Skip to content

Skip to table of contents

Tau Fakamoli a Iehova

Fifili e vagahau Faka-Niue

 TAU VALA TALA I MUA | TOKOFĀ E TAGATA HEKE SOLOFANUA​—PUHALA NE LAUIA A KOE

Tokofā e Tagata Heke Solofanua​—Ko Hai a Lautolu?

Tokofā e Tagata Heke Solofanua​—Ko Hai a Lautolu?

Ko e tau tagata heke solofanua tokofā ne tuga ko e mena galo ti matakutakuina, ka e nakai lata ke pihia. Ko e ha? Ha kua lagomatai he Tohi Tapu mo e tau mena tutupu he fakamauaga tala he vahā nei a tautolu ke kitia maaliali e kakano he tau tagata heke solofanua takitaha. Ti pete ko e heke atu ha lautolu kua fakakite e malaia he lalolagi, kua maeke foki ke eke mo tala mitaki ma haau mo e magafaoa haau. Puhala fe? Fakamua, to kumikumi a tautolu ke he tau tagata heke solofanua takitaha.

KO IA NE HEKE HE SOLOFANUA HINA

Ko e fakakiteaga ne kamata pehē: “Kitia ai e au, kitiala, ko e solofanua hina, ha ia ia foki kua heke ai e kaufana; kua ta age foki ki ai e foufou, ti fina atu ai a ia kua kautu, to kautu ni a ia.”​—Fakakiteaga 6:2.

Ko hai a ia ne heke he solofanua hina? Ko e puhala pauaki ke kitia a ia kua moua he tohi foki ni ha Fakakiteaga he Tohi Tapu, ne fakamaama he magaaho fakamui hagaao ki a ia nei ne heke he solofanua he lagi “Ko e Loko he Atua.” (Fakakiteaga 19:11-13) Ko e matahigoa ia Ko e Loko, kua moua e Iesu Keriso ha ko ia e gutuvagahau he Atua. (Ioane 1:1, 14) Lafi ki ai, fakahigoa foki a ia, ko e “Patuiki he tau patuiki, mo e Iki he tau iki” mo e talahau foki ko e “Fakamoli, mo e Moli.” (Fakakiteaga 19:16) Maaliali ai, kua moua e ia e pule ko e patuiki malolō ti nakai fakaaoga fakakeukeu po ke fakahehē e malolō haana. Ka e lagā mai falu hūhū.

Ko hai ne age ki a Iesu e pule ke kautu? (Fakakiteaga 6:2) Kitia he perofeta ko Tanielu e fakakiteaga ke he Mesia ne tuga e “Tama he tagata,” ne foaki ki ai e “pule, mo e fakahekeaga, mo e kautu” mai ni ia Iehova ko e Atua ko “Ia ne mai i tuai hana tau aho.” * (Tanielu 7:13, 14) Ko e Atua Malolō Ue Atu ne foaki ki a Iesu e malolō mo e tonuhia ke pule mo e fakahoko e fakafiliaga. Ko e solofanua hina ko e fakamailoga kua felauaki tonu ma e tauaga tututonu ne fakahoko he Tama he Atua, ha kua fa fakaaoga he Tohi Tapu e lanu hina ko e fakamailoga he tututonu.​—Fakakiteaga 3:4; 7:9, 13, 14.

Magaaho fe ne kamata e tau tagata heke solofanua ke heke atu? Mailoga ko Iesu ne heke atu fakamua, kua kamata he magaaho ne moua e ia e foufou. (Fakakiteaga 6:2) Magaaho fe ne fakafoufou a Iesu ko e Patuiki i luga he lagi? Nakai he magaaho ne liu a ia ke he lagi he mole e mate haana. Fakakite he Tohi Tapu ne kamata e fakatali haana he magaaho ia. (Heperu 10:12, 13) Foaki age e Iesu ke he tau tutaki haana e mena ke mailoga e fakaotiaga he magaaho fakatali ia mo e kamataaga he pule haana i luga he lagi. Pehē a ia ka kamata e pule haana, to kelea lahi mahaki e tau tuaga he lalolagi. To ha ha i ai e felakutaki, kūkū e tau mena kai, mo e tau tatalu. (Mataio 24:3, 7; Luka 21:10, 11) Nakai leva e kamata e Felakutaki I he Lalolagi he 1914, maaliali ai kua hohoko e tau tagata ke he vahā ia, ko e magaaho matematekelea he lalolagi ne fakahigoa he Tohi Tapu “ko e tau aho fakamui.”​—2 Timoteo 3:1-5.

Ka ko e ha ne kitia e tautolu kua au atu e kelea he tau tuaga tali mai he moua e Iesu e foufou haana he 1914? Ha ko e magaaho ia, ne kamata a Iesu ke pule mai he lagi, nakai he lalolagi. Ne hoko ai e latau i luga he lagi, ti ko e Patuiki ne kotofa foou ko Iesu ne hagaao ki a Mekaeli, ne liti hifo a Satani mo e haana tau temoni ke he lalolagi. (Fakakiteaga 12:7-9, 12) He haia a Satani he lalolagi nei, ne ita lahi a ia tali mai he magaaho ia ha kua iloa e ia kua tote haana vahā. Ti nakai leva to fakahoko he Atua e finagalo haana ki a Satani he lalolagi. (Mataio 6:10) O mai la mogonei ke kitia ko e fakamooli fēfē he tau tagata heke solofanua tokotolu ne toe kua nonofo mooli a  tautolu he “tau aho fakamui.” Nakai tuga e tagata heke solofanua fakamua ne hagaao ke he tagata pauaki, ko lautolu tokotolu ne mumui mai kua hagaao ke he tau tuaga he lalolagi katoa ne kua lauia e tau tagata oti kana.

KO IA NE HEKE HE SOLOFANUA KULA

“Ti fina atu ai e taha solofanua kua kula; kua ta age foki e pule kia ia kua heke ai ke uta kehe e mafola mai he lalolagi, kia fekeliaki ai a lautolu; kua ta age foki kia ia e pelu lahi.”​—Fakakiteaga 6:4.

Ko ia ne heke he solofanua nei kua fakatino e felakutaki. Kua utakehe e ia e mafola he lalolagi katoa, ka e nakai ni he falu motu. He 1914, ne hoko ai e felakutaki fakamua he lalolagi katoa. Mui mai ai e felakutaki ke uaaki ne au atu e tokologa ne mamate. Fuafua ai he falu ko e numera katoa ne mamate he tau felakutaki mo e latau tali mai he 1914 kua molea e 100 miliona! Lafi ki ai, tokologa atu ne pakia kelea lahi mahaki.

Kitia lahi fēfē kua fakamailoga he felakutaki e magahala nei? Magaaho fakamua laia he fakamauaga tala tuai ne tuga na maeke e tau tagata ke tamate oti e tau tagata he lalolagi. Kua nakai maeke foki e tau matakau taute mafola tuga e United Nations ke taofi a ia kua heke he solofanua kula.

KO IA NE HEKE HE SOLOFANUA ULI

“Kitia ai e au, kitiala, ko e solofanua uli; ha he lima hana kua heke ai e fua tautau. Ne logona foki e au e leo mai he vaha he tau mena momoui ne fa, kua pehe mai, Ko e totogi he koini saito ko e taha tenari ia, ko e totogi foki he tolu a koini karite ko e taha tenari ia, aua foki neke moumou e koe e puke lolo mo e uaina.”​—Fakakiteaga 6:5, 6.

Ko ia ne heke he solofanua nei kua fakatino e hoge. Kitia e tautolu e gahoa lahi he tau mena kai ha ko e taha e koini saito (0.7 e kilo) ke he taha e tenari, ko e totogi he gahua he aho katoa he senetenari fakamua! (Mataio 20:2) Ko e tupe taha ia foki ka fakatau aki tolu e koini karite (2.1 e kilo), mena kai ne nakai mahuiga tuga e saito. To maeke nakai e mena kai ia ke fagai aki e magafaoa lahi? Ti kua hataki ke he tau tagata ke fatifati fakamitaki e tau mena kai he tau aho takitaha tuga e tau mena aga mau he magahala mo e motu ia ko e puke lolo olive mo e uaina.

Tali mai he 1914, kua kitia nakai e tautolu e fakamooliaga kua gahuahua a ia nei ne heke he solofanua uli? Ē! Kavi ke he 70 e miliona tagata ne mamate he hoge he senetenari ke 20 aki. Fuafua he taha takitaki ko e “805 e miliona tagata​—kavi ke he taha mai he hiva he puke tagata he lalolagi​—ne nakai kai mitaki he 2012-14.” Pehē taha hokotaki foki: “Kua mua atu e tokologa he tau tagata ne mamate he hoge he tau tau takitaha ka fakatatai ke he tau tagata ne mamate he AIDS, malaria mo e māmā pala.” Pete he eketaha ke fagai e tau tagata ne hoge, kua matutaki ni a ia ne heke he solofanua uli.

KO IA NE HEKE HE SOLOFANUA KULA TEA

“Kitia ai e au, kitiala, ko e solofanua kula tea, ko e higoa foki hana kua heke ai ko e Mate, kua mui foki a Hate kia ia; kua ta age foki kia laua e pule ke kelipopo e vahega ne fakafa aki e lalolagi ke he pelu, mo e hoge, mo e mate, katoa mo e tau manu favale he vao.”​—Fakakiteaga 6:8.

Ko ia ne heke he solofanua ke fāaki kua fakatino e mate ha ko e tau tatalu mo e falu matematekelea. Nakai leva e mole he 1914, ne totou hogofulu miliona ne mamate he fulū Sepania. Liga 500 miliona tagata ne pikitia, kavi ke he 1 mai he 3 e tagata ne ha ha he magahala ia!

Ka ko e kamataaga e fulū Sepania. Fuafua he tau tagata pulotu kua totou teau miliona ne mamate he gagao smallpox he magahala he senetenari ke 20 aki. Hoko mai mogonei, totou miliona ne mamate he AIDS, māmā pala, mo e malaria, pete he lahi mahaki e kumikumiaga fakaekekafo.

Ko e fakahikuaga ni ko e mate​—ha ko e felakutaki, hoge, po ke tatalu. Kua puke a Hate ia lautolu, ti nakai fai fakaotiaga ne moua mai.

 TAU VAHĀ MITAKI I MUA!

To nakai leva ti fakaoti e tau lekua mogonei. Manatu e mena nei: Ko Iesu ne “fina atu ai a ia kua kautu” he 1914, ti haia ni a Satani he lalolagi ka e nakaila katoatoa e kautuaga ha Iesu he magaaho ia. (Fakakiteaga 6:2; 12:9, 12) Nakai leva i Amaketo, to utakehe e Iesu e fakaohoohoaga ha Satani ti moumou e tau tagata ne lalago e Tiapolo. (Fakakiteaga 20:1-3) Nakai ni fakaotioti e Iesu a lautolu ne heke solofanua tokotolu ne toe ka e hiki foki e tau lauiaaga matematekelea ha lautolu. Puhala fe? Manamanatu la ke he tau maveheaga he Tohi Tapu.

To fakaoti e felakutaki ka e pule e mafola. Ko Iehova “kua fakahiku e ia e tau ato hoko ke he fakatulakiaga he lalolagi; kua fafati e ia e kaufana, mo e tūtū e tao.” (Salamo 46:9) Ma e tau tagata ne fiafia ke he mafola, to “fakafiafia foki e lautolu a lautolu ha ko e monuina kua lahi.”​—Salamo 37:11.

To fakaoti e hoge, ti loga e mena kai. “To ha i ai e puke aloalolima he tau saito ke he motu, ki luga he fuga mouga.”​—Salamo 72:16.

Nakai leva to hiki e Iesu e tau lauiaaga he tau tagata heke solofanua tokotolu ne toe

To fakaoti e tatalu mo e mate, ti moua he tau tagata oti e malolō tino mitaki katoatoa mo e moui tukulagi. “To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea.”​—Fakakiteaga 21:4.

He nofo a Iesu he lalolagi, ne fakakite e ia e fakatino mafanatia he tau tuaga he vahā i mua i lalo hifo he pule haana. Ne fakalagalaga e ia e mafola, fagai fakamana e tokoafe, fakamaulu e tau tagata gagao, mo e fakaliu tu mai foki a lautolu ne mamate.​—Mataio 12:15; 14:19-21; 26:52; Ioane 11:43, 44.

Kua fiafia lahi e Tau Fakamoli a Iehova ke fakakite atu ki a koe he Tohi Tapu haau e puhala ke mautali a koe ka oti e heke he tau tagata heke solofanua ia. To talia nakai e koe e uiina ke fakaako foki falu mena?

^ para. 7 Ko Iehova e higoa he Atua ne fakakite i loto he Tohi Tapu.