Skip to content

Skip to table of contents

Tau Fakamoli a Iehova

Fifili e vagahau Faka-Niue

Aoga Nakai e Takitakiaga he Tohi Tapu Mogonei?

Aoga Nakai e Takitakiaga he Tohi Tapu Mogonei?

PEHĒ E FALU, NAKAI. Taha e ekekafo ne fakatatai e fakaaoga he Tohi Tapu mo takitakiaga ke he fakaaoga he tohi mai he tau tau 1920 ke fakaako e vahega kemisitulī. Ko e tagata ne nakai fakalilifu e Tohi Tapu ka hūhū to fakaaoga foki kia e koe e tohi fakamaama ma e komopiuta tuai ke takitaki a koe ke fakaaoga e komopiuta foou. Kua kitia he falu ko e Tohi Tapu kua fakateaga ha kua tuai lahi.

Ko e fakaaoga he ha he tagata e takitakiaga tuai pihia he lalolagi ne mafiti mo e foou e tau matini? Mua atu ha kua loga lahi e tau faahi kupega hila mo e tau vala tala ne fakatoka mai tumau e tau fakatonuaga mo e tau takitakiaga foou. Ko e tau fakaholoaga televisoni ne fakakite e tau fakatonuaga ha lautolu ne lotomatala lahi ke he manamanatuaga he tagata, tau faiaoga ke he tau puhala he moui, mo e tau tagata tohi tala. Ti sela he tau fale toka tohi e tau pepa ke lagomatai ni he tagata a ia, nukua fakaohooho e pisinisi ne loga lahi e tau tupe.

Ha kua loga e tau vala tala foou maka, ko e ha ne fuluhi ke he Tohi Tapu​—ne tohi ai he teitei 2,000 e tau kua mole? Hako kia e tau tagata ne fakauaua ke pehē ko e fakaaoga e tohi tuai pihia mo takitakiaga kua tatai mo e fakaaoga he tohi kemisitulī po ke tohi komopiuta tuai? Nakai hako e fakatataiaga ia. Ko e saiene mo e tau matini hila ne hikihiki mafiti, ka kua hikihiki nakai e aga pauaki he tagata? Manako agaia e tau tagata ke moua e kakano he moui, fiafia, haohao mitaki, tau fakafetuiaga mitaki ko e magafaoa, mo e tau kapitiga mitaki.

Kua leva tigahau e Tohi Tapu ka e maeke agaia ke lagomatai e tau manako ia mo e loga atu foki. Na omoomoi foki he Tufuga ha tautolu. Tuku mai e tau takitakiaga ki a tautolu ma e tau vala oti he moui mo e moua e tau puhala ke fehagai mo e tau tuaga kehekehe. (2 Timoteo 3:16, 17) Ti talahau foki kua maeke ke foaki mai e tomatomaaga katoatoa ne nakai fakaai ke tuai! Pehē e Tohi Tapu: “Ko e kupu he Atua kua moui ia.”​—Heperu 4:12.

Mooli nakai e tau talahauaga he Tohi Tapu? Tuai kia, po ke tohi ne mua atu e aoga ke he tau tohi oti​—ko e tohi gahuahua? Ko e kakano he Ko e Kolo Toko nei, ko e fufuta fakamua he tau fufuta pauaki ka lagomatai a koe ke moua e tau tali ke he tau hūhū nei.