Skip to content

Skip to table of contents

Tau Fakamoli a Iehova

Fifili e vagahau Faka-Niue

Maeke a Ia ke Talia he Atua

Maeke a Ia ke Talia he Atua

KUA fekafekau a tautolu ki a Iehova mo e manako ke moua e taliaaga mo e monuina haana. Ka e moua fēfē e tautolu e taliaaga he Atua? He vahā Tohi Tapu, falu tagata ne taute e tau agahala kelea muikau ne liu moua e taliaaga he Atua. Falu ne moua e tau mahani mitaki, ka e hoko ke he mogo fakahiku ti galo e taliaaga he Atua. Liga hūhū mogoia a tautolu, “Ko e heigoa ha Iehova ne kumi ia tautolu takitokotaha?” Ko e fakafifitakiaga ha Rehopoamo, ko e patuiki ha Iuta ka lagomatai a tautolu ke moua e tali.

KELEA E KAMATAAGA

Ko e matua taane ha Rehopoamo ko Solomona, ko e patuiki ha Isaraela ke 40 e tau. (1 Tau Patuiki 11:42) He mole e mate he matua taane ha Rehopoamo, ne hau a ia i Ierusalema ki Sikema ke eke mo patuiki. (2 Nofoaga he Tau Patuiki 10:1) Matakutaku kia a ia ke eke mo patuiki? Talahaua a Solomona he lahi e pulotu. Nakai leva to lata a Rehopoamo ke fakakite na pulotu nakai a ia ke fakamafola e lekua uka.

Logona hifo he tau Isaraela e pehiaaga ti fakafano atu e tau hukui ke tala age ki a Rehopoamo e mena ne manako a lautolu ki a ia ke taute: “Ne fakamamafa he matua hau ha mautolu a lakau hahamo; hanai kia fakamāmā e koe e gahua uka he hau a matua, mo e hana lakau hahamo mamafa ne tuku mai e ia kia mautolu, ti fekafekau atu ai a mautolu kia koe.”​—2 Nofoaga he Tau Patuiki 10:3, 4.

Ha ha ia Rehopoamo e fifiliaga uka ke taute. Ka taute e ia e mena ne manako e tau tagata ki ai, ko ia mo e haana magafaoa mo lautolu he fale patuiki to liga momoui nakai monuina tuga fakamua. Kaeke ke nakai talia e ia e ole he tau tagata, liga to totoko e lautolu a ia. Ko e heigoa haana ne taute? Tutala fakamua a ia ke he tau patu ne lagomatai e matua taane haana. Tala age a lautolu ki a ia ke fanogonogo ke he tau tagata. Ka e tutala foki a Rehopoamo ki a lautolu he atu haana ti fifili ke taute fakakelea e tau tagata. Tala age a ia ki a lautolu: “Ka ko au, to lafilafi atu e au ki ai; ne akonaki atu haku matua kia mutolu ke he tau akau, ka ko au, to akonaki atu e au kia mutolu ke he tau akarava.”​—2 Nofoaga he Tau Patuiki 10:6-14.

Kitia nakai e koe e fakaakoaga ma tautolu? Mogonei, tokologa a lautolu ne momotua kua fakalataha mo tautolu ne fekafekau ki a Iehova ke he loga e tau tau ne maeke ke lagomatai a tautolu ke taute e tau fifiliaga mitaki. Kia pulotu a tautolu he fanogonogo ki a lautolu.​—Iopu 12:12.

“FANOGONOGO A LAUTOLU KE HE KUPU A IEHOVA”

Fakapotopoto mogonei e Rehopoamo e kautau haana ke tau atu ke he tau magafaoa totoko. Ka e fakafano e Iehova e perofeta ko Semaia ke tala age ki a lautolu: “Aua neke o hake a mutolu ti aua neke tau, a mutolu mo e tau matakainaga ha mutolu ko e fanau a Isaraela; kia takitaha a mutolu mo e liu atu ke he hana magafaoa; ha kua mai ia au e mena  nai.”​—1 Tau Patuiki 12:21-24. *​—Kikite matahui tala.

Mukamuka nakai ma Rehopoamo ke fanogonogo ki a Iehova? Ko e heigoa e manatu he tau tagata ke he patuiki foou ha lautolu? Fitā he tala age a ia ki a lautolu to fakahala e ia a lautolu “ke he tau akarava,” ka e mogonei kua nakai fai mena a ia ke taute hagaao ke he totokoaga kelea lahi mahaki nei! (Fakatatai 2 Nofoaga he Tau Patuiki 13:7.) Ka e pete ni e manatu he tau tagata hagaao ki a ia, ko e patuiki mo e tau kautau haana ne “fanogonogo a lautolu ke he kupu a Iehova ne liliu mai a lautolu ti o atu ai a lautolu, ke lata mo e kupu a Iehova.”

Ko e heigoa e fakaakoaga ma tautolu? Pulotu tumau ke omaoma ke he Atua, pete ka vaiga e tau tagata ki a tautolu he taute pihia. To fakamonuina tumau he Atua a tautolu ka omaoma.​—Teutaronome 28:2.

Fakamonuina nakai a Rehopoamo ha ko e haana omaoma? Pule agaia a Rehopoamo ke he tau magafaoa ha Iuta mo Peniamina, ti fifili a ia ke ati e tau maaga foou he tau matakavi ia. Taute foki e ia e falu maaga “ke uka lahi” ke malolo. (2 Nofoaga he Tau Patuiki 11:5-12) Mua atu e aoga, fai magaaho ne omaoma a ia ke he tau fakatufono ha Iehova. Ha kua kamata e kautu ne hogofulu ke tapuaki ke he tau tupua tā, tokologa ne o atu ki Ierusalema ke lalago a Rehopoamo mo e tapuakiaga mooli. (2 Nofoaga he Tau Patuiki 11:16, 17) Ha kua omaoma a Rehopoamo ki a Iehova, ne malolō lahi e kautu haana.

AGAHALA MO E FAKATOKIHALA A REHOPOAMO

Magaaho ne malolō e kautu ha Rehopoamo, ne taute e ia taha mena matakehe. Nakai liu a ia ke omaoma ke he fakatufono ha Iehova ti kamata ke tapuaki ke he tau tupua tā! Ka ko e ha? Fakaohooho kia he matua fifine, ko e fifine Amoni e fifiliaga haana? (1 Tau Patuiki 14:21) Nakai iloa e tautolu, ka e mumui e motu ke he fakafifitakiaga kelea haana. Ti fakaatā e Iehova e Patuiki ko Sisaka ha Aikupito ke fofō e tau maaga loga he kautu ha Iuta. Tupu e mena nei pete he malolō lahi e tau motu ia ne ati e Rehopoamo!​—1 Tau Patuiki 14:22-24; 2 Nofoaga he Tau Patuiki 12:1-4.

Mua atu e kelea he tuaga he magaaho ne feoho mai a Sisaka mo e kautau haana ke totoko a Ierusalema, ne pule e Rehopoamo. He magaaho nei, ko e perofeta ko Semaia ne tala age ki a Rehopoamo mo e tau iki haana e fekau nei mai he Atua: “Kua tiaki e mutolu au, ko e mena ia kua tiaki ai e au a mutolu ke he lima a Sisaka.” Tali atu fēfē a Rehopoamo ke he akonakiaga ia? He puhala mitaki lahi! Pehē e Tohi Tapu: “Ti fakatokolalo ai e tau iki Isaraela, mo e patuiki, kua pehe atu a lautolu, Kua tututonu a Iehova.” Ko e mena ia ne fakahao e Iehova a Rehopoamo, ti nakai moumou a Ierusalema.​—2 Nofoaga he Tau Patuiki 12:5-7, 12.

Mole ia, ne matutaki a Rehopoamo ke pule ke he kautu ha Iuta. Ato mate, ne foaki e ia e tau mena fakaalofa loga ke he tau tama taane haana. Liga manako a ia ke iloa tonu to nakai totoko e lautolu ha lautolu a matakainaga ko Avia, ko ia ka eke mo patuiki. (2 Nofoaga he Tau Patuiki 11:21-23) He taute pihia, ne lahi e pulotu ha Rehopoamo ke he magaaho ne fuata a ia.

MITAKI PO KE KELEA KIA A REHOPOAMO?

Pete he taute e Rehopoamo e falu mena mitaki, talahau he Tohi Tapu hagaao ke he pule haana: “Ne mahani kelea a ia.” Ko e ha? Ha kua “nakai manatu ai a ia ke he hana loto ke kumi a Iehova.” Ti nakai fiafia a Iehova ki a ia.​—2 Nofoaga he Tau Patuiki 12:14.

Nakai ha ha ia Rehopoamo e fakafetuiaga tata mo Iehova, tuga a Tavita

Ko e heigoa ka fakaako e tautolu mai he moui ha Rehopoamo? Ne omaoma a ia ke he Atua he falu magaaho. Ti taute e ia falu mena mitaki ma e tau tagata ha Iehova. Ka e nakai ha ha ia ia e fakafetuiaga tata mo Iehova, ti nakai ha ha ia ia e manako malolō ke fakafiafia e Atua. Nakai liu a ia ke taute e mena hako, ti kamata ke tapuaki ke he tau atua fakavai. Liga manamanatu a koe: ‘He talia e Rehopoamo e fakatonuaga ha Iehova, kua hokulo mooli kia e logonaaga fakatokihala haana ma e tau hehē ti manako ke fakafiafia e Atua? Po ke pihia ha kua tala age he falu e tau mena kua lata a ia ke taute?’ (2 Nofoaga he Tau Patuiki 11:3, 4; 12:6) He magaaho fakamui he moui, ne liu a ia taute e mahani kelea. Kehe lahi a ia mai he matua tupuna haana ko e Patuiki ko Tavita! Mooli na taute e Tavita e tau hepehepe. Ka e fakatokihala mooli a ia mai he tau agahala kelea lahi mahaki ne taute e ia. Ti fakaalofa a ia ki a Iehova mo e manako ke he tapuakiaga mooli he moui katoa haana.​—1 Tau Patuiki 14:8; Salamo 51:1, 17; 63:1.

Lahi e mena ka fakaako e tautolu mai he tala nei he  Tohi Tapu. Nava ke he tau tagata ka leveki e tau magafaoa ha lautolu mo e taute e tau mena mitaki ma e falu. Ka ke moua e taliaaga ha Iehova, lata a tautolu ke tapuaki ki a ia he puhala kua fakafiafia a ia, ti lata a tautolu ke moua e fakafetuiaga malolō mo ia.

Ke hokotia ke he foliaga ia, lata a tautolu ke moua e fakaalofa hokulo ki a Iehova. Tuga ni he tuku fakaloga tumau e tautolu e tau gaafi ke puho e afi, fakamata tumau e tautolu e fakaalofa ma e Atua he fakaako tumau haana a Kupu, manamanatu fakahokulo ki ai, mo e fakamakamaka ke he liogi. (Salamo 1:2; Roma 12:12) To omoomoi he fakaalofa nei a tautolu ke fakafiafia a Iehova ke he tau mena oti ne taute e tautolu. To omoomoi foki a tautolu ke logona hifo kua fakatokihala mooli a tautolu ka taute e tau hehē mo e ole ki a Iehova ke fakamagalo a tautolu. To nakai tuga a Rehopoamo ka e to fakatumau a tautolu ke tua fakamooli ke he tapuakiaga mooli.​—Iuta 20, 21.

^ para. 9 Ha kua nakai tua fakamooli a Solomona, fitā he talahau he Atua to veveheua e kautu.​—1 Tau Patuiki 11:31.