Skip to content

Skip to table of contents

Tau Fakamoli a Iehova

Fifili e vagahau Faka-Niue

 VALA TALA FAKAAKO 30

Hokotia ke he Tau Loto he Tau Tagata ne Nakai Matutaki ke he Lotu

Hokotia ke he Tau Loto he Tau Tagata ne Nakai Matutaki ke he Lotu

“Kia moua e au a lautolu kua lolelole; kua eke au mo tau mena oti ke he tau tagata oti kia momoui ai ni falu kia au.”​—1 KORI. 9:22.

LOLOGO 45 Holo ki Mua!

FAKAMAAMAAGA KŪ *

1. Ko e heigoa e hikiaga ne tupu ke he falu matakavi he tau tau kua mole?

KE HE tau afe tau, laulahi he tau tagata he lalolagi ne tuga kua fai lotu. Ka e he tau hogofulu tau mogonei kua lahi mahaki e hiki. Tokologa atu e tagata ne nakai fai lotu. Ti ko e falu motu, laulahi he puke tagata ne fakamaama e lautolu a lautolu kua nakai fai lotu. *​—Mata. 24:12.

2. Ko e heigoa e falu kakano ne tokologa e tagata kua nakai matutaki ke he lotu?

2 Ko e ha ne tokologa lahi e tagata ne manamanatu ki a lautolu kua nakai matutaki ke he lotu? * Falu ne liga fakatauhele he tau fakafiafiaaga po ke tau lekua. (Luka 8:14) Falu ne nakai talitonu ko e mena fai Atua. Falu ne talitonu ke he Atua ka e manamanatu ko e lotu ko e puhala tuai, nakai aoga, ti nakai fetataiaki e saiene mo e manamanatuaga hako. Liga logona e lautolu e tau kapitiga, tau faiaoga, po ke tau tagata taute vala tala ne pehē kua tupumainoa e moui, ka e lavea a lautolu ke logona e tau kakano hako he talitonu ke he Atua. Falu ne vihiatia e tau akoako ha ko e lotokai ke moua e tau tupe mo e pule. He falu matakavi, kua fakakaupā he tau fakatufono e tau matagahua fakalotu.

3. Ko e heigoa e kakano he vala tala nei?

3 Poaki a Iesu ki a tautolu ke “eke e tau motu oti kana mo tutaki.” (Mata. 28:19) Lagomatai fēfē e tautolu e tau tagata ne  nakai matutaki ke he lotu ke fakaako ke fakaalofa ke he Atua ti eke mo tau tutaki he Keriso? Lata a tautolu ke mailoga ko e tali he tagata ke he fekau ha tautolu kua liga fakavē ke he matakavi ne tupu hake a ia. Ma e fakatai, ko e tau tagata mai i Europa ne liga nakai tatai e tali ke tuga ha lautolu mai i Asia. Ko e ha? I Europa, tokologa ne fai iloaaga hagaao ke he Tohi Tapu mo e mahani ke he manatu kua tufuga he Atua e tau mena oti kana. Ka e i Asia, laulahi he tau tagata kua iloa tote po ke nakai iloa hagaao ke he Tohi Tapu, ti liga nakai talitonu a lautolu ke he Tufuga. Ko e kakano he vala tala nei ke lagomatai a tautolu ke hokotia ke he tau loto ha lautolu oti ne feleveia mo tautolu he gahua fakamatala, pete ni e feakiaga ha lautolu.

FAKATUMAU E AGA MITAKI

4. Ko e ha kua lata a tautolu ke tumau e aga mitaki?

4 Kia Aga Mitaki. He tau tau takitaha, ha ha i ai e tau tagata ne nakai matutaki ke he lotu kua eke mo Tau Fakamoli a Iehova. Tokologa ne fitā e mitaki e tuaga he tau mahani ti vihiatia ke he fakatupua he lotu. Falu ne kelea e tuaga he tau mahani ti tokologa kua aga kelea ne lata ke tiaki ai. Ha ko e lagomatai ha Iehova, maeke a tautolu ke iloa to moua e tautolu a lautolu “ne kotofa ke he moui tukulagi.”​—Gahua 13:48; 1 Timo. 2:3, 4.

Hiki e puhala haau ka fakamatala ki a lautolu kua nakai talitonu ke he Tohi Tapu (Kikite paratafa 5-6) *

5. Ko e heigoa ne fa taute e tau tagata ke tali fakamitaki ke he fekau ha tautolu?

5 Kia Totonu mo e Fakailoilo. Fa mahani kua tali fakamitaki he tau tagata e fekau ha tautolu he nakai ke he mena ne talahau e tautolu, ka e he puhala ne talahau ai e tautolu. Loto fakaaue a lautolu ke he totonu, fakailoilo, mo e fiafia mooli ha tautolu. Nakai peehi e tautolu a lautolu ke fanogonogo ke he mena ne talahau e tautolu. Ka e lali a tautolu ke maama e tau kakano he manatu ha lautolu ke he lotu. Ma e fakatai, iloa e tautolu falu ne nakai manako ke tutala mo e tau tagata kehe hagaao ke he lotu. Falu ne logona hifo ne nakai ko e mahani mitaki ke hūhū ke he tagata hagaao ke he manatu haana ke he Atua. Ha ha i ai falu ne logona hifo e mā ka kitia hane totou e Tohi Tapu, mua atu mo e taha he Tau Fakamoli a Iehova. He ha tuaga, lali a tautolu ke maama e tau logonaaga ha lautolu.​—2 Timo. 2:24.

6. Fakakite fēfē he aposetolo ko Paulo kua hikihiki a ia, ti fifitaki fēfē e tautolu a ia?

6 Ko e heigoa ka taute e tautolu kaeke ke nakai fiafia e tagata ka fakaaoga e tautolu e tau kupu tuga e “Tohi Tapu,” “tufugatia,” “Atua,” po ke “lotu”? Maeke a tautolu ke fifitaki e aposetolo ko Paulo mo e hikihiki e puhala vagahau ki a lautolu. He tutala a Paulo mo e tau Iutaia, ne fakaaoga e ia e Tohi Tapu. Ka tutala a ia ke he tau pulotu Heleni i Areopako, nakai fakaaoga e ia e Tohi Tapu. (Gahua 17:2, 3, 22-31) Muitua fēfē e tautolu e fakafifitakiaga ha Paulo? Ka feleveia a koe mo e tagata ne nakai talia e Tohi Tapu, liga mitaki ke nakai fatiaki fakahako mai he Tohi Tapu ka tutala mo ia. Ka mailoga e koe kua liga nakai fiafia e tagata ke kitia he falu he totou e Tohi Tapu mo koe, lali ke fakakite ki a ia e tau kupu tohi he puhala tuga he matini utafano.

7. Ke tuga a Paulo ne fakamaama ia 1 Korinito 9:20-23, ko e heigoa ha tautolu ka taute?

7 Kia Maama mo e Fanogonogo. Lali a tautolu ke maama e tau puhala kua fakaohooho e tau tagata ne feleveia mo tautolu. (Fakatai 20:5) Liu ke manamanatu ke he fakafifitakiaga ha Paulo. Ne tupu hake a ia mo e tau Iutaia. Mooli kua hikihiki e fakamatala haana ke he tau Tagata Motu Kehe, ko e tau tagata ne iloa tote po ke nakai iloa a Iehova mo e Tohi Tapu. Liga lata a tautolu ke taute e kumikumiaga po ke tutala ki a lautolu ne kua leva i loto he fakapotopotoaga ti maeke a tautolu ke maama mitaki e tau tagata he fonua ha tautolu.​—Totou 1 Korinito 9:20-23.

8. Ko e heigoa taha puhala ke kamata e fakatutalaaga hagaao ke he Tohi Tapu?

 8 Ko e foliaga ha tautolu ke kumi a lautolu “kua lata.” (Mata. 10:11) Ke lauia mitaki, lata a tautolu ke uiina e tau tagata ke talahau e tau manatu ha lautolu mo e fanogonogo fakamitaki ki ai. Ko e matakainaga taane i England ne hūhū ke he tau tagata ma e manatu ha lautolu hagaao ke he puhala ke moua e fakamauaga fiafia, puhala ke feaki e tau tama, po ke puhala ke fahia ke he nakai fakafili tonu. Mole ai e fanogonogo ke he tau manatu ha lautolu, pehē a ia, “Fēfē e manatu haau ke he fakatonuaga nei ne tohia teitei 2,000 tau kua mole?” He nakai fakaaoga e talahauaga “Tohi Tapu,” ne fakakite e ia ki a lautolu e tau kupu tohi ne kua fifili fakamitaki i loto he telefoni haana.

HOKOTIA KE HE TAU LOTO HE TAU TAGATA

9. Liga lagomatai fēfē e tautolu e tau tagata ne fa kalo ke tutala hagaao ke he Atua?

9 Maeke a tautolu ke hokotia ke he tau loto he tau tagata ne fa kalo he tutala hagaao ke he Atua he fakatutala ke he taha mena kua fitā he lauia a lautolu. Ma e fakatai, tokologa ne ofoofogia ke he tufugatia. Ti liga talahau e tautolu e taha mena pehenā: “Liga iloa e koe loga e mena ne taute he tau saienetisi he fifitaki ke he tau tufugatia. Tuga anei, ko e tau tagata ne talaga e maikorofoni ne kumikumi ke he tau teliga, mo e tau tagata ne talaga e pokiata ne kumikumi ke he tau mata. Ko e heigoa e manatu haau ke he tau tufugatia? Manamanatu kia a koe ko e taha malolō ofoofogia, ko e tagata, po ke taha mena?” He fanogonogo fakamitaki, maeke a tautolu ke lafi: “He iloa he tau tagata enisinia e talagaaga he tau teliga mo e tau mata, liga manamanatu a tautolu ko hai ne fakaako mai a lautolu i ai. Ofoofogia au ke he taha mena ne tohi he tagata tohia poeme i tuai: ‘Ko ia ne eke e teliga, nakai kia logona e ia? ko ia ne eke e mata, nakai kia kitia e ia? . . . ko ia kua fakaako e tau tagata kia iloilo.’ Falu saienetisi ne talitonu pihia foki.” (Sala. 94:9, 10) Maeke mogoia a tautolu ke fakakite e vitiō mai he jw.org® i lalo he “Interviews and Experiences” he tau fufuta “Viewpoints on the Origin of Life.” (Onoono ki lalo he PUBLICATIONS > VIDEOS.) Po ke maeke a tautolu ke age ki a lautolu e porosua Was Life Created? po ke porosua The Origin of Life​—Five Questions Worth Asking.

10. Liga kamata fēfē e tautolu e fakatutalaaga mo e tagata ne nakai hihiga ke tutala hagaao ke he Atua?

10 Laulahi he tau tagata ne manako ke he vahā mitaki anoiha. Ka e tokologa ne matakutaku to moumou po ke nakai fai tagata ka nonofo he lalolagi. Ne pehē e leveki faifano i Norway  ko e tau tagata ne nakai hihiga ke tutala hagaao ke he Atua kua fa makai ke tutala hagaao ke he tau tuaga he lalolagi. Ka oti e feleveia mo e tau tagata, pehē a ia: “Ko e heigoa e manatu haau hagaao ke he amaamanakiaga ha tautolu ma e vahā mitaki anoiha? Fakavē kia e amaamanakiaga mua ue atu ha tautolu ke he tau tagata politika, tau saienetisi, po ke taha tagata foki?” He mole e fanogonogo fakamitaki, totou po ke fatiaki e ia e kupu tohi ne hagaao ke he vahā mitaki anoiha. Ofoofogia e falu ha ko e maveheaga he Tohi Tapu to tumau tukulagi e lalolagi ti ko e tau tagata mitaki to nonofo tukulagi i ai.​—Sala. 37:29; Fakama. 1:4.

11. Ko e ha kua lali a tautolu ke fakaaoga e tau puhala kehekehe, ti fifitaki fēfē e tautolu a Paulo tuga ne fakamaama ia Roma 1:14-16?

11 Mitaki ke fakaaoga e tau puhala kehekehe he fakatutala mo lautolu ne feleveia mo tautolu. Ko e ha? Ha kua kehekehe e tau tagata takitaha. Ko e mena kua futia ke he taha kua liga nakai fiafia ke he taha. Falu ne fiafia ke fakatutala hagaao ke he Atua po ke Tohi Tapu, ka e fiafia e falu ke tutala fakamua ke he falu mena kehe. He ha tuaga ni, lata a tautolu ke tutala ke he tau tagata oti kana. (Totou Roma 1:14-16.) Tokaloto e tautolu ko Iehova kua fakatupu e kupu mooli he tau loto ha lautolu kua fiafia ke he tututonu.​—1 Kori. 3:6, 7.

FOLAFOLA E KUPU MOOLI KE HE TAU TAGATA MAI I ASIA

Loga e tagata fakailoa he Kautu ne fakakite e fiafia fakatagata ke he falu mai he tau motu ne nakai faka-Kerisiano mo e tala age ki a lautolu e iloilo aoga he Tohi Tapu (Kikite paratafa 12-13)

12. Ko e heigoa ha tautolu ka taute ke hokotia ke he tau tagata he tau motu Asia ne nakai manamanatu kua fai Tufuga?

12 Tokologa e tagata fakailoa he lalolagi katoa kua feleveia mo e tau tagata mai he tau motu Asia, putoia e falu ne o mai he tau matakavi ne fakakaupā he tau fakatufono e matagahua fakalotu. Tokologa he tau motu Asia ne nakai manamanatu fakahokulo kua fai Tufuga. Falu ne fia iloa ti talia ke fakaako e Tohi Tapu, ka e fakauaua e falu he kamataaga ke iloa e tau manatu foou. Ko e heigoa ka taute e tautolu ke lagomatai a lautolu? Falu tagata fakailoa ne kautū he kamata e fakatutalaaga fakakapitiga, fakakite e fiafia fakatagata, kaeke ke latatonu mogoia ti talahau e puhala ne holo ki mua e moui ha lautolu he kamata ke fakagahua e matapatu fakaakoaga pauaki he Tohi Tapu.

13. Ko e heigoa ka futia e tau tagata ke he Tohi Tapu? (Kikite fakatino he kili.)

13 Tokologa e tagata ne futia fakamua ke he pulotu aoga he Tohi Tapu. (Fakama. 7:12) I New York, ko e matakainaga fifine ne ahiahi atu ke he tau tagata vagahau Mandarin ne pehē: “Lali au ke fiafia ke he tau tagata mo e fanogonogo ki a lautolu. Ka iloa e au ko e tau tagata foou a lautolu ne hiki mai, fa hūhū au: ‘Mahani fakahaga nakai a koe mo e hiki? Kua moua nakai e gahua haau? Taute fakamitaki nakai he tau tagata i hinei a koe?’” Falu mogo ne hafagi he mena nei e puhala ke tutala hagaao ke he Tohi Tapu. Ka latatonu, lafi he matakainaga fifine: “Ko e heigoa ka talahau e koe kua mua atu e aoga ke mitaki e tau fakafetuiaga mo e tau tagata? Maeke nakai au ke fakakite atu e fakatai he Tohi Tapu? Pehē: ‘Ko e kamataaga he taufetoko, kua tuga he liligi atu e maga vai haia; ko e mena ia kia tiaki a e taufetoko ka e nakaila tupu ai e latau.’ Manatu nakai a koe kua lagomatai he fakatonuaga nei a tautolu ke mitaki e tau fakafetuiaga mo e falu?” (Fakatai 17:14) Ko e tau fakatutalaaga pihia ka lagomatai a tautolu ke mailoga a lautolu ne manako ke fakaako foki.

14. Lagomatai fēfē he taha matakainaga he Faahi Uta Mamao e tau tagata ne pehē kua nakai talitonu a lautolu ke he Atua?

14 Ka e kua a lautolu ne tala mai kua nakai talitonu a lautolu ke he Atua? Ko e matakainaga taane ne kua leva e fakamatala ke he tau tagata ne nakai matutaki ke he lotu he Faahi Uta Mamao ne fakamaama: “Ka pehē e tagata i hinei, ‘Nakai talitonu au ke he Atua,’ kakano a ia kua nakai talitonu a ia ke tapuaki ke he tau  atua ne tapuaki he tau tagata tokologa he matakavi ia. Fa mahani au ke talia ko e laulahi he tau atua kua talaga he tau tagata ti nakai mooli. Fa totou e au e Ieremia 16:20: ‘To eke kia he tagata e tau atua māna, ka e nakai ko e tau atua a lautolu?’ Ti hūhū au: ‘Maeke fēfē a tautolu ke kitia e atua mooli mai he atua ne talaga he tau tagata?’ Fanogonogo fakamitaki au, ti totou mogoia e Isaia 41:23: ‘Kia fakakite mai e mutolu e tau mena ke tutupu mai a mui, ti iloa ai e mautolu ko e tau atua a mutolu.’ Fakakite mogoia e au e fakataiaga he puhala ne talahau tuai e Iehova e vahā anoiha.”

15. Ko e heigoa ka fakaako e tautolu mai he fakataiaga he matakainaga i Asia Uta?

15 Ko e matakainaga taane i Asia Uta ne fakaaoga e puhala nai ka taute e tau liu aahi atu. Pehē a ia: “Fakakite age e au e tau fakataiaga he pulotu he Tohi Tapu, tau perofetaaga he Tohi Tapu kua fakamooli, mo e tau matafakatufono ne puipui e lagi mo e lalolagi. Fakakite age mogoia e au ko e tau mena oti nei ne maeke ke iloa kua ha ha i ai e Tufuga moui mo e iloilo. Ka talia he tagata e manatu na fai Atua, kamata au ke fakakite ki a ia e mena ne talahau he Tohi Tapu hagaao ki a Iehova.”

16. Hagaao ke he Heperu 11:6, ko e ha kua lata e tau tagata fakaako ke tua ke he Atua mo e Tohi Tapu, ti lagomatai fēfē e tautolu a lautolu ke feaki e mena ia?

16 Ka taute e tautolu e tau fakaako Tohi Tapu mo e tau tagata ne nakai matutaki ke he lotu, lata a tautolu ke fakatumau ke ati hake e taofiaga ha lautolu ko e mena fai Atua. (Totou Heperu 11:6.) Ti lata a tautolu ke lagomatai a lautolu ke ati hake e tua ke he Tohi Tapu. Liga latatonu ke fatiaki lagaloga ai e tautolu. He tau fakaakoaga takitaha, liga lata a tautolu ke fakatutala ke he fakamooliaga ko e Tohi Tapu ko e Kupu he Atua. Tutala fakakū ke he tau perofetaaga he Tohi Tapu kua fakamooli, tonutika fakasaiene mo e fakamauaga tuai, po ke pulotu aoga.

17. Lauia fēfē e tau tagata ha ko e fakaalofa ha tautolu?

17 Lagomatai e tautolu e tau tagata ke eke mo tau tutaki he Keriso he fakakite e fakaalofa ki a lautolu, he fai lotu po ke nakai fai lotu a lautolu. (1 Kori. 13:1) He fakaako e tautolu a lautolu, ko e foliaga ha tautolu ke fakakite kua fakaalofa e Atua ki a tautolu ti manako ki a tautolu ke fakaalofa ki a ia. He tau tau takitaha totou afe he mogo fakamua ne tote po ke nakai fiafia ke he lotu kua papatiso ha kua tupu e fakaalofa ha lautolu ke he Atua. Kia aga mitaki, ti fakakite e fakaalofa mo e fiafia ke he tau tagata oti kana. Fanogonogo ki a lautolu. Lali ke maama a lautolu. He fakafifitakiaga haau, fakaako a lautolu ke eke mo tau tutaki he Keriso.

LOLOGO 153 Fēfē e Logonaaga Haau?

^ para. 5 To feleveia tumau a tautolu mogonei mo e tau tagata ne nakai matutaki ke he lotu. Fakatutala e vala tala nei ke he puhala ka folafola e tautolu e kupu mooli he Tohi Tapu ki a lautolu mo e puhala ka lagomatai e tautolu a lautolu ke talitonu ke he Tohi Tapu mo e tua ki a Iehova ko e Atua.

^ para. 1 Hagaao ke he tau kumikumiaga, falu he tau motu ia ko: Albania, Australia, Austria, Azerbaijan, Canada, China, Czech Republic, Denmark, France, Germany, Hong Kong, Ireland, Israel, Japan, Netherlands, Norway, South Korea, Spain, Sweden, Switzerland, United Kingdom, mo Vietnam.

^ para. 2 FAKAMAAMA E TALAHAUAGA: He vala tala nei, ko e talahauaga nakai matutaki ke he lotu kua hagaao ke he tau tagata ne nakai fai lotu po ke nakai talitonu ke he Atua.

^ para. 54 FAKAMAAMA E FAKATINO: Ko e matakainaga taane ne fakamatala ke he tagata gahua he fale gagao, ti kitekite a ia he mogo fakamui ke he Online Bible Study Lessons.