Skip to content

Skip to table of contents

Tau Fakamoli a Iehova

Fifili e vagahau Faka-Niue

Onoonoaga kua Lata ke he Hepehepe

Onoonoaga kua Lata ke he Hepehepe

Ko Don mo Margaret * ne fiafia he ahiahi mai e tama fifine ha laua mo e magafaoa haana. Ma e kai fakamavehe ha lautolu, ne tunu e Margaret ko e pulotu tunu kai ne kua litaea, e macaroni mo e siisi ko e kai mahuiga he tau mokopuna taane tokoua haana.

He nonofo oti he laulau ne tamai e Margaret e kai ti tuku he lotouho he laulau. Veveu hake e ia e uufi ti ofo lahi he kitia ko e sosi siisi vela hokoia ni i loto he polu! Kua nimo e Margaret ke tuku e vala pauaki he kai, ko e macaroni!

Pete kua fiha e tau he moui po ke lotomatala, kua taute e tautolu oti e tau mena hepe. Liga ha ko e kupu hukia po ke nakai felauaki e magaaho mo e mena ne taute, po ke liga fai mena a tautolu ne manimo. Ko e ha ne tutupu e tau hepehepe? Maeke fēfē a tautolu ke fehagai ki ai? Maeke nakai ke kalo mai i ai? Ko e onoonoaga tonu ke he tau hepehepe ka lagomatai a tautolu ke tali e tau hūhū nei.

TAU HEPEHEPE​—ONOONOAGA HA TAUTOLU MO E HE ATUA

Ka taute e tautolu e taha mena mitaki, kua talia fiafia e tautolu e nava mo e fakaaue ne amanaki a tautolu ki ai. Ka taute e tautolu e mena hepe, pete he nakai taute pauaki po ke nakai kitia he falu, kua lata nakai a tautolu ke talahau kua hepe a tautolu? He taute pihia kua lata ke moua e mahani fakatokolalo.

Ka manamanatu lahi a tautolu ki a tautolu ni, liga lali a tautolu ke fakatote hifo e tau hepehepe ha tautolu, tuku aki e taha tagata, po ke fakatikai foki na taute e tautolu. Ko e puhala pihia kua fa takitaki atu ke he tau lauiaaga kelea. Liga to nakai mafola e lekua, mo e tukupau fakakelea e falu tagata. Pete ka iloa e tautolu ke kalo he tau hepehepe mogonei, kua lata ke tokaloto e tautolu he magaaho fakamui “to takitokotaha a tautolu mo e talatala atu hana mahani ke he Atua.”​—Roma 14:12.

Kua mooli e onoonoaga he Atua ke he tau hepehepe. He tohi a Salamo, ne fakakite mai ko e Atua kua “fakaalofa hohofi mo e fakaalofa noa”; ti “nakai totoko mau e ia; nakai taofi tukulagi hana ita.” Iloa e ia e nakai mitaki katoatoa he tau tagata mo e maama e tuaga agahala ha tautolu ti “kua manatu e ia ko e kelekele ni a tautolu nai.”​—Salamo 103:8, 9, 14.

Lafi ki ai, tuga e matua taane fakaalofa noa, kua manako e Atua ki a tautolu ko e tau fanau Haana ke onoono ke he tau hepehepe mai he tuaga Haana. (Salamo 130:3) Loga lahi e tau fakatonuaga mo e takitakiaga kua foaki mai he Kupu haana ke lagomatai a tautolu ke fehagai mo e tau hepehepe ha tautolu ti pihia foki mo e he falu.

TAU PUHALA KE FAHIA MAI HE TAU HEPEHEPE

Fa mahani ai ka taute he tagata e tau hepehepe, kua lahi e magaaho mo e malolō ke tuku tagata po ke kumi mena ke piu ke he mena ne talahau  po ke taute. Ka e lata ke fakamolemole kaeke ke fakahukia he tau kupu haau e taha tagata, mo e fakahako e mena ne hepe ti fakatumau e tuaga kapitiga ha mua. Kua fai mena hepe nakai a koe ne taute ti fakalekua po ke fakahagahaga kelea lahi ki a koe po ke taha tagata? He nakai ita ki a koe ni po ke tukumale e falu, ko e ha ne nakai eketaha a koe ke fakahako e mena ne hepe? Ke fakamakamaka ko e falu tagata ne hepe, to fakaauatu ni e hogohogo manava teao mo e fakaatā e lekua ke holo ki mua. Ka e lata ke fakaako, fakahako, ti taute e mena kua lata.

Kaeke kua taute he taha tagata e mena hepe, kua mukamuka lahi ma tautolu ke fakakite e nakai fiafia. Ka kua mitaki ha ia ke muitua e fakatonuaga ha Iesu Keriso he pehē a ia: “Ko e tau mena oti kua loto a mutolu ki ai, ke eke he tau tagata kia mutolu; ati eke ā e mutolu e tau mena ia kia lautolu.” (Mataio 7:12) Ka taute e koe e mena hepe pete he tote, nakai noa kua manako a koe ke fakaalofa hofihofi e tau tagata ki a koe po ke fakamagalo katoatoa e hepehepe haau. Ti ko e ha ne nakai eketaha ke fakakite e mahani totonu pihia foki ke he falu?​—Efeso 4:32.

TAU MATAPATU FAKAAKOAGA KA LAGOMATAI KE FAKATOTE HIFO E TAU HEPEHEPE

Tutupu mai e tau hepehepe he “nakai hako e fifiliaga, tote e iloaaga, po ke nakai mataala” he fakakite mai he taha tohi fakamaama kupu. Lata a tautolu ke talahau na igatia e tau tagata mo e fakakite e tau aga pihia he taha magaaho. Ka e maeke ke gahoa e tau hepehepe ka manamanatu a tautolu ke he falu matapatu fakaakoaga he Tohi Tapu.

Taha e matapatu fakaakoaga pihia he Tau Fakatai 18:13, ne pehē: “Ko ia kua tali atu ke he kupu, ka e nakaila fanogonogo a ia ki ai, kua eke ia mo goagoa hana, mo mena foki ke mā ai a ia.” Ē, ko e fai magaaho ke fanogonogo ke he tala katoa mo e manamanatu ke he tali haau ka lagomatai mooli a koe ke ua talahau po ke taute taha mena fakatepetepe. Ko e iloaaga he fanogonogo fakamitaki kua aoga lahi ke ua taute e fifiliaga ne nakai hako​—mo e kalo mai he taute e mena hepe.

Taha matapatu fakaakoaga foki he Tohi Tapu ne pehē: “Kaeke kua maeke ia mutolu, kia nonofo fakamitaki mo e tau tagata oti kana.” (Roma 12:18) Eketaha ke fakaholo ki mua e aga mafola mo e kaufakalataha. Ka gahua mo e falu, kia manamanatu mo e fakalilifu ti eketaha ke nava mo e atihake a lautolu. Ko e tuaga pihia kua mukamuka ke fakamagalo po ke fakanimo e tau kupu mo e tau gahua fakateaga, ti maeke mogoia e tau lekua lalahi ke fakamafola.

Fakaako ke moua mai e tuaga mitaki he mena hepe ne tupu. Ka e nakai kumi mena ke piu ki ai ha ko e mena ne talahau po ke taute e koe, onoono ke he tuaga nei ko e magaaho ke feaki haau a tau aga mitaki. Lata kia a koe ke lahi e fakauka, totonu, po ke manako fakalatalata? Ka e kua e mahani molu, mafola, mo e fakaalofa? (Kalatia 5:22, 23) Ti maeke mogoia a koe ke iloa e mena ke ua taute ka liu ke pihia foki. Ua goagoa, lali ke nakai pāpā maō. Lagomatai he aga fekī ke fakatotoka e tuaga uka.

AOGA MAI HE ONOONOAGA KUA LATA

Ko e onoonoaga kua lata ke he tau hepehepe ka lagomatai a tautolu ke fehagai fakamitaki ka tutupu ai. To mafola lahi a tautolu ni mo e falu foki. Ka eketaha a tautolu ke fakaako mai he tau hepehepe ha tautolu, to mua atu e lotomatala mo e fiafia lahi mai ki a tautolu. Ti nakai momoko lahi po ke manamanatu kelea ki a tautolu ni. He iloa kua fehagai foki e falu mo e tau hepehepe ha lautolu ka fakatata lahi a tautolu ki a lautolu. Ka e mua atu, maeke a tautolu ke fakaako ke fifitaki e fakaalofa he Atua mo e makai haana ke fakamagalo.​—Kolose 3:13.

Fakakelea kia he mena hepe ne taute e Margaret e lafiaga he magafaoa ne totoku he kamataaga? Nakai. Kitia e lautolu oti e faahi fuluola, mua atu ki a Margaret, ti kai a lautolu mo e ai fai macaroni! He tau tau fakamui, ne liu e tau mokopuna tokoua talahau e tala ke he kaiaga he magafaoa ne nakai nimo e laua ke he tau fanau ni ha laua ti liu manatu fiafia ke he magaaho mo e tau mamatua tupuna ha laua. Ka manamanatu ki ai, ko e hepe noa ni!

^ para. 2 Hiki e tau higoa.