Skip to content

Skip to table of contents

Tau Fakamoli a Iehova

Fifili e vagahau Faka-Niue

Matematekelea​—Ko e Fakahala Kia Mai he Atua?

Matematekelea​—Ko e Fakahala Kia Mai he Atua?

FAKATETŌ E HUI HEMA HA LUZIA. He vahā tote, ne moua a ia he poliomyelitis ko e gagao pikitia vave ne lauia e tau hokohoko he tino. He 16 e tau haana, ne tala age e fifine ne gahua a Luzia i ai, “Fakahala he Atua a koe ke nakai gahuahua e taha vala he tino ha kua liuliu mo e kelea e mahani haau ke he matua fifine haau.” Loga e tau he mole, manatu agaia e Luzia e logonaaga mamahi he mogoia.

HE ILOA E DAMARIS KUA MOUA E UHOULU HAANA HE KENESĀ, ne hūhū age e matua taane haana: “Ko e heigoa haau ne taute ati tupu e mena nei ki a koe? Liga fai mena kelea lahi a koe ne taute. Kakano haia ati fakahala he Atua a koe.” Malipilipi e loto ha Damaris ha ko e talahauaga he matua taane.

Leva tuai e manatu, ko e gagao ko e fakahala mai he Atua a ia. Pehē e tohi Manners and Customs of Bible Lands kua tokologa he vahā he Keriso ne talitonu “na gagao ha ko e agahala e tagata ne gagao, po ke tau magafaoa haana, ti ko e fakahala a ia he agahala.” Ko e Medieval Medicine and the Plague ne talahau he loga e tau senetenari he mole e Keriso, “falu tagata ne talitonu kua fakahoko he Atua e tau malaia ke fakahala a lautolu ha ko e tau agahala ha lautolu.” Ti ko e totou miliona ne mamate i Europa ha ko e gagao he senetenari ke 14 aki, ko e fakahala kia a ia he Atua ke he tau tagata mahani kelea? Po ke matematekelea ha ko e pikitia he tau moko gagao, tuga he talahau he tau tagata kumikumi fakaekekafo? Liga manamanatu e falu, fakaaoga mooli kia he Atua e gagao ke fakamatematekelea aki e tau tagata ma e tau agahala ha lautolu? *

MANAMANATU: Ko e ha a Iesu ne fakamaulu e tau tagata gagao kaeke ko e gagao mo e matematekelea ko e fakahala pauaki mai he Atua? Nakai kia kua fakateaga a ia ke he fakafili tonu mo e tututonu he Atua? (Mataio 4:23, 24) Nakai fakaai a Iesu ke totoko e tau gahua he Atua. Pehē a ia: “Ha ko e mena eke mau e au e tau mena kua mitaki kia ia,” ti “tuga e poaki mai foki he Matua kia au, pihia he eke e au.”​—Ioane 8:29; 14:31.

Kua maaliali e Tohi Tapu. Ko Iehova ko e Atua kua “nakai ha ha ia ia ha mahani kelea.” (Teutaronome 32:4) Ma e fakatai, nakai fakahagahaga kelea he Atua e vakalele ti totou teau e tagata ka mamate, ha kua manako a ia ke fakahala taha tagata i loto! Ke felauaki mo e tututonu he Atua, ne pehē a Aperahamo ko e fekafekau tua fakamooli he Atua, to nakai maeke e Atua ke “fakamahakava . . . e tau tagata tututonu fakalataha mo e tau tagata mahani kelea.” Pehē a ia to “mamao ni ia koe [Atua].” (Kenese 18:23, 25) Pehē foki e Tohi Tapu kua “nakai mahani kelea e Atua”; ko ia kua nakai “mahani hepehepe.”​—Iopu 34:10-12.

FAKAAKO HE TOHI TAPU A TAUTOLU KE HE MATEMATEKELEA

Ko e matematekelea ne lauia a tautolu kua nakai ko e fakahala he Atua ma e agahala pauaki. Talahau fakamaali foki e Iesu ke he matakupu nei he kitia e ia mo e tau tutaki haana e tagata matapouli he fanau mai. “Ti hūhu hana tau tutaki kia ia, kua pehe age, Rapai na e, ko hai ne hala, ko ia nai, po ke hana tau matua? he fanau mai ai a ia mo e matapouli. Kua tala age a Iesu, Nakai hala e tagata nai, po ke hana tau matua; ka kia fakailoa ai e tau gahua he Atua ia ia.”​—Ioane 9:1-3.

He mailoga e tau manatu hehē kua tupu holofa ai, ne liga ofo e tau tutaki ha Iesu he tala age a ia kua nakai agahala e tagata nei po ke tau matua haana ati tupu e matematekelea. Ne fakamaulu e Iesu e tagata  matapouli ati fakahako e taofiaga hehē na fakatupu he Atua e matematekelea. (Ioane 9:6, 7) Ko lautolu kua matematekelea lahi he gagao mogonei ka mafanatia he iloa ne nakai ko e Atua ne fakatupu e tau gagao ha lautolu.

Ko e ha ne fakamaulu e Iesu e tau tagata gagao kaeke ko e Atua ne fakahala a lautolu ne mahani kelea?

Fakamafana he Tohi Tapu a tautolu

  • “Nakai kamatamata ai e Atua ke he mena kelea, nakai kamatamata foki e ia ke he taha.” (IAKOPO 1:13) Mooli, ko e tau “mena kelea” ne matematekelea e tau tagata ke he loga e tau senetenari, putoia e gagao, mamahi, mo e mate, to nakai leva ti utakehe katoatoa.

  • Ko Iesu Keriso ne “fakamalolo foki e ia a lautolu oti ne gagao.” (MATAIO 8:16) He fakamaulu e tau tagata oti ne o mai ki a ia, kua fakatātā he Tama he Atua e tau mena ka taute he Kautu he Atua ke he lalolagi katoa.

  • “To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.”​—FAKAKITEAGA 21:3-5.

KO HAI KA TUKUPAU AKI?

Ko e ha mogoia ne lahi e mamahi mo e matematekelea he tau tagata? Leva tuai e manamanatu he tau tagata ke he hūhū ia. Kaeke kua nakai fakatupu he Atua, ko hai ka fakalago ki ai? Ko e tali ke he tau hūhū ia to fakatutala he vala tala ka mui mai.

^ para. 4 Pete kua lagaloga e fakahala he Atua e tau tagata he vahā i tuai ha ko e tau agahala pauaki, nakai talahau he Tohi Tapu kua fakaaoga e Iehova mogonei e tau mena tuga e gagao po ke matematekelea ke fakahala e tau tagata ma e tau agahala ha lautolu.