita e pea! Ko hai ne lagomatai a Tavita he manatu e koe?— E, ko Iehova.

Ne fai magaaho foki ne mua atu e malolō ha Tavita. Kua tau atu e tau Isaraela ke he tau tagata Filisitia. Taha he tau kautau Filisitia ne tokoluga lahi mahaki, ko e tupua a ia! Ko e higoa haana ko Koliato. Ne fakafiufiu he tupua ia e tau kautau Isaraela mo Iehova. Ne fakaohooho e Koliato e tau kautau Isaraela ke o mai ke tau ki a ia. Ka kua matakutaku lahi e tau Isaraela ke tau mo ia. Ne logona e Tavita e mena nei, ti tala age a ia ki a Koliato: ‘To tau a taua! Ko Iehova ka lagomatai au, to keli e au a koe!’ Loto malolō nakai a Tavita he manatu e koe?— E, loto malolō lahi. Iloa nakai e koe ko e heigoa foki ne tupu?

Ne tamai e Tavita e filo haana mo e lima e maka momole, ti fina atu a ia ke tau mo e tupua. Mogo ne kitia e Koliato ko e tama fuata a Tavita, ne fakafiufiu e ia a Tavita. Ka e tala age a Tavita: ‘Kua hau a koe kia au mo e pelu, ka e fina atu au ki a koe ke he higoa a Iehova!’ Ti tuku e ia e maka ke he filo haana, mo e poi atu a ia ti liti aki a Koliato. Ne lau e maka he matalē ha Koliato! Ti veli  e tupua ke he kelekele, kua mate ai! Ne matakutaku lahi e tau Filisitia ti fehola a lautolu oti. Maeke fēfē e tama fuata tuga a Tavita ke keli e tupua?— Ne lagomatai e Iehova a ia, ti kua mua atu e malolō ha Iehova ke he tupua!

Nakai matakutaku a Tavita he iloa e ia to lagomatai e Iehova a ia

Ko e heigoa haau ne fakaako mai he tala ki a Tavita?— Kua mua atu e malolō ha Iehova ke he ha tagata. Ti ko e Kapitiga haau a ia. Ka liu foki a koe ke matakutaku, manatu, na maeke a Iehova ke lagomatai a koe ke loto malolō!

TOTOU HE TOHI TAPU HAAU