Skip to content

Skip to table of contents

Tau Fakamoli a Iehova

Fifili e vagahau Faka-Niue

Fefakafuaaki he tau tagata i Aferika mo Amerika ko e pisinisi monuina lahi

Hao Mai he Tupaaga—Vahā Fakamua mo e Mogonei

Hao Mai he Tupaaga—Vahā Fakamua mo e Mogonei

Ne hoko atu a Blessing * ki Europa mo e maveheaga to moua e ia e gahua hifi ulu. Ka e hogofulu e aho he mole he keli tumau a ia, mo e fakamatakutaku ke fakamatematekelea e magafaoa haana he motu ne hau ai a ia, ati gahua a ia ko e fakataka.

Fakatino ke he tau tupa ne tapaki i Aikupito i tuai

Ne amanaki a Blessing ke moua 200 ke he 300 euro he taha e pō ke totogi aki e kaitalofa haana ne fakatoka he fifine ne pule ke he fale ko e molea e 40,000 euro. * “Ne manamanatu tumau au ke hola,” he fakamaama e Blessing, “ka kua matakutaku au ke he mena ka taute e lautolu ke he magafaoa haaku. Kua vihi e tuaga haaku.” Ko e tala haana kua tatai mo e kavi ke he fā e miliona tagata ne fakatupa he kamupanī fakataka he lalolagi katoa.

Kavi ke he 4,000 tau kua mole, ko e fuata mui ko Iosefa ne fakafua he tau lafu taokete haana. Ti fakatupa a ia he kaina he taha iki Aikupito. He nakai tuga a Blessing, ne leveki fakamitaki he iki ne pule ki a Iosefa a ia he magaaho fakamua. Ka e magaaho ne nakai talia e ia e fakaohooho he hoana he iki haana, ne tukupau fakakelea a ia kua lali ke fakapilo pulenoa. Ne tuku a ia he fale puipui mo e līlī ke he tau lapatoa.Kenese 39:1-20; Salamo 105:17, 18.

Ko Iosefa ko e tupa he vahā i tuai; ko Blessing ko e tupa he senetenari ke 21 aki. Ka kua lauia a laua he matagahua mai i tuai ko e fefakafuaaki he tau tagata, ti kua fehagai ke he tau tagata tuga ko e tau koloa ne taute fakateaga ke moua tupe.

TAUTE HE FELAKUTAKI E TUPAAGA MO PISINISI LAHI

Kua eke e felakutaki mo puhala mukamuka lahi ma e tau motu ke moua e tau tagata mo fakatupa. Pehē ai ko e patuiki Aikupito ko Thutmose III ne liuaki mo ia 90,000 pagotā he oti e latau i Kanana. Fakagahua he tau Aikupito a lautolu ko e tau tupa ke keli  makauho, talaga e tau faituga, mo e ati e tau halavai.

I lalo hifo he Pule Atu Motu Roma, ne loga lahi e tau tupa ne fofō mai he latau, ti fa latau foki ha kua manako ke moua e tau tupa. Ne fuafua ai he hoko ke he senetenari fakamua, kua teitei hafa e puke tagata i Roma ko e tau tupa. Tokologa e tau tupa Aikupito mo Roma ne ekefakakelea lahi. Ma e fakatai, ko e loa he tau tau moui he tau tupa keli makauho i Roma ne kavi ni ke 30 e tau he moui.

Loga e tau tau he mole, ne au atu ni e matematekelea he tau tupa. He senetenari ke 16 aki ke he senetenari ke 19 aki, ko e fefakafuaaki he tau tagata i Aferika mo Amerika ko e taha pisinisi monuina lahi he lalolagi katoa. ‘Fuafua ai kua kavi 25 e miliona ke he 30 e miliona tagata taane, tau fifine, mo e tau fanau ne tapaki mo e fakafua ai,’ he talahau he hokotaki mai he UNESCO. Totou teau ne mamate he ō ke he taha faahi he Atlantic. Ko e tupa ne hao ko Olaudah Equiano, ne talahau: “Ko e tagi fakatūtū he tau fifine, mo e ooi he tau tagata ne mamate, ko e mena matakutakuina ne tupu ti nakai maeke ke fakamaama.”

Momoko ai, ko e fakatupa ne nakai ni ko e matematekelea he fakamauaga tala. Kavi ke he 21 e miliona he tau tagata taane, tau fifine, mo e tau fanau ne gahua fakatupa agaia i lalo hifo he līlīaga ia mo e tote po ke nakai fai totogi, he talahau he International Labour Organization. Ko e tau tupa he vahā nei ne gahua he tau keliaga makauho, tau fale taute ie, kamupanī ta piliki, tau fale fakataka, mo e tau kaina nonofo. Pete kua nakai fakaatā he fakatufono, kua tupu lahi fakahaga e vahega fakatupa nei.

Totou miliona ne gahua fakatupa agaia

HAO KE HE TOKANOAAGA

Kua lahi mahaki e matematekelea ati tokologa e tau tupa ne tau ke moua e tokanoaaga. He senetenari fakamua F.V.N., ko e toa ko Spartacus mo e kavi 100,000 tupa ne totoko ki Roma ti nakai kautū. He senetenari ke 18 aki, ne tau atu foki e tau tupa ha Hispaniola he Caribbean ke he tau takitaki ha lautolu. Ne taute fakakelea lahi e tau tupa he tau ulu tō ti tupu mai e felatauaki ne 13 e tau he loa, ne fakahiku ai ke he tū tokotaha ha Haiti he 1804.

Ko e O Kehe mai he tau Isaraela i Aikupito ko e fakahaoaga ne kautū mooli mai he fakatupaaga he fakamauaga tala. Liga tolu e miliona tagata—ko e motu katoa—ne fakatokanoa mai he fakatupa i Aikupito. Ne lata mooli a lautolu ke moua e tokanoaaga. Fakamaama he Tohi Tapu e moui ha lautolu i Aikupito ke tuga kua “fakatupatupa . . . a lautolu kua kotofa ia  mo e favale.” (Esoto 1:11-14) Taha e Farao ne poaki ke tamate e tau tama ikiiki oti he tau Isaraela ke fakatote hifo e puke tagata ha lautolu.Esoto 1:8-22.

Ne kehe lahi e fakatoka maiaga he tau Isaraela he ekefakakelea i Aikupito, ha ko Iehova ne lagomatai a lautolu. “Kua kitia e au ha lautolu a mamahi,” he tala age he Atua ki a Mose. “To hifo au, ti laveaki e au a lautolu.” (Esoto 3:7, 8) Ke hoko mai ke he aho nei, ko e tau Iutaia he lalolagi katoa ne fakamanatu e Paseka he tau tau takitaha ke fakamanatu e mena ia ne tupu.Esoto 12:14.

UTAKEHE FAKAOTI HE TUPAAGA

“Ha ko e mena nakai fai mahani hepehepe [e] Atua,” he talahau he Tohi Tapu, ti mauokafua a tautolu to nakai hiki a Iehova. (2 Nofoaga he Tau Patuiki 19:7; Malaki 3:6) Ne fakafano mai he Atua a Iesu “ke fakamatala ai e tok[a]noaaga ke he kaumahala, . . . ke toka noa ai a lautolu ne matematekelea.” (Luka 4:18) Kakano kia e mena nei ko e tokanoaaga ma e tau tupa takitaha? Nakai pihia. Fakafano mai a Iesu ke fakatokanoa e tau tagata mai he līlīaga he agahala mo e mate. Talahau e ia fakamui: “Ko e mena moli foki ke toka noa ai a mutolu.” (Ioane 8:32) He vahā nei, ko e kupu mooli ne fakaako e Iesu kua fakatokanoa ai e tau tagata he tau puhala kehekehe.—Kikite puha “ Hao Mai he Taha Fakatupa Foki.”

Ne lagomatai mooli he Atua a Iosefa mo Blessing he tau puhala kehekehe ke hao mai he fakatupa. Maeke a koe ke totou ke he tala ofoofogia hagaao ki a Iosefa he tohi ha Kenese veveheaga 39 ke he 41 i loto he Tohi Tapu. Ne mitaki foki e laliaga ha Blessing ke moua e tokanoaaga.

He mole e fekau ke fano kehe mai he taha motu Europa, ne fano a Blessing ki Spain. Ne feleveia a ia mo e Tau Fakamoli a Iehova ti kamata ke fakaako Tohi Tapu mo lautolu. Ne eketaha a ia ke fakahako e moui haana, ti moua e ia e gahua mo e ole ke he fifine ne leveki ki a ia fakamua ke fakatote hifo e totogi he kaitalofa haana he tau mahina takitaha. He taha aho, ne vilo atu e fifine nei ki a Blessing. Ne manako a ia ke fakamagalo noa e kaitalofa ha Blessing mo e ole ke fakamagalo age a ia. Ko e heigoa ne tupu? Kua kamata foki a ia ke fakaako Tohi Tapu mo e Tau Fakamoli a Iehova! “Ofoofogia mooli e tau puhala ne fakatokanoa he kupu mooli a koe,” he talahau e Blessing.

Ne mamahi a Iehova ko e Atua ha ko e ekefakakelea he tau tupa Isaraela i Aikupito; ti liga pihia foki e logonaaga haana ke he nakai fakafili tonu he vahā nei. Ke fakaoti mogoia e tau fakatupaaga kehekehe kua lata ni ke fai hikiaga lahi mahaki e tau tagata. Ti mavehe e Atua to tamai e hikiaga ia. “Ka e fakatalitali a tautolu ke he lagi fou mo e lalolagi fou, tuga ne hana talahaua mai, ke nofo ai e tututonu.”2 Peteru 3:13

^ para. 2 Hiki e higoa.

^ para. 3 He magahala ia, ko e tupe euro kua teitei tatai mo e tupe Amerika.