Skip to content

Skip to table of contents

Tau Fakamoli a Iehova

Fifili e vagahau Faka-Niue

 HŪHŪ HE TAU TAGATA TOTOU HA TAUTOLU . . .

Lata Nakai e Kirisimasi ma e Tau Kerisiano?

Lata Nakai e Kirisimasi ma e Tau Kerisiano?

Totou miliona e tau tagata he lalolagi katoa ne talitonu ko e Kirisimasi ko e fakamanatuaga mai i tuai he aho ne fanau a Iesu Keriso. Ka kua manamanatu nakai a koe na fakamanatu kia he tau Kerisiano he senetenari fakamua, ko lautolu ia ne tata lahi ki a Iesu e Kirisimasi? Mo e iloa nakai e koe e talahauaga he Tohi Tapu hagaao ke he tau aho fanau? He kumi e tau tali ke he tau hūhū nei ka lagomatai a tautolu ke fifili kua lata nakai e Kirisimasi ma e tau Kerisiano.

Fakamua, nakai talahau he Tohi Tapu e fakamanatuaga he aho fanau ha Iesu po ke ha tagata ne tapuaki fakamooli ke he Atua. Hagaao ni e Tohi Tapu ke he ua e tagata ne fakamanatu e tau aho fanau. Nakai tapuaki a laua ki a Iehova ko e Atua he Tohi Tapu, ti fai matematekelea lahi ne tupu he magaaho ne fakamanatu e tau aho fanau ha laua. (Kenese 40:20; Mareko 6:21) Talahau he Encyclopædia Britannica, ne totoko he tau Kerisiano fakamua atu e “aga pouliuli ke fakamanatu e tau aho fanau.”

Fanau a Iesu he aho fe?

Nakai talahau he Tohi Tapu e aho tonu ne fanau a Iesu. “Nakai maeke e aho ne fanau e Keriso ke iloa mooli mai he M[aveheaga] F[ou], po ke ha tohi,” talahau he McClintock and Strong’s Cyclopedia. Ane mai manako mooli a Iesu ke fakamanatu he tau tutaki e aho fanau haana, to eketaha a ia ke fakailoa ki a lautolu e aho ne fanau a ia.

Uaaki, ne nakai fakamau he Tohi Tapu hagaao ki a Iesu po ke taha he tau tutaki haana ne fakamanatu e Kirisimasi. Hagaao ke he New Catholic Encyclopedia, ko e totoku fakamua laia e fakamanatu he Kirisimasi “he Chronograph of Philocalus, ko e tau vala tala Roma ne fakamau he 336 [V.N.].” Maaliali ai, kua leva tuai e oti e tohia he Tohi Tapu mo e loga e senetenari he mole e nofo ha Iesu he lalolagi. Ati talahau e McClintock and Strong “ko e fakamanatuaga he Kirisimasi kua nakai kotofa he Atua po ke mai he M[aveheaga] F[ou].” *

Ko e heigoa ne tala age e Iesu ke he tau tutaki haana ke fakamanatu?

Ha ko Iesu ko e Faiaoga ne Mua, ne tala age fakamaaliali e ia e tau mena ne manako a ia ke taute he tau tutaki haana, ti fakamau e tau mena nei i loto he Tohi Tapu. Nakai putoia ke he tau mena nei e fakamanatu he Kirisimasi. Tuga ni e faiaoga ne nakai manako ke he tau fanau aoga haana ke mua atu he tau mena ne tala age e ia, nakai manako foki a Iesu ke he tau tutaki haana ke “mua [e] manatu ke he mena kua tohi” he Tohi Tapu.​—1 Korinito 4:6.

Ka e taha e matagahua aoga lahi ne aga mau e tau Kerisiano fakamua atu ki ai​—ko e Fakamanatuaga he mate ha Iesu. Ne tala age ni e Iesu ke he tau tutaki haana e magaaho ke taute e fakamanatuaga nei mo e fakakite age e puhala ke taute aki. Ko e tau mena pauaki nei, pihia foki mo e aho ne mate a ia nukua fakamau oti i loto he Tohi Tapu.​—Luka 22:19; 1 Korinito 11:25.

Kitia e tautolu mogonei, ko e Kirisimasi ko e fakamanatuaga he aho fanau, ti nakai taute he tau Kerisiano fakamua atu e aga pouliuli ia. Lafi ki ai, nakai fai talahauaga e Tohi Tapu hagaao ki a Iesu po ke ha tagata ne fakamanatu e Kirisimasi. He iloa e tau vala tala nei, kua totou miliona e tau Kerisiano he lalolagi katoa ne maama ai kua nakai lata e Kirisimasi ma lautolu.

^ para. 6 Ma e falu vala tala ke he tupu maiaga he laulahi he tau aga tuai he Kirisimasi, kikite e vala tala “Our Readers Ask . . . What Are the Facts About Christmas?” he The Watchtower ia Tesemo 1, 2014, ne moua he www.jw.org.