Skip to content

Skip to table of contents

Tau Fakamoli a Iehova

Fifili e vagahau Faka-Niue

 VALA TALA FAKAAKO 1

‘Aua Neke Fakaatukehe a Koe, ha ko Au ko e Hau a Atua’

‘Aua Neke Fakaatukehe a Koe, ha ko Au ko e Hau a Atua’

“Ua matakutaku a koe, ha kua fakalataha au mo koe; aua neke [“fakaatukehe,” NW] a koe, ha ko au ko e hau a Atua; kua fakamalolo e au a koe; ko e moli, kua lagomatai au kia koe.”​—ISAIA 41:10.

LOLOGO 23 Iehova ha Mautolu a Malolō

FAKAMAAMAAGA KŪ *

1-2. (a) Lauia fēfē e matakainaga fifine ko Yoshiko he fekau ne tohi ia Isaia 41:10? (e) Ko hai ne aoga he fekau ne fakamau e Iehova?

KO E matakainaga fifine fakamooli ko Yoshiko ne logona e tala kelea. Tala age e ekekafo haana ko e gahoa ni e tau mahina ke moui a ia. Tali atu fēfē a ia? Manatu e Yoshiko e kupu Tohi Tapu mahuiga haana ko e Isaia 41:10. (Totou.) Tala age fakatotoka mogoia a ia ke he ekekafo haana kua nakai matakutaku a ia, ha ko Iehova ne taofi e lima haana. * Ko e fekau mafanatia ne moua he kupu tohi ia ne lagomatai e matakainaga fifine fakahele ha tautolu ke falanaki katoatoa ki a Iehova. Maeke foki e kupu tohi ia ke lagomatai a tautolu ke fakatumau e fakatotoka ka fehagai mo e tau kamatamata lalahi. Ke maama e puhala ka taute pihia, kumikumi fakamua la ke he kakano ne foaki he Atua e fekau ia ki a Isaia.

2 Fakamua, fekau e Iehova a Isaia ke tohi hifo e tau kupu ia ke fakamafana e tau Iutaia ka uta fakapaea ki Papelonia he magaaho fakamui. Ka e fakamau e Iehova e fekau ia ke aoga e tau Iutaia ne uta fakapaea mo e tau tagata oti haana tali mai he magaaho ia. (Isaia 40:8; Roma 15:4) Kua nonofo a tautolu mogonei he “tau aho uka” lahi, ti latatonu mooli e atihakeaga he tohi ha Isaia.​—2 Timo. 3:1.

3. (a) Ko e heigoa e tau maveheaga kua moua ia Isaia 41:10 ko e lauga he tau ne fifili ma e 2019? (e) Ko e ha kua lata a tautolu mo e tau maveheaga nei?

3 He vala tala nei, to hagaaki a tautolu ke he tolu e maveheaga ha Iehova kua atihake e tua ne tohi he Isaia 41:10: (1) to fakalataha a Iehova mo tautolu, (2) ko ia ko e ha tautolu a Atua, mo e  (3) to lagomatai e ia a tautolu. Ko e tau maveheaga * anei ne lata mo tautolu, he tuga a Yoshiko, kua fehagai a tautolu mo e tau kamatamata ke he tau momoui. Lata foki a tautolu ke fehagai mo e tau peehiaga mai he tau lekua he lalolagi. Falu ha tautolu kua fakauka foki ke he favaleaga mai he tau fakatufono. Kia fakatutala a tautolu ke he tolu e maveheaga, taha he magaaho.

“KUA FAKALATAHA AU MO KOE”

4. (a) Ko e heigoa e maveheaga fakamua ka fakatutala a tautolu ki ai? (Kikite foki e matahui tala.) (e) Tau puhala fe ne fakakite e Iehova e tau logonaaga haana ma tautolu? (i) Lauia fēfē a koe he tau talahauaga he Atua?

4 Mavehe fakamua a Iehova ki a tautolu ke he tau kupu nei: “Ua matakutaku a koe, ha kua fakalataha au mo koe.” * Fakakite e Iehova kua fakalataha a ia mo tautolu he foaki ki a tautolu e onoonoaga katoatoa haana mo e fakaalofa mafanatia. Mailoga e puhala ne fakakite e ia e fakaalofa hofihofi mo e logonaaga hokulo haana ma tautolu. “Kua fakahelehele e au a koe,” he talahau e Iehova. “Kua fakalilifu e au a koe; kua fakaalofa atu foki au kia koe.” (Isaia 43:4) Nakai fai malolō he lagi mo e lalolagi katoatoa ka taute a Iehova ke utakehe e fakaalofa haana ki a lautolu ne fekafekau ki a ia; kua nakai maueue e mahani fakamooli haana ki a tautolu. (Isaia 54:10) Ko e fakaalofa mo e fakafetuiaga haana kua fakapuke a tautolu aki e loto malolō. To puipui e ia a tautolu he vahā nei, tuga he puipui e ia a Aperamo (Aperahamo) ko e kapitiga haana. Pehē a Iehova ki a Aperamo: “Ua matakutaku a koe; ha ko au nai ko e hau a akau punuti ia.”​—Kene. 15:1.

He lagomatai a Iehova, maeke ai ke kautū ke he tau kamatamata ne tuga e vai mo e afi ne fehagai mo tautolu (Kikite paratafa 5-6) *

5-6. (a) Iloa fēfē e tautolu kua manako a Iehova ke lagomatai a tautolu ke he tau kamatamata fakatagata ha tautolu? (e) Ko e heigoa ne fakaako mai e tautolu ia Yoshiko?

5 Iloa e tautolu kua manako a Iehova ke lagomatai a tautolu ke he tau kamatamata fakatagata ha tautolu ha kua mavehe e ia ke he tau tagata haana: “Ka fina atu a koe ke he tau vai, to fakalataha au mo koe; ka fina atu a koe ke he tau vailele, nakai tafia ai a koe; ka fano a koe ki loto he afi, nakai vela ai a koe; to nakai huhunu ai foki a koe ke he afi puhopuho.” (Isaia 43:2) Ko e heigoa e kakano he tau kupu nei?

6 Nakai mavehe a Iehova ke utakehe e tau paleko ne taute e moui ke uka, ka e nakai fakaatā e  ia e “tau vailele” he tau lekua ke fakatomo a tautolu po ke “afi puhopuho” he tau kamatamata ke fakamamahi tukulagi a tautolu. Fakamooli e ia to fakalataha a ia mo tautolu he lagomatai a tautolu ke “fina atu” po ke fahia ke he tau paleko ia. Ko e heigoa ka taute e Iehova? To lagomatai e ia he fakatotoka e tau matakutaku ha tautolu ke maeke a tautolu ke fakatumau e mahani fakamooli ki a Ia, pete foki ka hokotia a tautolu ke mamate. (Isaia 41:13) Ko Yoshiko ne totoku fakamua ne iloa e mena ia. Pehē e tama fifine haana: “Nava a mautolu ke he fakatotoka ha Mami. Kitia mooli e mautolu kua foaki e Iehova ki a ia e mafola he loto. He hoko ke he aho ne mate a Mami, ne tutala a ia ke he tau nosi mo e tau tagata gagao hagaao ki a Iehova mo e tau maveheaga Haana.” Ko e heigoa kua fakaako e tautolu mai he fakafifitakiaga ha Yoshiko? Ka falanaki a tautolu ke he maveheaga he Atua “to fakalataha au mo koe,” to fakamalolō mo e mauokafua foki a tautolu he fakauka ke he tau kamatamata.

“KO AU KO E HAU A ATUA”

7-8. (a) Ko e heigoa e maveheaga ke uaaki ka fakatutala a tautolu ki ai, ti ko e heigoa e kakano he mena ia? (e) Ko e ha ne tala age a Iehova ke he tau Iutaia ne fakapaea: ‘Aua neke fakaatukehe’? (i) Ko e heigoa e tau kupu ia Isaia 46:3, 4 ne liga fakatotoka e tau loto he tau tagata he Atua?

7 Mailoga e maveheaga ke uaaki ne tohi e Isaia: ‘Aua neke fakaatukehe a koe, ha ko au ko e hau a Atua.’ Ko e heigoa e kakano he talahauaga nei hagaao ke he fakaatukehe? He kupu tohi nei ko e kupu he vagahau fakamua ma e “fakaatukehe,” ne ha ha i ai e manatu “ke matakite tumau ke he tau fakamatakutaku nakai iloa” po ke “kitekite fano ha ko e tuaga matakutaku.”

8 Ko e ha ne tala age a Iehova ke he tau Iutaia ka fakapaea ki Papelonia ke ua fakaatukehe? Ha kua iloa e Iehova ko e tau tagata he motu ia to matakutaku. Ko e heigoa ka fakatupu e matakutaku ia? Ato hoko ke he matahiku he tau 70 he fakapaea he tau Iutaia, to tau atu e tau kautau malolō lahi ha Metai mo Peresia ki a Papelonia. To fakaaoga e Iehova e kautau nei ke fakatokanoa mai e tau tagata haana he paeaaga ki Papelonia. (Isaia 41:2-4) Magaaho ne iloa he tau Papelonia mo e tau tagata he falu motu ne nonofo he magaaho ia kua o mai e tau fī ha lautolu, ne lali a lautolu ke fakatumau e loto malolō he tala age ke he taha mo e taha: “Fakamalolo ā.” Talaga foki e lautolu loga e tau tupua tā, he amanaki to puipui he tau tupua nei a lautolu. (Isaia 41:5-7) Ka e fakatotoka e Iehova e tau loto he tau Iutaia ne fakapaea he pehē: “Ka ko koe Isaraela na e [nakai tuga e tau katofia haau] ko e haku a fekafekau, . . . aua neke [fakaatukehe] a koe, ha ko au ko e hau a Atua.” (Isaia 41:8-10) Mailoga kua pehē a Iehova: “Ko au ko e hau a Atua.” He tau kupu ia, ne mavehe a Iehova ke he tau tagata tapuaki fakamooli haana kua nakai nimo e ia a lautolu​—ko ia agaia e Atua ha lautolu, ti ko lautolu ko e tau tagata agaia haana. Tala age a ia ki a lautolu: “To toto . . . mo e laveaki e au a koe.” Ko e tau kupu mafanatia ia ne fakamalolō mooli e tau Iutaia ne fakapaea.​—Totou Isaia 46:3, 4.

9-10. Ko e ha ne nakai lata a tautolu ke matakutaku? Fakatai.

9 Ko e tau tagata ne viko takai ia tautolu kua fakaatukehe hagaao ke he holo ki mua e tau tutūaga kelea lahi mahaki he lalolagi. Mooli kua lauia foki a tautolu he tau lekua taha ia. Ka e nakai lata a tautolu ke matakutaku. Tala mai a Iehova ki a tautolu: “Ko au ko e hau a Atua.” Ko e ha e talahauaga ia ko e kakano malolō ke fakatumau e fakatotoka?

10 Manamanatu ke he fakatai nei: Tokoua e tagata ko Jim mo Ben ne heke he vakalele ne lukeluke he malolō lahi e matagi. He hake hifo e vakalele, ne hau e fakailoaaga: “Tau tumau e pipi ha mutolu. To fai magaaho ka lele a tautolu he matagi malolō.” Kua tupetupe lahi a Jim. Ka e lafi foki he pailote: “Ua fakaatukehe. Ko e  pailote ha mutolu anei ne vagahau.” Mogoia ne luelue e ulu ha Jim ti pehē, “Ko e maveheaga fēfē a ia?” Ka e mailoga e ia kua nakai fakaatukehe a Ben. Ti hūhū a Jim ki a Ben: “Ko e ha ne fakatotoka a koe?” Mamali a Ben ti pehē: “Na iloa mitaki e au e pailote. Ko e matua taane haaku a ia!” Ti pehē a Ben: “To tala atu e au e tala hagaao ke he matua taane haaku. Ka iloa e koe a ia mo e lotomatala haana ke fakaholo e vakalele, to fakatotoka foki a koe.”

11. Ko e heigoa ka fakaako e tautolu mai he fakatai hagaao ke he tokoua e tagata ne heke he vakalele?

11 Ko e heigoa ne fakaako e tautolu mai he fakatai nei? Tuga a Ben, kua totoka a tautolu he iloa mitaki ha tautolu a Matua he lagi ko Iehova. Iloa e tautolu to takitaki fakamitaki e ia a tautolu he tau lekua tuga e afā ne fehagai mo tautolu he tau aho fakamui he fakatokaaga nei. (Isaia 35:4) Falanaki a tautolu ki a Iehova, ti maeke a tautolu ke fakatumau e fakatotoka ka e fakahakuhaku e lalolagi he matakutaku. (Isaia 30:15) Mahani a tautolu tuga foki a Ben he fakailoa ke he tau katofia e tau kakano ne ha ha ia tautolu e mauokafua ke he Atua. Ti maeke foki a lautolu ke iloa pete ne tau paleko ne fehagai mo lautolu, to lalago e Iehova a lautolu.

“FAKAMALOLO E AU A KOE [MO E] LAGOMATAI AU KIA KOE”

12. (a) Ko e heigoa e maveheaga ke toluaki ka fakatutala a tautolu ki ai? (e) Ko e heigoa kua fakamanatu ki a tautolu hagaao ke he “lima” ha Iehova?

12 Manamanatu ke he maveheaga ke toluaki ne tohi e Isaia: “Fakamalolo e au a koe; ko e moli, kua lagomatai au kia koe.” Fitā he fakamaama e Isaia e puhala ne fakamalolō e Iehova e tau tagata haana, he pehē: “To haele mai e Iki ko Iehova mo e malolo, to pule hana lima māna.” (Isaia 40:10) Fa fakaaoga he Tohi Tapu e kupu “lima” ke fakakite aki e malolō. Ti ko e talahauaga “to pule hana lima” kua fakamanatu ki a tautolu ko Iehova e Patuiki ne mua ue atu e malolō. Fakaaoga e ia e malolō katoatoa haana ke lalago mo e papale e tau fekafekau haana i tuai, ti  matutaki a ia ke fakamalolō mo e puipui a lautolu kua falanaki ki a ia he vahā nei.​—Teu. 1:30, 31; Isaia 43:10.

To nakai kautū ha kanavaakau ha ko e puipuiaga he lima malolō ha Iehova (Kikite paratafa 12-16) *

13. (a) Magaaho pauaki fe ne taofi mau a Iehova ke he maveheaga haana ke fakamalolō a tautolu? (e) Ko e heigoa e fakamooliaga kua fakapuke a tautolu aki e malolō mo e mauokafua?

13 Mua atu he magaaho ka favale e tau fī ki a tautolu, kua taofi mau a Iehova ke he maveheaga haana: “Fakamalolo e au a koe.” Falu faahi he lalolagi he vahā nei, kua lali lahi e tau fī ha tautolu ke taofi e gahua fakamatala po ke pā e fakatokatokaaga ha tautolu. Pete ia, nakai molea e fakaatukehe ha tautolu ke he tau totokoaga pihia. Tuku mai e Iehova ki a tautolu e fakamooliaga ne kua fakapuke a tautolu ke he malolō mo e mauokafua. Mavehe a ia ki a tautolu: “Ko e tau kanavaakau oti kua taute ke tau kia koe, nakai monuina ia.” (Isaia 54:17) Ko e talahauaga ia kua fakamanatu mai tolu e matakupu aoga lahi ki a tautolu.

14. Ko e ha ne nakai ofo a tautolu kua totoko he tau fī he Atua a tautolu?

14 Fakamua, ha ko e tau tutaki he Keriso, amanaki ai ke vihiatia mai ki a tautolu. (Mata. 10:22) Talahau tuai e Iesu to favale mamahi ke he tau tutaki haana he tau aho fakamui. (Mata. 24:9; Ioane 15:20) Uaaki, hataki tuai he perofetaaga ha Isaia a tautolu to nakai ni vihiatia he tau fī ha tautolu a tautolu; to fakaaoga e lautolu falu kanavaakau ke totoko ki a tautolu. Putoia he tau kanavaakau ia e tau fakahehē fakagalogalo, tau pikopiko fakalialia, mo e favaleaga mamahi lahi. (Mata. 5:11) To nakai taofi e Iehova e tau fī ha tautolu he fakaaoga e tau kanavaakau nei ke tau mai ki a tautolu. (Efeso 6:12; Fakakite. 12:17) Ka e nakai lata a tautolu ke matakutaku. Ko e ha?

15-16. (a) Ko e heigoa e matakupu ke toluaki kua lata ke tokaloto e tautolu, ti lalago fēfē he Isaia 25:4, 5 e mena nei? (e) Fakamaama fēfē he Isaia 41:11, 12 e fakahikuaga ma lautolu kua tau ki a tautolu?

15 Manamanatu ke he matakupu ke toluaki kua lata a tautolu ke tokaloto. Pehē a Iehova “ko e tau kanavaakau oti kua taute ke tau kia [mutolu] nakai monuina ia.” Tuga ni e kaupā ne puipui a tautolu mai he malolō he afā moumou, to puipui  e Iehova a tautolu mai he “ita lahi ha lautolu ne favale.” (Totou Isaia 25:4, 5.) To nakai kautū e tau fī ha tautolu he fakamatematekelea tukulagi a tautolu.​—Isaia 65:17.

16 Fakamalolō foki e Iehova e falanaki ha tautolu ki a ia he fakamaama fakamatafeiga e fakahikuaga ne fakatali ki a lautolu kua “ita” ki a tautolu. (Totou Isaia 41:11, 12.) Pete ne lahi e tau mai he tau fī ha tautolu ki a tautolu po ke kelea mahakitoili e felakutaki, to tatai ni e fakahikuaga: Ko e tau fī oti kana he tau tagata he Atua “to eke a lautolu ke tuga ne mena noa maka; to mahaikava foki.”

PUHALA KE FAKAHOKULO E FALANAKI HA TAUTOLU KI A IEHOVA

Fakahokulo e falanaki ha tautolu ki a Iehova he totou tumau e Tohi Tapu hagaao ki a ia (Kikite paratafa 17-18) *

17-18. (a) Maeke fēfē e totou he Tohi Tapu ke fakahokulo e falanaki ha tautolu ke he Atua? Talahau e fakatai. (e) Maeke fēfē e manamanatu fakahokulo ke he lauga he tau ne fifili ma e 2019 ke lagomatai a tautolu?

17 Fakahokulo e falanaki ha tautolu ki a Iehova he iloa mitaki a ia. Ti ko e puhala ni ka iloa mitaki e tautolu e Atua he totou fakamakutu e Tohi Tapu ti manamanatu fakahokulo mogoia ke he mena ne totou ki ai. Ha ha he Tohi Tapu e fakamauaga mauokafua he puhala ne puipui e Iehova e tau tagata haana i tuai. Foaki mai he fakamauaga ia ki a tautolu e mauokafua to leveki e Iehova a tautolu mogonei.

18 Manamanatu ke he fakatai he tau kupu fulufuluola ne fakaaoga e Isaia ke fakamaama aki e puhala ne puipui e Iehova a tautolu. Hagaao a ia ki a Iehova ko e leveki mamoe mo e tau fekafekau he Atua ko e tau punua mamoe. Pehē a Isaia hagaao ki a Iehova: “To hapai e ia e tau punua mamoe ke he hana tau lima, mo e uta e ia a lautolu ke he hana fatafata.” (Isaia 40:11) Ka logona hifo e tautolu e tau lima malolō ha Iehova ne kuku mai a tautolu, logona e tautolu e puipuiaga mo e fakatotokaaga. Ke lagomatai a tautolu ke fakatumau e fakatotoka pete ne tau lekua ne fehagai mo tautolu, kua fifili he fekafekau fakamoli mo e loto matala e Isaia 41:10 (NW) ko e lauga he tau ma e 2019, “Aua neke fakaatukehe a koe, ha ko au ko e hau a Atua.” Manamanatu fakahokulo ke he tau kupu mafanatia ia. To fakamalolō ai a koe he fehagai mo e tau paleko i mua.

LOLOGO 60 To Fakamalolō e Ia a Koe

^ para. 5 Ko e lauga he tau ne fifili ma e 2019 kua foaki ki a tautolu tolu e kakano ke fakatumau e fakatotoka pete he tutupu e tau mena kelea he lalolagi po ke he tau momoui ha tautolu. To kumikumi e vala tala nei ke he tau kakano ia ti lagomatai ke fakatote hifo e fakaatukehe ha tautolu mo e omoomoi ke falanaki fakalahi ki a Iehova. Manamanatu fakahokulo ke he lauga he tau. Ako manatu ka maeke. To fakamalolō a koe ke lata mo e tau paleko i mua.

^ para. 1 Kikite Ko e Kolo Toko, Iulai 2016, lau 28.

^ para. 3 FAKAMAAMA E TALAHAUAGA: Ko e maveheaga ko e talahauaga mooli to fai mena ka tupu. Ko e tau maveheaga ne foaki e Iehova ki a tautolu ka fakatote hifo e tupetupe ke he tau lekua ka tutupu he tau momoui ha tautolu.

^ para. 4 Ko e talahauaga “Ua matakutaku” ne fakamau he Isaia 41:10, 13, mo e 14. Talahau lagaloga foki he tau kupu tohi ia e kupu “au” (hagaao ki a Iehova). Ko e ha ne omoomoi e Iehova a Isaia ke fakaaoga lagaloga e kupu “au”? Ke fakamaama e aoga lahi he manatu​—maeke ni a tautolu ke fakatotoka e tau matakutaku ha tautolu he falanaki ki a Iehova.

^ para. 52 FAKAMAAMA E FAKATINO: Tau tagata he magafaoa ne fehagai mo e kamatamata he gahuaaga, malolō tino, gahua fakamatala, mo e he aoga.

^ para. 54 FAKAMAAMA E FAKATINO: Ko e feleveiaaga he Tau Fakamoli ne fakahoko he kaina he tagata ne feoho mai e tau leoleo, ka e nakai tupetupe e tau matakainaga.

^ para. 56 FAKAMAAMA E FAKATINO: Taute tumau e Tapuakiaga he Magafaoa kua fakamalolō a tautolu ke fakauka.