Skip to content

Skip to table of contents

Tau Fakamoli a Iehova

Fifili e vagahau Faka-Niue

Fēfē e Atua?

Fēfē e Atua?

Ka maama mitaki e tautolu e tau aga he taha tagata, to iloa mitaki e tautolu e tagata ia ti tata lahi e kapitiga ha tautolu mo ia. Pihia foki ni, ka iloa mitaki e tautolu e tau aga ha Iehova, to iloa mitaki a ia ti tata lahi e kapitiga ha tautolu mo ia. Mai he tau aga mitaki oti he Atua, fā e aga ne mua atu e mitaki: haana malolō, iloilo, fakafili tonu, mo e fakaalofa.

KO E ATUA MALOLŌ LAHI

“Ko e Iki na e ko Iehova, Kitiala, ko koe ne eke e lagi mo e lalolagi he hau a malolo lahi.”​IEREMIA 32:17.

Kitia e malolō he Atua he tau tufugatia. Ma e fakatai, ka tu a koe i fafo he aho ne kikila e laā, ko e heigoa ne logona e koe? Ko e mafana he laā. Ko e logonaaga ia kua puna mai he malolō tufugatia ha Iehova. Lahi fēfē e malolō he laā? He lotouho kua kavi ke he 15,000,000°C. He tau sekone takitaha, ne fakatoka mai he laā e malolō ne tatai ke he loga mo e loga e tau pomu niukilia ne pāpā.

Ka kua tote e laā ha tautolu ka fakatatai ke he totou miliona he tau tufugatia pihia he lagi mo e lalolagi katoatoa. Fuafua he tau saienetisi ko e taha tufugatia pihia kua mua atu e lahi ne higoa UY Scuti, ne fakalahi 1,700 e veliveli ka fakatatai ke he laā. Lahi mahaki e UY Scuti ti maluia e fua lalolagi mo e molea atu ke he palaneta ko Jupiter. Liga lagomatai he mena ia a tautolu ke maama atu foki e talahauaga ha Ieremia na tufuga e Iehova ko e Atua e lagi mo e lalolagi katoatoa, ha ko e malolō lahi haana.

Aoga fēfē ki a tautolu e malolō he Atua? Momoui a tautolu ha ko e tau tufugatia he Atua, tuga e laā mo e  tau mena mitaki oti he fua lalolagi. Ti fakaaoga foki he Atua e malolō haana ke aoga e tau tagata takitokotaha. Ke he puhala fe? He senetenari fakamua, foaki he Atua ki a Iesu e malolō ke taute e tau gahua mitaki ue atu. Totou e tautolu: “Kua ala e tau matapouli, mo e ō e tau kulikuli, kua fakamea e tau lepela, mo e logona e tau teligatuli, kua fakamamatike e tau tagata mamate.” (Mataio 11:5) Ka e kua he vahā nei? “To foaki atu e ia e malolo kia lautolu kua lolelole,” he talahau he Tohi Tapu, ti lafi: “Ko lautolu kua tatali kia Iehova, to fakafou ai ha lautolu a malolo.” (Isaia 40:29, 31) Maeke e Atua ke foaki e “lahi ue atu he malolo” ke fahia a tautolu ke fehagai po ke fakauka ke he tau mena vihi mo e tau kamatamata he moui. (2 Korinito 4:7) Tata nakai a koe ke he Atua ne fakaalofa hofihofi ke fakaaoga e malolō lahi ue atu haana ma tautolu?

KO E ATUA ILOILO

“Iehova na e, kua loga ue atu hāu a tau gahua! Ne eke e koe e tau mena oti ia mo e iloilo.”​SALAMO 104:24.

Ka loga e tau mena ne iloa e tautolu ne tufuga he Atua, to lahi atu e ofoofogia ke he iloilo haana. Ha ha i ai e kumikumiaga biomimetics, po ke biomimicry he tau saienetisi ke he tau tufugatia ha Iehova ti fifitaki e lautolu ke talaga aki e tau mena foou. Ko e tau mena nei kua tuga e fakapili (velcro) ti hoko atu ke he tau vakalele.

Ko e mata he tagata ko e tufugatia ofoofogia

Ko e iloilo mua ue atu he Atua kua kitia ai ke he tino he tagata. Manamanatu ke he fakatai, ko e puhala ne tupu e tama mukemuke. Kamata mai he taha e tega kua fakafalefale, ne toka ai e tau genetic katoatoa. Lagaloga e vevehe he tega ia ke he loga foki e tau tegatega ne tatai. Ka e hoko ni ke he magaaho tonu ti kamata e tau tegatega ke kehekehe e tupuaga, ati moua mai e tau vala pauaki tuga e tau tegatega toto, tau hokohoko, mo e tau polohui motua. Nakai leva ti ha ha ai e tau vala lalahi he tino mo e kamata ke gahuahua. Hiva e mahina ti eke e tega ia ne taha he kamataaga mo tama mukemuke kua mau katoatoa ne totou piliona e tau tegatega. Ko e iloilo ne kitia he tufugatia pihia kua omoomoi e tokologa ke talia e talahauaga he tagata tohia Tohi Tapu ne pehē: “Kua fakaaue au kia koe, ha ko e mena eke au kia matakutakuina mo e ofo ki ai.”​—Salamo 139:14.

Aoga fēfē ki a tautolu e iloilo he Atua? Iloa he Tufuga kua lata a tautolu ke fiafia. Mai he pulotu mo e maamaaga lahi he Atua, ne foaki e ia e tomatomaaga iloilo he haana Kupu ko e Tohi Tapu. Ma e fakatai, pehē mai: “Kia . . . fefakamagaloaki.” (Kolose 3:13) Ko e tomatomaaga iloilo nakai a ia? Ē. Moua he tau kumikumiaga ko e fakamagalo atu kua maeke e tagata ke mohe mitaki mo e lagotatai e toto. Maeke foki ke fakatote hifo e lauia he gagao fakaagitau mo e falu lekua malolō tino. Ko e Atua kua tuga e kapitiga iloilo mo e fakaalofa ne foaki tumau e tomatomaaga aoga ki a tautolu. (2 Timoteo 3:16, 17) Manako nakai a koe ke moua e kapitiga pihia?

KO E ATUA FAKAFILI TONU

“Kua fiafia a Iehova ke he fakafiliaga [tonu].”​—SALAMO 37:28.

Taute tumau he Atua e tau mena hako. Ti “mamao mo e Atua ke mahani kelea ai a ia, mo Ia hana e malolo oti kana ke mahani hepehepe a ia.” (Iopu 34:10)  Kua tonu Haana tau fakafiliaga, tuga ne talahau he salamo ki a Iehova: “Fakafili fakatonu e koe e tau motu.” (Salamo 67:4) Kua “kitekite a Iehova ke he loto,” ti nakai fakahehē a ia he fakavai ka kua maeke ke iloa tumau e mena mooli mo e hako e tau fakafiliaga. (1 Samuela 16:7) Lafi ki ai, mailoga he Atua e tau nakai fakafili tonu mo e tau matahavala oti he lalolagi, ti mavehe a ia nakai leva “to vevehe kehe mai he motu a lautolu ne mahani kelea.”​—Tau Fakatai 2:22.

Nakai ko e fakafili peehi malolō e Atua ne lali fakalahi ke fakahala. Fakakite e ia e fakaalofa noa he magaaho kua lata. Pehē e Tohi Tapu: “Kua fakaalofa hohofi mo e fakaalofa noa mai a Iehova,” pihia foki ke he tau tagata kelea ka tokihala mooli a lautolu. Ko e fakafili tonu mooli nakai a ia?​—Salamo 103:8; 2 Peteru 3:9.

Aoga fēfē ki a tautolu e fakafili tonu he Atua? Pehē e aposetolo ko Peteru: “Nakai fakamailoga tagata e Atua. Ka ko e tau tagata he tau motu oti kana ne matakutaku kia ia mo e mahani tututonu, kua talia ai e ia.” (Gahua 10:34, 35) Aoga ki a tautolu e fakafili tonu he Atua ha kua nakai fakamailoga po ke fili tagata a ia. Maeke a tautolu ke talia e ia ti eke mo tau tagata tapuaki haana pete e lanu, motu, fakaakoaga, po ke tuaga ha tautolu.

Nakai fakamailoga tagata e Atua, ti aoga ai a tautolu he nakai fakamailoga tagata haana pete e lanu po ke tuaga

Ha kua manako e Atua ke maama mo e aoga a tautolu he fakafili tonu haana, ne foaki mai e ia e loto manamanatu. Fakamaama he tau Tohiaga Tapu e loto manamanatu ko e fakatufono ‘kua tohi ke he tau loto ha tautolu,’ ti “kua fakamoli” ka hako po ke hepe e mahani ha tautolu. (Roma 2:15) Aoga fēfē ki a tautolu? Ka fakamahani ai kua maeke e loto manamanatu ha tautolu ke fakalaga ke ua taute e tau gahua mamahi po ke nakai fakafili tonu. Ti ka taute e tautolu e mena hepe, maeke ai ke omoomoi a tautolu ke fakatokihala mo e fakahako e puhala. Ko e maama e fakafili tonu he Atua ka lagomatai mo e fakatata a tautolu ki a ia!

 KO E FAKAALOFA E ATUA

“Ko e Atua ko e fakaalofa.”​1 IOANE 4:8.

Fakatātā he Atua e malolō, iloilo, mo e fakafili tonu, ka e nakai pehē e Tohi Tapu ko e Atua ko e malolō, iloilo, po ke fakafili tonu. Pehē ai ko ia ko e fakaalofa. Ko e ha? Ha kua mooli ke pehē ko e malolō he Atua ati maeke a ia ke gahua mo e ko e fakafili tonu mo e iloilo ne takitaki e puhala gahua haana. Ka ko e fakaalofa ha Iehova ne omoomoi a ia ke gahua. Ko e fakaalofa e fakavēaga he tau mena oti haana ne taute.

Pete kua katoatoa a Iehova, ko e fakaalofa haana ati omoomoi a ia ke tufuga e tau mena momoui lotomatala he lagi mo e lalolagi, ti aoga mai ha ko e fakaalofa mo e levekiaga haana. Nakai lotokai a ia he tauteute e lalolagi mo kaina mitaki ma e tau tagata ne tufugatia e ia. Ti matutaki a ia ke fakakite e fakaalofa ke he tau tagata oti “ha kua fakahake ne ia hana la kia lautolu kua mahani kelea katoa mo lautolu kua mahani mitaki, kua fakato hifo foki e ia e uha kia lautolu kua tututonu katoa mo lautolu kua nakai tututonu.”​—Mataio 5:45.

Lafi ki ai, “kua fakaalofa fakalahi mai e Iki [Iehova] mo e hofihofi noa.” (Iakopo 5:11) Fakaalofa a ia ki a lautolu ne taute mooli e tau lakaaga ke iloa mo e fakatata ki a ia. Fioia he Atua e tau tagata takitokotaha. Ti “kua manatu e ia a mutolu.”​1 Peteru 5:7.

Aoga fēfē ki a tautolu e fakaalofa he Atua? Fiafia a tautolu he fulufuluola e tōaga laā. Olioli a tautolu ka logona e tama mukemuke ne kata. Tokiofa e tautolu e fakaalofa he magafaoa tata. Nakai ko e tau mena aoga ue atu anei, ka e mafanatia lahi e tau momoui ha tautolu.

Aoga foki a tautolu ha ko e taha mena fakaalofa he Atua: ko e liogi. Fakamalolō mai he Tohi Tapu: “Aua neke fakaatukehe a mutolu ke he taha mena taha; ka kia fakailoa atu ke he Atua e tau manako ha mutolu ke he tau mena oti kana ke he liogi, mo e ole, katoa mo e fakaaue.” Tuga e matua taane loto fakaalofa, manako a ia ke fuluhi a tautolu ki a ia ma e lagomatai ke he tau tuaga fakatagata. Ha ko e fakaalofa katoatoa ha Iehova kua mavehe mai a ia ke foaki e “monuina [po ke mafola] foki mai he Atua kua mua ue atu ke he tau mena oti kua manamanatu ki ai.”​—Filipi 4:6, 7.

He fakamaamaaga kū nei ke he tau aga pauaki he Atua tuga e malolō, iloilo, fakafili tonu, mo e fakaalofa, kua lagomatai nakai a koe ke kitia mitaki na fēfē e Atua? Ke fakalaulahi e fakaaue haau ke he Atua, uiina e mautolu a koe ke fakaako ke he tau gahua ne fitā a ia he taute mo e to taute ka aoga ki a koe.

FĒFĒ E ATUA? Ko Iehova kua mua atu e malolō, iloilo, mo e fakafili tonu. Ka ko e aga haana kua mua ue atu ko e fakaalofa