Skip to content

Skip to table of contents

Tau Fakamoli a Iehova

Fifili e vagahau Faka-Niue

 TAU VALA TALA I MUA | TALAHAUAGA HE TOHI TAPU KE HE TAU AGELU

Tala Mooli ke he Tau Agelu

Tala Mooli ke he Tau Agelu

Manako nakai a koe ke iloa e tala mooli ke he tau agelu​—ko hai a lautolu, tutupu mai i fe, mo e ko e heigoa e gahua ha lautolu? Kua mua e mitaki ke kumi e tau tali ke he Kupu mai he agaaga he Atua, ko e Tohi Tapu. (2 Timoteo 3:16) Ko e heigoa ne tala mai he Tohi Tapu ki a tautolu?

  • Tuga ni ko e Atua ko e Agaaga, ko e tau agelu foki ko e tau mena momoui fakaagaaga ne nakai kitia ti “nakai fai kakano . . . mo e tau hui.” Nonofo e tau agelu mahani fakamooli i luga he lagi ti kitekite mau a lautolu ke he fofoga he Atua.​—Luka 24:39; Mataio 18:10; Ioane 4:24.

  • Ko e tau agelu he falu magaaho ne tino tuga e tagata ke taute e tau kotofaaga he lalolagi ne age he Atua ti liu faliu fakaagaaga ka oti e kotofaaga ha lautolu.​—Tau Fakafili 6:11-23; 13:15-20.

  • Pete he hagaao e Tohi Tapu ke he tau agelu ko e tau mena momoui taane ti faliu tumau ke he tau tagata taane, kua nakai fai agelu ne taane po ke fifine. Nakai mau a lautolu ti fanafanau e tau agelu. Lafi ki ai, ne nakai momoui e tau agelu ko e tau tagata he lalolagi​—ko e tau tama mukemuke, tau fanau, po ke tau tagata lalahi. Ne tufugatia e Iehova e tau agelu; ati fakahigoa he Tohi Tapu a lautolu ko e “tau tama tane he Atua.”​—Iopu 1:6; Salamo 148:2, 5.

  • Talahau he Tohi Tapu ke he “tau vagahau he tau tagata katoa mo e tau agelu,” kua fakakite na fai vagahau e tau mena momoui fakaagaaga. Pete ne fakaaoga he Atua e tau agelu ke vagahau ke he tau tagata, nakai fakaatā e Ia a tautolu ke tapuaki po ke liogi ke he tau agelu.​—1 Korinito 13:1; Fakakiteaga 22:8, 9.

  • Kua afe mo afe e tau agelu, liga totou piliona he katoa. *​—Tanielu 7:10; Fakakiteaga 5:11.

  • Ko e tau agelu “kua malolo lahi”​—mua atu e malolō ke he tau tagata​—ti mua atu e iloilo ha lautolu. Kua mafiti e tau agelu ti nakai fakakaupā he tau matafakatufono he fua lalolagi.​—Salamo 103:20; Tanielu 9:20-23.

  • Pete ne mua atu e pulotu mo e malolō fakaagaaga e tau agelu, ne fai fakakaupāaga a lautolu, ti fai mena foki ne nakai iloa e lautolu.​—Mataio 24:36; 1 Peteru 1:12.

  • Ne tufugatia e tau agelu mo e tau aga, tau mahani fakaagaaga, mo e atāina ke fifili. Ti tuga ne tau tagata, kua maeke a lautolu ke fifili ke taute e tau mena hako po ke hepe. Momoko ai, ne fifili falu agelu ke totoko ke he Atua.​—Iuta 6.

^ para. 8 Ia Fakakiteaga 5:11, ko e kupu Heleni fakamua ma e “afe mo afe” kua hagaao ke he loga mo loga, ti maeke ke totou piliona mo piliona e tau mena momoui fakaagaaga!