Skip to content

Skip to table of contents

Tau Fakamoli a Iehova

Fifili e vagahau Faka-Niue

1 Lagomatai ke Kalo Mai he Tau Lekua

1 Lagomatai ke Kalo Mai he Tau Lekua

Pehē e Tohi Tapu ko e tau fakatonuaga i loto kua omoomoi he agaaga tapu mo e “kua aoga ni ke fakaako ai, ke fakatonu ai, ke akonaki ai.” (2 Timoteo 3:16) Mooli nakai e talahauaga ia? Manamanatu ke he puhala kua lagomatai he pulotu he Tohi Tapu e tau tagata ke kalo mai he falu lekua uka lahi neke hufia a lautolu.

FAKAAOGA FAKAHEHĒ HE KAVA

Ko Delphine ne totoku he vala tala kua mole, ne logona hifo ko e tau tupetupe haana kua fakaohooho a ia ke inu lahi e kava. Nakai pā malu he Tohi Tapu e fakaaoga fakalatalata he kava ka e pehē: “Ua eke a koe mo taha ia lautolu kua inu lahi ke he uaina.” (Tau Fakatai 23:20) Ko e fakaaoga fakahehē he kava kua matutaki ke he tau lekua malolō tino, mavehevehe mo e lekua e tau fakafetuiaga, mo e totou miliona ne mamate fakaofo he tau tau takitaha. Maeke ke kalo mai he tau lekua nei ka mumuitua e tau tagata ke he fakatonuaga pulotu he Tohi Tapu.

Ne taute pihia e Delphine. Pehē a ia mogonei: “Mailoga e au kua nakai lagomatai e kava ke fakamafola e tupetupe haaku. Fakagahua e au e pulotu ia Filipi 4:6, 7, ne pehē: ‘Aua neke fakaatukehe a mutolu ke he taha mena taha; ka kia fakailoa atu ke he Atua e tau manako ha mutolu.’ He tau pō takitaha ka logona e au kua tupetupe lahi e loto haaku mo e holo ki mua e fakaatukehe, ne olelalo au ki a Iehova. Fakavahega e au e tau logonaaga oti haaku, putoia e ita, mamahi, mo e fakaatukehe, ti ole ki a ia ke lagomatai au ke kumi e tau puhala ke moua e logonaaga mitaki. He magaaho pogipogi, ne eketaha au ke utakehe mooli e tau logonaaga ia. Ne taute he aga liogi nei au ke hagaaki e manamanatuaga ke he tau mena ne ha ha ia au ka e nakai ke he tau mena ne nakai ha ha ia au. Ne fifili au ke nakai liu inu kava. Ha kua moua e au e mafola lahi, ti nakai manako au ke fakagalo ai.”

 MAHANI FEUAKI

Ko e mahani feuaki e taha lekua lahi ne fakatupu e loto mamahi mo e matematekelea. Ka e maeke e tau matapatu fakaakoaga he Tohi Tapu ke lagomatai a tautolu ke kalo mai he falu punaaga he tau lekua​—ma e fakatai, ko e kalahī mo e onoono ke he tau fakatino telefua. “Na mukamuka lahi ke kalahī,” he talahau he fuata ko Samuel. “Falu mogo ne nakai manako loto au ke he taha fifine, ka e kitia e au kua manako loto a ia ki a au​—ko e mena ia ati fakafiafia ke kalahī.” Ne mailoga e Samuel kua tukupau tumau a ia ko e kalahī pete kua nakai manatu pihia a ia​—ti fifili a ia ke kalahī pauaki. Ka e nakai fiafia a ia ke he aga haana. Pehē a ia mogonei, “kua hagahaga kelea e mena ia ha kua feaki e mahani lotokai lahi.”

Ne totou e Samuel e vala tala ma e tau fuata he faahi kupega hila he jw.org. Ti manamanatu a ia ke he Tau Fakatai 20:11, ne pehē: “Kua maeke ke iloa ai e tama ke he hana tau mahani; po ke mitaki mo e hakohako hana tau mena ne eke.” Lagomatai fēfē e mena ia? Mailoga e Samuel kua nakai mooli mo e nakai hako e mahani kalahī haana. Pehē a ia mogonei: “Iloa foki e au ko e fuata ne kalahī kua feaki e tau mahani ka takitaki atu ke nakai mitaki e fakamauaga. Ne kamata au ke manamanatu to fēfē la e fifine ka hoana e au anoiha ka kitia e ia au ne kalahī ke he taha fifine. Ti mailoga e au kua nakai mitaki e aga ia. Pete he mukamuka ke kalahī, ka kua nakai hako.” Ti hiki a Samuel. Ko e kalo mai he kalahī kua lagomatai foki a ia ke kalo mai he mahani feuaki.

Ko Antonio kua hagahaga kelea lahi e tuaga haana ke he mahani feuaki: Ne hufia a ia ke he tau fakatino telefua. Pete kua mau a ia ke he fifine ne fakaalofa hofihofi a ia ki ai, ne lagaloga e kaumahala haana ha ko e tau fakatino telefua. Pehē a ia ko e manamanatu ke he 1 Peteru 5:8 ne lagomatai lahi a ia. Ne pehē: “Kia nonofo fakalatalata a mutolu, kia mataala a mutolu ha ko ia kua eke a mutolu mo tau fi hana, ko e tiapolo ia, kua faifano a ia tuga ne leona tagi, kua kumi kia falu ke faiola ai e ia.” Pehē a Antonio: “Loga lahi e tau fakatino telefua ne takatakai ia tautolu he lalolagi nei, ti maeke e tau fakatino ia ke mau he loto. Kua lagomatai mooli e kupu tohi ia ki a au ke manamanatu ke he tupumaiaga he tau kamatamata nei. Lata au ke totoko ki ai he fakamatutaki e tau fakatino kiva ia mo e tupumaiaga kelea muitui. Iloa e au mogonei ko Iehova ni kua maeke ke lagomatai au ke ‘nofo fakalatalata mo e mataala’ ke maeke ke totoko e tau mena fakatauhele ia ke he loto haaku, manamanatuaga haaku, mo e fakamauaga haaku.” Ne moua e Antonio e lagomatai kua lata, ati maeke a ia ke tuku kehe e tau aga kelea haana. Lagomatai he mena ia a ia ke kalo mai he tau lekua kelea lahi.

Maaliali ai, kua foaki mai he Tohi Tapu e fakatonuaga aoga ka lagomatai a tautolu ke kalo mai he tau lekua kelea lahi. Ka e kua e tau lekua ne fitā he tupu lahi mo e uka ke totoko? To kitia e tautolu e puhala ka lagomatai he Kupu he Atua a tautolu ke kautū mai he tau tuaga uka pihia.

Ko e takitakiaga aoga he Tohi Tapu ka lagomatai a tautolu ke kalo mai he falu lekua