Skip to content

Skip to table of contents

Tau Fakamoli a Iehova

Fifili e vagahau Faka-Niue

 TAU VALA TALA I MUA | TO TALIA NAKAI E KOE E MENA FAKAALOFA UE ATU HE ATUA?

Mena Fakaalofa Mua Ue Atu he Atua—Ko e Ha ne Uho Lahi?

Mena Fakaalofa Mua Ue Atu he Atua—Ko e Ha ne Uho Lahi?

Ko e heigoa ati uho mooli e mena fakaalofa ki a koe? Liga fā e kakano kua putoia ai: (1) ko ia ne foaki e mena fakaalofa ki a koe, (2) kakano ne foaki ai, (3) ko e heigoa ne poa ke moua e mena fakaalofa, mo e (4) aoga mooli nakai e mena fakaalofa. Ko e manamanatu ke he tau kakano ia ka lagomatai a tautolu ke hokulo e loto fakaaue ke he lukutoto—ko e mena fakaalofa mua ue atu he Atua.

KO HAI NE FOAKI AI?

Falu mena fakaalofa kua uho lahi ha kua foaki mai he taha pule tokoluga po ke tagata lilifu lahi. Ka ko e falu mena fakaalofa, pete he nakai tauuka, kua tokiofa ai ha kua foaki mai he taha fakahele he magafaoa po ke kapitiga uho. Pihia e mena fakaalofa ha Russell ki a Jordan, ne totoku he vala tala kua mole. Hagaao fēfē e tuaga nei ke he mena fakaalofa ko e lukutoto?

Fakamua, pehē e Tohi Tapu kua “fakafano mai he Atua hana Tama fuataha ke he lalolagi, kia momoui a tautolu kia ia.” (1 Ioane 4:9) Ko e tuaga ia ati uho lahi mooli e mena fakaalofa nei. Nakai fai foki ne mua hake e pule ke he Atua. Ko e tagata ne tohia e salamo ne hagaao ke he Atua: “Ko e hāu a higoa ko Iehova, hoko koe ni kua Mua ue atu ke he lalolagi oti.” (Salamo 83:18) Nakai maeke a tautolu ke moua e mena fakaalofa mai he punaaga tokoluga ue atu.

Uaaki, ko e Atua ko e “ha mautolu a Matua.” (Isaia 63:16) He puhala fe? Ne foaki mai e ia e moui ma tautolu. Lafi ki ai, ne leveki fakamooli e ia a tautolu tuga e matua taane ne eketaha ke leveki e haana fanau. He hagaao ke he falu tagata i tuai tuga a Efaraimo, ne hūhū e Atua: “Ko e haku a tama fakahele kia a Efaraimo? ko e tama kia a ia ke fiafia ki ai? . . . Kua tagi haku loto ki [a] ia; kua hofihofi noa haku a fakaalofa kia ia.” (Ieremia 31:20) Pihia agaia e logonaaga he Atua ke he tau tagata ne tapuaki ki a ia he vahā nei. Ko ia ko e Tufuga malolō ue atu ha tautolu ti ko e Matua mo e Kapitiga fakamooli foki ha tautolu. Nakai kia taute he tuaga ia e tau mena fakaalofa mai he Atua ke uho pauaki?

 KO E HA NE FOAKI AI?

Falu mena fakaalofa kua uho lahi ha kua foaki mai he fakaalofa mooli ka e nakai ha ko e matagahua. Ko e tagata fakamokoi mooli ne foaki e mena fakaalofa, kua nakai amanaki ke moua e totogi ma e totonu haana.

Foaki mai he Atua e Tama haana ke hukui aki a tautolu ha ko e fakaalofa haana ma tautolu. “Ko e mena foki hanai ne fakakite mai ai e fakaalofa he Atua kia tautolu, he fakafano mai he Atua hana Tama fuataha,” he talahau he Tohi Tapu. Ko e heigoa e aoga? “Kia momoui a tautolu kia ia.” (1 Ioane 4:9) Lata nakai e Atua ke taute pihia? Nakai! “Ko e lukutoto a Keriso Iesu” ko e fakakiteaga he “fakaalofa noa” he Atua.Roma 3:24.

Ko e ha e mena fakaalofa he Atua ko e fakakiteaga he “fakaalofa noa”? Fakamaama he Tohi Tapu: “Kua fakakite mai he Atua hana fakaalofa kia tautolu he matulei a Keriso ke hukui aki a tautolu, ka ko e tau tagata hala agaia a tautolu.” (Roma 5:8) Ko e fakaalofa mooli he Atua ati lagomatai e ia e tau tagata ne lolelole, nakai fahia, mo e agahala. Nakai maeke a tautolu ke moua e fakaalofa ia, ti nakai fakai ke foaki e totogi ki a ia. Ko e mena fakaalofa haana ko e fakakiteaga lahi ue atu he fakaalofa, tali mai he kamataaga.

KO E HEIGOA E POA NE FOAKI?

Falu mena fakaalofa kua uho lahi ha kua fakakite e eketaha he tagata ne foaki. Ka makai e tagata ke foaki e taha mena uho lahi haana ki a tautolu, kua tokiofa pauaki e tautolu e mena fakaalofa ha kua eketaha ai ke foaki.

Ko e Atua ne “ta mai ai hana Tama fuataha.” (Ioane 3:16) Kua mua atu ha kua foaki e ia e tama fakahele haana. Ke he loga e tau tau ne tufuga he Atua e lagi mo e lalolagi katoatoa, ne gahua fakalataha a Iesu mo ia ti eke “mo fiafia hana.” (Tau Fakatai 8:30) Ko Iesu ko e “Tama fakahele” he Atua mo e “ko e fakatai he Atua nakai kitia.” (Kolose 1:13-15) Ko e fakafetuiaga tata lahi mahaki anei he Atua mo Iesu.

Ka ko e Atua “kua nakai toka hana ni a Tama.” (Roma 8:32) Foaki e Iehova e mena ne mua ue atu ma tautolu. Nakai fai mena fakaalofa a ia ne kua lahi mahaki pihia e totogi.

FAKAMOOLI E MANAKO PAUAKI

Falu mena fakaalofa kua uho lahi ha kua maeke ke fakapuke ai e tau manako mooli, pihia foki ma e manako mafiti. Ma e fakatai, kua loto fakaaue mooli a koe ke he tagata ne foaki noa ke totogi e tuluiaga fakaekekafo ke fakahao aki e moui haau ne nakai fahia a koe ke totogi! Ko e mena fakaalofa a ia ne mua atu mooli e lahi, pihia nakai?

“Tuga he mamate e tau tagata oti kia Atamu, to pihia foki e fakamomoui mai oti kia Keriso.” (1 Korinito 15:22) Ha kua tutupu mai a tautolu ia Atamu, to “mamate” oti a tautolu, mo e nakai hao mai he tau huki he gagao mo e mate po ke ke fakafeilo a tautolu mo e Atua ti atāina mai he agahala ki mua haana. Ha ko e tau tagata fakateaga, kua nakai maeke a tautolu ke “fakamomoui” a tautolu po ke taha tagata. Fakakite mai he Tohi Tapu: “Nakai fakai ke maeke ia taha ia lautolu ke fakafua e matakainaga hana, po ke ta atu ke he Atua e palepale māna, . . . ti nakai maeke ni tukulagi.” (Salamo 49:7, 8) Manako lahi a tautolu ke moua e lagomatai he nakai fahia a tautolu ke totogi e lukutoto. Ka toka a tautolu ha ko tautolu, to nakai fai lagomatai.

Ha ko e fakaalofa lahi ha Iehova, kua makai a ia ke totogi e “tuluiaga” kua lata ke moua e tautolu e moui, ti puhala mai ia Iesu to “fakamomoui mai oti.” Fakamooli fēfē he lukutoto e mena nei? “Ko e toto foki a Iesu Keriso hana Tama kua fakamea ai a tautolu he tau hala oti kana.” Ē, ko e tua ke he toto ha Iesu ne fakamaligi kua hafagi e puhala ke fakamagalo e tau  agahala mo e ke moua e moui tukulagi. (1 Ioane 1:7; 5:13) Ti ko e heigoa e aoga he lukutoto ma e tau fakahele ha tautolu ne mamate? “Ha ko e tagata ne hoko mai ai e mate, ti ko e tagata [Iesu] foki kua hoko mai ai e liu foki tutu mai a lautolu kua mamate.”1 Korinito 15:21. *

Nakai fai mena fakaalofa ne kua foaki he ha punaaga tokoluga po ke omoomoi he fakaalofa lahi mahaki ka fakatatai ke he poa ha Iesu. Nakai fai tagata kua lahi mahaki e mena ne foaki ma tautolu ke tuga e foakiaga ha Iehova ko e Atua. Ti nakai fai mena fakaalofa ne fakapuke e manako lahi mahaki ha tautolu, ka ko e poa ne lagataha ni kua fakatokanoa mai a tautolu he agahala mo e mate. Ē, nakai fai mena fakaalofa ke tata ke he mitaki mua ue atu he lukutoto.

 

^ para. 19 Ma e falu vala tala ke he finagalo he Atua ke fakaliu tu mai a lautolu ne mamate, kikite tohi Ko e Heigoa ne Fakaako Mooli he Tohi Tapu? veveheaga 7, ne taute fakailoa he Tau Fakamoli a Iehova ti moua he www.jw.org.