Skip to content

Skip to table of contents

Tau Fakamoli a Iehova

Fifili e vagahau Faka-Niue

 VALA TALA FAKAAKO 10

Lekua He Ha ke Nakai Papatiso Au?

Lekua He Ha ke Nakai Papatiso Au?

“Fakatau o hifo ai a laua ke he vai, ko Filipo mo e eunuka; kua papatiso foki e ia a ia.”​—GAHUA 8:38.

LOLOGO 7 Tukuleleaga Kerisiano

FAKAMAAMAAGA KŪ *

1. Ko e heigoa ha Atamu mo Eva ne galo, mo e ko e heigoa e fua?

KO HAI he manatu e koe kua lata ke fakatoka e tau tuaga he tau mena mitaki mo e kelea? Magaaho ne kai e Atamu mo e Eva e fua he akau ke iloa ai e mitaki mo e kelea, kua fakakite fakamaaliali e laua: Nakai falanaki a laua ki a Iehova mo e tau tuaga haana. Fifili ni a laua ke fakatoka e tau tuaga ha laua ke he mitaki mo e kelea. (Kene. 3:22) Ka e onoono la ke he tau mena ne galo e laua. Galo ia laua e tuaga kapitiga mo Iehova. Galo foki ia laua e moui tukulagi, ti fakaholo age e agahala mo e mate ke he tau fanau ha laua. (Roma 5:12) Ko e fifiliaga ha Atamu mo Eva ne takitaki ke he matematekelea.

Mole e talia he eunuka Aitiope a Iesu, manako a ia ke papatiso mafiti (Kikite paratafa 2-3)

2-3. (a) Ko e heigoa ne taute he eunuka Aitiope he magaaho ne fakamatala a Filipo ki a ia? (e) Ko e heigoa e tau monuina ka moua e tautolu he papatiso, mo e ko e heigoa e tau hūhū ka fakatutala a tautolu ki ai?

2 Fakatatai e mahani ha Atamu mo Eva mo e puhala ne tali atu e eunuka Aitiope he fakamatala a Filipo ki a ia. Loto fakaaue lahi e eunuka ke he mena ne taute e Iehova mo Iesu ma haana ati papatiso agataha a ia. (Gahua 8:34-38) Magaaho ne tukulele a tautolu ke he Atua ti papatiso, tuga e eunuka, kua fakakite fakamaaliali e tautolu e tuaga. Fakakite e tautolu e loto fakaaue ke he tau mena ne taute e Iehova mo Iesu ma tautolu. Fakakite foki e tautolu e falanaki ki a Iehova mo e mailoga ko ia kua lata ke fakatoka e tuaga he mitaki mo e kelea.

3 Manamanatu ke he tau monuina kua moua e tautolu he fekafekau ki a Iehova! Taha mena, ha ha ia tautolu e amaamanakiaga ke moua e tau mena oti ne galo e Atamu mo Eva, putoia e moui tukulagi. Ha ko e tua ha tautolu ki a Iesu Keriso,  kua fakamagalo e Iehova e tau hepehepe ha tautolu mo e foaki mai e manamanatuaga meā. (Mata. 20:28; Gahua 10:43) Eke foki a tautolu mo vala he magafaoa ha Iehova he tau fekafekau ne kua talia mo e amanaki ke he vahā mitaki anoiha. (Ioane 10:14-16; Roma 8:20, 21) Pete e tau tuaga mitaki ia, ko e falu tagata ne iloa a Iehova kua fakauaua ke muitua e fakafifitakiaga he eunuka Aitiope. Ko e heigoa ati taofi a lautolu ke papatiso? Ti kautū fēfē a lautolu ke he tau paleko ia?

TAU PALEKO NE TAOFI E FALU KE PAPATISO

Tau paleko ne fehagai he falu ato fifili ke papatiso

Nakai Lahi e Mauokafua (Kikite paratafa 4-5) *

4-5. Ko e heigoa e tau paleko ne fehagai mo e fuata taane ko Avery mo e fuata fifine ko Hannah?

4 Nakai lahi e mauokafua. Ko e tau matua ha Avery ko e Tau Fakamoli a Iehova. Ne iloa lahi e matua taane haana ko e matua fakaalofa mo e motua mitaki. Ka kua taofi mai a Avery he papatiso. Ko e ha? “Nakai manatu au to maeke ia au ke mitaki tuga e matua taane haaku,” he talahau e ia. Nakai mauokafua lahi foki a Avery na maeke nakai a ia ke taute e tau kotofaaga ka age ki a ia he vahā i mua. “Tupetupe au neke ole ki a au ke liogi he toloaga, ke taute e tau lauga, po ke takitaki e matakau ke he gahua he fonua.”

5 Ko Hannah ne 18 e tau he moui ne lauia kelea he nakai lahi e mauokafua. Feaki hake a ia he tau matua ne fekafekau ki a Iehova. Pete ia, fakauaua a ia ko e maeke nakai ke muitua ke he tau tuaga ha Iehova. Ko e ha? Feaki e Hannah e manamanatuaga fakateaga lahi hagaao ki a ia. Falu magaaho ne kelea lahi e logonaaga haana ti fakamamahi pauaki e ia a ia, ka e au atu ni e kelea he tuaga. “Nakai tala age e au ke he ha tagata e mena ne taute e au, ai tala age foki e au ke he tau matua haaku,” he ui e ia, “ti manatu au kua nakai manako a Iehova ki a au ha ko e mena haaku ne taute ki a au ni.”

Fakaohooho he Kapitiga (Kikite paratafa 6) *

6. Ko e heigoa ne taofi a Vanessa mai he papatiso?

6 Fakaohooho he tau kapitiga. Ko Vanessa ne 22 e tau he moui, ne pehē, “Taha e kapitiga uho haaku ne teitei hogofulu e tau he iloa e au.” Ka e nakai lagomatai he kapitiga ia a Vanessa ke hokotia ke he foliaga ha Vanessa ke papatiso. Momoko a Vanessa he mena nei ti pehē a ia, “Uka au ke moua e tau kapitiga, mo e tupetupe neke fakaoti e au e fakafetuiaga ia haaku ti nakai liu foki au ke fai kapitiga uho.”

Matakutaku he Mahala (Kikite paratafa 7) *

7. Ko e heigoa ne matakutaku e fuata fifine ko Makayla ki ai, ti ko e ha?

7 Matakutaku he mahala. Ko Makayla ne lima e tau he moui he magaaho ne tuku ki tua e tugaane haana. He lahi hake, ne kitia e ia e puhala kua lauia ai e tau matua ha ko e tau gahua he tugaane haana. “Matakutaku au ke papatiso,” he ui e Makayla, “neke taute e au e mena hepe mo e tuku ki tua, to au atu e momoko he tau matua haaku.”

Matakutaku he Totokoaga (Kikite paratafa 8) *

8. Ko e heigoa he fuata taane ko Miles ne matakutaku ki ai?

 8 Matakutaku he totokoaga. Ko e matua taane ha Miles mo e stepmother ne fekafekau ki a Iehova, ka e nakai ko e Fakamoli e matua fifine fanau haana. “Ne nofo au mo e matua fifine haaku ke 18 e tau,” he ui e Miles, “ka e matakutaku au ke tala age ki a ia kua manako au ke papatiso. Kitia e au e puhala ne fehagai a ia ke he matua taane haaku he eke a ia mo Fakamoli. Matakutaku au neke fakatupu lekua a ia ki a au.”

MAEKE FĒFĒ A KOE KE KAUTŪ MAI HE TAU PALEKO?

9. Ko e heigoa ka tupu he mogo ka fakaako e koe kua fakaalofa mo e fakauka mooli a Iehova?

9 Fifili a Atamu mo Eva ke nakai fekafekau ki a Iehova ha kua kaumahala a laua ke feaki e fakaalofa lahi ki a Ia. Ka e fakaatā e Iehova a laua ke momoui loa ke fanafanau e tau tama mo e fakatoka ni e laua e tau puhala ke feaki e tau fanau ia. Ko e fua he fifiliaga ha Atamu mo Eva ke tutū kehe mai ia Iehova ne nakai leva ti kitia maali e goagoa ha laua. Ne tamate he tama taane uluaki ha laua e tehina haana, ti fai magaaho he mole ne tupu lahi e mahani vale mo e lotokai he magafaoa he tagata. (Kene. 4:8; 6:11-13) Ka e fai puhala a Iehova ke fakahao e tau fanau oti ha Atamu mo Eva kua manako ke fekafekau ki a Ia. (Ioane 6:38-40, 57, 58) He fakaako fakalahi atu a koe ke he fakauka mo e fakaalofa ha Iehova, to liga tupu e fakaalofa haau ki a ia. To manako a koe ke tiaki e puhala ne fifili e Atamu mo Eva ka e tukulele e moui haau ki a Iehova.

Puhala ke kautū a koe he tau paleko nei

(Kikite paratafa 9-10) *

10. Ko e ha e manamanatu fakahokulo ke he Salamo 19:7 ka lagomatai a koe ke fekafekau ki a Iehova?

10 Matutaki ke fakaako hagaao ki a Iehova. Ka lahi e fakaako haau hagaao ki a Iehova, to lahi foki e mauokafua haau kua maeke a koe ke kautū he fekafekau ki a ia. Ko Avery ne totoku he kamataaga, ne pehē: “Moua e au e mauokafua he totou mo e manamanatu fakahokulo ke he maveheaga ia Salamo 19:7.” (Totou.) Magaaho ne kitia e Avery e mooli he talahauaga ia, ne tupu lahi e fakaalofa haana ki a Iehova. Kua atihake he fakaalofa e mauokafua ti lagomatai foki a tautolu ke hagaaki ki a Iehova mo e tau mena ne manako a ia ki ai. Ko Hannah ne totoku he kamataaga,  ne pehē: “He totou e au e Tohi Tapu mo e fakaako ki ai, ne mailoga e au ka fakamamahi e au a au ni, kua fakamamahi foki e au a Iehova.” (1 Pete. 5:7) Kua eke a Hannah mo “tagata omaoma ke he kupu” he Atua. (Iako. 1:22) Ti ko e heigoa e fua? Pehē a ia: “He kitia e au e aoga ke omaoma ki a Iehova, ne feaki e au e fakaalofa lahi ki a ia. Iloa mooli e au mogonei to takitaki tumau e Iehova au ka manako ke he lagomatai haana.” Ti kautū a Hannah ke nakai fakamamahi e ia a ia. Kua tukulele e ia e moui haana ki a Iehova ti papatiso.

(Kikite paratafa 11) *

11. Ko e heigoa ne taute e Vanessa ke moua e tau kapitiga mitaki, ti ko e heigoa ne fakaako e tautolu mai he mena nei?

11 Fifili fakailoilo e tau kapitiga haau. Ko Vanessa ne totoku he kamataaga ne fakahiku ke mailoga ko e kapitiga haana kua taofi a ia mai he fekafekau ki a Iehova. Ti fakaoti e ia e kapitiga ha laua. Ka e fai mena foki ne taute e Vanessa. Eketaha a ia ke moua e tau kapitiga foou i loto he fakapotopotoaga. Pehē a ia ko e fakafifitakiaga ha Noa mo e magafaoa haana ne lagomatai lahi. “Ne viko takai a lautolu he tau tagata ne nakai fakaalofa ki a Iehova,” pehē a ia, “na ha ha ia lautolu e feoakiaga mitaki ko e taha ke he taha.” Mole e papatiso ha Vanessa ti paionia. Pehē a ia mogonei, “Lagomatai he mena nei au ke moua e tau kapitiga mitaki he fakapotopotoaga haaku mo e falu fakapotopotoaga foki.” Maeke foki a koe ke moua e tau kapitiga mitaki he taute e gahua ne kotofa e Iehova ki a tautolu.​—Mata. 24:14.

(Kikite paratafa 12-15) *

12. Ko e matakutaku fe ne nakai ha ha ia Atamu mo Eva, ti ko e heigoa ne tupu ki a laua?

12 Moua e onoonoaga lagotatai he matakutaku. Ha ha i ai e tau matakutaku kua mitaki ma tautolu. Ma e fakatai, lata a tautolu ke moua e matakutaku kua fakafiafia a Iehova. (Sala. 111:10) Ane mai feaki e Atamu mo Eva e matakutaku pihia, to nakai totoko e laua a Iehova. Ka kua totoko a laua. He taute pihia, ne fakaala e tau mata ha laua mo e mailoga katoatoa kua agahala tuai a laua. Fakaholo age mogoia e laua e agahala mo e mate ke he tau fanau ha laua. Ha kua maeke ke kitia po ke maama e tuaga, ne mā a laua ha kua nakai fai felevehi ti fakatapulu ai a laua.​—Kene. 3:7, 21.

13-14. (a) Lagotatai mo e 1 Peteru 3:21, ko e ha ne nakai lata a tautolu ke matakutaku lahi he mate? (e) Ko e heigoa e tau kakano ati fakaalofa a tautolu ki a Iehova?

 13 He lata a tautolu ke matakutaku ki a Iehova, nakai manako a tautolu ke matakutaku lahi he mate. Fakatoka e Iehova e puhala ma tautolu ke moua e moui tukulagi. Ka agahala ti tokihala mooli a tautolu, to fakamagalo e Iehova e tau hepehepe ha tautolu. To fakamagalo e ia ha ko e tua ha tautolu ke he poa lukutoto he Tama haana. Ko e puhala aoga lahi kua fakakite e tautolu e tua he tukulele e tau momoui ha tautolu ke he Atua ti papatiso.​—Totou 1 Peteru 3:21.

14 Loga e kakano ke fakaalofa a tautolu ki a Iehova. Nakai ni foaki e ia e tau mena mitaki ke fiafia a tautolu he tau aho takitaha ka e fakaako foki e ia a tautolu ke he kupu mooli hagaao ki a ia mo e tau finagalo haana. (Ioane 8:31, 32) Foaki mai e ia e fakapotopotoaga Kerisiano ke takitaki mo e lalago a tautolu. Lagomatai e ia a tautolu ke hahamo e tau kavega mogonei, ti foaki mai e ia e amaamanakiaga ke moui tukulagi he tau tuaga mitaki katoatoa he vahā anoiha. (Sala. 68:19; Fakakite. 21:3, 4) Ka manamanatu fakahokulo a tautolu ke he lahi he mena ne taute e Iehova ke fakakite e fakaalofa haana ki a tautolu, kua futia a tautolu ke fakaalofa ki a ia. Ka fakaalofa a tautolu ki a Iehova to moua e tautolu e matakutaku hako. Matakutaku a tautolu neke fakahukia a Ia kua fakaalofa lahi mahaki a tautolu ki ai.

15. Kautū fēfē a Makayla ke he matakutaku he mahala?

15 Ko Makayla ne totoku he kamataaga ne kautū ke he matakutaku he mahala kua maama e fakamagaloaga ha Iehova. “Mailoga e au kua nakai mitaki katoatoa oti a tautolu mo e to taute e tau hepehepe. Ka e maama foki e au kua fakaalofa mo e to fakamagalo e Iehova a tautolu fakavē ke he lukutoto.” Ko e fakaalofa haana ki a Iehova kua fakalagalaga ke tukulele haana moui ki a Ia ti papatiso.

(Kikite paratafa 16) *

16. Lagomatai fēfē a Miles ke kautū he matakutaku haana ke he totokoaga?

16 Ko Miles ne matakutaku to totoko he matua fifine e fifiliaga haana ke papatiso ne kumi lagomatai ke he leveki takaiaga. “Tupu hake foki a ia he kaina ne kehekehe e tua,” he talahau e Miles. “Lagomatai e ia au ke manamanatu ke he mena ka talahau e au ke mailoga he matua fifine haaku ko e fifiliaga ni haaku ke papatiso ka e nakai peehi he matua taane haaku au ke papatiso.” Nakai fiafia e matua fifine ha Miles ke he fifiliaga haana. Fakahiku ai, pipiki ni a Miles ke he fifiliaga haana ti fano kehe he kaina he matua fifine. “He fakaako ke he tau mena mitaki ne taute e Iehova ma haaku kua aamotia e loto haaku,” he talahau e ia. “He manamanatu fakahokulo au ke he poa lukutoto ha Iesu, mailoga e au e lahi mahaki he fakaalofa ha Iehova ki a au. Ko e manatu ia ne omoi au ke tukulele ki a Iehova ti papatiso.”

 PIPIKI MAU KE HE FIFILIAGA HAAU

Fakakite e loto fakaaue ha tautolu ke he tau mena ne taute he Atua (Kikite paratafa 17)

17. Ko e heigoa e magaaho kua moua e tautolu oti?

17 He kai e Eva e fua he akau i Etena, ne fakaheu e ia e Matua haana. He fakalataha a Atamu mo ia, ne fakakite kua fakateaga e loto fakaaue haana ke he tau mena mitaki oti ne taute e Iehova ke lata mo ia. Ha ha ia tautolu oti e magaaho ke fakakite kua nakai talia e tautolu e fifiliaga ne taute e Atamu mo Eva. He papatiso, fakakite e tautolu ki a Iehova kua talitonu a tautolu na ha ha ia Ia e pule ke fakatoka e tau poakiaga he mena kua hako mo e mena kua hepe ma tautolu. Fakakite e tautolu kua fakaalofa ke he Matua mo e falanaki ki a Ia.

18. Maeke fēfē a koe ke kautū he fekafekau ki a Iehova?

18 Ko e paleko ne fehagai mo tautolu he mole e papatisoaga ko e momoui fakatatau he tau aho takitaha ke he tau puhala ha Iehova, ka e nakai ke he ha tautolu. Totou miliona e tau tagata ne momoui ke he puhala ia he tau tau takitaha. Maeke a koe ke pihia kaeke ke matutaki ke fakahokulo e maamaaga haau ke he Kupu he Atua ko e Tohi Tapu; fakalataha tumau mo e tau matakainaga haau; mo e fakamakutu he tala age ke he falu e tau mena ne fakaako e koe hagaao ke he Matua fakaalofa haau. (Hepe. 10:24, 25) Ka taute e koe e tau fifiliaga, fanogonogo ke he fakatonuaga ne foaki e Iehova mai he Kupu mo e fakatokatokaaga haana. (Isaia 30:21) Ti ko e tau mena oti ne taute e koe to kautū.​—Fakatai 16:3, 20.

19. Ko e heigoa haau kua lata ke matutaki ke mailoga, ti ko e ha?

19 Ka matutaki a koe ke mailoga e aoga lahi haau mai he takitakiaga ha Iehova, to tupu e fakaalofa haau ki a ia mo e tau puhala haana. To nakai fai mena a Satani ke foaki ki a koe ke taofi a koe he fekafekau ki a Iehova. Manamanatu ki a koe he tau afe tau i mua. To liu a koe ke ono ki tua ke he fifiliaga haau ke papatiso ko e fifiliaga mitaki lahi mahaki ne taute e koe!

LOLOGO 27 Kau mo Iehova!

^ para. 5 Ko e fifiliaga ne mua atu ka taute e koe ke papatiso po ke nakai papatiso. Ko e ha ne aoga lahi e fifiliaga ia? To tali he vala tala nei e hūhū ia. To lagomatai foki a lautolu hane manamanatu ke papatiso ke kautū mai he tau paleko ne liga taofi a lautolu.

^ para. 56 FAKAMAAMA E FAKATINO: Mauokafua: Hopoate e fuata taane he tali.

^ para. 58 FAKAMAAMA E FAKATINO: Tau Kapitiga: Fuata Fakamoli mo e kapitiga ne nakai fakaohooho mitaki kua mā he kitia e tau matakainaga.

^ para. 60 FAKAMAAMA E FAKATINO: Mahala: He tuku ki tua e tugaane ti fano kehe he kaina, ne tupetupe e tama fifine neke mahala foki a ia.

^ para. 62 FAKAMAAMA E FAKATINO: Totokoaga: Hopoate e tama taane he liogi ka e onoono atu e matua fifine nakai tua haana.

^ para. 65 FAKAMAAMA E FAKATINO: Mauokafua: Fakalahi he fuata taane e fakaako fakatagata haana.

^ para. 67 FAKAMAAMA E FAKATINO: Tau Kapitiga: Fakaako e fuata Fakamoli ke matalahi he eke mo Fakamoli.

^ para. 69 FAKAMAAMA E FAKATINO: Mahala: Eke he fuata fifine e kupu mooli ma haana ti papatiso.

^ para. 71 FAKAMAAMA E FAKATINO: Totokoaga: Fakamaama mauokafua he tama taane e tau taofiaga haana ke he matua nakai tua.