Skip to content

Skip to table of contents

Tau Fakamoli a Iehova

Fifili e vagahau Faka-Niue

 VALA TALA FAKAAKO 27

Mautauteute Mogonei ma e Favaleaga

Mautauteute Mogonei ma e Favaleaga

“Ko lautolu oti foki kua loto ke nonofo mo e mahani Atua kia Keriso Iesu, to hoko ni kia lautolu e favale.”​—2 TIMO. 3:12.

LOLOGO 154 To Tumau e Fakauka ha Tautolu

FAKAMAAMAAGA KŪ *

1. Ko e ha kua lata a tautolu ke mautauteute ma e favaleaga?

KE HE pō ato tamate e Iki ha tautolu ko Iesu, pehē a ia ko lautolu oti kua fifili ke eke mo tau tutaki haana to vihiatia ki ai. (Ioane 17:14) Ato hoko mai ke he mogonei, ko e tau Kerisiano fakamooli ha Iehova ne favale ki ai mai ia lautolu ne totoko e tapuakiaga mooli. (2 Timo. 3:12) He tata lahi mai e fakaotiaga he fakatokaaga nei, amanaki a tautolu ke he tau fī ha tautolu ke totoko fakalahi mai.​—Mata. 24:9.

2-3. (a) Ko e heigoa kua lata ke mailoga e tautolu hagaao ke he matakutaku? (e) Ko e heigoa ka fakatutala a tautolu ki ai he vala tala nei?

2 Maeke fēfē a tautolu ke mautauteute he magaaho nei ke fehagai mo e favaleaga? Nakai lata a tautolu ke manamanatu ke he tau mena oti ka tutupu ki a tautolu. Ka pihia a tautolu, to molea e matakutaku mo e fakaatukehe ha tautolu. Maeke a tautolu ke manamanatu teao ke he tau fakamatakutaku ke kaumahala a tautolu ato hoko mooli ke he ha kamatamata. (Fakatai 12:25; 17:22) Ko e matakutaku ko e kanavaakau malolō lahi ne lali ha tautolu a ‘fi ko e tiapolo’ ke fakaaoga ke totoko aki a tautolu. (1 Pete. 5:8, 9) Ko e heigoa ha tautolu ka taute mogonei ke fakamalolō a tautolu?

3 He vala tala nei, to fakatutala a tautolu ke he puhala ka fakamalolō e fakafetuiaga ha tautolu mo Iehova mo e kakano kua aoga lahi ke taute ai e tautolu mogonei. To fakatutala foki ke he mena ka taute e tautolu ke ati hake e loto malolō. Fakahiku aki, to kumikumi a tautolu ke he puhala ka fahia mai he vihiatia he tau tagata totoko.

PUHALA KE FAKAMALOLŌ E FAKAFETUIAGA HAAU MO IEHOVA

4. Hagaao ke he Heperu 13:5, 6, ko e heigoa kua lata a tautolu ke talitonu ki ai, ti ko e ha?

4 Kia talitonu kua fakaalofa a Iehova ki a koe mo e to nakai tiaki e ia a koe. (Totou Heperu 13:5, 6.) Loga e tau kua mole, Ko e Kolo Toko ne pehē: “Ko e tagata ne iloa lahi mahaki e Atua to falanaki  ki a Ia he tau magaaho kamatamata.” Mooli lahi! Ke kautū he fehagai mo e favaleaga, lata a tautolu ke fakaalofa ki a Iehova mo e falanaki katoatoa ki a ia he nakai fakauaua kua fakaalofa hofihofi a ia ki a tautolu.​—Mata. 22:36-38; Iako. 5:11.

5. Ko e heigoa ka lagomatai a koe ke logona hifo e fakaalofa ha Iehova?

5 Totou e Tohi Tapu he tau aho takitaha mo e foliaga ke fakatata fakalahi ki a Iehova. (Iako. 4:8) He totou a koe, hagaaki ke he tau mahani mafanatia ha Iehova. Logona hifo e fakaalofa mo e hofihofi noa haana ne fakakite ke he tau mena ne talahau mo e taute e ia. (Esoto 34:6) Liga taufetului e falu ke talitonu kua fakaalofa e Atua ki a lautolu ha kua nakaila fakakite ki a lautolu e fakaalofa. Ka fehagai a koe mo e paleko ia, lali ke tohi hifo he tau aho takitaha e tau puhala kua fakakite e Iehova e fakaalofa noa mo e totonu ki a koe. (Sala. 78:38, 39; Roma 8:32) He manamanatu a koe ke he tau mena ne tutupu ki a koe mo e manamanatu fakahokulo ke he mena ne totou e koe he Kupu he Atua, to liga maeke a koe ke tohi hifo e tau mena loga kua taute e Iehova ma haau. Ko e lahi he loto fakaaue haau ke he mena ne taute e Iehova, to malolō e fakafetuiaga haau mo ia.​—Sala. 116:1, 2.

6. Hagaao ke he Salamo 94:17-19, maeke fēfē e liogi mafanatia ke lagomatai a koe?

6 Liogi tumau. Manamanatu ke he tama taane tote ne peka mafanatia he matua taane haana. Kua logona he tama taane e haohao mitaki ti maeke a ia ke tutala ke he matua taane hagaao ke he tau mena mitaki mo e tau mena kelea ne tutupu ki a ia he aho. Maeke a koe ke moua foki e vahega fakafetuiaga pihia ka fakatata a koe ki a Iehova he liogi mafanatia he tau aho takitaha. (Totou Salamo 94:17-19.) He liogi a koe ki a Iehova, “kia liligi atu po ke magavai hau a loto” ti tala age oti ke he Matua fakahele e tau matakutaku mo e tau fakaatukehe haau. (Aue 2:19) Ko e heigoa la e fua? To moua e koe e mena ne talahau he Tohi Tapu “ko e monuina [po ke mafola] foki mai he Atua kua mua ue atu ke he tau mena oti kua manamanatu ki ai.” (Filipi 4:6, 7) Ko e lahi e liogi haau he puhala nei, to tata lahi e logonaaga haau ki a Iehova.​—Roma 8:38, 39.

Moua mai e loto malolō he mauokafua ki a Iehova mo e haana Kautu

Fakamalolō e Stanley Jones a ia he iloa kua mooli e Kautu he Atua (Kikite paratafa 7)

7. Ko e ha kua lata a koe ke talitonu ko e tau maveheaga he Atua hagaao ke he Kautu haana to fakamooli?

7 Kia talitonu to fakamooli e tau monuina he Kautu he Atua. (Nume. 23:19) Ka lolelole e tua haau ke he tau maveheaga ia, to mukamuka lahi a Satani mo e matakau haana ke fakahopoate a koe. (Fakatai 24:10; Hepe. 2:15) Maeke fēfē a koe ke ati hake e mauokafua ke he Kautu he Atua mogonei? Eketaha ke kumikumi e tau maveheaga he Atua hagaao ke he Kautu haana mo e tau kakano kua maeke a koe ke iloa moolioli to hohoko e tau mena ia. To lagomatai fēfē e mena ia? Manamanatu ke he fakafifitakiaga ha Stanley Jones ne tuku he fale puipui ke fitu e tau ha ko e tua haana. * Ko e heigoa ne lagomatai a ia ke fakauka fakamooli? Pehē a ia: “Ha kua fakamalolō he iloa e kautu he  Atua, talia mooli ai, nakai lagataha e tuahā ki ai, ne nakai maueue au.” Ka malolō e tua haau ke he tau maveheaga he Atua, to fakatata lahi a koe ki a Iehova mo e to nakai mahala a koe ke he matakutaku.​—Fakatai 3:25, 26.

8. Ko e heigoa e fakakiteaga mitaki he aga ha tautolu ke he tau feleveiaaga? Fakamaama.

8 O atu tumau ke he tau feleveiaaga Kerisiano. Ko e tau feleveiaaga kua lagomatai a tautolu ke fakatata lahi ki a Iehova. Ko e aga ha tautolu he o atu ke he tau feleveiaaga ko e fakakiteaga mitaki ke he puhala ka kautū a tautolu he fehagai mo e favaleaga he mogo i mua. (Hepe. 10:24, 25) Ko e ha ne pihia ai? Ka fakaatā e tautolu e tau matalekua ikiiki ke taofi a tautolu he o atu ke he tau feleveiaaga mogonei, ko e heigoa ka tupu he mogo i mua ka fakahagahaga kelea e haohao mitaki ha tautolu ke feleveia mo e tau matakainaga Kerisiano? He taha faahi, ka feaki e tautolu e fifiliaga malolō ke o atu ke he tau feleveiaaga, to nakai mahala a tautolu ke he tau tagata totoko kua lali ke taofi a tautolu he fakalataha auloa. Ko e magaaho anei ke feaki e fiafia ke he tau feleveiaaga ha tautolu. Ka fiafia a tautolu ke o atu ke he tau feleveiaaga, to nakai fai totokoaga po ke pāaga he fakatufono ka taofi a tautolu he omaoma ke he Atua ka e nakai ke he tau tagata.​—Gahua 5:29.

Ako manatu e tau kupu tohi mo e tau lologo he Kautu mogonei ka lagomatai a koe he favaleaga (Kikite paratafa 9) *

9. Ko e ha e ako manatu he tau kupu tohi ko e puhala mitaki ke mautauteute ma e favaleaga?

9 Ako manatu e tau kupu tohi ne fiafia a koe ki ai. (Mata. 13:52) Liga nakai mitaki katoatoa e manamanatuaga haau, ka e maeke a Iehova ke fakaaoga e agaaga tapu malolō haana ke manatu e koe e tau kupu tohi ia. (Ioane 14:26) Mailoga e mena ne talahau he taha matakainaga ne tuku he fale puipui i East Germany mo e tuku tokotaha he poko puipui: “Ko e monuina mooli ha ko e magaaho ia kua totou teau e kupu Tohi Tapu kua iloa manatu e au! Pete he nofo tokotaha au ne manamanatu fakahokulo tumau au ke he tau matakupu kehekehe he Tohi Tapu.” Lagomatai he tau kupu tohi ia e matakainaga ha tautolu ke fakatata tumau ki a Iehova mo e fakauka fakamooli.

(Kikite paratafa 10) *

10. Ko e ha kua lata a tautolu ke ako manatu e tau lologo?

10 Ako manatu mo e uhu e tau lologo ne fakaheke a Iehova. He tuku he fale puipui i Filipi, ne uhu e Paulo mo Sila e tau lologo fakaagaaga ne iloa manatu e laua. (Gahua 16:25) Pihia foki he mogo ne fakapaea e tau matakainaga ha tautolu mai he Soviet Union fakamua ki Siberia, fakamalolō fēfē e lautolu a lautolu? Manatu he Matakainaga Fifine ko Mariya Fedun: “Uhu e mautolu e tau lologo oti ne iloa e mautolu, ko e tau lologo he tohi lologo.” Pehē a ia kua atihake he tau lologo  ia a lautolu oti ti lagomatai a lautolu ke tata lahi ki a Iehova. Logona hifo nakai e koe e mafanatia ka uhu e koe e tau lologo fakaagaaga haau ne fiafia lahi ki ai? Ti ako manatu e tau lologo ia mogonei!​—Kikite puha “ Foaki Mai ki a Au e Loto Malolō.”

PUHALA KE ATI HAKE E LOTO MALOLŌ HAAU

11-12. (a) Hagaao ke he 1 Samuela 17:37, 45-47, ko e ha ne loto malolō a Tavita? (e) Ko e heigoa e fakaakoaga uho ma tautolu mai he fakafifitakiaga ha Tavita?

11 Ke fehagai mo e favaleaga, lata a koe ke loto malolō. Ka logona hifo e koe kua nakai loto malolō, ko e heigoa haau ka taute? Manatu ko e loto malolō mooli ne nakai fakavē ke he lahi, maō, po ke lotomatala haau. Manamanatu ke he fakafifitakiaga he fuata tote ko Tavita he mogo ne fehagai a ia mo Koliato. He fakatatai mo e tupua ia, ko Tavita kua tote, lolelole, ti nakai fai puipuiaga. Nakai fai pelu foki a Tavita. Ka kua puke a ia he loto malolō. Ne poi fakamalolō a Tavita ke tau ke he tupua fakatokoluga ia.

12 Ko e ha ne lahi e loto malolō ha Tavita? Talitonu katoatoa a ia kua fakalataha a Iehova mo ia. (Totou 1 Samuela 17:37, 45-47.) Nakai hagaaki a Tavita ke he lahi ha Koliato he fakatatai mo ia. Ka e hagaaki a ia ke he tote ha Koliato he fakatatai ki a Iehova. Ko e heigoa kua fakaako e tautolu mai he tala nei? To logona e tautolu e loto malolō ka mauokafua a tautolu kua fakalataha a Iehova mo tautolu mo e ka iloa e tautolu kua ikiiki e tau tagata totoko he fakatatai ke he Atua Malolō Ue Atu. (2 Nofo. 20:15; Sala. 16:8) Maeke fēfē a tautolu ke ati hake e loto malolō ha tautolu mogonei ato hoko mai e favaleaga?

13. Maeke fēfē a tautolu ke ati hake e loto malolō? Fakamaama.

13 Maeke a tautolu ke ati hake e loto malolō ha tautolu mogonei he fakamatala e tala mitaki he Kautu he Atua ke he tau tagata. Ko e ha? Ha ko e fakamatala kua fakaako ki a tautolu ke falanaki ki a Iehova mo e fahia ke he ha matakutaku tagata. (Fakatai 29:25) Tuga ni e tau leke ha tautolu kua fakamalolō ka faofao, ko e loto malolō ha tautolu kua ati hake ka fakamatala mai he taha fale ke he taha fale, he tau toloaga tagata, he tau magaaho noa, mo e tau matakavi pisinisi. Ka feaki e tautolu e loto malolō ke fakamatala mogonei, to mautauteute mitaki a tautolu ke tumau e fakamatala pete ka pā e gahua ha tautolu.​—1 Tesa. 2:1, 2.

Nakai talia e Nancy Yuen ke oti e fakamatala he tala mitaki (Kikite paratafa 14)

14-15. Ko e heigoa e tau fakaakoaga ne moua e tautolu ia Nancy Yuen mo Valentina Garnovskaya?

14 Maeke a tautolu ke lahi e mena ka fakaako mai he fakafifitakiaga he tokoua e matakainaga fifine tua fakamooli ne fakakite e loto  malolō ofoofogia. Ko Nancy Yuen ne 1.5 ni e mita he loa, ka e nakai mukamuka a ia ke fakamatakutaku. * Nakai talia e ia ke oti e fakamatala he tala mitaki he Kautu he Atua. Ko e fua, ne molea e 20 e tau ne tuku a ia he fale puipui i Saina. Ko e tau leoleo ne hūhū toko ki a ia ne pehē ko ia ko e “tagata ne ulukafilo lahi” he motu ha lautolu!

Talitonu a Valentina Garnovskaya ko Iehova mo ia (Kikite paratafa 15)

15 Pihia foki a Valentina Garnovskaya ne lagatolu e tuku he fale puipui he Soviet Union fakamua ke he kavi 21 e tau he katoa. * Ko e ha? Ha kua eketaha a ia ke tumau e fakamatala ti fakamailoga he tau leoleo a ia “ko e tagata matahavala hagahaga kelea lahi.” Ko e heigoa ne taute e tau fifine tua fakamooli nei ke loto malolō? Talitonu a laua kua fakalataha a Iehova mo laua.

16. Ko e heigoa e matapatu ke he loto malolō mooli?

16 He fakatutala a tautolu, ke ati hake kua lata a tautolu ke nakai ni hagaaki ke he tau malolō mo e tau lotomatala ha tautolu. Ka kua lata a tautolu ke talitonu ko Iehova mo tautolu ti ko ia kua tau ma tautolu. (Teu. 1:29, 30; Saka. 4:6) Ko e matapatu a ia ke he loto malolō mooli.

PUHALA KE FAHIA MAI HE VIHIATIA HE TAU TAGATA

17-18. He fakamau ia Ioane 15:18-21, ko e heigoa e hatakiaga ne foaki mai e Iesu ki a tautolu? Fakamaama.

17 Fiafia a tautolu ka fakalilifu he falu, ka e nakai lata a tautolu ke manamanatu kua nakai aoga a tautolu ka nakai fiafia e tau tagata ki a tautolu. Pehē a Iesu: “Uhoaki a mutolu ka fakavihia a mutolu he tau tagata, ka vevehe kehe a mutolu, mo e eke fakakelea ai e lautolu, mo e tiaki ai ha mutolu a tau higoa, tuga ne mena kelea, ha ko e Tama he tagata.” (Luka 6:22) Ko e heigoa e kakano ha Iesu?

18 Nakai pehē a Iesu kua fiafia e tau Kerisiano ka vihiatia. Kua hataki e ia a tautolu ke he mena ka tupu. Nakai fai vala a tautolu he lalolagi. Momoui fakatatau a tautolu ke he tau fakaakoaga ha Iesu mo e fakamatala e fekau ne fakamatala e ia. Ko e fua, kua vihiatia he lalolagi a tautolu. (Totou Ioane 15:18-21.) Manako a tautolu ke fakafiafia a Iehova. Ka vihiatia he tau tagata a tautolu ha ko e fakaalofa ke he Matua ha tautolu, ko e lekua ha lautolu a ia.

19. Muitua fēfē e tautolu e fakafifitakiaga he tau aposetolo?

 19 Ua fakaatā ha mena ne talahau po ke taute he tau tagata ke fakamā aki a koe ko e taha he Tau Fakamoli a Iehova. (Mika 4:5) Maeke a tautolu ke fakaako ke fahia ke he matakutaku tagata he manamanatu ke he fakafifitakiaga ne fakatoka he tau aposetolo i Ierusalema he mole laia e kelipopo a Iesu. Iloa e lautolu na vihiatia lahi he tau takitaki lotu Iutaia a lautolu. (Gahua 5:17, 18, 27, 28) Ka e he tau aho takitaha ne matutaki a lautolu ke o atu ke he faituga mo e fakakite a lautolu ko e tau tutaki ha Iesu. (Gahua 5:42) Nakai fakaatā e lautolu e matakutaku ke taofi a lautolu. Maeke foki a tautolu ke kautū mai he matakutaku tagata he fakailoa tumau ko tautolu ko e Tau Fakamoli a Iehova he gahuaaga, aoga, mo e tuutakaina ha tautolu.​—Gahua 4:29; Roma 1:16.

20. Ko e ha ne fiafia e tau aposetolo pete kua vihiatia ki a lautolu?

20 Ko e ha ne fiafia e tau aposetolo? Iloa e lautolu e kakano ne vihiatia a lautolu, ti onoono a lautolu ki ai ko e lilifu ke ekefakakelea ha ko e taute e finagalo ha Iehova. (Luka 6:23; Gahua 5:41) Tohi he aposetolo ko Peteru he mogo fakamui: “Kaeke foki ke fakamamahi a mutolu ha ko e tututonu, uhoaki a mutolu.” (1 Pete. 2:19-21; 3:14) Ka maama e tautolu kua vihiatia a tautolu he taute e mena hako, to nakai fakaatā e tautolu e vihiatia he tau tagata ke fakamatakutaku a tautolu.

TO AOGA A KOE HE MAUTAUTEUTE

21-22. (a) Ko e heigoa haau kua fifili ke tauteute ke lata ma e favaleaga? (e) Ko e heigoa ka fakatutala a tautolu ki ai he vala tala ka mui mai?

21 Nakai iloa e tautolu e magaaho ka hoko e favaleaga po ke pā malu foki ka lauia e tapuakiaga ha tautolu ki a Iehova. Ka e iloa e tautolu kua maeke a tautolu ke mautauteute mogonei he fakamalolō e fakafetuiaga ha tautolu mo Iehova, ati hake e loto malolō ha tautolu, mo e fakaako ke fahia ke he vihiatia mai he tau tagata. Ko e tau fakatokatokaaga kua taute e tautolu mogonei ka lagomatai a tautolu ke tūmauokafua he tau mogo i mua.

22 Ka e kua ka pā e tapuakiaga ha tautolu? He vala tala ka mui mai, to fakatutala a tautolu ke he tau matapatu fakaakoaga ka lagomatai a tautolu ke fakatumau e fekafekau ki a Iehova pete ka pā e gahua ha tautolu.

LOLOGO 54 Lata Tautolu ke Tua

^ para. 5 Nakai manako a tautolu ke vihiatia mai. Ka e nakai leva to igatia a tautolu takitokotaha mo e fehagai ke he favaleaga. To lagomatai he vala tala nei a tautolu ke loto malolō he fehagai mo e favaleaga.

^ para. 7 Kikite The Watchtower, Tesemo 15, 1965, lau 756-767.

^ para. 14 Kikite The Watchtower, Iulai 15, 1979, lau 4-7. Kikite foki e vitiō Jehovah’s Name Will Be Made Known he JW Broadcasting®. Onoono ki lalo he INTERVIEWS AND EXPERIENCES.

^ para. 15 Kikite 2008 Yearbook of Jehovah’s Witnesses, lau 191-192.

^ para. 67 FAKAMAAMA E FAKATINO: He tapuakiaga magafaoa, fakaaoga he tau matua e tau laupepa fakaako (flash card) ke lagomatai e tau fanau ha laua ke ako manatu e tau kupu tohi.

^ para. 70 FAKAMAAMA E FAKATINO: He o atu he motokā ke he feleveiaaga, fakamahani e magafaoa he uhu e tau lologo he Kautu.