Skip to content

Skip to table of contents

Tau Fakamoli a Iehova

Fifili e vagahau Faka-Niue

 TAU VALA TALA I MUA | TALAHAUAGA HE TOHI TAPU KE HE TAU AGELU

Puhala ka Lagomatai he Tau Agelu a Koe

Puhala ka Lagomatai he Tau Agelu a Koe

Ko e tau agelu fakamooli kua fiafia lahi a lautolu ke he tau matagahua he tau tagata ti fakamakutu ke taute e finagalo ha Iehova. Magaaho ne tufugatia he Atua e lalolagi, ko e tau agelu kua “lologo fakalataha . . . mo e kalaga fiafia ai e tau tama tane oti he Atua.” (Iopu 38:4, 7) Tali mai he mogoia, kua fia “kitekite” e tau agelu ke he tau talahauaga fakaperofeta hagaao ke he tau mena tutupu he lalolagi he vahā i mua.​—1 Peteru 1:11, 12.

Fakakite mai he Tohi Tapu, ke maeke ke taute e finagalo he Atua kua foaki he tau agelu he falu magaaho e puipuiaga ma e tau tagata ne tapuaki fakamooli. (Salamo 34:7) Ma e fakatai:

  • He moumou e Iehova e tau maaga mahani kelea ko Sotoma mo Komora, ne lagomatai he tau agelu e tagata tututonu ko Lota mo e magafaoa haana ke fehola.​—Kenese 19:1, 15-26.

  • I Papelonia i tuai he magaaho ne fakahala e tau fuata Heperu tokotolu ke tamate he gutuumu kakā, ko e Atua ne “fakafano mai hana agelu, kua laveaki mai ai e ia hana tau fekafekau.”​—Tanielu 3:19-28.

  • He mole e taha e pō ne tuku e tagata tututonu ko Tanielu he ana he tau leona favale, ne fakamaama e ia kua moui a ia ha kua “fakafano mai he Atua haku hana agelu, kua pa ai e tau gutu he tau leona.”​—Tanielu 6:16, 22.

Leva lahi e lagomatai he tau agelu e tau tagata tua fakamooli

LALAGO HE TAU AGELU E FAKAPOTOPOTOAGA KERISIANO FAKAMUA ATU

Falu magaaho, ne lalago he tau agelu uta fekau he Atua e tau matagahua he fakapotopotoaga Kerisiano fakamua atu kaeke kua lata ke fakamooli e finagalo ha Iehova. Ma e fakatai:

  • Ko e agelu ne vevete e tau pa gutuhala he fale puipui ti poaki ke he tau aposetolo i loto he fale puipui ke matutaki ke fakamatala he faituga.​—Gahua 5:17-21.

  • Ko e agelu ne poaki ke he tagata fakamatala ko Filipo ke fano ke he mena tokanoa he puhala ne hifo mai i Ierusalema ki Kasa mo e fakamatala ke he tagata Aitiope ne fina atu ki Ierusalema ke liogi.​—Gahua 8:26-33.

  • He hoko e magaaho he Atua ma e tau Iutaia ke eke mo tau Kerisiano, ne tū atu e agelu he fakakiteaga ke he takitaki kau Roma ko Konelio ti vagahau ki a ia ke fekau e aposetolo ko Peteru ke fina age ke he kaina haana.​—Gahua 10:3-5.

  • Magaaho ne tuku e aposetolo ko Peteru he fale puipui, ne tū atu e agelu ki a ia ti takitaki mai a ia ki fafo he fale puipui.​—Gahua 12:1-11.

 PUHALA KA LAGOMATAI HE TAU AGELU A KOE

Kua nakai fai fakamooliaga mogonei na fakaaoga he Atua e tau agelu ke lagomatai fakamana e tau tagata tuga he tau puhala ne fakamaama he Tohi Tapu. Pete ia, hagaao ke he magahala ha tautolu ne pehē a Iesu: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” (Mataio 24:14) Iloa nakai e koe kua taute he tau tutaki he Keriso e gahua nei i lalo hifo he takitakiaga he tau agelu?

Lagomatai he tau agelu ke fakapuloa e tala mitaki ke he lalolagi katoa

Fakakite mai he tohi ha Fakakiteaga to eketaha e tau agelu ke lagomatai e tau tagata he lalolagi katoa ke iloa a Iehova ko e Atua mo e finagalo haana ma e tau tagata. Tohi he aposetolo ko Ioane: “Ne kitia foki e au e taha agelu kua lele ke he pulagi, ha ia ia e vagahau mitaki tukulagi ke fakamatala atu kia lautolu kua nonofo ke he lalolagi, mo e tau motu kehe oti, mo e tau magafaoa, mo e tau vagahau kehekehe, mo e tau motu, Kua pehe atu mo e leo lahi, Kia matakutaku a mutolu ke he Atua; mo e ta age kia ia e fakahekeaga, ha kua hoko mai e magaaho he hana fakafiliaga; kia hufeilo foki a mutolu kia ia ne eke e lagi, mo e lalolagi, mo e tahi, mo e tau vai puna.” (Fakakiteaga 14:6, 7) Loga e tau mena tutupu he vahā nei ne fakakite kua lalago he tau agelu e gahua fakamatala he Kautu ke he lalolagi katoa. Mooli ai, ka taha foki e tagata agahala ne fakatokihala ti fuluhi ki a Iehova, kua “pihia ni e fiafia ha i ai ki mua he tau agelu he Atua.”​—Luka 15:10.

Ko e heigoa ka tupu he magaaho ka fakakatoatoa e gahua fakamatala? Ko e tau agelu mogoia he “tau kau ha ha he lagi” to lalago a Iesu Keriso, ko e Patuiki he tau patuiki ke “tau ke he aho lahi he Atua mana” i Amaketo. (Fakakiteaga 16:14-16; 19:14-16) Ko e tau agelu malolō lahi to fakahoko e fakafiliaga he Atua he magaaho he Iki ko Iesu ka “taui atu kia lautolu . . . kua nakai omaoma ke he vagahau mitaki he Iki ha tautolu ko Iesu Keriso.”​—2 Tesalonia 1:7, 8.

Ko e mena ia, kia mauokafua kua fiafia e tau agelu ki a koe. Manamanatu mooli a lautolu ke he tuaga he tau tagata ne manako ke fekafekau ke he Atua, ti fakaaoga tumau e Iehova a lautolu ke fakamalolō mo e puipui e tau fekafekau fakamooli haana he lalolagi.​—Heperu 1:14.

Kua igatia mogoia a tautolu mo e taute e fifiliaga uho. To fanogonogo mo e omaoma nakai a tautolu ke he tala mitaki ne fakamatala he lalolagi katoa? To fiafia e Tau Fakamoli a Iehova he matakavi haau ke lagomatai a koe ke moua e lalagoaga fakaalofa he tau agelu malolō he Atua.