Skip to content

Skip to table of contents

Tau Fakamoli a Iehova

Fifili e vagahau Faka-Niue

 VALA TALA FAKAAKO 24

Ulu ki Lalo e Tau Manatu ne Totoko ke he Iloilo he Atua!

Ulu ki Lalo e Tau Manatu ne Totoko ke he Iloilo he Atua!

“Kua ulu ki lalo e tau mahalohaloaga, mo e tau mena fakatokoluga oti kua hemu ke he maama ke he kupu he Atua.”​—2 KORI. 10:5.

LOLOGO 18 Fakaalofa Fakamooli he Atua

FAKAMAAMAAGA KŪ *

1. Ko e heigoa e hatakiaga ne tohi he aposetolo ko Paulo ke he tau Kerisiano fakauku?

“AUA,” he hataki he aposetolo ko Paulo. Aua neke taute e heigoa? “Aua neke mahani foki a mutolu fakalataha mo e lalolagi nai.” (Roma 12:2) Tohi e Paulo e tau kupu ia ke he tau Kerisiano he senetenari fakamua. Ko e ha ne foaki e ia e hatakiaga malolō pihia ke he tau tagata taane mo e tau fifine ne kua fakatapu ke he Atua mo e fakauku he agaaga tapu?​—Roma 1:7.

2-3. Lali fēfē a Satani ke fuluhi kehe a tautolu mai ia Iehova, ka e maeke fēfē a tautolu ke utakehe e ‘tau kolo malolō’ he tau manatu ha tautolu?

2 Tupetupe a Paulo ha ko e falu Kerisiano ne kua fakaohooho he tau mahalohaloaga mo e tau pulotu nakai tonu ne fakaholo ki mua he lalolagi ha Satani. (Efeso 4:17-19) Maeke e mena ia ke tupu ki a tautolu oti. He lali fakalahi ke fuluhi kehe a tautolu mai ia Iehova, ko Satani e atua he lalolagi nei ne fakaaoga e tau lagatau kehekehe. Taha he tau lagatau ia ko e fakaohooho e manako ha tautolu ke foli lotokai po ke talahaua fakatagata. Liga fakaaoga foki e ia falu vala he ha tautolu a feakiaga, aga fakamotu, po ke fakaakoaga ke hiki a tautolu ke he puhala manamanatu haana.

3 Maeke nakai a tautolu ke utakehe e ‘tau kolo malolō’ he tau manatu ha tautolu? (2 Kori. 10:4) Mailoga e tali ha  Paulo: “Kua ulu ki lalo e tau mahalohaloaga, mo e tau mena fakatokoluga oti kua hemu ke he maama ke he kupu he Atua, kia mahala e tau manatu oti ke omaoma kia Keriso.” (2 Kori. 10:5) Ē, ko e lagomataiaga ha Iehova kua maeke a tautolu ke utakehe e tau manatu hehē. Tuga ni e tegavai ne utakehe e tau lauiaaga kelea he kona, maeke he Kupu he Atua ke lagomatai a tautolu ke utakehe e tau lauiaaga kelea he kona he lalolagi ha Satani.

“LIU FOKI FAKAFOU HE TAU LOTO HA MUTOLU”

4. Ko e heigoa e tau hikiaga ne taute he tokologa ia tautolu he mogo ne talia fakamua e kupu mooli?

4 Liu ke manamanatu ke he tau hikiaga ne lata a koe ke taute he talia fakamua e koe e kupu mooli he Tohi Tapu mo e fifili ke fekafekau ki a Iehova. Tokologa ia tautolu ne toka kehe katoatoa e falu mahani kua nakai hako. (1 Kori. 6:9-11) Loto fakaaue mooli a tautolu ma e lagomatai ha Iehova ke kautū mai he tau matagahua agahala pihia!

5. Ko e heigoa e tau mena ua ne fakamaama ia Roma 12:2?

5 Ka e nakai lata a tautolu ke fakateaga. Pete kua nakai liu a tautolu ke taute e tau agahala kelea lahi ne taute e tautolu fakamua ato papatiso, lata agaia a tautolu ke mataala ke nakai taute ha mena ka kamatamata a tautolu ke liliu ke he tau mahani tuai ia. Taute fēfē e tautolu e mena ia? Tali e Paulo: “Aua neke mahani foki a mutolu fakalataha mo e lalolagi nai, ka kia faliu a mutolu ke he liu foki fakafou he tau loto ha mutolu.” (Roma 12:2) Ti ua e mena kua lata ke taute e tautolu. Fakamua, lata a tautolu ke “aua neke mahani,” po ke fakahakohako he lalolagi nei. Uaaki, lata a tautolu ke “faliu,” po ke hiki e tau loto ha tautolu.

6. Ko e heigoa kua fakaako e tautolu mai he manatu he tau kupu ha Iesu ia Mataio 12:43-45?

6 Ko e hikiaga ne tokaloto e Paulo kua nakai ni ko e hiki he kili he tau foliga ha tautolu. Kua putoia e tau vala oti he moui ha tautolu.  (Kikite puha “ Faliu po ke Hiki Fakatupua?”) Kua lata ke hiki ha tautolu a tau loto​—ko e tau aga, tau logonaaga, mo e tau fatuakiloto ha tautolu. Ti lata oti a tautolu ke hūhū hifo, ‘Ko e tau hikiaga kia ne taute e au ke eke mo Kerisiano ne kitia kili, po ke eke mooli au mo Kerisiano mai he loto?’ Ko e kehekeheaga kua uho lahi. He tau kupu ia Mataio 12:43-45, fakakite e Iesu e tau mena kua lata ke taute. (Totou.) Ko e manatu he tau kupu ia kua fakamaama e mooli he kupu nei: Nakai ni ko e utakehe hokoia he tau manatu hehē; ka e lata a tautolu ke fakapuke e tau loto aki e tau manatu ne talia he Atua.

“KIA FAKAFOU A MUTOLU KE HE MANAKO HE TAU LOTO HA MUTOLU”

7. Maeke fēfē a tautolu ke hiki e tau loto ha tautolu?

7 Maeke nakai ke hiki e tau fatuakiloto po ke tau loto ha tautolu? Tali he Kupu he Atua: “Kia fakafou a mutolu ke he manako he tau loto ha mutolu. Mo e tapulu a mutolu ke he tagata fou kua eke ke lata mo e Atua, ke he tututonu mo e mahani mitaki ke fakamoli ai.” (Efeso 4:23, 24) Ē, maeke ke hiki e tau mena he tau loto ha tautolu ka e nakai mukamuka ke taute ai. Nakai ni lata hokoia a tautolu ke totoko e tau manako po ke tau mahani hehē. Lata a tautolu ke hiki e “manako he tau loto.” Putoia ai e hiki he ha tautolu a tau manako, tau mahani, mo e tau kakano ne taute pihia e tautolu. Lata ke eketaha tumau ke taute.

8-9. Fakamaama fēfē he mena ne tupu ke he matakainaga taane e lata ke hiki e tau loto ha tautolu?

8 Kia fakatutala a tautolu ke he fakataiaga he matakainaga taane ne aga vale he mogo fakamua. He mole e oti e inu kava mo e latau haana, ne hokotia a ia ke lata ke papatiso ti ko e fakamatala mitaki he maaga tote ne nofo a ia. Ka e taha afiafi, nakaila leva he mole e papatiso haana ne fehagai a ia mo e kamatamata fakaofo. Ko e tagata kona ne hau ke he kaina haana ti paleko ki a ia ke latau. He kamataaga ne totoko he matakainaga ha tautolu e logonaaga ke latau. Ka ko e magaaho ne ekefakakelea he tagata e higoa ha Iehova ne nakai fahia e matakainaga foou ha tautolu. Ne fano a ia ki fafo ti tafolo e tagata kona. Ko e heigoa e lekua? Pete kua fakaako he matakainaga e Tohi Tapu ti kua lagomatai a ia ke totoko e tau mahani vale haana, nakaila maeke a ia ke hiki e manako he loto haana. Kakano ai kua nakaila hiki mooli e loto haana.

9 Ka e nakai mahala e matakainaga nei. (Fakatai 24:16) Ha ko e lagomatai he tau motua, ne fakatumau a ia ke holo ki mua. Hokotia a ia ke lata ke eke mo motua he mogo fakamui. Ka ko e taha afiafi i fafo he Fale he Kautu, ne fehagai a ia mo e paleko pihia foki ne feleveia mo ia he tau tau fakamua atu. Teitei tafolo he tagata kona e taha he tau motua. Ko e heigoa ne taute he matakainaga ha tautolu? He fakatotoka mo e fakatokolalo, ne tutala fakatekiteki a ia mo e tagata kona, ti totoka hifo e tuaga, mo e lagomatai e tagata kona ke hoko ki kaina. Ko e heigoa ne tupu? Kua hiki e manako he loto he matakainaga ha tautolu. Kua hiki e loto haana ke eke mo tagata mafola mo e fakatokolalo. Tamai he mena nei e fakahekeaga ki a Iehova!

10. Ko e heigoa kua putoia he taute e tau hikiaga nei?

10 Ko e tau hikiaga nei kua nakai mafiti; po ke nakai tupu noa ni. Maeke a tautolu ke “lalilali” fakamalolō ke he loga e tau tau. (2 Pete. 1:5) Kua nakai tupu e tau hikiaga nei ha kua leva e fekafekau ha tautolu ki a Iehova. Lata a tautolu ke eketaha fakamalolō ke hiki e tau loto ha tautolu. Ha ha i ai e tau lakaaga aoga ka lagomatai a tautolu ke taute e hikiaga nei. Kia kumikumi a tautolu ke he falu he tau mena nei.

 PUHALA KE HIKI E TAU MANAKO HE TAU LOTO HA TAUTOLU

11. Lagomatai fēfē he liogi a tautolu ke hiki e manako he tau loto ha tautolu?

11 Ko e liogi e lakaaga aoga fakamua. Lata a tautolu ke liogi tuga ne taute he salamo: “Ko e Atua na e, kia eke e koe e loto meā maku; mo e fakafou e loto mau ki loto ia au.” (Sala. 51:10) Latatonu a tautolu ke talahau kua lata a tautolu ke hiki e manako he loto mo e ole ki a Iehova ma e lagomatai. Iloa tonu fēfē e tautolu to lagomatai e Iehova a tautolu ke taute e hikiaga? Mafanatia a tautolu he maveheaga ha Iehova hagaao ke he tau Isaraela loto maō he vahā a Esekielu: “To foaki atu foki e au kia lautolu e loto taha, mo e foaki atu e au kia [la]utolu e loto fou ki loto ia [la]utolu; . . . mo e foaki atu ai e au kia lautolu e loto kakano,” ko e loto kua makai ke muitua e takitakiaga he Atua. (Eseki. 11:19) Makai a Iehova ke lagomatai e tau Isaraela ia ke hiki, ti makai a ia ke lagomatai foki a tautolu.

12-13. (a) Hagaao ke he Salamo 119:59, ko e heigoa kua lata a tautolu ke manamanatu ki ai? (e) Ko e heigoa e tau hūhū kua lata ke hūhū ki a koe ni?

12 Ko e manamanatu e lakaaga ke uaaki ne uho lahi. He onoono a tautolu ki loto he Kupu he Atua he tau aho takitaha, lata a tautolu ke fakaatā e magaaho ke manamanatu, po ke manamanatu fakahokulo ke he tau manatu mo e tau logonaaga ne lata a tautolu ke hiki. (Totou Salamo 119:59; Hepe. 4:12; Iako. 1:25) Lata a tautolu ke mailoga e tau mahani ne liga futiaki a tautolu ke he tau pulotu he tagata. Lata a tautolu ke talahau fakamooli e tau lolelole ha tautolu ti gahua fakamalolō ke utakehe e tau lolelole ia.

13 Tuga anei, hūhū ki a koe ni: ‘Ha ha i ai nakai ha ila mahekeheke he loto haaku?’ (1 Pete. 2:1) ‘Fai logonaaga fakatokoluga nakai au ha ko e feakiaga, fakaakoaga, po ke tuaga fakatupe?’ (Fakatai 16:5) ‘Onoono hifo nakai au ke he falu ne nakai tatai e tau mena ne moua ke tuga haaku po ke mai a lautolu he tau feakiaga tu tokolalo?’ (Iako. 2:2-4) ‘Lautaki nakai he tau mena ne foaki he lalolagi ha Satani e logonaaga haaku?’ (1 Ioa. 2:15-17) ‘Manako nakai au ke he tau fakafiafiaaga he mahani feuaki mo e favale?’ (Sala. 97:10; 101:3; Amosa 5:15) Ko e tau tali ke he tau hūhū fakatagata nei ne liga fakakite e tau vala kua lata a koe ke gahua ki ai. He kautū ke “ulu ki lalo e tau mahalohaloaga” malolō he tau manatu ha tautolu, to fakafiafia e tautolu e Matua he lagi.​—Sala. 19:14.

14. Ko e ha kua aoga lahi ke fifili e tau kapitiga mitaki?

14 Ko e fifili e tau kapitiga mitaki ko e lakaaga ke toluaki kua latatonu. He mailoga po ke nakai mailoga e tautolu, kua fakaohooho malolō he tau kapitiga ha tautolu a tautolu. (Fakatai 13:20) He gahuaaga po ke aoga, liga viko takai a tautolu he tau tagata ne nakai lagomatai a tautolu ke feaki e puhala manamanatu ne talia he Atua. Ka e moua e tautolu e tau feoakiaga mitaki lahi mahaki he tau feleveiaaga Kerisiano ha tautolu. Ko e matakavi a ia “ke fakalagalaga ai e fakaalofa mo e tau gahua mitaki.”​—Hepe. 10:24, 25.

KIA “FAKATUMAU KE HE TUA”

15-16. Lali fēfē a Satani ke hiki e manamanatuaga ha tautolu?

15 Ka e manatu na eketaha a Satani ke hiki e tau manamanatuaga ha tautolu. Fakaaoga e ia e tau kakano kehekehe ke moumou aki e fakaohoohoaga mitaki he Kupu he Atua.

16 Matutaki a Satani ke hūhū e hūhū taha ia ki a Eva he kaina ko Etena: “Ko e moli kia kua pehe mai e Atua, . . . ?” (Kene. 3:1) He lalolagi ne pule a Satani ki ai, fa logona e tautolu e tau hūhū paleko, tuga anei: ‘Mooli kia kua nakai talia he Atua e fakamauaga he taane ke he  taane mo e fifine ke he fifine? Mooli kia kua nakai manako e Atua ki a koe ke fakamanatu e Kirisimasi mo e tau aho fanau? Mooli kia kua amanaki e Atua haau ke nakai talia e koe e fagai toto? Mooli kia kua amanaki e Atua fakaalofa ke kalo kehe a koe he fio mo e tau fakahele kua tuku ki tua?’

17. Ko e heigoa ka taute e tautolu kaeke ke fehagai mo e tau hūhū ne aoga ke he tau taofiaga ha tautolu, ti ko e heigoa e fua kua fakakite he Kolose 2:6, 7?

17 Lata a tautolu ke mauokafua ke he tau taofiaga ha tautolu. Ka nakai tali e tautolu e tau hūhū aoga he tau loto ha tautolu, to maeke ai ke fakauaua a tautolu. Ko e tau fakauaua ia ka fakahiku ke fakakeukeu e puhala manamanatu ha tautolu mo e moumou e tua ha tautolu. Ko e heigoa mogoia kua lata a tautolu ke taute? Tala mai e Kupu he Atua ke fakafou e tau loto ha tautolu, ti maeke ke kumikumi e tautolu “e finagalo he Atua, ko e mena mitaki, kia talia foki mo e fiafia, ti kua katoatoa.” (Roma 12:2) He fakaako tumau, maeke a tautolu ke fakamooli ki a tautolu e kupu mooli ne fakaako e tautolu mai he Tohi Tapu. Talitonu katoatoa a tautolu kua hako e tau tuaga ha Iehova. Ti tuga e akau ne maō e tau vaka, to maō e fakavēaga ha tautolu he “fakatumau ke he tua.”​—Totou Kolose 2:6, 7.

18. Ko e heigoa ka lagomatai a tautolu ke utakehe e tau lauiaaga kona he lalolagi ha Satani?

18 Nakai fai tagata ke fakatumau e malolō he tua haau ma haau, ti matutaki ke fakafoou e manako he loto haau. Liogi tumau; olelalo ma e lagomatai he agaaga ha Iehova. Manamanatu fakahokulo; matutaki ke hakahaka e puhala manamanatu mo e tau logonaaga haau. Kumi e tau kapitiga mitaki; fakalataha mo lautolu ka lagomatai a koe ke fakafoou e manamanatuaga haau. He taute pihia, to utakehe e koe e tau lauiaaga kona he lalolagi ha Satani mo e kautū he ulu ki lalo e “tau mahalohaloaga, mo e tau mena fakatokoluga oti kua hemu ke he maama ke he kupu he Atua.”​—2 Kori. 10:5.

LOLOGO 48 O Fano Tumau mo Iehova

^ para. 5 Ko e tau manamanatuaga ha tautolu kua fakaohooho tumau he tau feakiaga, aga fakamotu, mo e fakaakoaga kua mole. Liga mailoga e tautolu ko e falu aga hehē kua eke mo tau kolo malolō he mahani fakatagata ha tautolu. Ko e vala tala nei to fakakite e puhala ka maeke a tautolu ke utakehe e tau aga hehē ne kua feaki e tautolu.