Skip to content

Skip to table of contents

Tau Fakamoli a Iehova

Fifili e vagahau Faka-Niue

Mena fakaalofa he Atua ko e lukutoto ati maeke e moui tukulagi, ko e mena fakaalofa uho lahi

 TAU VALA TALA I MUA | KO E HEIGOA E MENA FAKAALOFA UHO LAHI?

Ko e Heigoa e Mena Fakaalofa Uho Lahi?

Ko e Heigoa e Mena Fakaalofa Uho Lahi?

“Ko e tau mena mitaki oti kua foaki noa mai, katoa mo e tau mena fakaalofa oti kua katoatoa ai e mitaki, mai luga e tau mena ia, kua hifo mai mai he Matua he maama.” (Iakopo 1:17) Hagaao e kupu tohi ia ke he fakamokoi he ha tautolu a Matua he lagi ko Iehova ko e Atua. Ka e pete he loga e tau mena fakaalofa ne foaki he Atua ma e tau tagata, ne taha e mena fakaalofa kua mahomo atu. Ko e heigoa a ia? Talahau mai he tau kupu talahaua ha Iesu ne fakamau he Ioane 3:16: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.”

Ko e mena fakaalofa ne foaki he Atua ko e Tama fuataha​—ko e mena fakaalofa uho mua ue atu mooli a ia kua maeke a tautolu ke fakatokanoa mai he līlīaga he agahala, fuakau, mo e mate. (Salamo 51:5; Ioane 8:34) Pete he eketaha a tautolu, kua nakai maeke a tautolu ke fakatokanoa mai he līlīaga ia. Ka ko e fakaalofa lahi he Atua, ne foaki e ia e mena kua lata ke fakatokanoa mai ai. He foaki e Tama fuataha ko Iesu Keriso mo lukutoto, nukua tuku age e Iehova ko e Atua ke he tau tagata e amaamanakiaga ke momoui tukulagi. Ka ko e heigoa mooli e lukutoto? Ko e ha ne lata ai? Ti aoga fēfē ai ki a tautolu?

Ko e lukutoto ko e totogi ke liu moua mai e taha mena ne galo po ke fakatoka mai he līlīaga. Fakamaama he Tohi Tapu ko e ha tautolu a tau mamatua fakamua ko Atamu mo Eva ne nakai fai agahala he magaaho ne tufugatia ai, ti amaamanaki ke momoui tukulagi he parataiso he lalolagi fakalataha mo e tau fanau ha laua ka fanafanau he magaaho fakamui. (Kenese 1:26-28) Momoko ai, ne fakagalo e laua e tau mena oti ia he fifili ke nakai omaoma ke he Atua​—ti eke mo tau tagata agahala. Ko e heigoa e fua? Tali he Tohi Tapu: “Tuga ni he hoko mai ai e hala ke he lalolagi ke he tagata tokotaha, ko e mate foki ha ko e hala, ti kua hoko mai ai e mate ke he tau tagata oti kana, ha kua hala e tau tagata oti kana.” (Roma 5:12) Ne nakai fakaholo age e Atamu e moui mitaki katoatoa ke he tau fanau haana, ka e fakaholo age e ia e agahala mo e fakahikuaga ko e mate.

Ma e lukutoto, kua lata e totogi ke tatai ni mo e mena ne galo. Magaaho ne nakai omaoma pauaki a Atamu ke he Atua, ne agahala a ia ti ko e fua ne galo e moui mitaki katoatoa he tagata​—ko e moui ha Atamu. Fakakite mai he Tohi Tapu ko e mena ia ati fakatupa e tau fanau ha Atamu ke he agahala mo e mate. Ko e mena ia, kua lata ni ke foaki e taha moui mitaki katoatoa​—ko e moui ha Iesu​—mo poa ke fakamooli e tokanoaaga mai he līlīaga. (Roma 5:19; Efeso 1:7) Kua maeke ni e mena nei ha ko e fakaalofa he Atua ke totogi e lukutoto ke moua he tau tagata e amaamanakiaga ne fakagalo e Atamu mo Eva​—ko e moui tukulagi he lalolagi parataiso.​—Fakakiteaga 21:3-5.

He mailoga e aoga he lukutoto, nakai fakauaua ai ko e mena fakaalofa he Atua a ia ati maeke ke moua e moui tukulagi, ko e mena fakaalofa uho mua ue atu. Ke loto fakaaue ke he “mena fakaalofa . . . kua katoatoa ai e mitaki,” o mai la ke onoono ke he tau puhala ne mua atu e mitaki ka lagomatai a tautolu ke foaki e tau mena fakaalofa uho tuga ne fakamaama he vala tala kua mole.

Fakamakona e tau manako ha tautolu. Ha ha ia tautolu ko e tau tagata e manako malolō pauaki ke momoui. (Fakamatalaaga 3:11) Pete kua nakai maeke a tautolu ke fakamooli e manako ia, kua maeke he lukutoto ke fakamooli ai ma tautolu. Pehē e Tohi Tapu: “Ha ko e mate ko e palepale ia he hala; ka ko e moui tukulagi ko e mena foaki noa mai he  Atua haia, ke he Iki ha tautolu ko Keriso lesu.”​—Roma 6:23.

Fakapuke e tau manako ha tautolu. Nakai maeke e tau tagata ke foaki e lukutoto. Fakamaama he Tohi Tapu: “Ha ko e mena uka lahi ni e palepale he [“lukutoto ma e tau momoui,” NW] ha lautolu; ti nakai maeke ni tukulagi.” (Salamo 49:8) Ko e mena ia, manako lahi a tautolu ke moua e lagomatai he Atua ke maeke ke fakatokanoa mai he līlīaga he agahala mo e mate. Ka e “ha ko e lukutoto a Keriso Iesu,” kua foaki mai he Atua e mena kua felauaki tonu.​—Roma 3:23, 24.

He magaaho tonu. Talahau he Tohi Tapu ki a tautolu: “Matulei a Keriso ke hukui aki a tautolu, ka ko e tau tagata hala agaia a tautolu.” (Roma 5:8) Ha kua foaki ai “ka ko e tau tagata hala agaia a tautolu,” kua fakakite he lukutoto e fakamooliaga he fakaalofa hokulo he Atua ma tautolu pete e tuaga agahala ha tautolu. Ti foaki mai ki a tautolu e amaamanakiaga lahi pete he fakauka a tautolu ke he tau fua he agahala.

Fakakite e kakano lilifu mua ue atu mo e foaki noa. Kua fakakite mai he Tohi Tapu e kakano ati foaki he Atua e haana Tama mo lukutoto: “Ko e mena foki hanai ne fakakite mai ai e fakaalofa he Atua kia tautolu, he fakafano mai he Atua hana Tama fuataha ke he lalolagi, kia momoui a tautolu kia ia. Ko e fakaalofa hanai, nakai ko e fakaalofa ha tautolu ke he Atua, ka kua fakaalofa mai a ia kia tautolu.”​—1 Ioane 4:9, 10.

Fakakite fēfē e koe e loto fakaaue haau ke he mena fakaalofa uho mua ue atu? Manatu e tau kupu ha Iesu he Ioane 3:16 ne pehē ko lautolu ni “ne tua” ki a ia ka fakamomoui. Talahau he Tohi Tapu ko e tua “ko e falanaki haia ke he tau mena kua amaamanaki ki ai.” (Heperu 11:1) Ke moua e mauokafua ia, kua aoga lahi e iloilo tonu. Ma e kakano nei, kua fakamalolō e mautolu a koe ke fai magaaho ke fakaako hagaao ki a Iehova ko e Atua, ko ia ko e Foaki he “mena fakaalofa . . . kua katoatoa ai e mitaki,” mo e ke iloa e tau mena kua lata ia koe ke taute ke moua e moui tukulagi ne fakaatā he poa lukutoto ha Iesu ki a koe.

Maeke a koe ke fakaako ke he tau mena oti nei he kumikumi ke he tau vala tala he Tohi Tapu ne haia he www.jw.org. Kua fiafia e Tau Fakamoli a Iehova ke lagomatai a koe. Mauokafua a mautolu he fakaako a koe mo e aoga mai he mena fakaalofa uho mua ue atu nei, to omoomoi a koe ke talahau: “Kua fakaaue atu au ke he Atua, ha ko Iesu Keriso ha tautolu a Iki.”​—Roma 7:25.