Skip to content

Skip to table of contents

Tau Fakamoli a Iehova

Fifili e vagahau Faka-Niue

 VALA TALA FAKAAKO 29

‘Kia O Atu ke Eke e Tau Motu Oti mo Tutaki’

‘Kia O Atu ke Eke e Tau Motu Oti mo Tutaki’

“Hanei, kia o atu a a mutolu ke eke e tau motu oti kana mo tutaki.”​—MATA. 28:19.

LOLOGO 144 Laveakiaga ma Lautolu ke Moui

FAKAMAAMAAGA KŪ *

1-2. (a) Hagaao ke he poakiaga ha Iesu ia Mataio 28:18-20, ko e heigoa e matagahua pauaki he fakapotopotoaga Kerisiano? (e) Ko e heigoa e tau hūhū ka fakatutala a tautolu ki ai he vala tala nei?

KO E tau aposetolo kua fiafia lahi he fakapotopoto a lautolu ke he mouga. He mole e liu tu mai ha Iesu, ne poaki a Iesu ke he tau aposetolo ke feleveia ke he matakavi ia. (Mata. 28:16) Liga ko e magaaho nai ne “kitia ai a ia he tau matakainaga kua fakalataha ne tokolima e teau mo e tuma.” (1 Kori. 15:6) Ko e ha ne ole a Iesu ke feleveia mo e tau tutaki haana? Ke tala age ki a lautolu e matagahua fiafia: “Hanei, kia o atu a a mutolu ke eke e tau motu oti kana mo tutaki.”​—Totou Mataio 28:18-20.

2 Ko e tau tutaki ne logona e tau kupu ha Iesu ko e vala he fakapotopotoaga Kerisiano he senetenari fakamua. Ko e matagahua pauaki he fakapotopotoaga ia ke moua e tau tutaki loga ma Keriso. * He vahā nei, totou hogofulu afe e tau fakapotopotoaga Kerisiano mooli he lalolagi katoa, ti ko e matagahua pauaki he tau fakapotopotoaga nai kua tatai agaia. He vala tala nei, to fakatutala a tautolu ke he fā e hūhū: Ko e ha e taute tutaki kua aoga lahi? Ko e heigoa ne putoia ai? Fai vala kia e tau Kerisiano oti he taute tutaki? Ti ko e ha kua lata a tautolu ke fakauka ke he gahua nei?

 KO E HA E TAUTE TUTAKI KUA AOGA LAHI?

3. Hagaao ke he Ioane 14:6 mo e 17:3, ko e ha e gahua taute tutaki kua aoga lahi?

3 Ko e ha e gahua taute tutaki kua aoga lahi? Ha ko e tau tutaki ni he Keriso ka eke mo tau kapitiga he Atua. Lafi ki ai, ko lautolu ne mumui ki a Keriso kua mitaki e tau momoui ha lautolu mogonei ti amaamanaki atu ke momoui tukulagi anoiha. (Totou Ioane 14:6; 17:3.) Mooli, tuku mai e Iesu ki a tautolu e matagahua aoga lahi, ka e nakai taute e tautolu hoko tautolu ni e gahua nei. Tohi he aposetolo ko Paulo hagaao ki a ia mo e falu ne gahua auloa: “Ko e tau ekegahua a mautolu fakalataha mo e Atua.” (1 Kori. 3:9) Ko e lilifu mooli ne tuku mai e Iehova mo Keriso ke he tau tagata nakai mitaki katoatoa!

4. Ko e heigoa ka fakaako e tautolu ke he mena ne tupu kua putoia a Ivan mo Matilde?

4 Ko e gahua taute tutaki ka foaki ki a tautolu e fiafia lahi. Manamanatu ke he fakataiaga ha Ivan mo e hoana haana ko Matilde i Colombia. Ne fakamatala a laua ke he fuata taane ko Davier, ne tala age ki a laua: “Manako au ke hiki e moui haaku, ka e nakai maeke au.” Ko Davier ko e tagata hūmomi ne fakaaoga e tau tulaki kona, molea e inu kava, ti nofo mo e kapitiga fifine haana ko Erika. Fakamaama e Ivan: “Kamata a maua ke ahiahi ki a ia he maaga haana ne mamao, he o atu a maua he tau pasikala taholi ke he loga e tulā he tau puhalatū pelapela. He mailoga kua holo ki mua e mitaki he aga mo e mahani ha Davier, ne fakalataha foki a Erika ke he fakaako Tohi Tapu.” Nakai leva ti tiaki e Davier e tau tulaki kona, inu kava, mo e hūmomi. Mau foki e ia a Erika. Pehē a Matilde: “Magaaho ne papatiso a Davier mo Erika he 2016, manatu e maua a Davier ne pehē, ‘Manako au ke hiki, ka e nakai maeke au.’ Ai maeke a maua ke taofi e tau hihina mata.” Logona mooli e tautolu e fiafia lahi ka lagomatai e tau tagata ke eke mo tau tutaki he Keriso.

KO E HEIGOA KUA PUTOIA HE TAUTE TUTAKI?

5. Ko e heigoa e lakaaga fakamua he taute tutaki?

5 Fakagahua e tautolu e lakaaga fakamua he taute tutaki ka “hūhū” po ke kumi ki a lautolu kua hako e tuaga he loto. (Mata. 10:11) Fakakite e tautolu ko e Tau Fakamoli a Iehova a tautolu he fakamatala ki a lautolu oti ne feleveia mo tautolu. Fakakite e tautolu ko e tau Kerisiano mooli a tautolu he mumui ke he poakiaga he Keriso ke fakamatala.

6. Ko e heigoa ka lagomatai a tautolu ke kautū he gahua fakamatala?

6 Falu tagata kua makai ke fakaako e tau kupu mooli he Tohi Tapu, ka e tokologa ne feleveia mo tautolu kua liga nakai manako he mogo fakamua. Liga lata a tautolu ke fakalagalaga e fiafia ha lautolu. Ke kautū he gahua fakamatala, lata a tautolu ke mautauteute fakamitaki. Fifili e tau matakupu pauaki ne liga fiafia a lautolu ne feleveia mo tautolu. Ti fakatoka e puhala ka tutala a koe ke he tau matakupu takitaha.

7. Liga kamata fēfē e koe e fakatutalaaga mo e taha tagata, ti ko e ha ne manatu a koe kua aoga ke fanogonogo mo e fakakite e fakalilifu?

7 Ma e fakatai, liga hūhū a koe ke he tagata he kaina: “Mitaki nakai ka hūhū au ke moua e manatu haau ke he taha mena? Loga e lekua ne fehagai mo tautolu mogonei ne lauia e tau tagata he lalolagi katoa. Manatu nakai a koe to maeke e fakatufono he lalolagi nei ke fakamafola e tau lekua he lalolagi?” Ti maeke a koe ke fakatutala ke he Tanielu 2:44. Po ke liga pehē a koe ke he tuutakaina: “He manatu haau, ko e heigoa e puhala ne mua atu ke feaki e tau fanau mahani mitaki? Manako au ke logona e manatu haau.” Ti fakatutala ke he Teutaronome 6:6, 7. Ko e ha matakupu kua fifili a  koe ke fakatutala, manamanatu ke he tau tagata ka fanogonogo ki a koe. Manamanatu ke he puhala ka aoga a lautolu mai he mena ne fakaako mooli he Tohi Tapu. Ka tutala mo lautolu, aoga ke fanogonogo mo e fakalilifu ke he manatu ha lautolu. He puhala ia to maama mitaki e koe a lautolu, mo e to liga fanogonogo foki a lautolu ki a koe.

8. Ko e ha kua lata ke eketaha tumau ke taute e tau liu aahi atu?

8 Ato fifili e tagata ke fakaako e Tohi Tapu, liga lata a koe ke foaki e magaaho mo e eketaha ke taute e tau liu aahi atu. Ko e ha? Ha kua nakai atā e tau tagata ka liliu a tautolu ke ahiahi atu ki ai. Liga lata foki a koe ke liu lagaloga ato logona he tagata he kaina e fiafia ke talia e fakaako Tohi Tapu. Manatu, ko e akau kua liga tupu ka fakamalū tumau. Pihia foki, to liga tupu e fakaalofa he tagata ki a Iehova mo Keriso ka fakatutala tumau a tautolu mo e tagata ia ke he Kupu he Atua.

FAI VALA KIA E TAU KERISIANO OTI HE TAUTE TUTAKI?

Putoia e Tau Fakamoli he lalolagi katoa he kumi ki a lautolu ne lata mooli (Kikite paratafa 9-10) *

9-10. Ko e ha ne talahau e tautolu kua putoia e tau fekafekau Kerisiano oti he kumi a lautolu ne hako e tuaga he tau loto?

9 Ko e tau fekafekau Kerisiano oti kua putoia he lagomatai ke kumi a lautolu ne hako e tuaga he loto. Maeke ke fakatatai e gahua nei ke he kumi he tama ne galo. He puhala fe? Manamanatu ke he mena ne tupu mooli ke he tama taane ne tolu e tau he moui ne fano ti galo. Kavi ke he 500 e tagata ne putoia he kumi a ia. Fakahiku ai, kavi ke he 20 e tulā he galo e tama, ne moua he tagata gahua e tama taane tote he ulu hana. Nakai matalahi e tagata gahua ia he moua e tama taane. Pehē a ia: “Na tokologa e tagata ne kumi a ia.”

10 Tokologa e tagata ne tuga e tama ia. Logona hifo e lautolu kua galo a lautolu. Nakai fai amaamanakiaga a lautolu, ka e manako a lautolu ke he lagomatai. (Efeso 2:12) Molea e  valu miliona ha tautolu kua putoia he eketaha ke kumi a lautolu ne kua lata. Liga nakai moua e koe e taha tagata ke fakaako e Tohi Tapu mo koe. Ka e moua he falu tagata fakailoa ne gahua he matakavi taha ia e tagata kua manako ke fakaako e kupu mooli he Tohi Tapu. Ka feleveia e matakainaga taane po ke matakainaga fifine mo e taha tagata ti eke mo tutaki he Keriso, kua fiafia a lautolu oti ne fakalataha ke he gahua kumi nei.

11. Pete ka nakai fai fakaako Tohi Tapu a koe, ke he tau puhala fe ka lagomatai a koe ke taute tutaki?

11 Pete foki ka nakai fai fakaako Tohi Tapu a koe mogonei, maeke a koe ke lagomatai ke taute tutaki he falu puhala. Ma e fakatai, maeke a koe ke fakafeleveia ki a lautolu ne foou mo e fakakapitiga ki a lautolu ka o mai ke he Fale he Kautu. He puhala ia, kua maeke a koe ke lagomatai a lautolu ke talitonu ko e fakaalofa ne fakakite ko tautolu ko e tau Kerisiano mooli. (Ioane 13:34, 35) Ko e tau tali haau he tau feleveiaaga, pete he kū, ka fakaako ki a lautolu ne fakalataha foou mai ke fakakite ai e mauokafua he puhala fakamooli mo e fakalilifu. Maeke foki a koe ke fakatauō mo e tagata fakailoa foou he gahua fakamatala ti lagomatai a ia ke fakamaama e tau kupu Tohi Tapu ke he tau tagata. He taute pihia, to fakaako e koe a ia ke fifitaki e Keriso.​—Luka 10:25-28.

12. Lata nakai a tautolu ke moua e tau lotomatala pauaki ke taute tutaki? Fakamaama.

12 Nakai lata a tautolu ke manamanatu kua latatonu a tautolu ke moua e tau lotomatala pauaki ke fakaako e falu ke eke mo tau tutaki ha Iesu. Nakai pihia he ha? Manamanatu ke he fakataiaga ki a Faustina ne nofo i Bolivia. Nakai iloa a ia ke totou he feleveia mo e Tau Fakamoli a Iehova. Tali mai mogoia, kua iloa tote a ia ke totou. Papatiso a ia mogonei ti fiafia ke fakaako e falu. Lima e fakaako Tohi Tapu haana ne taute he tau faahi tapu takitaha. Pete he nakaila iloa mitaki a Faustina ke totou tuga e laulahi he tau tagata fakaako haana, lagomatai e ia tokoono e tagata ke hokotia ke he papatiso.​—Luka 10:21.

13. Pete he lavelave lahi a tautolu, ko e heigoa falu monuina ka moua e tautolu he gahua taute tutaki?

13 Tokologa e Kerisiano ne lavelave lahi he taute e tau matagahua aoga. Ka e fakatoka agaia e lautolu e magaaho ke taute e tau fakaako Tohi Tapu, ti lahi e fiafia ne moua mai ai. Mailoga e fakataiaga ki a Melanie. Ko e matua tokotaha a ia ne nofo i Alaska ne feaki e tama fifine ne valu e tau he moui. Gahua tupe tumau foki a ia mo e lagomatai ke leveki e matua ne gagao kenesā. Ko Melanie tokotaha ni e Fakamoli ne nofo he taone ne tū mamao. Fa liogi a ia ke fahia ke fehagai mo e makalili ti fano ke fakamatala ha kua manako mooli a ia ke moua e tagata ke fakaako e Tohi Tapu.  Fakamui ne feleveia a ia mo Sara ne fiafia lahi he iloa na fai higoa e Atua. Fai magaaho he mole, talia e Sara ke fakaako Tohi Tapu. Pehē a Melanie: “He tau afiafi Faraile, kua mategūgū au ka e aoga ke he tama fifine haaku mo au he o atu ke taute e fakaako ia. Fiafia a maua he taute e tau kumikumiaga ke he tau hūhū ha Sara, ti fiafia lahi a maua ke kitia kua eke a Sara mo kapitiga ha Iehova.” Fehagai fakamalolō a Sara ke he totokoaga, toka e tapu haana, ti papatiso.

KAKANO KUA LATA KE FAKAUKA HE TAUTE TUTAKI

14. (a) Fakatatai fēfē a lautolu ne taute tutaki ke he tau tagata takafaga ika? (e) Lauia fēfē a koe he tau kupu ha Paulo ia 2 Timoteo 4:1, 2?

14 Pete he tuga kua nakai fai fua e gahua fakamatala haau, ua fakalolelole he kumi a lautolu ne manako ke eke mo tau tutaki. Manatu na fakatatai e Iesu e taute tutaki ke he takafaga ika. Lahi e magaaho ka fakaaoga he tau tagata takafaga ika ato moua e lautolu e tau ika. Fa mahani kua gahua mule a lautolu ke he pō po ke pogipogi kī, ti falu mogo kua loa e mena ne ō a lautolu ki ai. (Luka 5:5) Pihia foki, falu tagata ne taute tutaki ne lahi e magaaho he “takafaga” fakamalolō he tau magaaho kehekehe mo e tau matakavi kehekehe. Ko e ha? Ke maeke a lautolu ke feleveia mo e tau tagata. Ko lautolu ne lali fakalahi kua fa moua e palepale he feleveia mo e tau tagata ne fiafia ke he fekau ha tautolu. Maeke nakai a koe ke fakamatala he magaaho he aho ka liga feleveia a koe mo e tau tagata po ke he matakavi kua liga feleveia a koe mo lautolu?​—Totou 2 Timoteo 4:1, 2.

Fakauka he lagomatai e tau tagata fakaako haau ke holo ki mua fakaagaaga (Kikite paratafa 15-16) *

15. Ko e ha kua lata ke fakauka he taute e tau fakaako Tohi Tapu?

 15 Ko e ha kua latatonu ke fakauka he taute e tau fakaako Tohi Tapu? Taha kakano kua lata a tautolu ke lahi e mena ke taute he nakai ni lagomatai e tagata fakaako ke iloa mo e fiafia ke he tau fakaakoaga he Tohi Tapu. Lata a tautolu ke lagomatai e tagata fakaako ke iloa mo e fakaalofa ki a Iehova ko e Punaaga he Tohi Tapu. Lafi ke he lagomatai e tagata fakaako ke iloa e tau mena ne manako a Iesu ke he tau tutaki haana, lata a tautolu ke lagomatai e tagata fakaako ke iloa e puhala ke moui tuga e Kerisiano mooli. Lata a tautolu ke fakauka he lagomatai a ia kua taufetului ke fakagahua e tau matapatu fakaakoaga he Tohi Tapu. Falu ne maeke ke hiki e tau manamanatuaga mo e tau aga ha lautolu he tau mahina gahoa; ka e leva e falu.

16. Ko e heigoa ne fakaako e koe mai he fakataiaga hagaao ki a Raúl?

16 Ko e misionare i Peru ne fakakite e mena mitaki ne tupu ha ko e fakauka. “Ne ua e tohi kua fakaako e au mo e tagata fakaako Tohi Tapu ko Raúl,” ui he misionare. “Ka e fehagai agaia a ia mo e tau lekua lalahi he moui haana. Lekua e fakamauaga haana, kupu pilo tumau, mo e uka e tau fanau ke fakalilifu a ia. Hau tumau a ia ke he tau feleveiaaga, ti matutaki au ke ahiahi atu ki a ia ke lagomatai a ia mo e magafaoa haana. Molea e tolu e tau he feleveia a maua, ne hokotia a ia ke lata ke papatiso.”

17. Ko e heigoa ka fakatutala a tautolu ki ai he vala tala ka mui mai?

17 Tala mai a Iesu ki a tautolu “kia o atu . . . ke eke e tau motu oti kana mo tutaki.” Ke fakamooli e poakiaga ia, fa tutala a tautolu ke he tau tagata ne kehe lahi e puhala manamanatu mai he ha tautolu, putoia a lautolu ne nakai ō he ha tapu po ke nakai talitonu na fai Atua. Ko e vala tala ka mui mai to fakatutala ke he puhala ka folafola e tautolu e tala mitaki ke he tau tagata he tau tutūaga kehekehe.

LOLOGO 44 Gahua Helehele Fiafia

^ para. 5 Ko e fakapotopotoaga Kerisiano kua moua e kotofaaga pauaki ke lagomatai e tau tagata ke eke mo tau tutaki he Keriso. Foaki mai he vala tala nei e tau lagomataiaga ke taute aki e tautolu e matagahua ia.

^ para. 2 FAKAMAAMA E TALAHAUAGA: Ko e tau tutaki he Keriso ne nakai ni iloa hokoia e tau mena ne fakaako e Iesu. Fakagahua e lautolu e tau mena ne fakaako. Lali fakalahi a lautolu ke muitua fakatata ke he tau tuagahui, po ke fakafifitakiaga ha Iesu.​—1 Pete. 2:21.

^ para. 52 FAKAMAAMA E FAKATINO: Ko e tagata ne taute ke fano fenoga kua talia e tohi mai he Tau Fakamoli he malē vakalele. Fakamui, he fenoga evaeva haana ne kitia e ia e falu Fakamoli hane gahua fakamatala he toloaga. He liu a ia ki kaina, ne ahiahi atu e tau tagata fakailoa ke he kaina haana.

^ para. 54 FAKAMAAMA E FAKATINO: Talia he tagata ia e fakaako Tohi Tapu. Fakahiku, ti hokotia a ia ke lata ke papatiso.