Skip to content

Skip to table of contents

Tau Fakamoli a Iehova

Fifili e vagahau Faka-Niue

 HIKI HE TOHI TAPU E TAU MOMOUI

Nakai Manako Au ke Mate!

Nakai Manako Au ke Mate!
  • TAU NE FANAU: 1964

  • MOTU NE FANAU AI: IGILANI

  • MOUI FAKAMUA: MAHANI UKA HE MATUA FIFINE FUATA MUI

MOUI HAAKU KUA MOLE

Ne fanau au i Paddington, ko e matakavi ne tokologa lahi e tau tagata i London, i Igilani. Nofo au mo e matua fifine haaku mo e tolu e taokete. Nakai nofo tumau e matua taane mo mautolu ha ko e tau lekua haana he inu kava.

Magaaho ne tote au, ne fakaako he matua fifine au ke liogi he tau pō oti. Taha e Tohi Tapu tote haaku ko e Tau Salamo ni hokoia, ti taute ni e au e puhala ke lologo aki. Manatu e au e talahauaga he taha tohi ne totou e au: “To hoko ke he taha aho ti ai fai aho foki ne toe.” Ne fa ala au ka pō mo e manamanatu ke he tau kupu ia hagaao ke he vahā anoiha. ‘Liga fai mena foki ke he moui,’ he manatu e au. ‘Ko e eke ha au hinei?’ Nakai manako au ke mate!

Ne fia iloa lahi au hagaao ke he tau lagatau taulatua. Lali au ke tutala ke he tau tagata mamate, fina atu ke he tau tanuaga tagata mo e tau kapitiga aoga, mo e kitekite mo lautolu ke he tau kifaga fakamatakutaku. Manatu a mautolu kua fakafiafia mo e fakamatakutaku foki.

Kua kamata au ke mahani uka he hogofulu laia e tau he moui. Kamata au ke ula tapaka, ti nakai leva ne hufia ki ai. Levaleva, ne holo atu au ke ula mariuana. He 11 e tau he moui, ne fakataitai au ke inu kava. Pete ne ai loto au ki ai, ka e fiafia au ke he magaaho ka konahia. Fiafia foki au ke he tau leo kofe mo e koli. Ka maeke, ne fano au ke he tau patī mo e tau fale kalapu ka pō. Fa hola au ka pō ti liu mai fufū ki kaina ato hake mai e laā. Ne lolelole mogoia he aho, ti lagaloga e ai fano he aoga. He tau magaaho ka fano au he aoga, ne fa inu kava au he fano he taha vahega ke he taha vahega.

Ne kelea lahi e tau ola haaku he tau fakahiku he aoga. Ha kua nakai iloa he matua fifine e kelea he mahani uka haaku, kua hogohogo manava a ia mo e vale. Ne taufetoko a maua ti hola au he kaina. Fai magaaho ne nofo au mo e kapitiga taane haaku ko Tony, ko e Rastafari. Ne putoia a ia ke he tau gahua matahavala mo e fakafua he tau tulaki kona mo e lahi e mahani vale. Nakai leva ti fatu au, ko e 16 laia e tau he moui he magaaho ne fanau e tama taane ha maua.

 PUHALA NE HIKI HE TOHI TAPU E MOUI HAAKU

Feleveia fakamua au mo e Tau Fakamoli a Iehova he magaaho ne nofo au he fale ma e tau matua fifine tokotaha mo e tau tama mukemuke ha lautolu. Foaki mai he fakatufono he matakavi e poko he fale ia. Ne tokoua e fifine Fakamoli ne ahiahi tumau ke he falu matua fifine fuata. He taha aho ne fakalataha atu au ke he fakatutalaaga mo lautolu. Ne amanaki au ke fakakite age kua hepe e Tau Fakamoli. Ka kua tali oti e laua e tau hūhū loga haaku mai he Tohi Tapu ke he puhala fakatotoka mo e maaliali. Ne fiafia lahi au ha kua totonu mo e fakaalofa a laua. Ti talia e au ke fakaako e Tohi Tapu mo laua.

Nakai leva ti fakaako e au taha mena mai he Tohi Tapu ne hiki e moui haaku. Tali mai he vahā tote, ne matakutaku au he mate. Ka e iloa e au mogonei e fakaakoaga ha Iesu ke he liu tu mai! (Ioane 5:28, 29) Ne iloa foki e au na fakaalofa e Atua ki a au. (1 Peteru 5:7) Hokotia lahi ke he loto haaku e tau kupu he Ieremia 29:11 ne pehē: “Ha kua iloa e au e tau manatu kua manatu ai au kia mutolu, ko e tau manatu ke he monuina, ka e nakai ko e malaia, kua pihia mai a Iehova, ke foaki atu kia mutolu e fakahikuaga ne ha i ai e amaamanaki.” Ne kamata au ke talitonu kua maeke au ke moua e amaamanakiaga ke moui tukulagi he Parataiso he lalolagi.—Salamo 37:29.

Fakakite he Tau Fakamoli a Iehova e fakaalofa mooli ki a au. He magaaho ne fina atu fakamua au ke he taha he tau feleveiaaga ha lautolu, ne mafanatia mo e fiafia au ki ai—kua aga kapitiga e tau tagata oti! (Ioane 13:34, 35) Kua kehe lahi mahaki ka fakatatai ke he puhala ne fehagai mai e tau tagata he lotu ne fano au ki ai. Ne fakafeleveia he Tau Fakamoli au pete e tau tutūaga haaku. Ne foaki e lautolu e magaaho, leveki mai, mo e fiafia, ti lahi foki e lagomatai. Logona hifo e au kua tuga ko au he magafaoa lahi mo e fakaalofa.

Mai he fakaako Tohi Tapu haaku, ne mailoga e au kua lata ke taute e tau hikiaga he moui haaku ke lautatai mo e tau mahani mitaki lahi he Atua. Ne nakai mukamuka ia au ke oti e ula tapaka. He magaaho taha, kua mailoga e au ko e falu leo kofe ne fakaohooho e manako haaku ke ula mariuana, ti hiki e au e tau leo kofe ne fanogonogo au ki ai. He manako ke he mena mitaki, ne fakaoti e fano haaku ke he tau patī mo e tau fale kalapu ka pō ha ko e tau tutūaga ia ka kamatamata au ke konahia. Ti kumi e au e tau kapitiga foou ka fakaohooho fakamitaki ke lagomatai au he puhala moui foou haaku.—Tau Fakatai 13:20.

He magaaho ia, ko Tony kua fakaako foki e Tohi Tapu mo e Tau Fakamoli a Iehova. He tali he Tau Fakamoli e tau hūhū haana mai he Tohi Tapu, ne talitonu foki a ia kua fakaako e ia e kupu mooli. Taute e ia e tau hikihikiaga lalahi ke he moui haana: ne toka e ia e tau kapitiga fakamua haana ne mahani vale, fakaoti e tau gahua matahavala, mo e fakaoti e ula mariuana. Ke fakafiafia mooli a Iehova, ne kitia e maua kua lata ke hiki e puhala moui feuaki ke moua he tama taane ha maua e takatakaiaga mitaki. Ne mau a maua he 1982.

“Nakai ala au ka pō he tupetupe ke he vahā anoiha po ke mate”

Manatu e au he kumi e tau vala tala i loto he tau mekasini Watchtower mo e Awake! * ne tohi ai e tau tala he tau tagata kua kautū he taute e tau hikihikiaga ne manako au ke taute. Ne mafanatia lahi au he tau fakafifitakiaga ha lautolu! Logona hifo e au e malolō ke lali fakalahi mo e nakai fakalolelole. Liogi tumau au ki a Iehova ke ua tiaki au. Ne papatiso au mo Tony ko e Tau Fakamoli a Iehova ia Iulai 1982.

PUHALA NE AOGA KI A AU

Ko e feaki e tuaga kapitiga mo Iehova ko e Atua ne fakahao e moui haaku. Logona foki e au mo Tony e lalagoaga ha Iehova he tau magaaho uka. Ne fakaako a maua ke falanaki ke he Atua he tau magaaho uka, ti logona hifo kua lagomatai mai tumau mo e leveki e ia e magafaoa ha maua.—Salamo 55:22.

Kua fiafia au he lagomatai e tama taane mo e tama fifine ha maua ke iloa a Iehova tuga ne iloa e au. Mogonei, fiafia foki au he kitia e tau fanau ha laua kua moua e iloilo he Atua.

Nakai ala au ka pō he tupetupe ke he vahā anoiha po ke mate. Gahua lahi au mo Tony he fenoga atu ke he tau fakapotopotoaga kehekehe he Tau Fakamoli a Iehova he tau faahi tapu takitaha ke atihake a lautolu. Ne kaufakalataha a maua mo lautolu ke fakaako e falu ka tua a lautolu ki a Iesu, to maeke foki a lautolu ke moua e moui tukulagi.

^ para. 19 Ne taute fakailoa foki he Tau Fakamoli a Iehova.