Skip to content

Skip to table of contents

Tau Fakamoli a Iehova

Fifili e vagahau Faka-Niue

Ko Hai e Higoa he Atua?

Ko Hai e Higoa he Atua?

Ka lali a koe ke iloa e taha tagata, liga ko e hūhū fakamua haau, “Ko hai e higoa haau?” Ka hūhū a koe ke he Atua e hūhū ia, ko e heigoa haana ka talahau?

“Ko au ko Iehova, ko e haku a higoa haia.”​Isaia 42:8.

Foou nakai e higoa ia ki a koe? Liga foou, ha kua tokologa e tau tagata fakaliliu he Tohi Tapu ne nakai fakaaoga lahi e higoa he Atua. Fa hukui e lautolu aki e matahigoa “IKI.” Ka kua tohi e higoa he Atua kavi ke he laga 7,000 he vagahau fakamua he Tohi Tapu. Ha ha he higoa ia fā e konosonene ne tatai ke he YHWH po ke JHVH, ne kua fakaliliu “Iehova” he vagahau Niue.

Kitia e higoa he Atua he tohi katoa faka-Heperu mo e moua ke he loga e tau fakaliliuaga

Dead Sea Psalms Scroll Senetenari fakamua V.N., HEPERU

Fakaliliuaga ha Tyndale 1530, FAKA-PERITANIA

Fakaliliuaga ha Reina-Valera 1602, SEPANIA

Union Version 1919, SAINA

KAKANO NE AOGA E HIGOA HE ATUA

Aoga e higoa ke he Atua. Nakai fai tagata ne fakahigoa e Atua; fifili ni e ia e higoa haana. Fakailoa e Iehova: “Ko e haku higoa haia tukulagi, mo e haku a fakamanatuaga haia ke he taha hau mo e taha hau.” (Esoto 3:15) I loto he Tohi Tapu, ko e higoa he Atua kua mua atu e loga ka fakatatai ke he tau matahigoa haana tuga e Malolō Ue Atu, Matua, Iki, po ke Atua, ti loga atu ke he higoa he falu tagata tuga a Aperahamo, Mose, Tavita, po ko Iesu. Ka e mua atu ai ko e finagalo ha Iehova ke fakailoa e higoa haana. Talahau he Tohi Tapu: “Ti iloa ai e lautolu a koe, ko e hāu a higoa ko Iehova, hoko koe ni kua Mua ue atu ke he lalolagi oti.”​—Salamo 83:18.

Aoga e higoa ki a Iesu. He Ha Mautolu a Matua po ke Liogi he Iki, ne fakaako e Iesu e tau tutaki haana ke ole ke he Atua he tau kupu nei: “Kia tapu hau a higoa.” (Mataio 6:9) Liogi foki a Iesu ke he Atua: “Ma Matua na e, fakaheke a ke he hau a higoa.” (Ioane 12:28) Ne tuku fakamua e Iesu he moui haana ke fakaheke e higoa he Atua, kakano nei ati maeke a ia ke liogi pehē: “Ne fakailoa atu foki e au hau a higoa kia lautolu, to fakailoa atu ai foki e au.”​—Ioane 17:26.

Aoga e higoa ki a lautolu ne iloa e Atua. Iloa he tau tagata he Atua he vahā fakamua ko e puipuiaga mo e fakamouiaga ha lautolu kua matutaki ke he higoa tapu he Atua. “Ko e higoa a Iehova, ko e kolo uka haia; kua hola atu ki ai e tagata tututonu, ti hao ai a ia.” (Tau Fakatai 18:10) “To fakamomoui ai a lautolu oti kana kua ui atu ke he higoa a Iehova.” (Ioelu  2:32) Fakakite mai he Tohi Tapu to kitia e tau tagata kua tapuaki ke he Atua ha ko e higoa Haana. “Ha ko e tau motu oti kua takitaha mo e fano ke he higoa he atua ha lautolu, ko tautolu foki, to o a tautolu ke he higoa a Iehova ha tautolu a Atua tukulagi tukumuitea.”​—Mika 4:5; Gahua 15:14.

TAU MENA NE FAKAKITE E KAKANO HE HIGOA

Ko e higoa ne fakakite pauaki e Atua. Tokologa e pulotu ne talahau ko e higoa Iehova ne kakano “To Fakamooli Ai a Ia ke he Mena Ia.” Talahau ni e Iehova ko e Atua e kakano he higoa haana he tau kupu nei ne tala age ki a Mose: “Ko Au ko e Moui, kua Moui Ai Ni.” (Esoto 3:14) Ko e talahauaga he vagahau Heperu fakamua ma e mena nei kua fakaliliu “To Fakamooli Ai Au ke he Mena Ia ti To Fakamooli Ni Au ki Ai.” Ti mua atu e kakano he higoa he Atua ke he matagahua haana ko e Tufuga ne fakatupu e tau mena oti kana ke momoui. Kakano e higoa haana kua maeke a ia ke fakatupu po ke omoomoi a ia mo e tau tufugatia haana ke eke mo ha mena ke fakamooli haana finagalo. Mai he tau matahigoa ne liga fakamaama e tuaga, pule, po ke malolō he Atua, ko e higoa ni haana, Iehova, kua hukui e tau mena oti kana kua ha ha ia ia mo e maeke ke fakamooli.

Fakakite he higoa e fiafia he Atua ki a tautolu. Ko e kakano he higoa he Atua kua hagaao ke he fakaalofa hofihofi tumau haana ke he tau mena ne tufugatia e ia, ti putoia a tautolu. Ha kua fakailoa he Atua e higoa haana ko e fakakiteaga kua manako a ia ke iloa e tautolu a ia. Ti eketaha a ia ke tala mai e higoa haana ato iloa e tautolu ke hūhū hagaao ki ai. Maaliali ai, manako e Atua ki a tautolu ke onoono ki a ia ko e Atua moolioli kua maeke ke fakatata ki ai, ka e nakai ko e taha mena mamao ne uka ke maama.​—Salamo 73:28.

Ko e fakaaoga he higoa he Atua kua fakakite e fiafia ha tautolu ki a ia. Ke fakatai, liga ole a koe ke he taha ne amanaki a koe ke kapitiga ki ai ke fakaaoga e higoa haau. Fēfē e logonaaga haau ka nakai mahalo e tagata ia ke fakaaoga e higoa haau? Fai magaaho he mole liga manamanatu a koe na manako mooli nakai e tagata ia ke tata ki a koe. Ti pihia e Atua. Talahau e Iehova e higoa haana ke he tau tagata ti fakamafana e ia a tautolu ke fakaaoga ai. Ka taute pihia e tautolu, kua fakakite e tautolu ki a Iehova e manako ke fakatata ki a ia. Mailoga foki e ia a lautolu kua “manamanatu ai ke he hana higoa”!​—Malaki 3:16.

He fakaako ke he higoa he Atua ko e lakaaga aoga fakamua ke iloa a ia. Ka e nakai lata a tautolu ke okioki he naia. Kia kumikumi hagaao ki a Ia ne higoa pihia. Lata a tautolu ke iloa na fēfē e Atua.

KO HAI E HIGOA HE ATUA? Ko e higoa he Atua ko Iehova. Fakakite he higoa pauaki ia e Atua ko Ia ka fakamooli e finagalo haana