Skip to content

Skip to table of contents

Tau Fakamoli a Iehova

Fifili e vagahau Faka-Niue

Puhala ka Aoga a Koe he Levekiaga he Atua

Puhala ka Aoga a Koe he Levekiaga he Atua

Tufugatia he Atua e tau tino ha tautolu ke he puhala ofoofogia ke maeke ke maulu. Ka mahele, mavakuvaku, po ke pū e vala he tino he tagata malolō, “kua ofoofogia e puhala ne maeke ai ke gahuahua ke fakamaulu e tau matamotu lalahi mo e ikiiki.” (Johns Hopkins Medicine) Gahuahua agataha e tino ke taofi e tafe he toto, fakalahi e tau hoko toto, fakamaulu e matamotu, mo e fakamaō e vala ia ne pakia.

MANAMANATU: Ka talaga he Tufuga e tau tino ha tautolu ke maulu, to mauokafua nakai a tautolu ke he maveheaga haana ke lagomatai a tautolu ke kautū mai ka hukia e tau logonaaga? “Kua fakamalolo e ia a lautolu ne malipilipi e tau loto,” he tohia he salamo. “Kua pipi e ia ha lautolu a tau motu.” (Salamo 147:3) Kaeke kua fakaatukehe po ke matematekelea e tau logonaaga haau, maeke fēfē a koe ke iloa tonu to pipi e Iehova e tau motu haau he mogonei mo e anoiha?

FAKAAKO HE TOHI TAPU A TAUTOLU KE HE FAKAALOFA HE ATUA

Mavehe mai e Atua: “Ua matakutaku a koe, ha kua fakalataha au mo koe; aua neke kitekite fano a koe, ha ko au ko e hau a Atua; kua fakamalolo e au a koe; ko e moli, kua lagomatai au kia koe.” (Isaia 41:10) Ko e tagata ne iloa na leveki e Iehova a ia kua mafola e manamanatuaga mo e malolō ke fehagai mo e tau kamatamata kehekehe. Fakahigoa he aposetolo ko Paulo e fakatotoka he loto “ko e monuina [mafola] foki mai he Atua kua mua ue atu ke he tau mena oti kua manamanatu ki ai.” Lafi e Paulo: “Ha ha he Atua e lahi ue atu he malolo.”​—Filipi 4:4-7, 9; 2 Korinito 4:7.

Lagomatai he tau kupu Tohi Tapu a tautolu ke atihake e tua ke he tau maveheaga ha Iehova ma e vahā anoiha he tau tagata. Ma e fakatai, he Fakakiteaga 21:4, 5 kua tala mai ko e heigoa haana ka taute mo e ko e ha kua maeke a tautolu ke falanaki to taute ai e ia:

  • “To holoholo kehe he Atua e tau hihina mata oti” he tau mata he tau tagata. To utakehe katoatoa e Iehova e tau matematekelea mo e tau fakaatukehe ha tautolu, pete ka fakateaga ke he kitiaaga he falu.

  • “Kua nofo ke he nofoaiki” lilifu he lagi e Patuiki Malolō Ue Atu he tau tufugatia oti kana ka fakagahuahua e malolō mo e pule haana ke nakai matematekelea mo e foaki ki a tautolu e lagomatai kua lata.

  • Poaki mai e Iehova ko e tau maveheaga haana “kua moli mo e fakamoli ia.” Kakano to fakavē e matahigoa haana ko e Atua mooli he fakamooli e tau maveheaga haana.

“To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua. Kua tala mai foki a ia kua nofo ke he nofoaiki, Kitiala, kua fakafou tuai e au e tau mena oti. Kua tala mai foki a ia kia au, Tohi ā; ha ko e tau kupu nai kua moli mo e fakamoli ia.”​—Fakakiteaga 21:4, 5.

Fakakite he tau tufugatia he lagi mo e lalolagi ti pihia mo e Tohi Tapu e aga mo e tau mahani he ha tautolu a Matua he lagi. Pete kua fakakite he tau tufugatia e uiina fakamahao ke iloa e Atua ko e Kapitiga tata, kua talahau fakalapalapa he Tohi Tapu e uiina ia he pehē: “Kia fakatata atu a mutolu ke he Atua, ti fakatata mai ai a ia kia mutolu.” (Iakopo 4:8) Pehē e Gahua 17:27: “Ka e nakai ni mamao a ia mo tautolu takitokotaha.”

He eketaha a koe ke iloa e Atua to lahi foki e mauokafua haau “kua manatu e ia” a koe. (1 Peteru 5:7) Ko e heigoa e tau mena aoga he falanaki pihia ki a Iehova?

Manamanatu ke he mena ne tupu ki a Toru mai i Sapanī. Ne feaki he matua fifine Kerisiano a ia ka e putoia a ia he tau puhala favale he yakuza, ko e Mafia Sapanī. Talahau e ia, “Talitonu au kua vihiatia he Atua au ti logona hifo ko e tau tagata ne lafi mo au kua mamate, mua atu ki a lautolu ko e tau fakahele haaku, ko e fakahala ki a au a ia.” Talahau e Toru ko e takatakai mahani vale mo e aga pihia ati eke a ia “mo tagata nakai fai logonaaga mo e kelea.” Hagaao ke he foliaga haana, ne talahau e ia, “Fia mate au he fuata agaia ka mole e tamate e taha tagata ne mua atu e talahaua ia au ti fai matahigoa mogoia au.”

 Ka e he fakaako a Toru mo e hoana haana ko Hannah ke he Tohi Tapu, ne taute e Toru e tau hikiaga lalahi ke he moui mo e onoonoaga haana. “Ne kitia maaliali e au e tau hikiaga nei he taane haaku,” he talahau e Hannah. Mogonei, ne talahau mauokafua e Toru: “Na fai Atua ne leveki mooli ki a tautolu takitokotaha. Nakai manako a ia ke mate taha, ti makai a ia ke fakamagalo a lautolu kua fakatokihala mooli ke he tau hepehepe ha lautolu. Fanogonogo a ia ke he tau mena ne nakai maeke a tautolu ke tala age ke he ha tagata ka ko ia ni, mo e to nakai maama he ha tagata. He vahā tata i mua, to utakehe katoatoa e Iehova e tau lekua, matematekelea, mo e mamahi. Pihia foki mogonei, kua lagomatai e ia a tautolu he tau puhala ne nakai amanaki ki ai. Kua leveki mo e laveaki e ia a tautolu ka takaveli a tautolu.”​—Salamo 136:23.

Tuga ne fakamaama he mena ne tupu ki a Toru, he iloa na maeke e Atua ke utakehe katoatoa e tau matematekelea mo e nakai leva ti holoholo kehe e tau hihina mata oti, kua moua e tautolu e amaamanakiaga mooli ma e anoiha, ti lagomatai foki a tautolu ke mitaki e tau momoui mogonei. Ē, pete kua pukenamo e lalolagi he matematekelea, maeke a koe ke aoga mai he levekiaga fakaalofa he Atua.