Skip to content

Skip to table of contents

Tau Fakamoli a Iehova

Fifili e vagahau Faka-Niue

 VALA TALA FAKAAKO 22

Fakaholo ki Mua e Puhala Kumikumi Haau!

Fakaholo ki Mua e Puhala Kumikumi Haau!

“Kia mailoga ai e mutolu e tau mena [“ne mua atu e aoga,” NW].”​—FILIPI 1:10.

LOLOGO 37 Tau Tohiaga Tapu​—Mai he Agaaga he Atua

FAKAMAAMAAGA KŪ *

1. Ko e ha ne liga nakai manako e falu ke kumikumi?

EKETAHA e tau tagata ke gahua malolō he vahā nei ke moua e tupe. Tokologa e matakainaga ha tautolu ne gahua loa ke leveki aki e tau magafaoa ha lautolu. Ha ha i ai falu ne loloa e tau tulā ne o atu mo e liliu ki kaina he tau aho takitaha mai he tau gahuaaga ha lautolu. Tokologa ne leveki a lautolu he taute e tau gahua fakatino. He matahiku he aho, kua mategūgū e tau matakainaga nei ne gahua malolō! Ko e mena fakahiku kua hihiga e tokologa ke taute ko e kumikumi.

2. Magaaho fe kua moua e koe ke kumikumi?

2 Ka e lata mooli a tautolu ke moua e magaaho ke kumikumi fakahokulo ke he Kupu he Atua mo e ke he tau tohi faka-Kerisiano ha tautolu. Fakavē e fakafetuiaga ha tautolu mo Iehova mo e moui tukulagi ki ai! (1 Timo. 4:15) Falu ne uhu matike he tau aho takitaha ke kumikumi ka mamanofua e kaina ti maeke a lautolu ke manamanatu fakamitaki he aala mai he momohe. Falu ne fakatoka e tau magaaho gahoa he matahiku he aho ke fagai fakaagaaga mo e manamanatu fakahokulo ki ai.

3-4. Ko e heigoa e hikihikiaga ne taute ke he tau vala tala kua foaki mai, ti ko e ha?

3 Nakai fakauaua ai kua talitonu a koe na aoga ke moua e magaaho ke kumikumi. Ka ko e heigoa kua lata a tautolu ke kumikumi? ‘Loga lahi mahaki e mena ke totou,’ ka talahau e koe. ‘Uka lahi au ke totou e tau mena oti.’ Falu ne maeke ke fakaaoga katoatoa e tau foakiaga fakaagaaga, ka e tokologa e tau matakainaga ha tautolu ne taufetului ke moua e magaaho ke kumikumi. Mailoga he Kau Fakatufono e mena nei. Kakano ia ati taute e lautolu e fakatonuaga ke fakatote e tau vala tala ne lolomi mo e he initanete.

 4 Ma e fakatai, kua nakai liu lolomi e Yearbook of Jehovah’s Witnesses, ha kua loga e tala mafanatia he jw.org® ti pihia mo e tau polokalama he JW Broadcasting® he tau mahina takitaha. Ko e fufuta ma e fonua he tau mekasini Kolo Toko mo e Awake! kua lomi lagatolu mogonei he tau. Nakai taute e hikihikiaga nei ke lahi e magaaho ha tautolu ke taute falu matagahua. Kua fakatokatoka ai ke maeke a tautolu ke hagaaki fakalahi ke he tau mena “ne mua atu e aoga.” (Filipi 1:10) Kia fakatutala a tautolu ke he puhala ka fakatoka e tau mena ne mua e uho mo e puhala ka aoga katoatoa mai a koe he kumikumi fakatagata ke he Tohi Tapu.

TUKU FAKAMUA E TAU MENA KUA MUA E AOGA

5-6. Ko e heigoa e tau tohi kua lata ke kumikumi fakamatafeiga e tautolu?

5 Ko e heigoa kua putoia foki he tau mena ha tautolu ne mua e aoga? Lata mooli a tautolu ke fakaaoga e magaaho he tau aho takitaha ke kumikumi ke he Kupu he Atua. Ko e loa he vala tala mogonei kua fakatoka ma e totouaga he Tohi Tapu he fakapotopotoaga he tau faahi tapu takitaha, ne fakatote hifo ke lahi e magaaho ke manamanatu fakahokulo ke he mena kua totou e tautolu mo e fakaako fakalahi atu foki. Ko e foliaga ha tautolu ne nakai ko e kumikumi noa ni he vala tala kua kotofa, ka e lata ke fakaatā e fekau he Tohi Tapu ke hokotia ke he tau loto ha tautolu mo e fakatata fakalahi atu a tautolu ki a Iehova.​—Sala. 19:14.

6 Ko e heigoa foki kua lata a tautolu ke kumikumi fakamatafeiga? Manako mooli a tautolu ke tauteute e vala tala ma e Fakaakoaga Kolo Toko mo e Fakaakoaga Tohi Tapu he Fakapotopotoaga ti pihia foki e falu vala tala ma e feleveiaaga he vahā tapu. Lata foki a tautolu ke totou e tau fufuta takitaha he Ko e Kolo Toko mo e Awake!

7. Lata kia a tautolu ke loto lolelole ka nakai maeke ke totou po ke kitekite e tau vala oti ne moua he ha tautolu a faahi kupega hila mo e JW Broadcasting?

7 ‘Mitaki,’ he liga talahau e koe, ‘ka e kua e tau vala oti he ha tautolu a faahi kupega hila he jw.org, ti pihia mo e tau vala ne fakakite he JW Broadcasting? Loga lahi mahaki!’ Manamanatu ke he fakatai: Kehekehe e tau mena kai lolo ne toka he laulau he fale kai. Nakai maeke e tau tagata ne o atu ke kai e tau mena oti ne tuku he laulau. Ti gahoa ni e mena kai ne fifili e lautolu. Pihia foki, ka nakai maeke a koe ke totou e tau mena oti ne haia he matini hila, ua loto lolelole. Totou po ke kitekite e mena kua maeke ia koe. Kia fakatutala a tautolu mogonei ke he mena ne putoia ke he kumikumi mo e puhala ka aoga lahi mai he kumikumi ha tautolu.

KO E GAHUA MOOLI E FAKAAKO!

8. Ko e heigoa e tau lakaaga kua liga taute e koe ka kumikumi ma e fakaakoaga Ko e Kolo Toko, mo e aoga fēfē a koe he taute pihia?

8 Ko e kumikumi ko e hagaaki ke he mena ne totou ke fakaako e taha mena aoga. Nakai ni ko e totou holo he vala tala kua kotofa mo e vate he tau tali. Ka tauteute ma e Fakaakoaga Kolo Toko, ma e fakatai, totou fakamua e fakamaamaaga kū he kamataaga he vala tala. Uaaki, manamanatu ke he mataulu he vala tala, pihia foki e tau vala mataulu mo e tau hūhū liu fakamanatu. Toluaki, totou fakatekiteki e vala tala. Mailoga e uho manatu he alaga kupu he kamataaga he tau paratafa takitaha. Fa fakakite he alaga kupu ia he paratafa ki a koe ke kitia e fakamaamaaga he paratafa. He totou e koe e vala tala, manamanatu ke he puhala kua lalago he tau paratafa takitaha e vala mataulu mo e matutaki ke he matakupu he vala tala katoa. Fakamaumau e tau kupu matakehe mo e tau manatu kua manako a koe ke kumikumi fakalaulahi atu foki.

9. (a) Ko e ha mo e puhala fe kua lata a tautolu ke hagaaki pauaki ke he tau kupu tohi ka fakaako he Ko e Kolo Toko? (e) Ia Iosua 1:8, ko e heigoa kua lata a tautolu ke taute he lafi ke he totouaga he tau kupu tohi?

 9 Ko e Fakaakoaga Kolo Toko ko e fakaako ke he Tohi Tapu. Ko e mena ia, kia hagaaki pauaki ke he tau kupu tohi, mua atu ke he tau kupu tohi ka totou he magaaho ka fakatutala e fakapotopotoaga ke he vala tala. Mailoga pauaki e tau kupu po ke tau talahauaga aoga he tau kupu tohi ne lalago e manatu i loto he paratafa. Mua atu, fakaaoga e magaaho ke manamanatu fakahokulo ke he tau kupu tohi ne totou e koe, mo e manamanatu ke fakagahua ai ke he moui haau.​—Totou Iosua 1:8.

Tau matua, fakaako e tau fanau ke he puhala ke kumikumi (Kikite paratafa 10) *

10. Fakavē ke he Heperu 5:14, ko e ha kua lata e tau matua ke fakaako e tau fanau ha lautolu he magaaho tapuakiaga he magafaoa ke he puhala ke fakaako mo e taute e kumikumiaga?

10 Maama ai, manako e tau matua ke moua he tau fanau e fiafia he magaaho Tapuakiaga he Magafaoa he tau faahi tapu takitaha. Pete he lata tumau e tau matua ke fakatoka pauaki taha mena ke taute he tapuakiaga he magafaoa, nakai lata a laua ke manatu hifo kua lata ke taute taha matagahua pauaki he tau faahi tapu takitaha. Maeke he magaaho Tapuakiaga he Magafaoa ke kitekite e polokalama he JW Broadcasting he tau mahina takitaha po ke gahua he falu magaaho ke he taha matagahua pauaki, tuga e fakatūtū e vaka ha Noa, aoga lahi foki ma e tau fanau ke fakaako e puhala ke kumikumi. Lata a lautolu ke iloa e puhala ke tauteute ma e tau feleveiaaga mo e puhala ke kumikumi e matalekua ne tupu he aoga. (Totou Heperu 5:14.) Ka fakaaoga e lautolu e taha magaaho ke kumikumi ke he tau matakupu he Tohi Tapu i kaina, to mukamuka lahi a lautolu ke fanogonogo ke he vala tala ne taute he tau feleveiaaga, tau toloaga, mo e tau fonoaga ne nakai fa kitekite tumau ke he vitiō. Ko e loa he tau magaaho kumikumi takitaha kua fakavē ke he tau tau he moui mo e aga he tau fanau.

11. Ko e ha kua aoga ki a tautolu ke fakaako e tau tagata fakaako Tohi Tapu ke iloa ne lautolu e puhala ke kumikumi fakahokulo?

11 Lata foki e tau tagata fakaako Tohi Tapu ha tautolu ke iloa e puhala ke kumikumi. Ka foou a lautolu, fiafia a tautolu ke kitia ka vate e tau tali ha lautolu he tauteute ma e fakaako Tohi Tapu po ke tau feleveiaaga he fakapotopotoaga. Ka e lata a tautolu ke fakaako e tau tagata fakaako Tohi Tapu ha tautolu ke he puhala ke taute e kumikumiaga mo e puhala ke taute ni e lautolu e kumikumiaga fai kakano mooli. He puhala ia, ka tutupu e tau lekua, he nakai mafiti ke fuluhi ke he falu he fakapotopotoaga ma e lagomatai, to iloa e lautolu e puhala  ke moua e lautolu e fakatonuaga kua aoga he kumikumi ke he tau tohi ha tautolu.

FAI FOLIAGA HE FAKAAKO

12. Ko e heigoa e tau foliaga ka ha ha ia tautolu he magaaho ka kumikumi a tautolu?

12 Ka nakai ko e tagata fiafia a koe he fakaako, to nakai manatu a koe na maeke ke moua e fiafia he kumikumi. Ka e maeke ia koe. Kamata aki e tau magaaho kukū, ti fakalahi fakahaga e tau magaaho kumikumi haau. Tokaloto e foliaga. Ko e foliaga pauaki ha tautolu ke fakatata fakalahi atu ki a Iehova. Ko e foliaga mafiti lahi ne liga ke tali e hūhū he taha tagata ne hūhū mai po ke taute e kumikumi ke he matalekua ne fehagai mo tautolu.

13. (a) Fakamaama e tau lakaaga ka taute he tama ke talahau e taofiaga haana he aoga. (e) Fakagahua fēfē e koe e fakatonuaga i loto he Kolose 4:6?

13 Tuga e fakatai, ko koe kia ko e tama fano aoga? Liga talitonu oti e tau kapitiga he poko aoga haau ke he fakaakoaga he tupumainoa. Manako a koe ke fakamaama e fakaakoaga he Tohi Tapu ka e nakai maeke ke taute pihia. Lata a koe mogoia ke taute e kumikumiaga ke he matakupu ia! Maeke ke ua e kakano he foliaga haau: (1) ke fakamalolō e tua haau na tufuga he Atua e tau mena oti kana mo e (2) ke fakaholo ki mua e lotomatala haau ke fakamaama e kupu mooli. (Roma 1:20; 1 Pete. 3:15) Liga hūhū hifo fakamua a koe, ‘Ko e ha ne talahau he tau kapitiga he poko aoga haaku kua talitonu a lautolu ke he tupumainoa?’ Ti fakaaoga mogoia e tau tohi ha tautolu ke kumikumi fakamatafeiga ki ai. Ko e fakamaama e taofiaga haau ne liga nakai ko e mena uka lahi tuga he manatu e koe. Laulahi he tau tagata ne talitonu ke he tupumainoa ha kua fai tagata lotomatala ne tala age ki a lautolu kua mooli e mena ia. Ka moua e koe taha po ke ua e manatu ke tala age, liga to makona e tali ka foaki e koe ke he tagata loto fakamooli ne hūhū.​—Totou Kolose 4:6.

FEAKI E FIAFIA HAAU

14-16. (a) Liga iloa mitaki fēfē e koe e tohi he Tohi Tapu ne nakai mahani lahi a koe ki ai? (e) He fakaaoga e tau kupu tohi, fakamaama e puhala ka moua e koe e falu vala tala foki he tohi a Amosa. (Kikite foki e puha “ Taute e Tohi Tapu ke Mooli!”)

14 Manamanatu la kua fakatoka e feleveiaaga ha tautolu he mogo i mua ke kumikumi e tau tohiaga he taha he tau perofeta ikiiki, liga ko e taha ne nakai mahani lahi a koe ki ai. Ko e lakaaga fakamua ka taute, ko e feaki e fiafia ke he mena ne tohia he perofeta ia. Liga taute fēfē e koe e mena ia?

15 Fakamua, hūhū hifo: ‘Ko e heigoa kua iloa e au hagaao ke he tagata tohia he tohi? Ko hai a ia, nofo a ia i fe, ko e heigoa e gahua haana?’ Ko e feakiaga he tagata tohia ne liga fakamaama foki e fifiliaga haana ke he tau kupu po ke tau vahega fakatai ne fakaaoga e ia. He totou e koe e Tohi Tapu, kumi e tau talahauaga ne fakakite e aga he tagata tohia.

16 Matutaki atu, lagomatai ai ki a koe ke iloa e magaaho ne tohia e tohi. Mukamuka a koe ke taute ai he fakakia e “Table of the Books of the Bible” i tua he New World Translation of the Holy Scriptures. Lafi ki ai, maeke a koe ke onoono ke he Appendix A6 hagaao ke he tau perofeta mo e tau patuiki. Kaeke kua kumikumi a koe ke he tohi he tau perofetaaga he Tohi Tapu, mitaki ka iloa e koe e tau tuaga he magahala ia ne tohia ai. Ko e heigoa e tau aga po ke tau mahani kelea he tau tagata ne amanaki e perofeta ke fakatonu? Ko hai foki ne momoui he magahala ia? Ke moua e maamaaga katoa, maeke a koe ke onoono ke he falu tohi he Tohi Tapu. Ma e fakatai, ke maama fakalaulahi e mena ne tupu he mogo ne moui e perofeta ko Amosa, aoga ki a koe ka totou e tau kupu ia 2 Tau Patuiki mo e 2 Nofoaga he  Tau Patuiki ne fakamau he tau kupu tohi he faahi he Amosa 1:1 he New World Translation of the Holy Scriptures. Lafi ki ai, maeke a koe ke liu totou e tau tohiaga ha Hosea, ko ia ne liga moui he magahala ha Amosa. Ko e tau vala tala oti nei to lagomatai ke maama mitaki e magahala ne moui a Amosa.​—2 Patu. 14:25-28; 2 Nofo. 26:1-15; Hosea 1:1-11; Amosa 1:1.

HAGAAKI KE HE TAU VALA TALA FAKAMATAFEIGA

17-18. He fakaaoga e tau fakataiaga he tau paratafa po ke fakataiaga haau ni, talahau e puhala he hagaaki ke he tau vala tala ne tuga na ikiiki ka taute e kumikumiaga haau ke he Tohi Tapu ke fiafia.

17 Mitaki ke totou e Tohi Tapu mo e manako lahi ke fakaako fakalahi atu foki. Manamanatu ke he fakatai, kua totou a koe ke he veveheaga 12 he perofetaaga a Sakaria ne talahau tuai e mate he Mesia. (Saka. 12:10) Ka hoko a koe ke he kupu 12, to totou e koe “ko e magafaoa he ohi a Natano” kua maanu lahi mahaki ke he mate he Mesia. He nakai totou holo noa ni e vala tala ia, fakamanou a koe ti hūhū hifo: ‘Ko e heigoa e matutakiaga he magafaoa ha Natano ke he Mesia? Fai puhala foki nakai ke moua falu vala tala?’ Taute e koe e matagahua “titeketivi.” Ko e tau kupu tohi he faahi ne takitaki a koe ke he 2 Samuela 5:13, 14, ti iloa e koe ko Natano ko e taha he tau tama taane he Patuiki ko Tavita. Ko e kupu tohi he faahi ke uaaki ia Luka 3:23, 31, ne fakakite ko Iesu ne tupu mai he magafaoa ha Natano ia Maria. (Kikite “Joseph, son of Heli,” vala fakaako ia Luka 3:23.) Ofoofogia mooli a koe! Iloa e koe kua talahau tuai to tupu mai a Iesu he magafaoa a Tavita. (Mata. 22:42) Ka e molea e toko 20 e tama taane ha Tavita. Nakai kia ofo ai kua fakakite e Sakaria ko e magafaoa ha Natano ne maanu lahi he mate a Iesu?

 18 Manamanatu ke he taha fakataiaga foki. He veveheaga fakamua ia Luka, totou e tautolu na fina atu e agelu ko Kaperielu ki a Maria ti tala age ko e tama taane ka fanau e ia: “To homo a ia, to talahaua a ia ko e Tama hana ne Mua ue atu; to foaki atu he Iki ko e Atua kia ia e nofoaiki a Tavita hana matua; To eke a ia mo Patuiki he faoa a Iakopo tukulagi.” (Luka 1:32, 33) Liga hihiga a tautolu ke hagaaki ke he vala fakamua he fekau ha Kaperielu, to fakahigoa a Iesu ko e “Tama hana ne Mua ue atu.” Ka e fakailoa foki e Kaperielu to eke a Iesu “mo Patuiki.” Ti manamanatu a tautolu ke he kakano he tau kupu ia ha Kaperielu ki a Maria. Manatu kia a Maria kua kakano e tau kupu ha Kaperielu to hukui e Iesu e Patuiki ko Herota po ke taha he tau tagata ke eke mo pule i Isaraela? Ka patuiki a Iesu, to eke a Maria mo matua fifine patuiki mo e to nonofo e magafaoa haana he fale patuiki. Ka e nakai fai fakamauaga na vagahau pihia a Maria ki a Kaperielu; po ke nakai totou e tautolu na ole a Maria ma e kotofaaga he Kautu, tuga ne taute he tau tutaki tokoua ha Iesu. (Mata. 20:20-23) Fakamalolō he vala tala nei e onoonoaga ha tautolu ki a Maria ko e fifine ne mua e mahani fakatokolalo!

19-20. He fakamaama he Iakopo 1:22-25 mo e 4:8, ko e heigoa e tau foliaga ha tautolu ka taute e kumikumiaga?

19 Kia manatu ko e foliaga pauaki ha tautolu he fakaako e Kupu he Atua mo e tau tohi faka-Kerisiano ke fakatata fakalahi ki a Iehova. Manako foki a tautolu ke kitia mitaki “po ke fefe” a tautolu ti taute e tau hikiaga kua lata ke fakafiafia e Atua. (Totou Iakopo 1:22-25; 4:8.) He kamataaga he tau magaaho fakaako takitaha, lata a tautolu ke ole ki a Iehova ma e agaaga haana. Lata a tautolu ke olelalo ki a ia ke lagomatai a tautolu ke aoga katoatoa mai he tau tohi mo e kitia e tautolu a tautolu tuga he kitia e ia a tautolu.

20 Kia igatia a tautolu oti ke tuga e tagata he Atua ne fakamaama he salamo: “Ko e fakatufono a Iehova kua fiafia ai a ia, ti manamanatu a ia ke he tau fakatufono hana ke he aho katoa mo e po. . . . To monuina foki a ia ke he tau mena oti kana ke eke e ia.”​—Sala. 1:2, 3.

LOLOGO 11 Fakafiafia e Loto ha Iehova

^ para. 5 Loga e tau foakiaga ne tuku mai e Iehova ki a tautolu ke kitekite, totou, mo e kumikumi. Ko e vala tala nei to lagomatai a koe ke fifili e mena ke kumikumi, ti foaki e tau lagomataiaga ke aoga mai he kumikumiaga haau.

^ para. 61 FAKAMAAMA E FAKATINO: Fakakite he tau matua ke he tau fanau e puhala ke tauteute ma e Fakaakoaga Kolo Toko he tau faahi tapu takitaha.

^ para. 63 FAKAMAAMA E FAKATINO: Matakainaga ne kumikumi ke he tagata tohia he Tohi Tapu ko Amosa. Ko e tau fakatino i tua ne fakakite e mena ne kitia ke he manamanatuaga he matakainaga he totou e ia e tau tala he Tohi Tapu mo e manamanatu fakahokulo ki ai.