Skip to content

Skip to table of contents

Tau Fakamoli a Iehova

Fifili e vagahau Faka-Niue

 TAU VALA TALA I MUA | KO E HEIGOA E MENA FAKAALOFA UHO LAHI?

Kumi he Mena Fakaalofa Uho

Kumi he Mena Fakaalofa Uho

Nakai mukamuka ke moua e mena fakaalofa kua latatonu ma e taha tagata. Ha ko e aoga he mena fakaalofa to fifili e ia ka moua ai. Ti liga nakai tatai e uho he tau mena fakaalofa ke he tau tagata kehekehe.

Tuga anei, liga logona hifo e fuata mui ko e mena fakaalofa mitaki lahi e matini foou tuga e selafoni. Ke he tagata lahi, liga tokiofa e ia e mena fakaalofa ne fai kakano uho, tuga e mena fakaalofa ne matutaki hifo he tau atuhau he magafaoa. Falu aga fakamotu, fa mahani ke talia fiafia e lautolu ne ikiiki mo e momotua e mena fakaalofa tupe ha kua fakaatā a ia ne moua ai ke fakaaoga ke he tau mena ne manako a ia ki ai.

Pete he uka, tokologa e tau tagata manamanatu ne matutaki ke kumi e mena fakaalofa ne latatonu mo e tagata ne ofania e lautolu. Pete he liga nakai maeke tumau ke moua e mena fakaalofa pihia, tokaloto e falu puhala ka liga mukamuka ke moua e mena fakaalofa. Fakatutala a tautolu mogonei ke he fā e puhala ka lafi ke he fiafia he tagata kua moua e mena fakaalofa.

Ko e tau manako haana kua moua ai. Taha e tagata taane i Belfast i Northern Ireland ne fakahigoa e pasikala laga ne moua e ia he 10 po ke 11 e tau he moui, ko e mena fakaalofa uho. Ko e ha? “Ha kua manako mooli au ki ai,” he fakamaama e ia. Fakakite mai he talahauaga ia ko e manako he tagata kua matutaki lahi mo e tokiofa e ia e mena fakaalofa po ke nakai. Ti manamanatu ke he tagata kua amanaki a koe ke age e mena fakaalofa. Lali ke mailoga e tau mena ne liga uho ki a ia, ha kua fa fakalagalaga he tau mena uho ia e tau manako haana. Ma e fakatai, kua fa uho ke he tau mamatua tupuna ke fai magaaho mo e magafaoa. Liga manako a lautolu ke kitia tumau e tau fanau mo e tau mokopuna ha lautolu. Ti ko e ō ke evaeva mo e magafaoa ne putoia e tau matua tupuna to liga loto fakaaue lahi ki ai ka fakatatai ke he falu mena fakaalofa ma lautolu.

Ko e puhala ke iloa e tau manako he tagata he eke mo tagata fanogonogo mitaki. Fakamafana mai he Tohi Tapu a tautolu ke “alumaki ke fanogonogo, kia fakatuai ke vagahau atu.” (Iakopo 1:19) He tutala a koe mo e tau kapitiga po ke tau magafaoa haau he tau aho takitaha, fanogonogo fakamitaki ke iloa e  koe e tau mena ne fiafia mo e nakai fiafia a lautolu ki ai. To liga iloa mitaki mogoia e koe ke maeke ke foaki e mena fakaalofa ka fiafia a lautolu ki ai.

Ko e tau mena ne lata mo ia kua moua ai. Liga tokiofa lahi e ia ne moua e mena fakaalofa pete he tote ha ko e mena to fakaaoga e ia. Ka e iloa fēfē e koe e mena kua liga lata mo e taha tagata?

Liga mua atu e mukamuka ke iloa he hūhū ke he tagata ko e heigoa e tau mena kua lata po ke loto a ia ki ai. Ke he tokologa e tagata ne foaki mena fakaalofa, kua utakehe he puhala nei e fiafia he foaki ha kua manako a lautolu ke fakaofo a ia ka moua e mena fakaalofa ne felauaki tonu. Lafi ki ai, liga atāina e falu tagata ke talahau e tau mena ne fiafia po ke nakai fiafia a lautolu ki ai, ka e nakai makaukau a lautolu ke talahau e tau mena ne latatonu mo lautolu.

Ko e mena ia, kia onoono fakamitaki mo e mailoga pauaki e tau tutūaga he tagata. Ko ia nakai ko e fuata, motua, nofo tokotaha, fai tokoua, tau vevehe, takape, fai gahua, po ke litaea? Ti manamanatu ko e heigoa e tau mena fakaalofa ka liga felauaki mo e tuaga he tagata.

Ke manamanatu ke he tau mena kua lata mo e tagata ka age e koe e mena fakaalofa ki ai, tutala ke he falu he tau tutūaga ia. Liga maeke a lautolu ke tala atu e tau mena pauaki kua lata ne nakai iloa lahi he falu. He puhala ia, liga maeke a koe mogonei ke age e mena fakaalofa kua felauaki tonu ne nakai manamanatu ki ai e falu.

Ko e magaaho. Pehē e Tohi Tapu: “Mo e kupu ke he hana aho ke lata ai, kua mitaki lahi haia.” (Tau Fakatai 15:23) Fakakite mai he kupu tohi nei kua aoga lahi e magaaho ne talahau e tau kupu ha tautolu. Pihia foki e tau gahua ha tautolu. Tuga ni e tau kupu ne talahau he magaaho ke lata ai kua mitaki ke he tagata ne fanogonogo, ko e mena fakaalofa ne age he magaaho ke lata ai po ke felauaki mo e tuaga ka lafi ke he fiafia lahi haana ne moua ai.

Kua amanaki e kapitiga ke mau. Ko e tama fuata kua teitei kautū mai he aoga. Ko e hoa mau kua amanaki ke fanau mai e mukemuke. Falu ni anei he tau magaaho loga ne fa foaki e tau mena fakaalofa. Moua he falu kua aoga ke tohi hifo e tau mena tutupu pauaki pihia ka hohoko he tau. He puhala nei kua maeke a lautolu ke fakatokatoka tuai ke moua e mena fakaalofa kua uho ma e tau tutūaga takitaha. *

Mooli ai, nakai lata a koe ke fakakaupā e foaki mena fakaalofa ke he tau magaaho pauaki ni. Maeke ke fiafia he foaki mena fakaalofa he ha magaaho. Pete ia, kua lata ke mataala. Ma e fakatai, ka age he tagata taane e mena fakaalofa ke he fifine ka e nakai fai kakano mitaki, liga fakahiku e ia kua manako e tagata taane ke fia iloa mitaki a ia. Ka nakai mooli mo e nakai amanaki pihia, ko e mena fakaalofa ia to liga tupu mai e nakai fai maamaaga po ke tau mena vihi. Ko e mena nei ati uho ai ke manamanatu ke he taha kakano foki​—ko e fatuakiloto haana ne foaki.

Ko e fatuakiloto haana ne foaki. Kitia mai he fakatai i luga, kua mitaki ke manamanatu neke nakai maama mitaki e ia ne moua e mena fakaalofa e fatuakiloto haana ne foaki. He taha faahi, kua mitaki foki ma haana ne foaki ke manamanatu hifo fakamitaki ke he haana ni a fatuakiloto. Pete kua tokologa e tagata ne manatu kua mitaki e tau kakano ati foaki e lautolu e tau mena fakaalofa, tokologa ne foaki e tau mena fakaalofa he tau magaaho pauaki he tau ha kua logona hifo e lautolu e peehiaga ke foaki. Ka ko e falu kua foaki he amaamanaki ke taute fakamitaki ki ai po ke moua e taui.

Ko e heigoa haau ka taute ke iloa mooli kua foaki e koe e mena fakaalofa mai he fatuakiloto mitaki? Pehē e Tohi Tapu: “Kia eke e mutolu e tau mena oti ha mutolu mo e fakaalofa.” (1 Korinito 16:14) Ka foaki e koe ha kua fakalagalaga he fakaalofa mooli mo e manatu mitaki ki a lautolu ka moua e mena fakaalofa, to liga fiafia a lautolu ka moua ai ti lahi e olioli haau ha ko e fakamokoi mooli. Ka foaki a koe mai he loto, to fakafiafia foki e koe ha tautolu a Matua he lagi. Ne nava e aposetolo ko Paulo ke he tau Kerisiano i Korinito i tuai he fakamokoi mo e fiafia a lautolu ke lalago e gahua foaki mena fakaalofa ke he tau matakainaga Kerisiano i Iutaia. “Fakaalofa e Atua kia ia kua foaki mo e fakamakai,” he tala age e Paulo.​—2 Korinito 9:7.

 Ko e manamanatu fakahokulo ke he tau vala ne fakatutala a tautolu ki ai ka lafi lahi ke he puhala foaki mena fakaalofa haau ke fakafiafia e falu. Ko e tau vala nei mo e falu foki, kua putoia ke he fakaholoaga he Atua ma e tau tagata ke moua e mena fakaalofa uho lahi mahaki. Uiina e mautolu a koe ke manamanatu ke he mena fakaalofa uho ofoofogia nei he totou e vala tala ka mui mai.

^ para. 13 Tokologa ne foaki foki e tau mena fakaalofa he tau fakamanatuaga aho fanau mo e tau aho okioki. Ka ko e tau magaaho pehēnei ne fa putoia e tau gahua ne nakai lautatai mo e tau fakaakoaga he Tohi Tapu. Kikite e vala tala he mekasini nei, “Hūhū he Tau Tagata Totou ha Tautolu​—Lata Nakai e Kirisimasi ma e Tau Kerisiano?