Skip to content

Skip to table of contents

Tau Fakamoli a Iehova

Fifili e vagahau Faka-Niue

2 Lagomatai ke Mafola e Tau Lekua

2 Lagomatai ke Mafola e Tau Lekua

Falu lekua he moui ne hihiga ke leva, falu mogo ke he loga e tau; ti liga tupu ai ka e nakai mailoga katoatoa e tautolu e tuaga. Foaki mai nakai he Tohi Tapu e pulotu ke kautū ke he tau lekua ia ne leva mo e tauhele? Manamanatu ke he falu fakataiaga.

MOLEA E TUPETUPE

Pehē a Rosie, “Ne manamanatu lahi au ke he falu tupetupe ti fakaau atu e kelea po ke manamanatu ke he tau tuaga kelea ka tutupu.” Ko e tau kupu Tohi Tapu fe ne lagomatai? Taha ko e Mataio 6:34: “Aua neke fakaatukehe a mutolu ke he aho a pogipogi; ha ko e mena fakaatukehe e aho a pogipogi ke he hana tau mena. Lata ke he aho hana kelea ni.” Pehē a Rosie mogonei ko e tau kupu na ha Iesu ne lagomatai a ia ke ua tupetupe ke he tau mena ka tutupu a pogipogi. Lafi e ia, “Kua fitā he loga e tau lekua haaku, ti nakai lata ke lafi mai e tau tupetupe he tau tuaga ne nakaila tutupu ia mo e liga to nakai tutupu.”

Ko Yasmine foki ne mailoga kua tupetupe a ia. “Ne tagi au he falu aho he faahi tapu, ti nakai maeke ke mohe he falu pō. Logona hifo e au kua molea lahi e tau manamanatuaga kelea haaku.” Ko e heigoa e kupu tohi ne lagomatai? Hagaao a ia ke he 1 Peteru 5:7: “Kia tuku atu [ke he Atua] e tau mena oti kua fakaatukehe ai a mutolu, ha ko e mena kua manatu e ia a mutolu.” Pehē a Yasmine: “Fai magaaho he mole, ne fakatumau au ke liogi ki a Iehova ti tali e Ia e tau liogi haaku. Logona hifo e au kua tuga e taha mena mamafa kua utakehe he tau tukeua haaku. Fa tupu agaia e tau manatu kelea haaku, ka e iloa e au mogonei e puhala ke fehagai ki ai.”

FAKATUAI

Pehē e fifine fuata ko Isabella: “Manatu au ko e fakatuai ko e mena fakamagafaoa ha kua pihia foki e  matua taane haaku. Nakai fakamafiti au ke taute e tau mena ne aoga ha kua manako au ke nofo noa ni​—ke okioki mo e kitekite televisoni. Nakai mitaki e aga ia ha kua fakalahi e tupetupe ti nakai mitaki e gahua ka taute.” Ko e matapatu fakaakoaga ne lagomatai a ia kua fakakite mai he 2 Timoteo 2:15, ne pehē: “Kia lalilali atu a koe kia eke a koe mo tagata kua fiafia ki ai e Atua, ko e ekegahua nakai fai mena ke mā ai.” Pehē a Isabella, “Nakai manako au ke mā a Iehova ke he gahua haaku ha kua fakatuai au.” Ati holo ki mua a ia.

Pihia foki he talahau e Kelsey: “Ka fai matagahua au ke taute ne toka e au ti hoko ke he sekone fakahiku. Ti tagi, ai mohe, mo e tupetupe au. Nakai mitaki e mena ia ma haaku.” Moua e Kelsey e lagomatai mai he Tau Fakatai 13:16: “Ko e tau tagata lotomatala oti, kua takitaha a lautolu mo e eke mena mo e iloilo; ka ko e tagata goagoa, kua fofola ai e ia hana goagoa.” Fakamaama e ia ko e manamanatu fakahokulo ke he kupu tohi nei ne fakaako ki a ia: “Kua pulotu ke fakatoka tuai e fakaholoaga. Fai pepa au mogonei he fuga laulau ke tohi e tau gahua ka taute, ti lagomatai he mena nei au ke fakatokatoka e moui haaku ka e ua toka e tau gahua ke hoko ke he mogo fakahiku.”

MATIMATI

“Ne fano kehe e taane haaku he fakamauaga ha maua, ti toka hifo au mo e fā e tama ikiiki,” talahau e Kirsten. Ko e heigoa e matapatu fakaakoaga he Tohi Tapu ne lagomatai a ia? Totou ai ia Tau Fakatai 17:17: “Kua fakaalofa e kapitiga ke he tau aho oti kana; kua fanau foki e matakainaga ke lata ai mo e aho matematekelea.” Kumi lagomatai a Kirsten ke he falu ne fekafekau ki a Iehova tuga a ia. Ko e heigoa ne moua e ia? “Ne lagomatai he tau kapitiga haaku au ke he tau puhala loga! Falu ne toka e tau fakatau mo e tau fiti he gutuhala haaku. Lagatolu ne o mai e matakau tote ke lagomatai au mo e fanau ke hiki e kaina. Taha matakainaga ne lagomatai au ke moua e gahua. Haia tumau e tau kapitiga haaku ke lagomatai au.”

Ko Delphine ne totoku i mua, ne taufetului foki mo e matimati. Manatu e ia he mole e tau tuaga momoko oti haana: “Logona hifo e au tuga ko au i fafo he fale koloa he moui hane onoono ke he tau tagata oti i loto. Kua matimati lahi au.” Taha e kupu tohi ne lagomatai a ia ko e Salamo 68:6: “Ne fakanofo kaina he Atua a lautolu kua tagitagimoki.” Fakamaama e ia: “Iloa e au nakai kakano hokoia e kupu tohi ke he kaina. Ka e maama e au ko e Atua ne foaki mai e kaina fakaagaaga, ko e matakavi haohao mitaki mooli ne ha ha i ai e tau fakafetuiaga mafanatia mo lautolu ne fakaalofa ki a Iehova. Ka e iloa e au kua nakai maeke au ke tata ke he falu tagata ato tata fakamua au ki a Iehova. Ko e Salamo 37:4 ne lagomatai ke he tuaga ia: ‘Kia fiafia a koe kia Iehova, ti foaki mai ai e ia kia koe e tau mena kua manako ki ai hāu a loto.’”

Fakahiku e ia: “Kua mailoga e au e lata ke pipiki mauokafua ki a Iehova. Ko ia ko e mua ue atu. Ti tohi hifo e au e tau gahua ka taute e au mo e falu ke moua e au e fakafetuiaga mo lautolu ne fakavē ke he tau puhala aoga fakaagaaga. Ne fakaako au ke kitia e mitaki he falu ti fehagai mo lautolu ke tuga ko e tau mena mitaki hokoia haaku ne kitia.”

Ka e nakai mitaki katoatoa agaia e tau kapitiga ne fekafekau ke he Atua. Kua taufetului e Tau Fakamoli a Iehova mo e tau lekua tuga ni e tau tagata oti. Ka kua omoomoi he fakamahaniaga he Tohi Tapu e tau tagata ke lagomatai e falu ka maeke. Kua pulotu he taute e tau kapitiga pihia. Pete ia, maeke nakai e tau matapatu fakaakoaga he Tohi Tapu ke lagomatai e tau lekua ne nakai maeke ke fakamafola mogonei, tuga e hololoa he tau lekua ke he malolō tino mo e maanu?

Ko e fakagahua e tomatomaaga he Tohi Tapu ka maeke a koe ke moua e tau kapitiga mitaki