Skip to content

Skip to table of contents

Tau Fakamoli a Iehova

Fifili e vagahau Faka-Niue

Fakaalofa Hofihofi Kia e Atua?

Fakaalofa Hofihofi Kia e Atua?

FAKAAKO A TAUTOLU MAI HE TAU MENA NE TUFUGATIA

Ko e fakaalofa hofihofi kua kakano “ko e maeke ke maama e tau logonaaga mo e tau tuaga he taha tagata he manamanatu to fēfē la kaeke ko au he tuaga he tagata ia.” Ko e tagata pulotu ke he manamanatuaga ko Dr. Rick Hanson, ne pehē “ha ha he tau huimotua ha tautolu e fakaalofa hofihofi.”

MANAMANATU: Ko e ha e tau tagata ne maeke ke fakakite e fakaalofa hofihofi, ka e nakai pihia e tau mena momoui oti ne toe? Fakamaama he Tohi Tapu na tufugatia he Atua e tagata ke he haana fakatai. (Kenese 1:26) Tufugatia a tautolu ke he fakatai he Atua ti maeke ke fakakite e aga mo e falu mahani mitaki haana. Ko e mena ia, ka omoomoi e tau tagata loto fakaalofa ke lagomatai e falu, kua fakakite e lautolu e fakaalofa hofihofi he ha lautolu a Tufuga ko Iehova ko e Atua.​—Tau Fakatai 14:31.

FAKAAKO HE TOHI TAPU A TAUTOLU KE HE FAKAALOFA HOFIHOFI HE ATUA

Fakaalofa hofihofi e Atua ki a tautolu ti nakai fiafia ke kitia a tautolu kua matematekelea. Hagaao ke he tau tagata Isaraela i tuai ne fakauka ha ko e fakatupa fakakelea i Aikupito ti 40 e tau ne matematekelea ai he tutakale, pehē e Tohi Tapu: “Nakai fai fi a ia kia lautolu ke he ha lautolu a tau matematekelea oti.” (Isaia 63:9) Mailoga kua nakai kitia hokoia he Atua e fakaatukehe ha lautolu. Maeke a ia ke logona e mamahi ha lautolu. “Ha kua kitia e au ha lautolu a mamahi,” he talahau e ia. (Esoto 3:7) “Ha ko ia kua piki atu kia mutolu,” he talahau he Atua, “kua piki atu ai a ia ke he alito mata he hana fofoga.” (Sakaria 2:8) Ka fakamamahi he falu a tautolu, kua mamahi fakalataha a ia mo tautolu.

Fakamafana mai he Tohi Tapu pete kua liga logona hifo e tautolu e nakai aoga mo e fakateaga ke moua e fakaalofa hofihofi he Atua, “kua mua e Atua ke he tau loto ha tautolu, kua fioia foki e ia e tau mena oti kana.” (1 Ioane 3:19, 20) Iloa mitaki he Atua a tautolu he iloa e tautolu a tautolu ni. Kua iloa katoatoa e ia e tau tuaga oti ha tautolu mo e tau manatu mo e tau logonaaga. Fakaalofa hofihofi a ia ki a tautolu.

Maeke a tautolu ke haga ke he Atua ma e fakamafana, pulotu, mo e lalago he iloa kua lagomatai e ia a lautolu kua fakaatukehe

 Fakamafana he Tohi Tapu a tautolu

  • “Ti ui atu a koe, ti tali mai ai e Iehova; to tagi atu a koe ti pehe mai a ia, Ko au hanai.”​—ISAIA 58:9.

  • “Ha kua iloa e au e tau manatu kua manatu ai au kia mutolu, ko e tau manatu ke he monuina [mafola], ka e nakai ko e malaia, kua pihia mai a Iehova, ke foaki atu kia mutolu e fakahikuaga ne ha i ai e amaamanaki. Ti ui mai ai e mutolu kia au, to o foki a mutolu mo e liogi kia au, to fanogonogo foki au kia mutolu.”​—IEREMIA 29:11, 12.

  • “Kia utu haku a tau hihina mata ke he hāu a lupo; nakai kia ha ha he tohi hāu?”​—SALAMO 56:8.

MAILOGA, MAAMA, MO E FAI LOGONAAGA E ATUA KI A TAUTOLU

Maeke nakai he iloa na fakaalofa hofihofi e Atua ki a tautolu ke lagomatai a tautolu ke fehagai mo e tau mena vihi? Manamanatu ke he mena ne tupu ki a Maria:

“Logona hifo e au kua uka mo e nakai fakafili tonu e moui he mole e mamahi lahi mahaki au he mate e tama taane haaku ne 18 e tau he moui ne ua e tau he taufetului mo e kenesā. Ita au ki a Iehova he nakai lagomatai ke fakamaulu e gagao he tama taane haaku!

“Ono e tau he mole, ko e kapitiga ofania mo e fakaalofa hofihofi noa he fakapotopotoaga ne fanogonogo he tala age e au e tau logonaaga haaku kua nakai fakaalofa a Iehova ki a au. Fai tulā he mole e fanogonogo ki a au mo e nakai fakatauhele, ne fatiaki e ia e kupu tohi ne aamotia e loto haaku. Ko e 1 Ioane 3:19, 20 ne pehē: ‘Kua mua e Atua ke he tau loto ha tautolu, kua fioia foki e ia e tau mena oti kana.’ Fakamaama e ia na maama e Iehova e fakaatukehe ha tautolu.

“Pete e mena nei, ne uka ia au ke fakatoka kehe e ita haaku! Totou mogoia e au e Salamo 94:19 ne pehē: ‘Ko e tau manamanatu loga he haku a loto kua fiafia ai au ha ko e fakamafanaaga mai ia koe.’ Logona hifo e au kua tuga na tohi pauaki e tau kupu nei ma haaku! Fakahiku ai ne mafanatia lahi au he maeke ke tutala ki a Iehova hagaao ke he fakaatukehe haaku, ti iloa kua fanogonogo mo e maama e ia.”

Kua mafanatia mooli ke iloa kua maama mo e fai logonaaga e Atua ki a tautolu! Ka ko e ha mogoia ne lahi mahaki e matematekelea? Kua fakahala kia he Atua a tautolu he taute e tau mena hepe? Maeke nakai e Atua ke utakehe katoatoa e matematekelea? To fakatutala ke he tau matakupu nei he tau vala tala ka mui mai.