Skip to content

Skip to table of contents

Tau Fakamoli a Iehova

Fifili e vagahau Faka-Niue

Ko e Tau Tagata ha Iehova a Tautolu

Ko e Tau Tagata ha Iehova a Tautolu

“Uhoaki e motu kua Atua kia Iehova, ko e motu kua fifili e ia ke eke māna.”​—SALAMO 33:12.

TAU LOLOGO: 31, 48

1. Ko e ha ne talahau e tautolu kua ha ha ia Iehova e tau mena oti kana? (Kikite fakatino he kamataaga.)

KUA pule a Iehova ke he tau mena oti kana! Ha ha ia Iehova e “lagi mo e lagi he tau lagi, ko e lalolagi foki, mo e tau mena oti kana ha ha i ai.” (Teutaronome 10:14; Fakakiteaga 4:11) Ha kua tufuga e Iehova e tau tagata, ko tautolu oti ko e tau koloa haana. (Salamo 100:3) Ka e mai he tau tagata oti kana ne momoui, fifili he Atua e falu ke eke mo tau tagata haana he puhala pauaki.

2. Hagaao ke he Tohi Tapu, ko hai kua eke mo tau tagata ha Iehova he puhala pauaki?

2 Ma e fakatai, fakamaama he Salamo 135 ko e tau tagata tapuaki fakamooli ha Iehova i Isaraela i tuai ne eke mo “koloa uho hana.” (Salamo 135:4) Fakailoa foki e Hosea to eke e falu ne nakai ko e tau Isaraela mo tau tagata ha Iehova. (Hosea 2:23) Ko e perofetaaga nei ne fakamooli he kamata a Iehova ke fifili e tau tagata ne nakai ko e tau Isaraela ke pule mo Keriso  he lagi. (Gahua 10:45; Roma 9:23-26) Ko lautolu ne fakauku he agaaga tapu ne fakahigoa “ko e motu tapu.” Moua e Iehova a lautolu māna. (1 Peteru 2:9, 10) Ka e kua e tau Kerisiano fakamooli oti he vahā nei ne amaamanaki ke momoui tukulagi he lalolagi? Fakahigoa foki e Iehova a lautolu ko e “haku motu” mo e ko “lautolu ne fifili e au.”​—Isaia 65:22.

3. (a) Ko hai he vahā nei kua moua e fakafetuiaga pauaki mo Iehova? (e) Ko e heigoa ka fakatutala a tautolu ki ai he vala tala nei?

3 He vahā nei, ko e “fuifui mamoe gahoa” ne amaamanaki ke momoui tukulagi he lagi, mo e ‘tau mamoe kehe’ ne amaamanaki ke momoui tukulagi he lalolagi, kua tapuaki auloa ki a Iehova ke he “taha ai e fuifui mamoe.” (Luka 12:32; Ioane 10:16) Manako a tautolu ke fakakite ki a Iehova e loto fakaaue ha kua moua e tautolu e fakafetuiaga uho lahi mo ia. He vala tala nei, to fakatutala a tautolu ke he puhala ka fakakite e loto fakaaue ha tautolu ki a Iehova ma e lilifu pauaki nei.

TUKULELE HA TAUTOLU A TAU MOMOUI KI A IEHOVA

4. Fakaaue fēfē a tautolu ki a Iehova he fakaatā a tautolu ke moua e fakafetuiaga mo Ia, ti taute pihia fēfē e Iesu?

4 Fakakite e tautolu e loto fakaaue ki a Iehova ka tukulele a tautolu ki a Ia ti papatiso. Maeke mogoia he tau tagata oti ke kitia ko e tau tagata ha Iehova a tautolu ti makai a tautolu ke omaoma ki a Ia. (Heperu 12:9) Taute pihia e Iesu he papatiso a ia. Pete ko ia he vala he motu ne kua tukulele ki a Iehova, ne foaki e ia a ia ki a Iehova. Tuga kua pehē a ia: “Haku Atua na e, kua fiafia au ke eke hāu a finagalo; ha i loto ia au hau a fakatufono.”​—Salamo 40:7, 8.

5, 6. (a) Ko e heigoa ne talahau e Iehova he magaaho ne papatiso a Iesu? (e) Ko e heigoa e fakatai ka lagomatai a tautolu ke maama e logonaaga ha Iehova ke he tukuleleaga ha tautolu?

5 Fēfē e logonaaga ha Iehova he mogo ne papatiso a Iesu? Pehē e Tohi Tapu: “Kua papatiso a Iesu, ti hake mai agataha a ia he vai, kitiala, kua maihiua tuai e lagi kia ia, kua kitia foki e ia e Agaga he Atua kua hifo mai tuga ne lupe, kua hoko ki luga ia ia. Kitiala, ko e leo mai he lagi, kua pehe mai, Ko e haku a tama fakahele hanā, kua fiafia na au kia ia.” (Mataio 3:16, 17) Fitā a Iesu he eke mo tagata he Atua. Ka e fiafia a Iehova he kitia ko Iesu kua makai ke fakaaoga haana moui he fekafekau ki a Ia ni. Fiafia foki a Iehova ka tukulele ha tautolu a tau momoui ki a ia mo e to fakamonuina a tautolu.​—Salamo 149:4.

6 Ka kua fitā e pule a Iehova ke he tau mena oti kana! Ti ko e heigoa ka foaki age e tautolu ki a ia? Manamanatu ke he tagata ne ha ha he katene haana e tau fiti fulufuluola. Taha aho ne tau mai he tama fifine tote haana e taha he tau fiti ti age ki a ia. Pete kua fitā e pule e matua taane ofania ke he fiti, fiafia a ia ke he mena fakaalofa. Fakakite he mena ia kua ofania he tama fifine haana a ia. Ko e fiti ne age he tama fifine haana kua mua atu e uho ki a ia ke he tau fiti oti ne toe he katene. He puhala taha, fiafia a Iehova ka tukulele fakamakai ha tautolu a tau momoui ki a Ia.​—Esoto 34:14.

7. Lagomatai fēfē e Malaki a tautolu ke maama e logonaaga ha Iehova ki a lautolu kua fekafekau fakamakai ki a Ia?

7 Totou Malaki 3:16. Ko e ha kua aoga lahi ke tukulele e moui haau ki a Iehova ti  papatiso? He fakafua e matua fifine haau ia koe, fitā he pule e Tufuga haau ko Iehova ki a koe. Ka e manamanatu la ke he fiafia ha Iehova ka talia e koe a Ia ko e Pule haau ti tukulele ki a Ia! (Tau Fakatai 23:15) Fioia e Iehova a lautolu kua makai ke fekafekau ki a Ia, ti tohi hifo e tau higoa ha lautolu ke he haana a “tohi ke fakamanatu.”

8, 9. Ko e heigoa ne ole a Iehova ki a lautolu kua tohi e tau higoa ke he haana “tohi ke fakamanatu”?

8 Ka manako a tautolu ke fakatumau e higoa he “tohi ke fakamanatu” ha Iehova, fai mena kua lata a tautolu ke taute. Pehē a Malaki kua lata a tautolu ke matakutaku ki a Iehova ti manamanatu fakahokulo ke he higoa Haana. Ka tapuaki a tautolu ke he ha tagata po ke ha mena, to utakehe e higoa ha tautolu mai he tohi ha Iehova!​—Esoto 32:33; Salamo 69:28.

He momoui, lata a tautolu ke fakamooli ke he tau gahua kua omaoma a tautolu ki a Iehova

9 Nakai ni mavehe a tautolu ke taute e finagalo ha Iehova ti papatiso. Ko e tau mena nei kua lagataha ni he taute e tautolu, ka ko e tapuaki ki a Iehova ko e puhala moui ha tautolu. He tau aho takitaha he momoui a tautolu, lata ke fakamooli ke he tau gahua kua omaoma a tautolu ki a Iehova.​—1 Peteru 4:1, 2.

TIAKI E TAUTOLU E TAU MANAKO HE LALOLAGI

10. Ko e heigoa kua kitia maaliali e kehekehe ha lautolu kua fekafekau ki a Iehova mo lautolu ne nakai fekafekau ki a ia?

10 He vala tala fakamua ne fakaako e tautolu ko Kaino, Solomona, mo e tau Isaraela ne talahau kua tapuaki ki a Iehova ka e nakai mahani fakamooli a lautolu ki a ia. Fakaako he tau fakafifitakiaga nei ki a tautolu kua nakai lata hokoia ke talahau kua tapuaki a tautolu ki a Iehova. Lata a tautolu ke vihiatia e mena kua kelea mo e fiafia ke he mena kua mitaki. (Roma 12:9) Pehē a Iehova to kitia maaliali e kehekehe he “tagata mahani tututonu, kehe e tagata mahani kelea; kua kehe a ia kua fekafekau ke he Atua, mo ia kua nakai fekafekau kia ia.”​—Malaki 3:18.

11. Ko e ha kua lata ke mukamuka ma e tau tagata oti ke kitia kua tapuaki ni a tautolu ki a Iehova?

11 Loto fakaaue a tautolu ki a Iehova ha kua fifili a tautolu ke eke mo tau tagata haana! Lata ke mukamuka ma e tau tagata oti ke kitia ko tautolu kua kau ki a Iehova. (Mataio 5:16; 1 Timoteo 4:15) Hūhū hifo: ‘Kitia nakai he falu kua fakamooli katoatoa au ki a Iehova? Fiafia nakai au ke tala age ke he tau tagata ko au ko e taha he Tau Fakamoli a Iehova?’ Manamanatu la ke he hukia ha Iehova ka mā a tautolu ke tala age ke he falu ko tautolu ko e tau tagata Haana.​—Salamo 119:46; totou Mareko 8:38.

Fakakite fakamaali nakai he puhala moui haau ko koe taha he Tau Fakamoli a Iehova? (Kikite paratafa 12, 13)

12, 13. Taute fēfē he falu matakainaga ke uka ma e falu ke kitia a lautolu ko e Tau Fakamoli a Iehova?

12 Momoko ai, falu he Tau Fakamoli ne fifitaki e “agaga he lalolagi.” Ko e fua, nakai kehe lahi a lautolu mai ia lautolu ne nakai tapuaki ki a Iehova. (1 Korinito 2:12) Ko e “agaga he lalolagi” kua taute e tau tagata ke hagaaki ke he tau manako lotokai ni ha lautolu. (Efeso 2:3) Ma e fakatai, pete ni kua  moua e tautolu e tau fakatonuaga, falu ne fifili ke tauteute ke he tau tapulu kua nakai lilifu. Tui e lautolu e tau mena tui ne mapita mo e fakataki, ti tui foki ke he tau feleveiaaga Kerisiano. Po ke fifili e lautolu e tau puhala taute ulu fakaliga kehe. (1 Timoteo 2:9, 10) Ti ko e fua, liga uka e falu ke iloa ko e Tau Fakamoli a Iehova a lautolu po ke nakai.​—Iakopo 4:4.

13 Ha ha i ai falu puhala ne nakai kehe lahi e falu Fakamoli mai he lalolagi. Ma e fakatai, he tau fakafiafiaaga, ne koli mo e mahani e falu he puhala ne nakai lata ma e tau Kerisiano. Falu ne tuku e tau ata ha lautolu mo e tau talahauaga he initanete ne fakakite e manamanatu fakalalolagi ha lautolu. Liga nakai akonaki a lautolu he fakapotopotoaga Kerisiano ma e agahala kelea muitui, ka e maeke a lautolu ke fakaohooho kelea ke he tau matakainaga ha lautolu hane eketaha ke kehe mai he lalolagi.​—Totou 1 Peteru 2:11, 12.

Ua fakaohooho ha ko lautolu ne nakai kitia maaliali ke he faahi ha Iehova

14. Ko e heigoa kua lata ke taute e tautolu ke puipui e tuaga kapitiga pauaki ha tautolu mo Iehova?

14 Ko e tau mena oti kana he lalolagi kua taute ke maeke a tautolu ke hagaaki ke he “manako lahi he tino, mo e manako lahi he tau mata, katoa mo e tau mena he mouiaga nai ke hula ki ai.” (1 Ioane 2:16) Ko tautolu ko e tau tagata ha Iehova ti kehe a tautolu. “Tiaki e tautolu e tau mahani hepehepe, katoa mo e tau manako lahi he lalolagi,” mo e “nonofo fakalatalata a tautolu mo e tututonu katoa mo e mahani Atua ke he mouiaga nai.” (Tito 2:12) Ko e puhala katoa he tau momoui ha tautolu, putoia e puhala tutala, kai, inu, tauteuteaga, mo e gahua, kua lata ke maaliali ke he tau tagata oti ko tautolu ko e tau tagata ha Iehova.​—Totou 1 Korinito 10:31, 32.

 ‘MOUA E TAUTOLU E FAKAALOFA LAHI KO E TAHA KIA TAHA’

15. Ko e ha kua lata a tautolu ke totonu mo e fakaalofa ke he tau Kerisiano?

15 Fakakite e tautolu kua tokiofa e tautolu e tuaga kapitiga ha Iehova ha ko e puhala ne fehagai mo e tau matakainaga. Ko lautolu ko e tau tagata ha Iehova tuga a tautolu. Ka manatu e tautolu e mena nei, to fehagai tumau ai ki a lautolu he puhala totonu mo e fakaalofa. (1 Tesalonia 5:15) Aoga fēfē e mena nei? Pehē a Iesu ke he tau tutaki haana: “Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.”​—Ioane 13:35.

16. Ko e heigoa ne fakaako e tautolu mai he Fakatufono ha Mose ke he fakaalofa ha Iehova ma e tau tagata haana?

16 Ko e fakataiaga mai he Fakatufono ha Mose ka lagomatai a tautolu ke maama e puhala kua lata ke fehagai mo e falu he fakapotopotoaga. He faituga ha Iehova, ha ha i ai e tau koloa ne fakaaoga hokoia ni ma e tapuakiaga. Fakamaama fakamahino he Fakatufono e puhala kua lata he tau tagata Levi ke leveki e tau koloa nei, ti ko e ha tagata kua nakai muitua ke he tau fakatonuaga nei to tamate. (Numera 1:50, 51) Ka manamanatu lahi a Iehova ke he puhala ne leveki he tau tagata e tau koloa ne fakaaoga ma e tapuakiaga haana, to lahi fēfē e manamanatu haana ke he puhala ne fehagai e tau tagata ke he tau tagata tapuaki fakamooli haana ne tukulele! Fakailoa mai e ia kua uho lahi a tautolu ki a ia he pehē: “Ha ko ia kua piki atu kia mutolu, kua piki atu ai a ia ke he alito mata he hana fofoga.”​—Sakaria 2:8.

Mailoga e Iehova a tautolu ka fakamokoi, lima foaki, fakamagalo atu, mo e totonu

17. Ko e heigoa “kua hagao mai foki a Iehova mo e fanogonogo mai”?

17 Pehē a Malaki “kua hagao mai foki a Iehova mo e fanogonogo mai” ke he puhala ne  fehagai e tau tagata haana mo e falu. (Malaki 3:16) “Kua fioia he Iki [Iehova] hana tau tagata.” (2 Timoteo 2:19) Mataala lahi a Ia ke he tau mena oti kana ne taute mo e talahau e tautolu. (Heperu 4:13) Ka nakai mahani totonu a tautolu ke he tau matakainaga, mailoga e Iehova e mena ia. Ka e iloa tonu e tautolu kua mailoga foki e Iehova a tautolu ka mahani fakamokoi, lima foaki, fakamagalo atu, mo e mahani totonu.​—Heperu 13:16; 1 Peteru 4:8, 9.

“NAKAI TOKA E IEHOVA HANA MOTU”

18. Fakaaue fēfē a tautolu ki a Iehova he fifili a tautolu ke eke mo tau tagata haana?

18 Manako a tautolu ke fakakite ki a Iehova e loto fakaaue ha ko tautolu ko e tau tagata haana. Iloa e tautolu he tukulele e tau momoui ha tautolu ki a ia, ko e fifiliaga pulotu lahi mahaki anei kua taute e tautolu. Pete he nonofo a tautolu “he hau fakakeukeu mo e faliuliu,” maeke agaia a tautolu ke “nakai totoku kua kelea, to totonu” mo e “tau mena kua fakamaama aki e lalolagi.” (Filipi 2:15) Ti eketaha a tautolu ke kalo kehe he taute ha mena kua vihiatia e Iehova. (Iakopo 4:7) Fakaalofa mo e fakalilifu e tautolu e tau matakainaga ha ko lautolu foki ko e tau tagata ha Iehova.​—Roma 12:10.

19. Palepale fēfē e Iehova a lautolu ne eke mo tau tagata haana?

19 Mavehe he Tohi Tapu: “Nakai toka e Iehova hana motu.” (Salamo 94:14) Ko e fakamooliaga anei. Pete ni e mena ka tupu, to ha ha a Iehova mo tautolu. Ka mamate foki a tautolu to nakai nimo e ia a tautolu. (Roma 8:38, 39) “Ka momoui a tautolu, kua momoui ni ha ko e Iki [Iehova], ka mamate a tautolu kua mamate ni ha ko e Iki [Iehova]; haia ni, po ke momoui, po ke mamate a tautolu, ko e tau tagata he Iki [Iehova] a tautolu.” (Roma 14:8) Amanaki a tautolu ke he magaaho ka fakamomoui e Iehova e tau kapitiga fakamooli oti haana kua mamate. (Mataio 22:32) Pihia foki mogonei kua moua e tautolu e tau mena fakaalofa loga homo ue atu ne mai he ha tautolu a Matua. Tuga he talahau he Tohi Tapu, “uhoaki e motu kua Atua kia Iehova, ko e motu kua fifili e ia ke eke māna.”​—Salamo 33:12.