Skip to content

Skip to table of contents

Tau Fakamoli a Iehova

Fifili e vagahau Faka-Niue

Ko e Heigoa ka Taute he Atua?

Ko e Heigoa ka Taute he Atua?

Ka haia a koe he tuaga vihi, liga amanaki a koe ke he kapitiga tata ke taute taha mena ke lagomatai a koe. He manatu pihia, pehē falu kua nakai ko e kapitiga e Atua he logona hifo kua nakai taute he Atua ha mena ke lagomatai a lautolu. Ka ko e tala mooli, fitā e Atua he loga e mena aoga ne taute ma tautolu mo e to gahua foki a ia ke utakehe katoatoa e tau lekua mo e tau matematekelea oti ha tautolu mogonei. Ko e heigoa ka taute he Atua?

FAKAOTI E TAU MAHANI KELEA OTI KANA

To fakaoti he Atua e tau mahani kelea oti kana he utakehe e punaaga. Fakakite he Tohi Tapu e punaaga ia he pehē: “Ko e lalolagi oti ha he pule hana kua mahani kelea.” (1 Ioane 5:19) Ko ia “kua mahani kelea” ne fakahigoa e Iesu ko e “iki he lalolagi nai,” ko Satani ko e Tiapolo. (Ioane 12:31) Ko e fakaohoohoaga ha Satani ke he tau tagata he lalolagi e punaaga he tau tuaga matematekelea he lalolagi. Ko e heigoa ka taute he Atua?

To nakai leva ti fakaaoga e Iehova ko e Atua e haana Tama ko Iesu Keriso ke “fakaoti ai . . . a ia ne toka ai e kautu ke mate ai, ko e tiapolo haia.” (Heperu 2:14; 1 Ioane 3:8) Fakakite mai he Tohi Tapu na iloa he Tiapolo “kua tote hana vaha” ti hoko e moumouaga haana. (Fakakiteaga 12:12) To utakehe foki he Atua e tau tagata oti ne fakatupu e mahani kelea.​—Salamo 37:9; Tau Fakatai 2:22.

EKE E LALOLAGI MO PARATAISO

Ka mole e utakehe katoatoa he mahani kelea mai he lalolagi, to gahua e Tufuga ha tautolu ke fakamooli e finagalo tukulagi haana ma e tau tagata mo e lalolagi. Ko e heigoa ka amanaki a tautolu ki ai?

Mafola mo e haohao mitaki tukulagi. “Ko e tau tagata mahani molu, to eke ma lautolu e motu; ti fakafiafia foki e lautolu a lautolu ha ko e monuina [mafola] kua lahi.”​—Salamo 37:11.

Loga e mena kai mitaki. “To ha i ai e puke aloalolima he tau saito ke he motu, ki luga he fuga mouga.”​—Salamo 72:16.

Hagahaga mitaki e tau kaina mo e fiafia he gahua. “To ta fale e lautolu, mo e nonofo ai a lautolu; to to e lautolu e tau ulu vine, mo e kai ai e lautolu ha lautolu a tau fua. . . . To oti ai kia lautolu ne fifili e au e tau mena ne eke ai ke he tau lima ha lautolu.”​—Isaia 65:21, 22.

Manako nakai a koe ke kitia e tau tuaga ia? To nakai leva ti kitia tumau ai he tau tagata oti he tau aho takitaha.

UTAKEHE KATOATOA E GAGAO MO E MATE

Kua gagao mo e mamate e tau tagata oti mogonei, ka e to nakai pihia tumau. Ti fakagahua mogoia he Atua e kakano he poa lukutoto ha Iesu “kia nakai mate taha ne tua kia ia, ka kia moua e ia e moui tukulagi.” (Ioane 3:16) Ko e heigoa e fua?

To utakehe katoatoa e gagao. “To nakai pehe mai foki taha kua nofo ai, Kua gagao au; to fakamagalo ai e tau hala he tau tagata kua nonofo ai.”​—Isaia 33:24.

To nakai liu e tau tagata ke mamate. “To fakaoti tukulagi e ia e mate; to holoholo kehe foki he Iki ko Iehova e tau hihina mata mai he tau mata oti.”​—Isaia 25:8.

To momoui tukulagi e tau tagata. “Ko e moui tukulagi ko e mena foaki noa mai he Atua haia, ke he Iki ha tautolu ko Keriso Iesu.”​—Roma 6:23.

Ko lautolu ne mamate to liliu tu mai. “Liu foki tutu mai a lautolu kua mamate, ko lautolu ne tututonu katoa mo lautolu ne hepehepe.” (Gahua 24:15) To aoga ki a lautolu e mena fakaalofa he Atua ko e lukutoto.

To taute fēfē he Atua e tau mena oti nei?

 FAKATŪ E FAKATUFONO MITAKI KATOATOA

To fakamooli he Atua e finagalo haana ma e tau tagata mo e lalolagi ha ko e kautu he lagi nukua kotofa a Keriso Iesu ke Pule. (Salamo 110:1, 2) Ko e fakatufono, po ke kautu, ne fakaako e Iesu e tau tutaki haana ke liogi hagaao ki ai he tau kupu nei: “Ha mautolu a Matua na e, ha ha he lagi, . . . kia hoko mai hau a kautu.”​—Mataio 6:9, 10.

To pule e Kautu he Atua ke he lalolagi mo e fakaotioti e mamahi mo e matematekelea oti he lalolagi. Ko e Kautu nei e fakatufono mua ue atu mooli ma e tau tagata! Kakano ia ati fakamakamaka a Iesu ke fakailoa e “vagahau mitaki he kautu” he magaaho ne fekafekau a ia he lalolagi ti tala age ke he tau tutaki haana ke taute pihia foki.​—Mataio 4:23; 24:14.

Ha ko e fakaalofa ha Iehova ko e Atua ma e tau tagata, ne mavehe a ia ke taute e tau mena mitaki oti nei ma lautolu. Ti manako nakai a koe ke iloa mo e fakatata ki a ia? Ka talia e koe ke taute pihia, ko e heigoa e fua mitaki? To fakamaama he vala tala ka mui mai.

KO E HEIGOA KA TAUTE HE ATUA? To utakehe katoatoa he Atua e gagao mo e mate, tamai fakalataha e tau tagata ki lalo hifo he fakatufono he Kautu haana, mo e taute e lalolagi mo parataiso