Skip to content

Skip to table of contents

Tau Fakamoli a Iehova

Fifili e vagahau Faka-Niue

 VALA TALA FAKAAKO 2

Fakaheke a Iehova he Fakapotopotoaga

Fakaheke a Iehova he Fakapotopotoaga

“To fakaheke atu au kia koe ki mua he fakapotopotoaga.”​—SALA. 22:22.

LOLOGO 9 Fakaheke a Iehova ha Tautolu Atua!

FAKAMAAMAAGA KŪ *

1. Fēfē e logonaaga ha Tavita hagaao ki a Iehova, ti ko e heigoa he mena nei ne omoomoi a ia ke taute?

KO E Patuiki ko Tavita ne tohi: “Kua homo atu a Iehova, ti lata ke fakaheke fakalahi kia ia.” (Sala. 145:3) Fakaalofa a ia ki a Iehova, ti omoomoi he fakaalofa nai a ia ke fakaheke e Atua “ki mua he fakapotopotoaga.” (Sala. 22:22; 40:5) Fakaalofa mooli a koe ki a Iehova ti talia mo e tau kupu ha Tavita: “Kia fakamonuina [fakaheke] atu a koe Iehova na e, ko e Atua a Isaraela, ha mautolu a matua, mai i tuai tigahau to hoko ke he tukulagi.”​—1 Nofo. 29:10-13.

2. (a) Maeke fēfē a tautolu ke fakaheke a Iehova? (e) Ko e heigoa e tau paleko ne fehagai mo e falu, ti ko e heigoa ka fakatutala a tautolu ki ai?

2 He vahā nei, taha puhala kua fakaheke atu ki a Iehova ko e ha tautolu a tau tali he tau feleveiaaga Kerisiano. Ka ko e paleko mooli anei ma e falu he tau matakainaga ha tautolu. Manako a lautolu ke tali he tau feleveiaaga, ka e hopoate a lautolu. Ko e heigoa ha lautolu ka taute ke kautū mai he hopoate ia? Ti ko e heigoa e tau puhala aoga ka lagomatai a tautolu oti ke talahau e tau tali mafanatia? Ato tali e tautolu e tau hūhū ia, kia fakatutala fakamua la ke he fā e matapatu kakano ne tali a tautolu he tau feleveiaaga.

KAKANO NE TALI A TAUTOLU HE TAU FELEVEIAAGA

3-5. (a) He fakamaama ia Heperu 13:15, ko e ha kua tali a tautolu he tau feleveiaaga? (e) Latatonu kia a tautolu oti ke tatai e puhala tali? Fakamaama.

3 Tuku mai e Iehova ki a tautolu oti e lilifu ke fakaheke a ia. (Sala. 119:108) Ko e tau tali ha tautolu he tau feleveiaaga ko e vala he ha tautolu a “poa fakaheke,” ti nakai maeke he ha  tagata ke taute ai ma tautolu. (Totou Heperu 13:15.) Poaki kia a Iehova ki a tautolu oti ke tatai e tau poa, po ke tali pihia foki? Nakai, ai pihia!

4 Iloa e Iehova kua kehekehe e tau lotomatala mo e tau tutūaga ha tautolu, ti tokiofa e ia e tau foakiaga kua maeke a tautolu ke foaki ki a ia. Manamanatu ke he vahega poa ne talia e ia mai he tau Isaraela. Falu Isaraela ne maeke ke poa e punua mamoe po ke koti. Ka ko e Isaraela ne nofogati ne maeke ke foaki “ua e kulukulu, po ke ua e punua lupe.” Ka nakai moua he Isaraela ua e manu lele, talia e Iehova “e veveheaga ne hogofulu aki he efa he falaoa [mata] mitaki.” (Levi. 5:7, 11) Nakai tauuka e falaoa mata, ka e loto fakaaue agaia a Iehova ke he poa kaeke ko e ‘falaoa mata mitaki.’

5 Ko e Atua totonu ha tautolu kua pihia agaia e logonaaga mogonei. Ka talahau e tautolu e tau tali, nakai amanaki e Atua ki a tautolu ke gutu mahifi tuga a Apolo po ke fakaaoga e tau kupu fakamafoki ke tuga ha Paulo. (Gahua 18:24; 26:28) Manako a Iehova ke eketaha a tautolu ke foaki e tau tali mai he tau loto ha tautolu. Manatu e fifine takape ne tuku ua e tupe ikiiki. Kua ofania e Iehova a ia ha kua foaki e ia e tau mena oti kua maeke a ia.​—Luka 21:1-4.

Aoga e tali ki a tautolu mo lautolu ne fanogonogo (Kikite paratafa 6-7) *

6. (a) Hagaao ke he Heperu 10:24, 25, lauia fēfē a tautolu he tau tali ne logona e tautolu? (e) Fakakite fēfē e koe e loto fakaaue ma e tau tali kua fakamafana a koe?

6 Fakamafana e tautolu e taha mo e taha he tau tali ha tautolu. (Totou Heperu 10:24, 25.) Loto fakaaue oti a tautolu he logona e kehekehe he tau tali he tau feleveiaaga. Fiafia a tautolu ke he tau kupu mukamuka mo e mooli he tama tote. Aamotia foki ha ko e leo fiafia he matakainaga hagaao ke he kupu mooli kua moua foou e ia. Ti nava foki ki a lautolu ne eketaha fakamalolō ke tali, pete kua mā po ke kamata laia a lautolu ke fakaako e vagahau ha tautolu. (1 Tesa. 2:2) Fakakite fēfē e tautolu e loto fakaaue ma e tau laliaga ha lautolu? Fakaaue a tautolu ki a lautolu ma e tali mafanatia ha lautolu ka oti e feleveiaaga. Taha puhala foki ko e tali hake a tautolu. To nakai ni moua e tautolu e fakamafanaaga he tau feleveiaaga ka e foaki foki e tautolu.​—Roma 1:11, 12.

7. Aoga fēfē a tautolu ka tali?

7 Aoga a tautolu ka tali. (Isaia 48:17) Puhala fe? Fakamua, ka amanaki a tautolu ke tali, to omoomoi pauaki a tautolu ke tauteute  fakamitaki ma e feleveiaaga. Ka tauteute fakamitaki to moua e tautolu e maama hokulo ke he Kupu he Atua. Ka hokulo e maamaaga ha tautolu, to fakagahua fakamitaki e tautolu e tau mena ne fakaako ki ai. Uaaki, to liga fiafia lahi a tautolu ke he feleveiaaga ha kua putoia a tautolu ke he fakatutalaaga. Toluaki, ha kua eketaha ke tali, fa tokaloto e tautolu e tau manatu ne talahau e tautolu he oti e feleveiaaga.

8-9. (a) Fakakite ia Malaki 3:16, fēfē e manatu haau ke he logonaaga ha Iehova ke he tau tali ha tautolu? (e) Ko e heigoa e paleko ne liga fehagai agaia e falu ki ai?

8 Fakafiafia e tautolu a Iehova ka tutala ai ke he tua ha tautolu. Iloa tonu e tautolu kua fanogonogo mai a Iehova mo e tokiofa e laliaga ha tautolu ke tali he tau feleveiaaga. (Totou Malaki 3:16.) Fakakite e ia e loto fakaaue haana he fakamonuina a tautolu ka eketaha a tautolu ke fakafiafia a ia.​—Mala. 3:10.

9 Moua mooli e tautolu e tau kakano mitaki ke tali he tau feleveiaaga. Ka e liga fai agaia ne hopoate ke tuku hake e lima. Ka pihia e logonaaga haau, ua fakalolelole. Kia fakatutala la ke he falu matapatu fakaakoaga he Tohi Tapu, falu fakafifitakiaga, mo e falu puhala aoga pauaki ka lagomatai a tautolu oti ke lali ke tali lagaloga he tau feleveiaaga.

FAHIA KE HE HOPOATE

10. (a) Ko e heigoa e hopoate kua moua he tokologa ia tautolu? (e) Ko e ha ne liga ko e hopoate ke tali ko e fakamailoga mitaki?

10 Fotūfotū nakai e ate haau he tau magaaho takitaha ka manamanatu a koe ke tuku hake e lima ke tali? Ne nakai ko koe ni kua moua e logonaaga ia. Mooli na laulahi ia tautolu kua hopoate ka tali. Ke fahia a koe mai he logonaaga hopoate nei, lata a koe ke mailoga e kakano ne hopoate a koe. Hopoate kia a koe neke nimo e mena ne manako ke talahau po ke talahau e koe e mena hepe? Tupetupe kia a koe kua nakai mitaki e tali haau tuga e tali he falu? Ko e tau hopoate pihia kua eke mo fakamailoga mitaki. Fakakite ai kua loto fakatokolalo a koe mo e onoono ke he falu kua mua atu ki a koe. Fiafia a Iehova ke he mahani ia. (Sala.  138:6; Filipi 2:3) Ka e manako foki a Iehova ki a koe ke fakaheke a ia mo e fakamafana e tau matakainaga haau he tau feleveiaaga. (1 Tesa. 5:11) Fakaalofa a ia ki a koe mo e to foaki e loto malolō kua lata mo koe.

11. Ko e heigoa e tau fakamanatuaga he Tohi Tapu ka lagomatai a tautolu?

11 Manamanatu ke he falu fakamanatuaga he Tohi Tapu. Pehē e Tohi Tapu kua taute e tautolu oti e tau hehē ke he tau mena ne talahau mo e puhala ne talahau ai e tautolu. (Iako. 3:2) Nakai amanaki a Iehova ki a tautolu ke mitaki katoatoa, ti pihia foki e tau matakainaga ha tautolu. (Sala. 103:12-14) Ko lautolu ko e ha tautolu a magafaoa fakaagaaga ti ofania e lautolu a tautolu. (Mare. 10:29, 30; Ioane 13:35) Maama e lautolu kua nakai hakotonu e tau tali ha tautolu he falu mogo tuga ne amanaki a tautolu ki ai.

12-13. Ko e heigoa kua fakaako e tautolu mai he tau fakafifitakiaga ha Nehemia mo Iona?

12 Manamanatu ke he falu fakafifitakiaga he Tohi Tapu ka lagomatai a koe ke fahia ke he tau hopoate haau. Manatu a Nehemia. Fekafekau a ia he lotopā he patuiki ne mua e malolō. Ne momoko lahi a Nehemia ha kua logona e ia ne malona e tau kaupā mo e tau gutuhala ha Ierusalema. (Nehe. 1:1-4) Manamanatu la ke he fotūfotū he ate haana he mogo ne hūhū e patuiki ki a ia ke fakamaama e kakano ne momoko lahi a ia! Liogi fakamafiti a Nehemia ti tala age e tali haana. Fakahiku ai ne lahi e mena ne taute he patuiki ke lagomatai e tau tagata he Atua. (Nehe. 2:1-8) Manamanatu foki ki a Iona. He mogo ne ole a Iehova ki a Iona ke tutala ke he tau tagata i Nineva, ne matakutaku a ia ti hola ke he taha matakavi foki. (Iona 1:1-3) Ha ko e lagomatai ha Iehova, ne taute e Iona e kotofaaga haana. Ko e tau kupu ne talahau e ia ne lagomatai ki a lautolu i Nineva. (Iona 3:5-10) Mai ia Nehemia kua fakaako e tautolu e aoga he liogi ato foaki e tali. Mai ia Iona kua fakaako e tautolu na maeke a Iehova ke lagomatai a tautolu ke fekafekau ki a ia pete e tau hopoate lalahi ha tautolu. Moolioli ai, fai fakapotopotoaga nakai kua fakamatakutaku tuga e tau tagata Nineva?

13 Ko e heigoa e tau puhala aoga ka lagomatai a koe ke foaki e tau tali atihake he tau feleveiaaga? Kia fakatutala a tautolu ke he falu manatu gahoa.

14. Ko e ha kua lata a tautolu ke tauteute fakamitaki ma e tau feleveiaaga ha tautolu, ti ko e magaaho fe ka taute e tautolu?

14 Mautauteute ma e tau feleveiaaga takitaha. Ka fakatoka tuai mo e tauteute fakamitaki a koe, to logona hifo e koe e mauokafua lahi ke tali. (Fakatai 21:5) Mooli, nakai tatai oti e tau fakaholoaga ha tautolu. Ko Eloise, ko e takape he atu tau 80 ne kamata ke tauteute tuai ma e Fakaakoaga Kolo Toko he faahi tapu. Pehē a ia, “Fiafia lahi au ke he tau feleveiaaga ka fakaako tuai au.” Ko Joy, ne gahua  tupe tumau kua fakatoka e magaaho he Aho Faiumu ke fakaako e Kolo Toko haana. “Manako au ke manatu mitaki e au e vala tala,” he talahau e ia. Ko Ike, ko e motua lavelave ne paionia foki kua pehē, “Moua e au kua mitaki lahi ke fakaako ke he tau magaaho kūkū he faahi tapu ka e nakai taute fakalahi he taha e mogo.”

15. Tauteute fakamitaki fēfē a koe ma e feleveiaaga?

15 Ko e heigoa ne putoia he tauteute fakamitaki ma e feleveiaaga? Kamata e tau magaaho fakaako takitaha he ole ki a Iehova ke foaki ki a koe e agaaga tapu. (Luka 11:13; 1 Ioa. 5:14) Ti fakaaoga e tau minuti gahoa ke kitekite ke he fakaakoaga. Kumikumi e mataulu, tau vala mataulu, tau fakataiaga, mo e tau puha fakaako. He fakaako e koe mogonei e tau paratafa takitaha, totou e tau kupu Tohi Tapu loga ne tutū i ai. Manamanatu fakahokulo ke he vala tala, ti mailoga pauaki e tau manatu kua manako a koe ke tali. Ko e mautauteute mitaki haau to aoga lahi ki a koe, mo e to mukamuka lahi ke maeke a koe ke tali.​—2 Kori. 9:6.

16. Ko e heigoa e tau koloa kua maeke ke moua e koe, ti puhala fe kua fakaaoga ai e koe?

16 Ka maeke ia koe, fakaaoga e tau koloa hila ne foaki he vagahau ne iloa e koe. Puhala mai e Iehova he fakatokatokaaga haana ki a tautolu e tau koloa hila ke lagomatai a tautolu ke mautauteute ma e tau feleveiaaga. Ko e JW Library® app ne maeke a tautolu ke moua mai e tau tohi fakaako ke he matini utafano. Ti maeke a tautolu ke fakaako po ke totou po ke fanogonogo ke he vala tala he ha magaaho mo e he ha matakavi. Falu ne fakaaoga e koloa nei ke fakaako he magaaho okioki kai laā he gahua, aoga, po ke fano fenoga. Ko e Watchtower Library mo e Kolo Toko he FATATOHI INITANETEkua fakamukamuka ke kumikumi e tau manatu he fakaakoaga kua manako a tautolu ke fakaako fakahokulo ki ai.

Magaaho fe kua fakatoka e koe ke tauteute ma e tau feleveiaaga? (Kikite paratafa 14-16) *

17. (a) Ko e ha kua mitaki ke tauteute ke loga e tali? (e) Ko e heigoa ne fakaako e koe he vitiō Become Jehovah’s Friend​—Prepare Your Comment?

17 Ka maeke, tauteute ke loga e tali ma e tau fakaakoaga takitaha. Ko e ha? Ha ko e mena to liga nakai tofi tumau a koe ka tuku hake e lima haau. To liga taha ni e mogo ka tuku hake e tau lima he falu, ti liga fifili he tagata ne taute e aoga e taha ia lautolu. Ke hili e feleveiaaga he magaaho fafati, lata he tagata ne taute e aoga ke fakatote hifo e numera he tau tali he falu vala. Ti ua ita po ke loto lolelole ka nakai tofi e ia a koe he kamataaga he fakaakoaga. Ka tauteute e koe loga e tali, to lahi e magaaho haau ke fai vala he fakatutalaaga. Taha he tau tali haau ka tauteute ko e totou e kupu Tohi Tapu. Ka maeke a koe, tauteute foki e tali he fakaaoga e tau kupu ni haau. *

18. Ko e ha kua lata ke tali fakakū?

 18 Tali kū. Fa mahani ko e tau tali atihake kua kūkū mo e mukamuka. Ti foli ke fakakū tumau e tau tali haau. Lali ke fakakaupā ai kavi ke 30 e sekone. (Fakatai 10:19; 15:23) Kaeke kua leva lahi e tali haau he tau feleveiaaga, ha ha ia koe e matagahua aoga​—fakatoka e fakafifitakiaga mitaki he fakakū tumau e tau tali haau. Ka uka e tau tali haau ti loloa foki, to liga fakamatakutaku e falu he manamanatu to nakai hokotia a lautolu ke he lotomatala haau he puhala tali. Ko e tau tali kū foki ne fakaatā e magaaho ke tokologa e tagata ke fai vala he feleveiaaga. Mua atu ka tofi fakamua ki a koe, tali fakamukamuka mo e fakahako ke he hūhū. Ua lali ke talahau e tau manatu oti he paratafa. Ka oti e fakatutala ke he matapatu manatu he paratafa, maeke a koe ke tali ke he falu manatu foki.​—Kikite puha “ Ko e Heigoa e Tali Haaku?

19. Lagomatai fēfē he tagata ne taute e aoga a koe, ka ko e heigoa kua lata a koe ke taute?

19 Fakailoa ke he tagata ne taute e aoga kua manako a koe ke tali e paratafa pauaki. Ka fifili a koe ke taute e mena nei, lata a koe ke tala age tuai ke he tagata ne taute e aoga ato kamata e feleveiaaga. Ka hoko e magaaho ke tali he paratafa ia, ti fakamafiti ke tuku hake fakaloa e lima haau ke kitia he tagata ne taute e aoga.

20. Puhala fe kua tuga e kaiaga auloa mo e tau kapitiga e feleveiaaga he fakapotopotoaga?

20 Onoono ke he tau feleveiaaga he fakapotopotoaga tuga ko e kaiaga auloa mo e tau kapitiga mitaki. Manamanatu la ka fai kapitiga he fakapotopotoaga ne fakatoka ke papakiu (barbecue) ti ole ki a koe ke tauteute e taha mena kai tote. Fēfē e tali haau? Liga to tupetupe a koe, ka e to eketaha a koe ke tamai taha mena ka fiafia oti e tau tagata ki ai. Ko Iehova, ko e ha tautolu a Leveki ne fakatoka e laulau ne puke he tau mena mitaki ma tautolu he tau feleveiaaga. (Sala. 23:5; Mata. 24:45) Fiafia a ia ka tamai e tautolu e mena fakaalofa tote, ka e mai he loto. Tauteute fakamitaki ti fakatumau ke tali. To nakai ni kai a koe he laulau ha Iehova ka e tamai foki e mena fakaalofa ke fiafia auloa mo e fakapotopotoaga.

LOLOGO 138 Iehova Haau a Higoa

^ para. 5 Tuga e salamo ko Tavita, fakaalofa a tautolu oti ki a Iehova mo e fiafia he fakaheke a ia. Moua e tautolu e magaaho pauaki ke fakakite e fakaalofa ha tautolu ma e Atua ka feleveia a tautolu he fakapotopotoaga ke tapuaki. Ka e falu ia tautolu ne uka ke tali he tau feleveiaaga. Ka fehagai a koe mo e paleko ia, to lagomatai he vala tala nei a koe ke mailoga e kakano ne hopoate a koe ke tali mo e kautū mai i ai.

^ para. 17 He jw.org, kitekite e vitiō Become Jehovah’s Friend​—Prepare Your Comment. Onoono ki lalo he BIBLE TEACHINGS > CHILDREN.

^ para. 63 FAKAMAAMA E FAKATINO: Tau tagata he fakapotopotoaga kua fiafia he fai vala ke he fakatutalaaga he Ko e Kolo Toko.

^ para. 65 FAKAMAAMA E FAKATINO: Falu tagata he fakapotopotoaga ne fakakite he lau 9 hane fai vala ke he Fakaakoaga Kolo Toko. Pete kua kehekehe e tau tutūaga ha lautolu takitaha, kua fai magaaho oti a lautolu ke fakaako e vala tala ma e feleveiaaga.