Skip to content

Tau Fakamoli a Iehova

Fifili e vagahau Faka-Niue

Ko e Tohi Mai he Kau Fakatufono—2017

Ko e Tohi Mai he Kau Fakatufono—2017

Ke he Tau Matakainaga Fakahelehele:

He senetenari ke fituaki F.V.N., ne foaki age ke he perofeta ko Esekielu e fakakiteaga ofoofogia. Kitia e ia e peleō lahi mahaki toili, ko e kariota he lagi i lalo hifo he takitakiaga he Pule Katoatoa he lagi mo e lalolagi katoa. Ko e mena kua nava lahi hagaao ke he kariota ia ko e puhala ne holo ai. Kua holo mafiti tuga e lupa he hila, pihia foki ka hiki e fanoaga​—maeke ke taute pihia ka e nakai fakaeneene hifo po ke tafilu!​—Eseki. 1:4, 9, 12, 14, 16-27.

Fakamanatu mai he fakakiteaga ia ki a tautolu ko e vala he fakatokatokaaga ha Iehova i luga he lagi hane holo tumau. Ka e kua e vala he lalolagi? Ko e fekafekauaga he tau kua mole ne fakakite fakamaaliali foki na takitaki e Iehova e tau tagata haana ne fakatokatoka he lalolagi ke he puhala ofoofogia lahi e mafiti!

He United States, ko e tau matakainaga he magafaoa Peteli kua lavelave he hiki mai i Brooklyn ke he matapatu ofisa foou he lalolagi i Warwick i New York, pihia foki ke he falu ofisa mo e ke he fonua. Ko e tau matakainaga he Peteli he tau la ofisa he lalolagi kua lavelave foki he talaga, fakafoou, lafi fakalataha, po ke hiki atu ke he tau matakavi foou. Ka e kua a koe? Pete kua nakai lavelave a koe he hiki e nofoaga, ka kua lavelave a koe ke he falu puhala foki.

Kua aamotia mo e atihake lahi e Kau Fakatufono ke kitia e tau tagata he Atua he lalolagi katoa kua lavelave lahi mahaki he fakatumau ke fakatauō mo e fakatokatokaaga ha Iehova. Tokologa kua hiki atu ke fekafekau he tau matakavi ne manako lahi ke he lagomatai. Falu kua hiki ke he tau puhala foou he fekafekauaga, tuga e fonua vagahau kehe. Tokologa ne taute e puhala fakamatala foou ne nakaila mahani a lautolu ki ai. Ti tokologa atu foki kua fakalaulahi ha lautolu a fekafekauaga ke he falu puhala. Ko e tau Kerisiano fakamooli oti, putoia ai a lautolu ne momotua mo e fakakaupā e malolō tino, hane tafepoi tumau ke he poitufi he moui​—he matutaki ke fakatauō ke he fekafekauaga ha Iehova ti lagomatai ke fakakite a Satani ko e fakavai!​​—1 Kori. 9:24.

Kia manatu kua nakai nimo e Iehova e aga ne fakakite e koe. (Hepe. 6:10) Ko e aga fakamakai haau kua fakamanatu ki a mautolu a Aperahamo mo Sara. He 70 tumā e tau ha Aperahamo, ne hiki a ia mo e haana magafaoa mai he maaga ko Uro i Kaletaia ke he matakavi mamao ko Kanana ti nonofo he tau fale ie ke he taha e teau tau he moui haana ne toe. Ko e aga fakamakai mooli ne fakakite e ia mo e hoana fakahelehele haana!​—Kene. 11:31; Gahua 7:2, 3.

 Fakakite nakai e koe e aga pihia? Kua eketaha a mutolu oti ke fakauka fakamooli he tau magahala paleko nei mo e taute e mena kua talahau e Iesu ki a tautolu ke taute. Pehē a ia: “Hanei, kia o atu a a mutolu ke eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e Agaga Tapu.”​—Mata. 28:19.

Fakaaoga foki e Iesu e talahauaga “o atu” ke fakakite kua lata a tautolu ke gahuahua tumau. Fiafia ha ia ke kitia e lahi he gahua ne taute he tau fekafekau fakamakutu he Keriso he tau kua mole! Mukamuka ke kitia e lima malolō ha Iehova kua fakamonuina e gahua ke fakamatala e tala mitaki he Kautu ke he tau motu oti.​—Mare. 13:10.

Tokologa ne kua talia e fekau. Ko e tapunu he tau tagata fakailoa he tau kua mole ne 8,340,847, ti ko e evalesi he tau fakaako Tohi Tapu ha tautolu ko e 10,115,264 he tau mahina takitaha. Maaliali ai, hane holo agaia e kariota he lagi, ti pihia foki a koe! Eketaha ke he tau gahua mitaki haau he magaaho kū ne toe ato pā e Iehova e gutuhala ke he fakamouiaga.

Kua latatonu mooli e lauga ha tautolu he tau ma e 2017, “Kia tua a koe kia Iehova, mo e eke e mahani mitaki”! (Sala. 37:3) Ka omaoma a koe ke he tau kupu nei he taute e tau mena mitaki he fekafekauaga tapu ki a Iehova, fakakite e koe e tua haau ki a ia. Fakamolemole tokaloto tumau, nakai ko koe tokotaha. To fakamooli e tau kupu ha Iesu: “Kitiala, to fakalataha au mo mutolu ke he tau aho oti, ato hoko ni ke he fakaotiaga he lalolagi.”​—Mata. 28:20.

Mafanatia ke iloa to matutaki a Iehova ke fakamonuina e fekafekauaga fakamooli haau. He tote po ke lahi e foakiaga haau ki a Iehova, ko e mena ne mua ki a Ia kua foaki katoatoa ai e koe mo e aga hako. Ko e tau mena fakaalofa oti pihia kua aamotia ke he loto haana ti talia fiafia e ia. (2 Kori. 9:6, 7) Kia matutaki ke fakatata fakalahi ke he Matua fakahele haau he fakatumau ke liogi, fakaako e Kupu he Atua, fakalataha ke he tau feleveiaaga Kerisiano, mo e fai vala ke he gahua he fonua.

Ato mole e magahala nei “kua tote” he Tiapolo, eketaha a ia ne totoko ke taute ha mena ke fakatauhele e tuaga ha tautolu ke fakatumau e fakamooli ki a Iehova. (Fakakite. 12:12) Fakatata tumau ki a Iehova mo e to kaumahala e Tiapolo ke he tau laliaga oti haana. (Sala. 16:8) Fakamolemole manatu kua fakaalofa lahi mahaki a mautolu ki a mutolu, mo e loto fakaaue lahi ke he ha mutolu a lalagoaga ke he tau gahua he Kautu he Iki he tau aho fakamui nei.

Ha mutolu a tau matakainaga,

Kau Fakatufono he Tau Fakamoli a Iehova