Skip to content

Skip to table of contents

Tau Fakamoli a Iehova

Fifili e vagahau Faka-Niue

Vahā Anoiha Haau, Fifiliaga Haau!

Vahā Anoiha Haau, Fifiliaga Haau!

FAI FIFILIAGA MOOLI NAKAI A KOE KE HE VAHĀ ANOIHA HAAU? Talitonu falu tagata ko e iloa tuai kua omoomoi e tau momoui ha lautolu, nakai ko e fifiliaga fakatagata. Ka nakai hokotia a lautolu ke he tau foliaga, kua pehē a lautolu kua uka pauaki. “Nakai finagalo tuai ni ke pihia!” he talahau e lautolu.

Ko e falu kua fakagogoa ka kitia kua nakai fai puhala foki ke kautū ki ai mai he lalolagi matematekelea mo e nakai fakafili tonu nei ne nonofo a tautolu. Liga lali a lautolu ke fakaholo ki mua e tau momoui​—ka kua kitia ni he tau mena tuga e felakutaki, matahavala, tau matematekelea tutupu pauaki, mo e gagao kua fakatauhele tumau e tau fakatokaaga ha lautolu. ‘Ti ko e manamanatu he ha ki ai?’ he hūhū hifo e lautolu.

Ko e tau tutūaga he moui kua maeke mooli ke lauia lahi e tau fakatokaaga haau. (Fakamatalaaga 9:11) Pete ia, ma e fakahikuaga haau kua fai fifiliaga mooli a koe. Fakakite mai he Tohi Tapu ko e vahā anoiha haau kua fakavē ke he fifiliaga haau. Manamanatu ke he talahauaga he Tohi Tapu.

Ko Mose ne takitaki e motu ko Isaraela i tuai, ne tala age ke he tau tagata he teitei a lautolu ke huhū atu ke he Motu he Maveheaga: “Kua tuku atu e au ki mua ha mutolu e moui mo e mate, ko e monuina mo e malaia; ko e hanai, kia fifili la e moui, kia moui ai a koe katoa mo e hau a fanau; Kia fakaalofa atu a koe kia Iehova hau a Atua, mo e fanogonogo ke he hana leo, mo e pipiki atu a koe kia ia.”​Teutaronome 30:15, 19, 20.

“Kua tuku atu e au ki mua ha mutolu e moui mo e mate, ko e monuina mo e malaia; ko e hanai, kia fifili la e moui.”​—Teutaronome 30:19

Ē! Ne laveaki he Atua e tau Isaraela mai he fakatupa i Aikupito ti tuku ki mua ha lautolu e amaamanakiaga ke atāina mo e moui fiafia he Motu he Maveheaga. Ka e nakai moua noa e lautolu e tau mena oti ia. Ke moua e tau monuina ia kua lata a lautolu ke “fifili la e moui.” Ke he puhala fe? He ‘fakaalofa atu ke he Atua, mo e fanogonogo ke he hana leo, mo e pipiki atu kia ia.’

He vahā nei, kua pihia foki e fifiliaga i mua haau, ti ko e fifiliaga ka taute e koe ka fakavē ki ai e vahā anoiha haau. He fifili ke fakaalofa atu ke he Atua, ke fanogonogo ke he haana leo, mo e pipiki atu ki a ia, kua fifili e koe e moui​—ko e moui tukulagi he lalolagi parataiso. Ka ko e heigoa kua putoia ke he tau lakaaga takitaha ia?

FIFILI KE FAKAALOFA ATU KE HE ATUA

Ko e fakaalofa e matapatu he aga he Atua. “Ko e Atua ko e fakaalofa a ia,” he tohia he aposetolo ko Ioane ne omoomoi he agaaga. (1 Ioane 4:8) Ko e kakano nei he magaaho ne hūhū ai ko e heigoa e poakiaga ne mua, pehē a Iesu: “Kia fakaalofa a koe ke he Iki hau a Atua mo e hau a loto katoa, mo e hau a agaga katoa, mo e hau a manatu katoa.” (Mataio 22:37) Ko e fakafetuiaga mooli mo Iehova ko e Atua kua lata ke fakavē ke he fakaalofa, nakai ke he matakutaku po ke omaoma noa ni. Ka ko e ha kua lata a tautolu ke fifili ke fakaalofa ki a ia?

Ko e fakaalofa ha Iehova ma e tau tagata kua tuga e fakaalofa he tau matua ke he tau fanau. Pete he nakai mitaki katoatoa, ko e tau matua fakaalofa kua fakaako, fakamafana, lagomatai, mo e akonaki e tau fanau ha laua ha kua manako ke fiafia mo e kautū a lautolu. Ko e heigoa e taui ne manako e tau matua ki ai? Manako a laua ke he tau fanau ke tokaloto e tau mena ne tala age e laua ke mitaki ai ni a lautolu. Nakai kia lata mogoia e ha tautolu a Matua mitaki katoatoa he lagi ke amanaki ki a tautolu ke fakakite e fakaaue mooli ke he tau mena oti kua taute e ia ma tautolu?

 FANOGONOGO KE HE HAANA LEO

He vagahau fakamua ne tohia ai e Tohi Tapu, ko e kupu “fanogonogo” kua hagaao foki ke he “omaoma.” Kakano pihia nakai a tautolu ka tala age ke he tama, “Fanogonogo ke he tau matua haau”? Ti ko e fanogonogo ke he leo he Atua kua kakano ke fakaako mo e omaoma ke he tau mena ne talahau e ia. Ha kua nakai maeke mooli a tautolu ke logona e leo he Atua, kua fanogonogo a tautolu ki a ia he totou mo e fakagahua e tau mena i loto he haana Kupu, ko e Tohi Tapu.​—1 Ioane 5:3.

Ke fakakite e aoga he fanogonogo ke he leo he Atua, taha e mogo ne pehē a Iesu: “Nakai ko e tau mena kai hokoia ke moui ai ha tagata, ka ko e tau kupu oti ne to mai he fofoga he Atua.” (Mataio 4:4) Tuga ni he aoga ki a tautolu ke kai e tau mena kai, kua mua atu e aoga ke iloa e Atua. Ko e ha? Fakamaama he patuiki pulotu ko Solomona: “Ha kua eke e iloilo mo mena ke malu ai, kua eke foki e tau tupe mo mena ke malu ai; ka ko e aoga he iloilo kua moua, kua moui ai a ia ne toka ai.” (Fakamatalaaga 7:12) Ko e iloilo mo e pulotu mai he Atua ka puipui a tautolu he vahā nei mo e lagomatai a tautolu ke taute e fifiliaga pulotu ka takitaki atu ke he moui tukulagi anoiha.

PIPIKI ATU KI A IA

Manatu la e fakatai ha Iesu ne totoku he vala tala kua mole, pehē a ia: “Ko e mena pukilu e gutuhala, ti lautote foki e hala ke pu atu ke he moui, kua tokogaogao foki a lautolu ke moua.” (Mataio 7:13, 14) He fenoga atu he puhala pihia, kua aoga ke fai takitaki pulotu ti pipiki fakatata ki a ia ka manako a tautolu ke hohoko ke he matakavi kua fakatoka ki ai​—ko e moui tukulagi. Ko e mena ia kua fai kakano mitaki ma tautolu ke nonofo fakatata ke he Atua. (Salamo 16:8) Ka e taute fēfē e tautolu e mena ia?

He tau aho takitaha, loga e tau mena ne lata a tautolu ke taute ti loga atu foki ne manako a tautolu ke taute. Ko e tau mena pihia ka fakalavelave po ke fakatauhele a tautolu ti tote po ke nakai fai magaaho ke manamanatu ke he tau mena ne manako e Atua ke taute e tautolu. Kakano haia ati fakamanatu mai he Tohi Tapu: “A mutolu kia o fakalaulau a mutolu; nakai tuga ne tau tagata goagoa ka kia tuga e tau tagata iloilo. Kia fakaaoga e mutolu e tau aho he mouiaga nai, ha kua kelea e tau aho ainei.” (Efeso 5:15, 16) Nonofo fakatata a tautolu ke he Atua he taute e fakafetuiaga ha tautolu mo ia ke mua atu e aoga he tau momoui ha tautolu.​—Mataio 6:33.

KO E FIFILIAGA HAAU

Pete kua nakai maeke a koe ke hiki e vahā haau kua mole, ka kua maeke a koe ke fifili ke fakatoka e vahā mitaki anoiha ma haau mo e tau fakahele haau. Fakakite mai he Tohi Tapu ko e ha tautolu a Matua he lagi ko Iehova ko e Atua, kua fakaalofa lahi mahaki ki a tautolu ti tala mai ki a tautolu e tau mena kua manako a ia ke taute e tautolu. Mailoga e tau kupu he perofeta ko Mika:

“Teme na e, kua fakakite atu e ia kia koe e mena mitaki; ko e heigoa foki e mena kua finagalo ai a Iehova kia koe, nakai kia ko e tau mena nai, ke eke ai e mahani tututonu, ke fiafia ke he fakaalofa, mo e feoaki mo e hau a Atua mo e loto holoilalo?”​Mika 6:8.

To talia nakai e koe e uiina ha Iehova ke fakatauō mo ia ti moua e tau monuina tukulagi ne fakatoka e ia ma lautolu ne taute pihia? Ko e fifiliaga haau!