Skip to content

Skip to table of contents

Tau Fakamoli a Iehova

Fifili e vagahau Faka-Niue

Ko Hai ka Tukupau Aki?

Ko Hai ka Tukupau Aki?

Kaeke kua nakai fakatupu he Atua e matematekelea, fakalago mogoia ki a hai e lahi mahaki he hoge, mativa, felakutaki kelea lahi, tau tatalu kelea muitui, mo e tau matematekelea tutupu pauaki? Ko e Kupu he Atua ko e Tohi Tapu, ne fakakite tolu e matapatu kakano ati matematekelea e tau tagata:

  1. Fulukovi, Lotokai, mo e Vihiatia. “Kua pule ai e taha tagata ke he taha, ke kelea ai e ia ni.” (Fakamatalaaga 8:9) Fa matematekelea e tau tagata ha kua lauia he nakai mitaki katoatoa, fulukovi, po ke tau tagata favale.

  2. Magaaho mo e Tau Mena Tutupu Fakaofo. Fa matematekelea e tau tagata ha ko e “vaha mo e tau mena ke tutupu ai kua hoko ia kia lautolu oti.” (Fakamatalaaga 9:11) Kakano kua haia e tau tagata he matakavi hepe he magaaho hepe, ti tutupu e tau pakia, po ke fakahanoa po ke hepe e tau mena ne taute he tau tagata.

  3. Ko e Pule Kelea Lahi Mahaki he Lalolagi. Kua fakakite fakamaaliali he Tohi Tapu e matapatu he tupumaiaga he matematekelea he tagata. Pehē mai: “Ko e lalolagi oti ha he pule hana kua mahani kelea.” (1 Ioane 5:19) Ko ia kua mahani kelea ko Satani ko e Tiapolo, ko e mena moui fakaagaaga malolō lahi ko e agelu he Atua he kamataaga ka e “nakai tumau ni a ia ke he mena moli.” (Ioane 8:44) Ne kau falu agelu mo Satani ti totoko ke he Atua ke moua e tau manako lotokai, ati eke a lautolu mo tau temoni. (Kenese 6:1-5) Tali mai he totokoaga ha lautolu, ne malolō e fakaohoohoaga mo e favale ha Satani mo e haana tau temoni ke he tau gahua he lalolagi nei. Ti mua atu ai he magahala nei ha tautolu. Kua ita lahi e Tiapolo mogonei mo e “kua fakahehe e lalolagi oti,” ti kua fua mai e “oi fakaalofa kia mutolu kua nonofo ke he fonua.” (Fakakiteaga 12:9, 12) Kua pule kelea mooli a Satani. Fakalialia e fiafia haana ke kitia e tau tagata ne matematekelea. Ko Satani ne fakatupu e matematekelea he tau tagata, nakai ko e Atua.

MANAMANATU: Ko e tagata nakai fai logonaaga mo e mahani kelea ka fakamamahi e tau tagata mitaki. Kehe ai, pehē e Tohi Tapu: “Ko e Atua ko e fakaalofa a ia.” (1 Ioane 4:8) Ke tatai mo e aga fakaalofa haana, “kia mamao mo e Atua ke mahani kelea ai a ia, mo Ia hana e malolo oti kana ke mahani hepehepe a ia.”​—Iopu 34:10.

Ka e liga manatu a koe, ‘To fiha e leva he Atua Malolō Ue Atu ka fakaatā a Satani ke matutaki e haana pule kelea muitui?’ Tuga he kitia e tautolu, vihiatia he Atua e mahani kelea ti mamahi lahi foki a ia ka matematekelea a tautolu. Lafi ai, tomatoma he Kupu haana: “Kia tuku atu kia ia e tau mena oti kua fakaatukehe ai a mutolu, ha ko e mena kua manatu e ia a mutolu.” (1 Peteru 5:7) Fakaalofa e Atua ki a tautolu mo e ha ha i ai e malolō ke utakehe e tau matematekelea oti mo e nakai fakafili tonu, to fakamaama he vala tala ka mui mai. *

^ para. 7 Ma e fakamaamaaga matafeiga ke he kakano ati fakaatā he Atua e matematekelea, kikite veveheaga 11 he tohi Ko e Heigoa ne Fakaako Mooli he Tohi Tapu? ne taute fakailoa he Tau Fakamoli a Iehova mo e moua mai he www.jw.org.