Skip to content

Skip to table of contents

Tau Fakamoli a Iehova

Fifili e vagahau Faka-Niue

“Ko Fe e Atua?”

“Ko Fe e Atua?”

“HAKE TUMAU MAI E HŪHŪ: KO FE E ATUA?”​—Pope Benedict XVI, he ahiahi ke he kemuaga pagotā he mogo fakamua i Auschwitz, Poland.

KA TUTUPU E TAU MENA MATEMATEKELEA, FA MANATU NAKAI A KOE, ‘KO FE E ATUA?’ PO KE LAUIA E MOUI HAAU HE MENA FAKATUPETUPE, TI HŪHŪ A KOE NA MANAMANATU NAKAI E ATUA KI A KOE?

Liga logona hifo a koe tuga a Sheila, ne nofo i United States. He feaki hake a ia he magafaoa ne malolō ke he lotu, pehē a ia: “Tali mai he vahā tote ne futia au ke he Atua ha ko ia e Tufuga ha tautolu. Ka e nakai tata au ki a ia. Manamanatu au na onoono mai a ia ki a au, ka e he mena mamao. Logona hifo e au kua fiafia e Atua ki a au ka e nakai talitonu au na fakaalofa mai a ia ki a au.” Ko e ha ne fakauaua a Sheila? Fakamaama e ia: “Ne lauia e magafaoa haaku he tau matematekelea loga, ti tuga kua nakai lagomatai he Atua a mautolu.”

Ke tuga a Sheila, liga logona hifo a koe na ha ha i ai mooli e Atua Mua Ue Atu. Ka e manatu a koe na leveki mooli nakai e ia a koe. Ne fakauaua foki e tagata tututonu ko Iopu, ko ia ne tua ke he malolō mo e pulotu he Tufuga. (Iopu 2:3; 9:4) He mole e tau lekua ne tupufetui ke he moui ha Iopu​—ti nakai moua ha fakatotokaaga​—ne hūhū a ia ke he Atua: “Kua haga kehe he ha e koe hau a fofoga ia au, mo e eke e koe au mo fi hau?”​—Iopu 13:24.

Ko e heigoa ne talahau he Tohi Tapu? Tukupau aki kia e Atua ka tutupu e tau matematekelea? Fai fakamooliaga nakai na manamanatu e Atua ke he tau tagata oti mo e ki a tautolu takitokotaha? Ki a tautolu takitokotaha, fai nakai a tautolu ne iloa mooli na mailoga, maama, fakaalofa hofihofi, po ke lagomatai e ia e tau lekua ha tautolu?

He tau vala tala ka mui mai, to fakatutala a tautolu ke he tau puhala kua fakaako mai he tau mena ne tufugatia na leveki he Atua a tautolu. (Roma 1:20) To kumikumi foki a tautolu ke he tau talahauaga he Tohi Tapu ma e levekiaga he Atua. He holo ki mua e “iloa e [koe] a ia” ha ko e tau tufugatia mo e Kupu haana, to lahi atu foki e mafanatia haau “kua manatu e ia a [koe].”​—1 Ioane 2:3; 1 Peteru 5:7.