Skip to content

Skip to table of contents

Tau Fakamoli a Iehova

Fifili e vagahau Faka-Niue

Moua e Puipuiaga Mauokafua Mai he Matahele ha Satani

Moua e Puipuiaga Mauokafua Mai he Matahele ha Satani

KUA tauteute e tau Isaraela i tuai ke o atu ke he taha faahi he Vailele ko Ioritana ne mavehe age he Atua, fai tagata ne ahiahi mai ki a lautolu. Ko e tau fifine motu kehe ne uiina e tau tagata taane ke he galue. Tuga ko e mena lavea e tau magaaho pehēnei. Moua e tau kapitiga foou, koli, mo e kai e tau mena kai mitaki kua futiaki lahi. Pete ko e tau aga fakamotu mo e tau mahani he tau fifine ia ne nakai takitaki he Fakatufono he Atua ki a Isaraela, liga manamanatu e falu tagata Isaraela: ‘Ai ko e mena ti lauia a mautolu. To mataala a mautolu.’

 Ko e heigoa ne tupu? Tala mai he fakamauaga ki a tautolu: “Ti kamata ai he motu ke feuaki mo e tau fifine Moapi.” Ko e tau fifine ne manako ke he tau tagata taane Isaraela ke tapuaki ke he tau atua fakavai. Ti taute mooli e lautolu! Maama ai, “tupu lahi ai e ita a Iehova kia Isaraela.”​—Nume. 25:1-3.

Ne moumou he tau Isaraela ia e Fakatufono he Atua ke he ua e puhala: Hufeilo a lautolu ke he tau tupua tā, mo e taute e mahani feuaki. Totou afe ne mamate ha ko e nakai omaoma ha lautolu. (Esoto 20:4, 5, 14; Teu. 13:6-9) Ko e heigoa ne lafi ke he mamahi ha ko e mena nei ne taute e lautolu? Ko e magaaho. Ane mai nakai moumou he tau tagata taane e Fakatufono he Atua, to nakai leva ti o atu e tau Isaraela tokologa ia ke he taha faahi ha Ioritana ke he Motu he Maveheaga.​—Nume. 25:5, 9.

Hagaao ke he tau mena ia ne tutupu, tohi he aposetolo ko Paulo: “Ne hohoko e tau mena oti ia kia lautolu ke eke mo tau fakamailoga; kua tohi foki ke eke mo tomatomaaga ma tautolu kua hohoko mai ke he vaha ke fakahiku ai.” (1 Kori. 10:7-11) Fiafia mooli a Satani ha kua mokulu e falu he tau Isaraela ia ke he agahala kelea lahi ti nakai hokotia ke huhū atu ke he Motu he Maveheaga. Pulotu lahi mogoia ma tautolu ke omaoma ke he hatakiaga ia, ha kua manako lahi a Satani ke taofi a tautolu ke ua hohoko atu ke he lalolagi foou he Atua!

MATAHELE HAGAHAGA KELEA

Tatao e Satani e tau Kerisiano he fakaaoga e tau matahele ne iloa mitaki e ia kua gahua ke he tokologa e tagata. Tuga he talahau fakamua hagaao ke he tau Isaraela, fakaaoga e Satani e mahani feuaki. He vahā ha tautolu, matutaki e mahani feuaki ke eke mo matahele hagahaga kelea. Taha he tau puhala malolō lahi kua hele a tautolu ko e tau fakatino telefua.

He vahā nei, maeke ke kitekite ke he tau fakatino telefua ka e nakai iloa he falu. He tau tau loga kua mole, ko e tagata ne manako ke kitekite ke he tau fakatino telefua kua liga fano ke he fale kifaga ke kitekite e tau ata nakai meā po ke tau fale tohi he tau tagata lalahi ke fakatau e tau tohi he tau fakatino telefua. Ko e mena fakamā ka kitia po ke tata atu ke he tau fale pihia ti liga fakamamao mai e tokologa i ai. Ka ko e mogonei, kua maeke e tagata ke fakaaoga e Initanete ke kitekite e tau fakatino telefua he gahuaaga po ke haia he motokā. He tau motu loga, maeke e tagata taane po ke fifine ke kitekite ke he tau ata telefua he nonofo ni i kaina.

Nakai koenaia. Mukamuka lahi mahaki ke kitekite e tau ata telefua he tau matini utafano. He o hui e tau tagata he puhala tū po ke heke he pasi po ke tuleni, maeke a lautolu ke kitekite ke he tau fakatino feuaki he tau matini utafano.

Ha kua mukamuka lahi ke kitekite e tau fakatino telefua mo e taute fufū ai he tagata e mena ia, fakatupu he tau fakatino telefua e hagahaga kelea he vahā nei nakai pihia he vahā fakamua. Tokologa e tagata ne kitekite ke he tau fakatino telefua kua moumou ha lautolu a fakamauaga, lilifu fakatagata, mo e loto manamanatu. Mua atu e kelea, ne fakahagahaga kelea e lautolu e tuaga kapitiga ha lautolu mo e Atua. Mauokafua a koe kua fakahagahaga kelea he tau fakatino telefua a lautolu kua kitekite ki ai. Laulahi he tau tuaga, kua tuina e tau logonaaga. To liga maulu fakahaga e tau logonaaga pihia ka kua mau hifo e pite.

Ti lata a tautolu ke mataala, kua foaki e Iehova e puipuiaga mai he matahele nei ha Satani. Ke moua e tautolu e puipuiaga ha Iehova, lata a tautolu ke taute e tau mena ne kaumahala e tau tagata taane Isaraela i tuai ke taute​—ko e “fanogonogo fakamakutu” ki a ia. (Esoto 19:5) Lata a tautolu ke mailoga kua nakai talia mooli he Atua e tau fakatino telefua. Ko e ha ne talahau pihia a tautolu?

VIHIATIA KI AI TUGA NE TAUTE E IEHOVA

Manamanatu ke he mena nei: Ko e tau fakatufono he Atua ke he motu ha Isaraela ne kehe mamao mai he falu motu he vahā ia. Tuga e kaupā, maeke ai ke vevehe kehe a Isaraela mai he  tau tagata ne viko takai mo e tau mahani fakalialia ha lautolu. (Teu. 4:6-8) Ko e tau fakatufono ia ne kitia maali e kupu mooli aoga: Vihiatia e Iehova e mahani feuaki.

He tohi e tau mena fakalialia he tau motu tata mai, tala age a Iehova ke he tau Isaraela: “Ti ua eke foki e mutolu tuga ne tau mena kua fa eke ke he motu ko Kanana ka fakahoko atu e au a mutolu ki ai. . . . Ti kelea ai foki e motu; ti taui atu ai e au e tau mahani hepehepe ha i ai.” Ke he Atua tapu ha Isaraela, ne fakateteki e puhala moui he tau Kanana ti ko e motu ne nonofo ai a lautolu kua nakai meā mo e kiva.​—Levi. 18:3, 25.

Pete kua fakahala e Iehova e tau Kanana, matutaki e falu tagata ke taute e mahani feuaki. Molea e 1,500 he tau tau fakamui, fakamaama e Paulo ko e tau motu ne nonofo ai e tau Kerisiano “kua nakai tuai logona e lautolu ha mena.” Ati “tuku e lautolu a lautolu ke he matahavala ke eke e tau mena kelea oti kana, mo e manako lahi ki ai.” (Efeso 4:17-19) He vahā nei foki, tokologa e tagata ne talahaua he mahani fakalialia lahi mahaki. Ma e tau Kerisiano mooli, kua lata ke kalo kehe he kitekite ke he tau mahani feuaki he tau tagata he lalolagi nei.

Nakai fakalilifu he tau fakatino telefua e Atua. Tufugatia e Ia e tau tagata ke he haana a fakatai ti foaki ki a tautolu e logonaaga kua hako po ke hepe. Pulotu ai, fakatū he Atua e tau fakakaupāaga kua lata ke he mahani fakataane mo e fifine. Kua lata ke moua ni he hoa mau e fiafia meā ke he vahāloto ha laua. (Kene. 1:26-28; Fakatai 5:18, 19) Ka ko e heigoa kua taute e lautolu ne talaga po ke fakaholo ki mua e tau fakatino telefua? Kua tiaki katoatoa e lautolu e tau tuaga he mahani meā he Atua. Ko e tau tagata mogoia kua fakaholo ki mua e tau fakatino telefua kua nakai fakalilifu a Iehova. To fakafili he Atua a lautolu ne fakaheu e tau tuaga haana he talaga po ke fakaholo ki mua ha lautolu a tau fakatino telefua.​—Roma 1:24-27.

Ka e kua e tau tagata ne totou po ke kitekite pauaki ke he tau fakatino telefua? Falu ne logona hifo ko e fakafiafiaaga nakai hagahaga kelea. Ka kua lalago e lautolu e tau tagata ne nakai fakalilifu ke he tau tuaga ha Iehova. Liga nakai ko e foliaga ha lautolu anei he kamata a lautolu ke kitekite ke he tau fakatino telefua. Ka e fakakite fakamaaliali ai kua lata e tau fekafekau he Atua mooli ke vihiatia malolō e tau fakatino telefua.  Tomatoma he Tohi Tapu: “Ko mutolu kua fakaalofa atu kia Iehova, kia fakavihia e mutolu e tau mena kelea.”​—Sala. 97:10.

Ko lautolu foki kua manako ke kalo kehe he kitekite ke he tau fakatino telefua kua uka ki a lautolu ke taute e mena nei. Nakai mitaki katoatoa a tautolu, ti lata ke eketaha a tautolu ke totoko e tau manako feuaki nakai meā. Mua atu, lali e tau loto nakai mitaki katoatoa ha tautolu ke kumi e puhala ke moumou e fakatufono he Atua. (Iere. 17:9) Ka e tokologa kua eke mo tau Kerisiano ne kautū ke he taufetului nei. He iloa e mena nei ka fakamalolō a koe kaeke kua taufetului pihia foki. Mailoga e puhala ka lagomatai he Kupu he Atua a koe ke kalo kehe mai he matahele ha Satani he tau fakatino telefua.

UA MANAMANATU TUMAU KE HE TAU MANAKO FEUAKI

He totoku fakamua, tokologa e Isaraela ne takitaki he tau manako hehē ke he matematekelea lahi. Mena taha ia ka tupu he vahā nei. Ko e matakainaga ha Iesu ko Iakopo ne fakamaama e hagahaga kelea nei: “Takitokotaha mo e . . . toho mo e hele a ia he hana tau manako lahi; Ka fatu e manako lahi ti fanau mai ai e ia, ko e hala.” (Iako. 1:14, 15) Ka fakaatā he tagata e manako feuaki ke tupu i loto haana, to nakai leva ti agahala a ia. Lata mogoia a tautolu ke utakehe e tau manatu feuaki, ti nakai manamanatu tumau ki ai.

Kaeke kua manamanatu tumau a koe ke he tau manatu feuaki, taute taha mena ke utakehe fakamafiti ai. Pehē a Iesu: “Kaeke ke tupetupe a koe he hau a lima, po ke hau a hui, ati hio kehe a mo e tiaki e koe; . . . Kaeke foki ke tupetupe a koe he hau a mata, ati kape ai a, mo e tiaki e koe.” (Mata. 18:8, 9) Nakai kakano a Iesu ke fakamamahi e tau tino ha tautolu. Ka e fakamaama e ia e lata ke utakehe fakamafiti mo e fakamalolō e punaaga he manatu hehē. Fakagahua fēfē e tautolu e fakatonuaga ia ke lata mo e tau fakatino telefua?

Ka kitia e koe e tau fakatino telefua, ua manamanatu, ‘Ai ko e mena ti lauia au.’ Fakamafiti ke ono kehe. Tamate agataha e TV. Tamate he mogoia ni e komopiuta po ke matini utafano. Liu hagaaki fakahako ke he mena kua meā. Ko e taute pihia ka lagomatai a koe ke tautaofi e manamanatuaga haau ka e nakai fakaatā e tau manako hehē ke takitaki a koe.

 KA E KUA KA HELEAKI AGAIA E TAU MANATU FEUAKI?

Ka e kua kaeke kua kautū a koe he nakai kitekite ke he tau fakatino telefua, ka e heleaki agaia e tau manatu ia? Maeke e tau fakatino telefua po ke tau manatu ke pite tumau he manamanatuaga he tagata. Maeke ke liu hake mai he ha magaaho. Ka tupu e mena ia, liga logona hifo e koe e manako ke taute e mahani kiva, tuga e mulumō. Kia mataala to tutupu mai e tau manatu pihia, ka e mautauteute ke totoko ai.

Fakamalolō e fifiliaga haau ke fakatatai e tau manatu mo e tau mahani ke he finagalo he Atua. Kia tuga e aposetolo ko Paulo, ne makai ke “tatuki e [haana] tino mo e fakatupa a ia.” (1 Kori. 9:27) Ua fakaatā e tau manako kiva ke pule ki a koe. “Kia faliu a [koe] ke he liu foki fakafou he . . . loto [haau], kia kumikumi e [koe] po ke heigoa e finagalo he Atua, ko e mena mitaki, kia talia foki mo e fiafia, ti kua katoatoa.” (Roma 12:2) Manatu: Ko e manamanatu mo e mahani kua fakatatai mo e finagalo he Atua ka tamai e fiafia lahi mahaki he nakai omaoma ke he tau manako agahala.

Ko e manamanatu mo e mahani kua fakatatai mo e finagalo he Atua ka tamai e fiafia lahi he nakai omaoma ke he tau manako agahala

Lali ke ako manatu e falu kupu Tohi Tapu. Ka tutupu mai e tau manatu hepe, eketaha ke manatu e tau kupu tohi ia. Ko e tau kupu Tohi Tapu tuga e Salamo 119:37; Isaia 52:11; Mataio 5:28; Efeso 5:3; Kolose 3:5; mo e 1 Tesalonia 4:4-8 ka lagomatai a koe ke fakatatau e manamanatuaga haau mo e onoonoaga ha Iehova ke he tau fakatino telefua mo e mena kua amanaki a ia ke taute e koe.

Ka e kua ka manako lahi mahaki a koe he falu mogo ke kitekite po ke manamanatu ke he tau mahani feuaki? Muitua fakatata ke he tau tuagahui he ha tautolu a Fakafifitaki ko Iesu. (1 Pete. 2:21) He mole e papatiso ha Iesu, ne kamatamata tumau e Satani a ia. Ko e heigoa ne taute e Iesu? Ne fakatumau a ia ke totoko. He fakaaoga tumau e tau kupu Tohi Tapu, totoko e ia e tau kamatamata ha Satani. Pehē a ia: “Ati fano kehe a a koe ma Satani” ti fano kehe a Satani ia ia. Tuga ni he nakai fakalolelole a Iesu ke totoko e Tiapolo, kua lata foki a koe ke pihia. (Mata. 4:1-11) Ko Satani mo e lalolagi haana to matutaki fakalahi ke fakapuke e loto haau aki e tau manatu feuaki, ka e ua fakalolelole ke he totokoaga. Maeke a koe ke kautū he totoko ke he tau fakatino telefua. Mo e lagomatai ha Iehova, maeke a koe ke fakakaumahala e fī haau.

LIOGI KI A IEHOVA, TI OMAOMA KI A IA

Fakatumau ke liogi ki a Iehova. Pehē a Paulo: “Kia fakailoa atu ke he Atua e tau manako ha mutolu. . . . Ko e monuina foki mai he Atua kua mua ue atu ke he tau mena oti kua manamanatu ki ai, to leveki ai e tau loto ha mutolu, katoa mo e tau manatu ha mutolu kia Keriso Iesu.” (Filipi 4:6, 7) Tamai he mafola he Atua e totokaaga ke he taufetului mo e agahala. Ka fakatata a koe ki a Iehova, to “fakatata mai ai a ia kia [koe].”​—Iako. 4:8.

Ko e puipuiaga mitaki lahi mahaki mai he tau matahele ko e fakatata tumau a koe ke he Pule Katoatoa he lagi mo e lalolagi katoatoa. Pehē a Iesu: “Hau ne fai e iki [Satani] he lalolagi nei, ka e nakai moua e ia taha mena kia au.” (Ioane 14:30) Ko e ha ne moua e Iesu e mauokafua pihia? Fakamaama e ia he taha magaaho: “Ko ia foki ne fakafano mai au, ha ha ia au a ia; nakai toka tokotaha au e Matua ha ko e mena eke mau e au e tau mena kua mitaki kia ia.” (Ioane 8:29) He taute e koe e tau mena kua fakafiafia a Iehova, to nakai tiaki foki e ia a koe. Kalo kehe he matahele he tau fakatino telefua, mo e to nakai maeke a Satani ke hele a koe.