Skip to content

Skip to table of contents

Tau Fakamoli a Iehova

Fifili e vagahau Faka-Niue

Ahiahi atu a Iesu ke he matua fugavai fifine ha Peteru ti fakamalolō a ia.—Mataio 8:14, 15; Mareko 1:29-31

Ko e Poakiaga Kia ma e Tau Fekafekau he Lotu ke Nakai Mau?

Ko e Poakiaga Kia ma e Tau Fekafekau he Lotu ke Nakai Mau?

KO E tau lotu he lalolagi katoa—tuga e Lotu Katolika Roma, falu lotu Orthodox, Puta, mo e falu foki—ne poaki ke nakai faihoana e tau takitaki he lotu mo e tau akoako. Taha faahi, tokologa e tagata ne manatu ko e poakiaga nei e matapatu ati tupu lahi e mahani feuaki mogonei ne lauia e tau akoako he tau lotu kehekehe.

Ti kua lata mogoia ke hūhū, Ko e poakiaga kia he Tohi Tapu ma e tau fekafekau he lotu ke nakai mau? Ke tali e hūhū ia, kia fakatutala a tautolu ke he kamataaga mo e puhala ne fakagahuahua e poakiaga nei mo e onoonoaga he Atua ki ai.

KO E FAKAMAUAGA TALA TUAI HE LOTU KE HE NAKAI MAU

Kua fakamaama he Encyclopædia Britannica e nakai mau ko e “nakai faitaane po ke faihoana ti ko e mena ia kua nakai mahani fakataane mo e fifine, fa putoia ai ke he kotofaaga he takitaki lotu.” He 2006 he tutala e Pope Benedict XVI ke he Roman Curia, ne matutaki e ia e poaki katoa ke nakai mau ke he “aga tuai he magahala ne tata ke he vahā he tau Aposetolo.”

Ka ko e nakai mau ne nakai ko e aga fakalotu ne fa taute he tau Kerisiano he senetenari fakamua. Ti ko e aposetolo ko Paulo ne moui he senetenari fakamua, ne hataki ki a lautolu ne tua hagaao ke he tau tagata taane ka talahau ke he “tau agaga ke fakahehe ai” mo e ke “ua fai hoana.”1 Timoteo 4:1-3.

He senetenari ke uaaki ne kamata e nakai mau ke taute he tau lotu “Kerisiano” he Faahi Lalo. Talahau he tohi Celibacy and Religious Traditions, ko e mena nei kua “felauaki mo e mena foou ke pa malu e mahani fakataane mo e fifine ne kua tupu ke he Pule Atu Motu Roma.”

He tau senetenari fakamui, ko e tau matakau lotu mo e Tau Matua Faka-Lotu ne fakaohooho ke nakai mau e tau takitaki he lotu. Manatu a lautolu ko e  mahani fakataane mo e fifine kua nakai meā mo e nakai lautatai mo e tau matagahua he tau takitaki he lotu. Pete ia, ne fakakite mai he Encyclopædia Britannica “he senetenari ke 10 aki ne tokologa e tau akoako mo e falu pisopo foki ne faihoana.”

Ne peehi ke nakai mau e tau takitaki he lotu he magahala he Lateran Councils he 1123 mo e 1139 ne fakahoko i Roma, ti pihia agaia e tuaga he Lotu Katolika Roma ke hoko mai ke he mogonei. He puhala nei, ne puipui e malolō mo e tau tupe he lotu, ha ko e mena ka mau e tau akoako to age e lautolu e tau koloa he lotu ke he tau fanau ha lautolu.

ONOONOAGA HE ATUA KE HE NAKAI MAU

Ko e onoonoaga he Atua ke he nakai mau kua kitia maaliali he haana Kupu ko e Tohi Tapu. Totou e tautolu i ai e tau kupu ha Iesu hagaao ki a lautolu kua tumau ke nonofo takitokotaha, tuga he taute e ia, “ha ko e kautu he lagi.” (Mataio 19:12) Ne tutala pihia foki e aposetolo ko Paulo ke he tau Kerisiano ne fifili ke fifitaki a ia he nonofo takitokotaha “ha ko e vagahau mitaki.”1 Korinito 7:37, 38; 9:23.

Pete ia, ne nakai poaki e Iesu po ko Paulo e tau fekafekau he lotu ke nakai mau. Pehē a Iesu ko e nonofo takitokotaha ko e “foaki atu” ne nakai moua he tau tutaki oti haana. Magaaho ne tohi e Paulo hagaao ki a lautolu “ko e tau tamafine tote,” ne talahau fakamaaliali e ia: “Nakai moua e au ha poaki mai he Iki kia lautolu; ka kua tala atu e au haku a taofi.”Mataio 19:11; 1 Korinito 7:25.

Lafi ki ai, ne fakakite mai he Tohi Tapu na tokologa e tau fekafekau Kerisiano he senetenari fakamua, putoia foki e aposetolo ko Peteru, ko e tau tagata taane ne faihoana. (Mataio 8:14; Mareko 1:29-31; 1 Korinito 9:5) Ha kua tupu lahi e fakalialia he mahani feuaki i Roma he magahala ia, ne tohi e Paulo kaeke ko e tagata faihoana e Kerisiano ne leveki kua lata a ia ke “fai hoana ke he fifine tokotaha” mo e “ha ha ia ia e tau fanau kua omaoma.”1 Timoteo 3:2, 4.

Nakai ko e tau fakamauaga anei ne totoko ke nakai mau, ha kua talahau fakatonu he Tohi Tapu “kia uta he tane ke he hoana e mahani mitaki kua lata” ti ko e tau hoa mau ke “aua neke totoko [lamakai] e taha ke he taha” he tau fakafetuiaga mahani fakataane mo e fifine. (1 Korinito 7:3-5) Maaliali ai, nakai ko e poaki he Atua ke nakai mau po ke lauia e tau fekafekau oti he lotu.

KE LATA MA E TALA MITAKI

Kaeke ke nakai lata ke mau, ko e ha ne talia e Iesu mo Paulo e nonofo takitokotaha? Ha kua maeke e tagata nofo tokotaha ke lahi e magaaho ke folafola atu e tala mitaki ke he falu. Maeke foki a lautolu ke foaki fakalahi ha kua nakai ha ha ia lautolu e tau tupetupe ne moua e lautolu ne faihoana mo e faitaane.1 Korinito 7:32-35.

Manamanatu la ke he fakafifitakiaga ha David, ne fifili a ia ke toka e gahua totogi mitaki haana i Mexico City mo e hiki atu ke he maaga i tua ha Costa Rica ke fakaako e falu hagaao ke he Tohi Tapu. Logona hifo nakai e David ko e tuaga nofo tokotaha haana ne lagomatai a ia ke taute pihia? “Ē,” he talahau e ia. “Ko e paleko ke hikihiki ke he aga foou he motu mo e puhala moui ne kehekehe, ka e ha kua tokotaha ni au ke leveki, ne mukamuka lahi e hikiaga.”

Ko Claudia, ko e Kerisiano nofo tokotaha ne hiki atu ke gahua he tau matakavi ne manako lahi ke he tau tagata fakamatala, ne pehē: “Fiafia au he fekafekauaga haaku ke he Atua. Kua malolō e tua mo e fakafetuiaga haaku mo e Atua he kitia e au e puhala ne leveki e ia au.”

“Ai fai kehe, ko e mau a koe po ke nofo tokotaha to fiafia a koe ka foaki katoatoa ki a Iehova ko e Atua.”—Claudia

Nakai lata e nofo tokotaha ke eke mo kavega. Ti lafi e Claudia: “Ai fai kehe, ko e mau a koe po ke nofo tokotaha to fiafia a koe ka foaki katoatoa ki a Iehova ko e Atua.”Salamo 119:1, 2.