Skip to content

Skip to table of contents

Tau Fakamoli a Iehova

Fifili e vagahau Faka-Niue

 TAU VALA TALA I MUA | TALAHAUAGA HE TOHI TAPU KE HE TAU AGELU

Tau Agelu​—Maeke Nakai a Lautolu ke Lauia e Moui Haau?

Tau Agelu​—Maeke Nakai a Lautolu ke Lauia e Moui Haau?

Ko e taha afiafi Tapu, ko Kenneth mo Filomena ne nonofo i Curaçao ne o atu ke ahiahi e hoa mau ne fakaako Tohi Tapu mo laua.

“Hohoko atu a maua,” ui e Kenneth, “kua pāpā e fale ti galo e motokā. Ka e fai mena ne omoomoi au ke vilo ke he telefoni he hoana.”

Ne tali he fifine e telefoni ti fakamaama ko e taane haana he gahua. Ka e he mailoga e ia ko Kenneth mo Filomena i fafo, ne hau a ia ke he gutuhala ti uiina a laua ki loto.

Mafiti a laua ke kitia kua hane tagi e fifine. He hafagi e Kenneth e fakaako Tohi Tapu aki e liogi, ne liu foki e fifine kamata ke tagi. Ti hūhū totonu a Kenneth mo Filomena ke he fifine ko e heigoa e lekua.

Fakamaama he fifine ko e amanaki a ia ke tamate ne ia a ia he afiafi ia, ti ko e tohi a ia he tohi taupega ke he taane haana ka e oti noa he tagi e telefoni ha Kenneth. Tala age a ia ki a laua kua matematekelea a ia he gagao fakaatukehe, ti totou e laua mo ia falu kupu fakamafana mai he Tohi Tapu. Kua fakamoui he fakamafanaaga ia e fifine.

“Fakaaue a maua ki a Iehova he fakaatā a maua ke lagomatai e fifine nei ne matematekelea,” ui e Kenneth, “mua atu ha kua omoomoi a maua​—liga he agelu po ke agaaga tapu Haana​—ke vilo ke he telefoni!” *

Hako nakai a Kenneth mo Filomena ke talitonu ko e Atua ne lagomatai ke he puhala he agelu po ke agaaga tapu, po ke malolō gahuahua Haana? Po ke liga felauaki tonu mo e magaaho ne vilo atu a Kenneth?

Nakai maeke a tautolu ke iloa moolioli. Ka e iloa e tautolu na fakaaoga he Atua e tau agelu haana ke lagomatai fakaagaaga e tau tagata. Ma e fakatai, pehē e Tohi Tapu na fakaaoga he Atua e agelu ke takitaki e Kerisiano ko Filipo ke lagomatai e Aitiope ko e fekafekau ne mua hane kumi ke he takitakiaga fakaagaaga.​—Gahua 8:26-31.

Loga e lotu ne fakaako ke talitonu ke he tau mena momoui fakaagaaga ne fakaliga kehe e malolō, falu ia lautolu ne tuga na fiafia ke taute e finagalo he Atua po ke eke mo tau agelu leveki he tau tagata takitokotaha. Tokologa ne talitonu na fai agelu ti maeke foki e tau agaaga ia ke aoga lahi ke he tau momoui ha lautolu. Ka e tokologa ne nakai talitonu na fai agelu.

Mooli nakai e tau agelu? Ka mooli, tutupu mai i fe a lautolu? Ko e heigoa e tala mooli ke he tau agelu? Maeke nakai a lautolu ke lauia e moui haau? To kumikumi a tautolu ke he tau fakamooliaga.

^ para. 8 Ko Iehova e higoa he Atua i loto he Tohi Tapu.​—Salamo 83:18.