Skip to content

Skip to table of contents

Tau Fakamoli a Iehova

Fifili e vagahau Faka-Niue

Tau Fakaakoaga he Tohi Tapu​—Pulotu Katoatoa

Tau Fakaakoaga he Tohi Tapu​—Pulotu Katoatoa

MANAMANATU KE HE MENA NEI: Ko koe kua kitekite ke he fale ne toka e tau koloa tuai. Laulahi he tau koloa kua pūpū, maaki tea, mo e malona. Kua lahi e falu vala ne galo. Ka e taha ne mau maopoopo agaia; kua kitia mitaki e talagaaga. “Foou lahi kia e koloa nei ka fakatatai ke he falu?” he hūhū e koe ke he tagata fakakitekite. Pehē a ia, “Nakai, mua atu e tuai he koloa ia ti nakaila fakafoou.” “Tuku kia he mena malu?” he hūhū e koe. Pehē e tagata fakakitekite, “Nakai, kua lauia e koloa nei he matagi mo e uha lahi. Ti tokologa ne lali ke moumou ai.” Liga ofo lahi a koe ti manatu, ‘Taute mai he heigoa?’

Tuga kua tatai e Tohi Tapu mo e koloa ofoofogia ia. Ko e tohi ne mua atu e tuai ke he falu tohi. Na fai tohi tuai foki. Ka e tuga e tau koloa tuai ne malona, laulahi he tau tohiaga tuai ne malona kelea ha kua leva lahi. Ko e tau talahauaga i ai ne hagaao ke he tau mena fakasaiene kua nakai tatai mo e tau iloaaga foou ne hako. He tau fakatonuaga fakaekekafo ne tuga kua mua atu e hagahaga kelea mo e nakai lagomatai. Ti laulahi he tau tohi tuai ko e tau vala ni ne toe; falu vala kua galo po ke malona lahi.

Ka e kehe mamao e Tohi Tapu. Ne kamata ke tohi ai he molea 35 e senetenari kua mole, ka e maopoopo agaia e Tohi Tapu. Pete he totoko tumau ki ai he tau senetenari kua mole he tugi, pā malu, mo e taute fakateaga kua kautū tumau e tau talahauaga i loto ke he tau totokoaga oti. Nakai maeke ke talahau kua tuai e Tohi Tapu pete he loga e tau iloilo foou, kua fakakite ai e iloaaga ofoofogia ke he vahā i mua.​—Kikite puha “Tuai Lahi po ke Leva Tigahau Kia?

TAU MATAPATU FAKAAKOAGA MA TAUTOLU HE VAHĀ NEI

Ka e liga manatu a koe, ‘Aoga mooli kia e tau fakaakoaga he Tohi Tapu ma e vahā foou nei ha tautolu?’  Ke tali, hūhū hifo: ‘Ko e heigoa e tau lekua kelea lahi mahaki kua fehagai mo e tau tagata he vahā nei? Ko e tau lekua fe kua mua atu e matakutaku?’ Liga manatu a koe ke he latau, kiva e takatakaiaga, matahavala, po ke kolokolovao. Onoono la mogonei ke he falu matapatu fakaakoaga he Tohi Tapu. He manamanatu a koe, hūhū hifo, ‘Ka momoui fakatatau e tau tagata ke he tau puhala aoga nei, to mitaki nakai e lalolagi?’

FIAFIA KE HE MAFOLA

“Uhoaki a lautolu ke fakatupu e fakafeilo; ha ko e mena talahaua a lautolu ko e fanau he Atua.” (Mataio 5:9) “Kaeke kua maeke ia mutolu, kia nonofo fakamitaki mo e tau tagata oti kana.”​—Roma 12:18.

FAKAALOFA NOA MO E FAKAMAGALO

“Uhoaki a lautolu ne fakaalofa atu; ha ko e mena ofania mai a lautolu.” (Mataio 5:7) “Kia fefakaukaaki a mutolu, mo e fefakamagaloaki, kaeke kua mahani kelea taha kia taha; tuga ne fakamagalo mai a [“Iehova,” NW] * kia mutolu, kia pihia foki a mutolu.”​—Kolose 3:13.

FAKALATAHA E TAU TAGATA KEHEKEHE

Ko e Atua ne “eke foki e ia e tau motu oti he tau tagata ke he toto taha, ke nonofo ai ke he fuga kelekele oti kana.” (Gahua 17:26) “Nakai fakamailoga tagata e Atua. Ka ko e tau tagata he tau motu oti kana ne matakutaku kia ia mo e mahani tututonu, kua talia ai e ia.”​—Gahua 10:34, 35.

FAKALILIFU E LALOLAGI

“Ne uta foki e Iehova ko e Atua e tagata, mo e tuku a ia ke he kaina ko Etena, ke gahua ai mo e leoleo ai.” (Kenese 2:15) Ko e Atua ka “moumou ai foki a lautolu kua moumou e lalolagi.”​—Fakakiteaga 11:18.

VIHIATIA KE HE VELEVELEMENA MO E MAHANI FEUAKI

“Kia leveki e mutolu a mutolu neke velevelemena; ha ko e mena nakai moui taha he loga hana tau mena ha i ai.” (Luka 12:15) “Ka ko e feuaki, mo e tau mena kelea oti, mo e velevelemena, aua neke talahau e tau mena ia ki mua ha mutolu, tuga e mena kua lata mo e tau tagata tapu.”​—Efeso 5:3.

MAHANI FAKAMOOLI MO E GAHUA MALOLŌ

“Kua loto a mautolu ke mahani mitaki ke he tau mena oti kana.” (Heperu 13:18) “Ko e tagata kaiha aua neke liu kaiha foki, ka e mitaki ke fakamalolo a ia ke gahua ke he tau lima hana ke he mena mitaki.”​—Efeso 4:28.

UHO LAHI KE LAGOMATAI A LAUTOLU NE LOLELOLE

“Kia fakamafana a lautolu kua manava tote, kia lagomatai kia lautolu kua lolelole, kia fakauka ke he tau tagata oti kana.” (1 Tesalonia 5:14) “Ke ahi e tau tagata kua mamate e tau matua, mo e tau fifine takape ke he ha lautolu a matematekelea.”​—Iakopo 1:27.

Ne nakai tohi noa ni he Tohi Tapu e tau puhala aoga ia. Ko e tau lagomatai ia kua fakaako he Tohi Tapu ki a tautolu e aoga he tau matapatu fakaakoaga pihia mo e ke fakagahua he tau momoui ha tautolu he tau aho oti. Ane mai tokologa kua fakagahua e tau fakaakoaga nei, to liga gahoa kia e tau lekua kelea lahi mahaki mogonei? Mooli ai, ko e tau matapatu fakaakoaga he Tohi Tapu kua aoga lahi mo e felauaki tonu mogonei! Ka ko e heigoa he tau fakaakoaga he Tohi Tapu kua aoga ki a koe he magaaho tonu nei?

 UHO E TAU FAKAAKOAGA HE TOHI TAPU KI A KOE MOGONEI

Ko e tagata ne mua atu e pulotu ne pehē he taha mogo: “Talahaua tututonu e pulotu.” (Mataio 11:19) Talia nakai e koe? To kitia e pulotu mooli ka fakagahua ai e koe. Ti liga manamanatu a koe: ‘Ka aoga mooli e Tohi Tapu, kua lata nakai ke fai fua mitaki he moui haaku? Aoga fēfē ke he tau lekua ne fehagai au ki ai he magaaho tonu nei?’ Manamanatu ke he fakataiaga.

Ma Delphine, * kua lavelave, pukeina, mo e palepale mitaki e moui. Ka e amanaki ni a ia ti tupufetui e tau matematekelea he galo e tau fakahele. Mate e tama fifine fuata mui haana. Mavehevehe e fakamauaga haana. Ti hagahaga kelea e tuaga fakatupe haana. Ne liu a ia manatu: “Nakai iloa e au e tuaga haaku​—nakai fai tama fifine, nakai fai taane, nakai fai kaina. Logona hifo e au e gatigati​—nakai fai tohiaga, nakai fai malolō, nakai fai manatu ma e anoiha.”

Ko e magaaho fakamua anei ne kitia maaliali e Delphine e mooli he tau kupu nei: “Ko e tau aho he tau tau ha mautolu ko e fitu gofulu ia he tau tau, kaeke ko e valu gofulu e tau tau ha kua malolo, ka ko e malolo ha lautolu ha i ai e mamahi mo e matematekelea; ha kua vave hana mole atu, mo e lele kehe a mautolu.”​—Salamo 90:10.

Ne fuluhi a Delphine ke he Tohi Tapu he magaaho  vihi lahi nei. Ofogia e puhala ne lauia ai e moui haana. To fakakite he tau vala tala tolu ka mui mai, ko e falu ne ofogia ke he puhala ne lagomatai he Tohi Tapu a lautolu he fakagahua e tau tomatomaaga ke he tau lekua he moui. Kua maeke a lautolu ke logona hifo ko e Tohi Tapu kua tuga e koloa tuai ne fakamaama he kamataaga. Nakai tatai ke he tau tohi loga ne kua tuai. Pihia kia ha kua kehe e tau talahauaga i loto he Tohi Tapu? Liga kia ha ko e tau manatu mooli he Atua​—mo e nakai he tagata?​—1 Tesalonia 2:13.

Liga mailoga foki e koe kua kū e moui mo e puke he tau lekua. Ka fakamatematekelea he tau lekua a koe ke tupetupe lahi, fuluhi a koe ki fe ke moua e mafanatia, lalagoaga, mo e fakatonuaga mauokafua?

To fakatutala a tautolu ke he tolu e matapatu puhala mai he Tohi Tapu ne kua aoga lahi ke he moui haau. Maeke ke fakaako a koe ke

  1. kalo mai he tau lekua.

  2. fakamafola e tau lekua ka tutupu.

  3. fehagai fakamitaki mo e tau tuaga ne nakai maeke a koe ke hiki.

To fakatutala e tau vala tala ka mui mai ke he tolu e vala nei.

^ para. 10 Ko Iehova e higoa he Atua ne fakakite i loto he Tohi Tapu.​—Salamo 83:18.

^ para. 24 He vala tala nei mo e tolu e vala tala ka mui mai, kua hiki falu higoa.