Skip to content

Skip to table of contents

Tau Fakamoli a Iehova

Fifili e vagahau Faka-Niue

Kua Aoga MOOLI ke Moui

Kua Aoga MOOLI ke Moui

Ko Faizal nukua lata ke iihi lahi e ate he taha e tau he mole e mate he hoana haana. Pehē a ia: “He totou e au e tohi a Iopu, iloa e au na fai kakano ne tuku ai e Iehova i loto he Tohi Tapu. Ka moua e tautolu e tagata i loto he Tohi Tapu ne tatai e tuaga mo tautolu, ko e puhala a ia ke fakatotoka e tau loto fakaatukehe ha tautolu.” Lafi e ia: “Ti kua aoga agaia ke moui.”

Ko Tarsha ne tote he mogo ne mate e matua fifine haana. Pehē a ia: “Ko e iloa e Tufuga ha tautolu ati fai kakano, amaamanakiaga, mo e fiafia e moui pete e tau mena oti ne liga fehagai mo tautolu. Mauokafua a tautolu kua maeke a Iehova ke lagomatai a tautolu he tau aho takitaha.”

KO E tau vala tala i mua ne fakakite e tau tutūaga matematekelea kehekehe kua maeke ke taute e moui ke tuga kua nakai fahia. He fakauka a koe ke he tau lekua ni haau, liga manamanatu a koe na aoga nakai ke moui po ke fai tagata nakai ne manatu ki a koe. Kia mafanatia na manatu he Atua a koe he fakaatukehe. Kua uho a koe ki a ia.

Ko e tagata ne tohia e Salamo 86 ne fakakite e mauokafua ke he Atua: “Ko e aho ka matematekelea ai au, to ui atu ai au kia koe; ha kua fanogonogo mai a koe kia au.” (Salamo 86:7) Ka e liga manamanatu a koe, ‘To fanogonogo mai fēfē e Atua he “aho ka matematekelea ai au”?’

Pete ka nakai utakehe fakamafiti he Atua e tau lekua haau, ko e haana Kupu ko e Tohi Tapu ka fakamafana a koe to foaki mai e ia e loto mafola ke fahia: “Aua neke fakaatukehe a mutolu ke he taha mena taha; ka kia fakailoa atu ke he Atua e tau manako ha mutolu ke he tau mena oti kana ke he liogi, mo e ole, katoa mo e fakaaue. Ko e monuina [mafola] foki mai he Atua kua mua ue atu ke he tau mena oti kua manamanatu ki ai, to leveki ai e tau loto ha mutolu, katoa mo e tau manatu.” (Filipi 4:6, 7) Fakamolemole manamanatu ke he puhala kua fakamafana he tau kupu Tohi Tapu nei a tautolu ke he levekiaga fakaalofa hofihofi he Atua.

Manatu Mooli he Atua a Koe

“Nakai nimo foki taha [manu lele] ki mua he Atua. . . . Kua mua a mutolu ke he tau manu [lele] ikiiki loga.”​Luka 12:6, 7.

MANAMANATU: Ko e tau manu lele ikiiki ne tuga kua fakateaga ke he laulahi he tau tagata, ka e manatu he Atua a lautolu. Kitia he Atua e tau manu lele ikiiki oti; kua uho lahi ko e tau mena momoui takitaha. Ka e mua atu e uho he tau tagata ke he Atua, ke he tau manu lele ikiiki. Mahomo hake e tau tagata mai he tau tufugatia he Atua he lalolagi, nukua eke a lautolu ke he “fakatai” haana ti maeke ke feaki mo e fakakite e tau aga mitaki haana.​—Kenese 1:26, 27.

“Iehova na e, kua kumikumi e koe au, ti kua fioia ni e koe au [mo e] haku a manamanatu. . . . Kia kamatamata e koe au mo e kitekite ke he haku a manamanatu.”​Salamo 139:1, 2, 23.

MANAMANATU: Iloa mitaki he Atua a koe. Iloa e ia e tau logonaaga galo haau mo e tau tupetupe. Pete kua nakai maama he falu e tuaga fakaatukehe haau, ka e manatu he Atua a koe ti manako ke lagomatai. Ko e mena nei ati aoga ai ke moui.

 Fai Kakano e Moui Haau

“Iehova na e, fanogonogo mai a koe ke he haku a liogi, kia hoko atu foki haku a tagi kia koe. . . . Kia haga mai hāu a na fofoga kia au; kia fanogonogo vave kia au ke he aho ka ui atu ai au kia koe. . . . Kua hagao mai a ia ke he liogi he tagata nofogati.”​Salamo 102:1, 2, 17.

MANAMANATU: Tuga na tali mai he kamataaga he matematekelea he tagata, kua totou e Iehova e tau hihina mata oti he tau tagata. (Salamo 56:8) Putoia foki e tau hihina mata haau. Manatu he Atua e tau kamatamata mo e tau hihina mata oti haau ha kua uho a koe ki a ia.

“Aua neke kitekite fano [fakaatukehe] a koe, ha ko au ko e hau a Atua; kua fakamalolo e au a koe; ko e moli, kua lagomatai au kia koe; . . . Ha ko au ko Iehova ko e Atua hau, . . . ko ia kua pehe atu kia koe, Ua matakutaku a koe ko au ni kua lagomatai kia koe.”​Isaia 41:10, 13.

MANAMANATU: Kua mautali e Atua ke lagomatai a koe. Ka veli a koe, to lagaki hake e ia a koe.

Fai Amaamanakiaga ma e Vahā Mitaki Anoiha

“Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.”​Ioane 3:16.

MANAMANATU: Kua ofania lahi he Atua a koe ati makai a ia ke foaki haana Tama ko Iesu mo poa ke lata mo koe. Ko e poa nei ati moua e koe e amaamanakiaga ke fiafia mo e fai kakano tukulagi e moui. *

Pete kua liga fakaatukehe a koe mo e tuga kua nakai fahia ke moui, kia fakaako fakahokulo e Kupu he Atua ti fakamalolō e tua haau ke he amaamanakiaga kua mavehe he Atua. To fiafia a koe mo e mauokafua kua aoga ke moui.

^ para. 19 Ke fakaako atu foki ke he puhala ka aoga a koe mai he poa ha Iesu, kitekite e vitiō Manatu e Matulei ha Iesu he www.jw.org. Onoono ki lalo he TAU TOHI > VITIŌ > HA MAUTOLU A TAU FELEVEIAAGA MO E GAHUA HE FONUA.